❤️ Тоқаев Пәкістан басылымына сұхбатта не айтты?

Пәкістанға мемлекеттік сапармен барған кезде The News International басылымына берген сұхбатында президент Қасым-Жомарт Тоқаев Қазақстан "суперпрезиденттік басқару үлгісінен тежемелік әрі тепе-теңдік тетіктері күшейтілген президенттік республикаға көшіп жатыр" деді. Тәуелсіз сарапшылар кейінгі Конституция жобасы керісінше президент билігін күшейте түсетінін айтып, алаңдаушылық білдірген.
🔗Толығырақ Азаттықтан оқыңыз

🗣 Құлсары мектебінде балта ұстаған оқушы құрылыптастарына тап берген

Атырау облысы Құлсары қаласында 10-сынып оқушысы өзі құрылыптас балалармен жанжалдасып қалғаннан кейін мектепке балта алып келіп, өзге оқушыларға тап берген.

Полиция мәліметінше, 5 ақпанда болған оқиға салдарынан екі оқушы жеңіл жарақат алған. Жергілікті билік орындары олардың өміріне қауіп жоқ деп хабарлады.

Әлеуметтік желіде тараған видеоларда балта ұстаған ересек ұлдың мектеп дәлізінде басқа оқушылардың соңынан түскені көрінеді. Оқиға куәгерлері полиция шақырып, балта ұстаған оқушыны ұстаған.

15 жастағы күдіктінің әрекетіне байланысты "бұзақылық" бабымен қылмыстық іс қозғалған. Жасөспірім уақытша ұстау изоляторына қамалып, ішкі істер органдары оны есепке алған.

❗️Пәкістанда мешіттегі жарылыстан кемінде 30 адам өлген

6 ақпанда Исламабадта жұма намазы кезінде шиит мешітінде болған жарылыс салдарынан 30-дан астам адам қаза тауып, 160-қа жуық адам жараланған. Полицияның өкілінің айтуынша, жанкешті мешіттің кіреберісінде өзін жарып жіберген.

Елдегі ең қатаң күзетілетін қалалардың бірі саналатын Исламабад әдетте мұндай шабуылдар сирек болады. Соған қарамастан, кейінгі жылдары Пәкістанда радикал топтар белсенділігі артқаны байқалып отыр дейді бақылаушылар.

⚡️ Алматының Алмалы аудандық сотында Астанада жаппай тәртіпсіздік ұйымдастыруға дайындалды және Ақорданы басып алуға оқталды деген айып тағылған бес белсендінің ісі қаралып жатыр деп жазды Vlast басылымы.

Бұл істе белсенділер Асқар Нұрмаған, Әбдуәли Тағай, Дүйсенбек Жақашев, Қайсар Өзбек пен Талғат Ашировқа топ болып билікті күшпен басып алуды немесе ұстап тұруды насихаттады, жаппай тәртіпсіздік ұйымдастыруға дайындалды деген айып тағылған. Қайсар Өзбек пен Талғат Ашировқа жарылғыш заттарды заңсыз сатып алу, сақтау және тасымалдау айыбы қосымша тағылды деп жазды басылым.

Істегі куәлардың бірінің қауіпсіздігіне алаңдайтынын алға тартып, сот процесін жабық өткізуді сұраған прокурордың өтінішін судья орындаған.

"Жария болғанын қаламайды. Бәрін ың-шыңсыз тезірек жауып тастағысы келеді", – деген адвокат Жанар Балғабаеваның сөзін келтіреді басылым.

Билік органдары "Ақорданы басып алмақ болған" бесеудің ісі жайлы әзірге ресми пікір білдірген жоқ.

🗣 Қазақстан сенаты кинематография туралы заңға фильмді прокатқа шығармас бұрын мазмұнында тыйым салынған, соның ішінде "ЛГБТ насихаты" бар-жоғын да тексеру жөнінде өзгерістер енгізетін заң жобасын мақұлдап, президентке қол қоюға жіберді.

Заң жобасына сәйкес, егер фильм мазмұнында конституциялық құрылысты күштеп өзгертуге, республиканың тұтастығын бұзуға үндейтін, мемлекет қауіпсіздігіне нұқсан келтіретін, әлеуметтік, нәсілдік, ұлттық, діни, сословие я ру айырмашылығына байланысты алауыздық қоздыратын, қатыгездік пен зорлық-зомбылықты насихаттайтын, порнография, сондай-ақ "дәстүрлі емес жыныстық қатынастарды" және педофилияны насихаттайтын белгілер болса, прокат куәлігі берілмейді.

"Дәстүрлі емес жыныстық қатынастар" мен педофилияны насихаттауға тыйым салу туралы норма былтыр желтоқсанда қабылданған басқа заңға енгізілген және ол биыл наурызда күшіне енеді.

🔴Қазақстандық журналистер ел президенті Қасым-Жомарт Тоқаевқа қазіргі Конституцияның 20-бабын сақтап қалуды сұрады

Құқықтық медиа орталығы үкіметтік емес ұйымы бұл өтінішті елдегі журналистер қауымдастығы атынан жасап отырғанын айтқан.

Қазақстан Конституциясының 20-бабында елде сөз бен шығармашылық еркіндігіне кепілдік берілетіні, цензураға тыйым салынатыны және әркімнің заң жүзінде тыйым салынбаған кез келген тәсілмен еркін ақпарат алуға және таратуға құқығы бар екені жазылған.

Құқықтық медиа орталығы Конституциядағы осы норма құқықтық тұрғыдан дәл, қысқа әрі негізгі заңның бостандықтар мен кепілдіктерді бекітетін құжат ретіндегі табиғатына сай келеді дейді. Ұйым өкілдерінің пікірінше, сөз бостандығы мен шығармашылық еркіндігіне кепілдік беріледі деген тұжырым артық түсіндірулерді қажет етпейді және Азаматтық және саяси құқықтар туралы халықаралық пактінің 19-бабына сәйкес келеді.

Үкімет жақында жариялаған жаңа Конституция жобасында ұсынылып отырған 23-бап керісінше, Конституция деңгейіне салалық құқықтық реттеуге тән егжей-тегжейлі нормаларды енгізеді. Атап айтқанда, шығармашылық түрлерін тізбелеп, зияткерлік меншікке қатысты ережелерді және азаматтық пен қылмыстық заңда бұрыннан бар нормаларды қайталайды, дейді ұйым.