❗️ЕҚЫҰ бюросы референдумға дайындық барысын сынға алды

Тым аз уақыт берілген, сөз бостандығы бойынша бұрынғы ұсыныстар орындалмаған, әкімшілік ресурсты орынсыз қолдану ықтималдығы жойылмаған. ЕҚЫҰ-ның Демократиялық институттар және адам құқықтары бюросы (ДИАҚБ) Қазақстанда жаңа Конституцияға қатысты референдумға дайындық туралы есебінде осындай қорытынды жасайды.

Бюроның Қажеттілікті бағалау миссиясы (Needs Assessment Mission) сарапшылары 17-20 ақпан аралығында Қазақстанның мемлекеттік органдарында болған және азаматтық қоғам өкілдерімен кездескен.

ДИАҚБ тұжырымы бойынша, референдумға дайындық қабылданған күнтізбе жоспарымен жүріп жатыр, бюллетеньдегі мәтін нақтыланған, сайлау комиссиясы мүшелеріне, қоғам өкілдері мен ақпарат құралдарына арнап онлайн және оффлайн тренинг бағдарламасы қабылданған. Орталық референдум комиссиясы «барлық сессиялары онлайн көрсетілетінін, медиа өкілдерінің сұрақ қоюына мүмкіндік беретін тұрақты брифингтер өткізілетінін» айтқан.

💬СІМ қазақстандықтарға Иранға бармауға кеңес берді

Қазақстан сыртқы істер министрлігі қазақстандықтарды Иранға бармауға жәге онда жүрген қазақстандықтарды сол елден мүмкіндігінше шығып кетуге шақырды.

"Иран Ислам Республикасының төңірегіндегі шиеленістің сақталуына байланысты Қазақстан Республикасының сыртқы істер министрлігі Қазақстан азаматтарына жағдай тұрақталғанға дейін Иранға барудан уақытша бас тартуды ұсынады. Қазіргі уақытта Иран аумағында жүрген Қазақстан азаматтарына елден мүмкіндігінше шығып кетуді, сондай-ақ қауіпсіздік шараларын барынша сақтауды, қырағылық пен сақтық танытуды, жаңалықтарды қадағалап отыруды және жергілікті билік органдарының ұсынымдарын мүлтіксіз орындауды ұсынамыз" деп жазылған Қазақстан СІМ хабарламасында.

🔴АҚШ пен Израиль Иранға соққы жасады. Қазірге дейін не белгілі?

АҚШ президенті Дональд Трамп 8-минуттық мәлімдемесінде Иранға қарсы "ірі әскери операциясын" бастағанын хабарлады. Бірнеше сағат бұрын Израиль Тегераннан төнетін «қауіпті сейілту» мақсатында Иранға «превентив соққы жасағанын» мәлімдеген еді.

Әлеуметтік желіде жариялаған видеосында Трамп мақсат "Иран режимінен төнген қатерге төтеп беріп, Америка халқын қорғау" деді.

"Америка халқының қаһармандарынан айырылуымыз мүмкін және бізде адам шығыны да болуы мүмкін, мұндай нәрсе соғыста болады, бірақ біз мұны бүгінгі күн үшін жасап жатқан жоқпыз. Мұны болашақ үшін жасап жатырмыз және бұл киелі миссия" деді Трамп.

Иранның да Израильге ракета жіберіп, АҚШ-тың Таяу Шығыстағы бірқатар әскери базаларына соққы жасалғаны хабарланды.

Толығырақ оқыңыз

💬 Әлем елдері АҚШ пен Израильдің Иранға соққысына қалай реакция білдірді?

🔺Ұлыбритания үкіметі Израиль мен АҚШ-тың операциясына қатыспағанын мәлімдеп, жағдайдың әрі қарай ушыққанын қаламайтынын жеткізді.

“Иранға ядролық қару жасауына ешқашан мүмкіндік бермеу керек және дәл сол себепті шешімге келіссөз арқылы қол жеткізу талпынысын үнемі қолдаймыз” деп жазылған үкімет мәлімдемесінде.

🔺Еуроодақ дипломатиясының басшысы Кая Каллас израильдік әріптесі Гидеон Саар және аймақтағы өзге де ресми өкілдермен әңгімелескенін алға тартып, ЕО араб әріптестерімен бірге қақтығысты дипломатия жолымен шешу мүмкіндігін қарастырып жатқанын айтты.

🔺Германия үкіметінің хабарлауынша, Израиль Иранға соққы жасайтынын Берлинге алдын ала хабарлаған. Канцлер Фридрих Мерц жағдайды мұқият бақылап отырғанын айтып, Еуропадағы әріптестерімен байланыста отырғанын мәлімдеді. Келесі аптада ол Вашингтонда Дональд Трамппен кездеседі.

🔺Франция басшысы Эммануэль Макрон БҰҰ-ның Қауіпсіздік кеңесінің шұғыл отырысын өткізуге шақырды. Макронның сөзінше, Тегеран өзінде “ешқандай жол қалмағанын” түсінуі керек және ядролық қарудан және құрлықаралық баллистикалық ракетадан бас тартып, “келіссөзге отыруы” керек.

🔺Ресей “БҰҰ мүшесі – тәуелсіз әрі егемен мемлекетке қарсы алдын ала жоспарланған және себепсіз қарулы басқыншылықты” айыптады.

Ресей СІМ АҚШ пен Израильдің Иранға қарсы соққысын “ойланбаған қадам” және халықаралық құқық нормасын бұзатын “қауіпті авантюра” деп бағалады. Ведомство өкілдерінің пікірінше, АҚШ пен Израиль “конституциялық құрылымды жоюды және күшке бағынудан бас тартқан өздеріне тиімсіз мемлекеттің басшылығын жоюды” көздеп отыр.