❗Қазақстан ресейлік белсенді Емельянованы экстрадициялауды уақытша тоқтатты

Ресейлік белсенді, Навальный штабының бұрынғы қызметкері Юлия Емельянова Қазақстанда босқын мәртебесін сұраған өтініші қаралып жатқанда елден шығарылмайды. Бұл туралы Емельянованың адвокатына сілтеп, "Ковчег" құқық қорғау жобасы мәлімдеді.

Құқық қорғаушылардың мәліметінше, белсендінің ісі бойынша келесі отырыс 27 ақпанда өтпек.

Қазақстан бас прокуратурасы бұған дейін Ресейдің Емельянованы экстрадициялау туралы өтінішін қанағаттандырған еді. Белсендіге қаулыны 29 қаңтарда берген. Осыдан соң Емельянованың қорғаушылары Жоғарғы сотқа шағымданған.

Юлия Емельянова –Emigration for Action және Just Help қозғалысының белсендісі. Ол 2025 жылы 31 тамызда басқа елге транзитпен кетіп бара жатқанда Алматы әуежайында ұсталған. Ресей Емельяноваға "таксистің телефонын ұрлады" деген айыппен іздеу жариялаған. Қазір белсенді Алматы шетіндегі уақытша изоляторда отыр.

Ержановтың ұсталуы, Тшановтың даты, сүйіншінің сұрауы — Azatnews | 26.02.2026

Жаңа Конституция жобасын ашық сынап жүрген қоғам белсендісі Оразалы Ержанов ұсталып, 10 тәулікке қамалды. Қылмыстық іс қозғалған. Саясаткер, қоғам қайраткері Амалбек Тшановтың президент Тоқаевқа даты бар. Ол жаңа Конституцияны қабылдауға асықпайық дейді. “Атажұрттың” істі боп жатқан белсендісіне бауы берік болсын деп сүйінші салған адам айыппұл арқалады. Полиция мұны тіркелмеген ұйымды қаржыландыру деп тапқан.

🔗КӨРУ

⚡Журналист Борейконың желідегі парақшалары бұзылды

Журналист, "Гиперборей" YouTube-арнасының авторы Вадим Борейконың Instagram және Facebook парақшасын әлдекімдер бұзған. Бұл туралы Азаттыққа журналистің өзі хабарлады.
Борейко парақшаларының бұзылуын бүгін, 26 ақпанда Youtube-арнасына шыққан видеолармен байланыстырады.

- Парақшамды бұзды, бар айтарым осы. Хронологиясына келсек, "Гиперборей" YouTube-арнасына таңертең сағат 9-да "Құқықтық медиаорталық" қоғамдық қорының жетекшісі Диана Окремовамен референдум қарсаңында қорқыту мен үркіту науқаны жайлы шықты. Ал түсте Оразалы Ержановтың ұсталғаны (Алматыда жаңа Конституция жобасын қатаң сынап жүрген белсенді Оразалы Ержанов қамалғаны хабарланды - Ред.) жайлы жедел шығарылым жарияланды. Осыдан соң басталды, – деді журналист Азаттыққа.

Қазір Борейконың Instagram және Facebook парақшасын есімі және бас суреті өзгертіліп, журналисті қаралайтын суреттер мен видеолар жарияланған.

Вадим Борейконың парақшасына алғаш рет шабуыл жасалып тұрған жоқ. Былтыр қарашада Борейконың, журналист Асхат Ниязовтың Instagram парақшасы өшіріліп, қоғам белсендісі Санжар Боқаевтың Instagram парақшасы бұзылған.

Қазанда тәуелсіз журналист Лұқпан Ахмедияров YouTube "Просто журналистика" арнасы өшіріліп, ізінше қалпына келтірген. YouTube-тың өзі арна негізсіз жабылғанын мойындағаны айтылған.

Кейінгі кезде Қазақстанда билікті сынап жүрген азаматтардың немесе тәуелсіз журналист, белсенділердің әлеуметтік желідегі парақшалары, YouTube-арналарының түрлі себеппен жойылуы жиіледі.

t.me/azattyq

Щучинскіде дәмханада газ жарылып, жеті адам қаза болды

Ақмола облысы Бурабай ауданы Щучинск қаласында дәмханада газ жарылып, жеті адам қаза болды, 20-дан астам адам зардап шекті.

"Бурабай ауданының Щучинск қаласында бес қабатты тұрғын үйге тіркелген бір қабатты дәмханада газ–ауа қоспасы жарылып, өрт шықты. Хабарлама түскеннен кейін 5 минут ішінде Ақмола облысының ТЖД күштері мен құралдары оқиға орнына келді. Өрт сөндірушілер жанған ғимараттан 8 газ баллонын алып шықты және 10-нан астам адамды құтқарды" деп жазылған департамент хабарламасында.

Зардап шеккендердің бір бөлігі Бурабай аудандық ауруханасына жатқызылған, алты адам амбулаториялық бақылауға жіберілген. Бірнеше адам төтенше жағдай министрлігінің реанимобилімен Көкшетау қаласына жеткізілген.

Желіде Щучинскідегі дәмханада жарылыс болған сәт бейнеленген видео да тарады. Видеодан отқа оранған ғимараттан кейбір адамдардың шығып үлгергені көрінеді, кейбірінің киімін от шалған. Куәгерлер оларға бірден көмектесуге тырысады.

Ал Qumash арнасы таратқан мына видеода видеоны түсіріп тұрған адам қаладағы палау орталығының жанып жатқанын айтады.

Төтенше жағдай басқармасы өрт түнде толық сөндірілгенін хабарлады.

Сот Мовлаевқа босқын мәртебесін бермеу туралы шешімді заңсыз деп танудан бас тартты

Бұл жөнінде адвокаты Мұрат Адам хабарлады. Ол осылай болады деп күткенін де жеткізді.

Оның алдында адвокат сот "жұмыс уақытынан тыс уақытқа көшірілгенін, Мансур Мовлаевтың қатысуынсыз" өтетінін жазған.

Бұған дейін шешен азаматы Мансур Мовлаев егер Ресейге экстрадицияланатын болса, ол жақта өзін азаптап, тіпті өлтіріп тастауы мүмкін екенін мәлімдеген.

Щучинск дәмханасындағы жарылысқа байланысты “Көп адамның өліміне соқтырған өрт қауіпсіздігі талаптарын бұзу” бабы (292-бап, 3-бөлік) бойынша қылмыстық іс қозғалды. Бұл жөнінде аймақ полициясы хабарлады.

27 ақпанға қараған түні Щучинск қаласындағы дәмханалардың бірі газ жарылып, 7 адам қаза болды, 20-дан астам адам зардап шекті, 13-ін түрлі дәрежеде күйік шалған.

Украинадағы соғысқа төрт жыл толғанына орай БҰҰ Бас ассамблеясы жиынында Ресейдің БҰҰ-дағы елшісі өзін «нағыз украинмын» деп атап, украиналық елшімен сөз таластырып қалды. Жиында Украинадағы бейбітшілік туралы қарар қабылданған. «Украинадағы баянды бейбітшілікті қолдау» деп аталатын қарарды жалпы 107 мемлекет қолдап, 12 ел қарсы шықты. 51 ел қалыс қалды. Қазақстан – қалыс қалғандар қатарында.

Адам құқығын қорғау бюросы Оразалы Ержановтың ұсталуының жай-жапсарын жазды

Facebook және Instagram парақшалары бұғатталған журналист Вадим Борейкоға сүйенген Адам құқығын қорғау бюросы қоғам белсендісі Оразалы Ержановтың ұсталуының жай-жапсарын жазды. Ондағы мәліметке қарағанда тергеу соты Оразалы Ержановты 5 наурызға дейін қамаған.

Бір күн бұрын Алматы полициясы "сайлау құқықтарын жүзеге асыруға кедергі келтіру фактісі негізінде қылмыстық іс қозғалғанын" хабарлаған еді.

Сурет: Адам құқығын қорғау бюросының сайтынан алынған скриншот

Бас прокурор Берік Асылов депутаттардың Эпштейн файлдарында аты аталған қазақстандықтарды тексеру туралы ұсынысына жауап берді.

Оның сөзінше, прокуратура мұндай тексерісті депутаттар сауал жасамай тұрып бастаған.

“Бүкіл әлем мұны талқылап жатыр, сол себепті бас прокуратура да өзге ведомстволық органдар сияқты фактілерді тексеріп жатыр. Кәрім Мәсімов бойынша тексерісті бастадық. Алдын ала тексерісті бастадық. Осы жаққа Эпштейн келді ме. Келімбетовтің өзі барды ма, жоқ па, қосымша тексеріледі” деді Асылов.

❗Сот белсенді Ілияшевтің Тоқаев үстінен түсірген шағымын кері қайтарды

🔹Сот не дейді?

Астана қаласы ауданаралық әкімшілік соты белсенді Әлнұр Ілияшевтің президент Қасым-Жомарт Тоқаевтың үстінен түсірген арызын қарамай кері қайтарған. Бұл туралы Азаттыққа соттың анықтама бөліміндегі маман айтты.

Кеше, 26 ақпанда Ілияшев желіде президент Тоқаевтың референдум тағайындау туралы жарлығының заңдылығын даулап, сотқа шағым түсіргенін жазған. Белсенді Астана қаласының мамандандырылған ауданаралық әкімшілік соты шағымды тіркегенін айтқан. Қазір Ілияшевтің шағым түсіргені туралы жазбасы Facebook парақшасында көрінбей қалды. Ал белсенді жазбасын парақшасынан алмағанын айтты.

🔹Белсенді неге шағымданып еді?

Белсенді «азаматтардың коституциялық құқығы мен бостандығын бұзатын, Республика қызметінің түбегейлі принциптерін өзгертетін жобаны 15 наурыздағы референдумға шығармақ» деп мәлімдеген. Сондықтан ол соттан президенттің референдум өткізу туралы жарлығын заңға қайшы деп тануды талап еткен еді.

Қазақстанда жаңа Конституция жобасы бойынша референдум 15 наурызда өтеді.

🔹Ақорда Конституция жобасы жайлы не дейді?

Ақорда конституциялық түзетулерді «жаңа тарихи дәуірдің талаптарына сәйкес мемлекетті қайта құру және қоғамдық сананы жаңарту» деп түсіндіреді. Конституция жобасында екі палаталы парламенттің орнына бір палаталы парламент құрылатыны, Жоғарғы соттың, Конституциялық соттың, Ұлттық банктің, ҰҚК төрағасын, Бас прокурорды президент тағайындайды.

Ал кейбір заңгерлер мен құқық қорғаушылар жоба президенттің билігін күшейте түседі, биліктің заң шығарушы тармағының рөлін төмендетіп, азаматтардың құқығын шектейді деп санайды. Билік Конституция президент билігін күшейтеді деген сөзді "аңыз" деп атаған.

Тоқаев пен АҚШ елшісі бір айда екінші рет кездесіп, экономика және инвестиция келісімдерін талқылады

Қазақстан президенті Қасым-Жомарт Тоқаев АҚШ-тың Қазақстандағы елшісі Джули Стаффтты қабылдап, сауда-экономика, инвестиция саласындағы келісімдерді жүзеге асыру жайын талқылады. Бұл туралы 27 ақпанда Ақорда хабарлады.

Тоқаев пен Стаффт келісімдер бойынша нақты нәтижеге жету үшін екі елдің салалық министрлері деңгейінде тығыз қарым-қатынасты жалғастыру керегін айтқан. Бұған қоса, АҚШ президенті Дональд Трамп құрған Бейбітшілік кеңесі аясындағы ықпалдастық мәселелері жайлы да сөйлескен.

"АҚШ елшісі аталған ұйымның ізгі мақсатын ілгерілетуге белсене атсалысқаны үшін Қазақстан тарапына ризашылығын білдірді" деп мәлімдеді Ақорда ресми хабарламасында.

Тоқаев пен Стаффт осы айда екінші рет кездесіп отыр. 13 ақпандағы кездесуде де сауда-экономика, инвестиция саласындағы қарым-қатынасты талқылаған.

Джули Стаффтты былтыр шілдеде АҚШ президенті Дональд Трамп Қазақстандағы елші қызметіне ұсынған. Сенат оны қазанда осы қызметке бекіткен. Джули Стаффт биыл 9 қаңтарда Қазақстан президентіне сенім грамотасын тапсырып, қызметіне кіріскен.

Тоқаевқа арыз жазған белсенді, Тшановты қаралағандар — AzatNEWS | 27.02.2026

🔹 Заңгер, алматылық белсенді Әлнұр Ілияшев президент Қасым-Жомарт Тоқаевтың үстінен арыз жазды. Бірақ шағымы қаралмайтын болды.

🔹 Президент Тоқаевқа үндеу жасап, Конституция жобасын сынаған саяси қайраткер Амалбек Тшановты қаралайтын жазба көбейді. Мұның артында кім тұр?

🔹 Азаттық жиырма депутатқа хабарласып, референдум қарсаңында "сөз еркіндігі шектеліп жатыр" деген сынға пікір сұрады. Сөйлескен екі мәжілісмен қудалау бар дегенге келіспейді.