АҚШ президенті Дональд Трамп бірнеше жылдан бері Дания автономиясы Гренландия аралын бақылауына алу туралы айтып жүр. Биыл қаңтардың басында АҚШ әскері Венесуэланы шабуылдап, президент Николас Мадуроны тұтқындап алып кеткенде, бұл мәселе қайтадан күн тәртібіне шықты. Трампқа Гренландия не үшін керек?

1979 жылы Иранда ислам революциясы болып, елде монархия құлады да, оның орнына діни режим орнады. Содан бері елде билік өзгерген жоқ. Иран қалай ислам республикасына айналдырғанын қысқа-нұсқа түсіндіреміз.

"Жомарт" кенішіндегі апат: кеншілер қарапайым жұмысшыларға айып тағылуына қарсы

Жеті адамның өмірін қиған "Жомарт" кенішіндегі апатқа байланысты істе қарапайым жұмысшыларға айып тағылып жатыр. "Біз бұған қарсымыз" деп мәлімдеді жұмысшылар осы аптада жариялаған видеомәлімдемелерінде.

Мәлімдеме авторлары апатты әділ әрі объективті тергеуді талап еткен. Ұлытау облыстық полиция департаментінің өкілдері іс бойынша тергеу аяқталғанын айтқанмен қанша адамға айып тағылғанын және олардың қызметін нақтыламады.

Украина дрондары Воронежге соққы жасады, жараланғандар бар

10 қаңтарда кешке Украина дрондары Воронежге шабуылдады. Куәгерлердің айтуынша, Воронеждің түрлі ауданында шамамен 25 жарылыс болған.

"Атып түсірілген дрон бөлшектерінен екі адам жарақаттанды: ер адамның денесіне сынық кіріп жараланды, бір әйел басынан жарақат алды. Құлаған бөлшектер көпқабатты үш тұрғын үй және салынып жатқан бір ғимараттың терезелері мен алдыңғы жағын бүлдірді. Тағы бір үйде пәтерден өрт шықты, ол сөндірілді. Кем дегенде бір көлік бүлінді" деп жазды Воронеж облысының губернаторы Александр Гусев.

"Базаның" жазуынша, қалада түрлі жарақат алған төрт адам ауруханаға түскен. Екі адамның жағдайы ауыр, тағы екі адам орташа дәрежеде жарақат алған. Воронеж облысы аумағында 10 қаңтарда кешке дрон қатері режимі күшінде болды.

Трамп Ирандағы наразылықты қолдады

“Иран еркіндікке ұмтылады, бәлкім, бұрын-соңды болмаған дәрежеде. АҚШ көмектесуге дайын” деп жазды АҚШ президенті Дональд Трамп Truth Social желісінде.

Бұған дейін Америка басшысы Ирандағы жағдайды мұқият бақылап отырғанын айтып, режимнің құлауын да жоққа шығармаған.

Иран билігі наразыларды басып-жаншыса, АҚШ Иран билігін “жазалайды” деп мәлімдеген еді. Трамптың сөзінше, мәселе Иранға әскер кіргізу жөнінде болып отырған жоқ, дегенмен Иран режимінің “осал тұстарына тегеурінді соққы жасалмақ”.

НАСА халықаралық ғарыш станциясындағы экипажды Жерге 15 қаңтарда шұғыл қайтарғысы келеді. Миссия мүшелерінің бірі ауырып қалған.

Crew-11 экипажының құрамында командир Зена Кардман, ұшқыш Майкл Финк, жапон астронавты Кимия Юи және ресейлік ғарышкер Олег Платонов бар.

Нақты кімнің денсаулығы сыр бергенін және нақты немен ауырғаны айтылмайды.

Crew-11 экипажы Жерге оралса, халықаралық ғарыш станциясында "Союз МС-28" экипажынан америкалық Кристофер Уильямс пен ресейліктер Сергей Кудь-Сверчков пен Сергей Микаев қалмақ.

Сурет: Crew-11 экипажының мүшелері. NASA

Өзбекстанда мәдениет министрі тойда өлең айтып, ақша алғаны үшін сынға қалды. Министрлік түсініктеме берді

Министрліктің хабарлауынша, оқиға 2025 жылы 25 қазанда министрлік қызметкерлерінің бірінің тойында болған.

Баспасөз хатшысының айтуынша, тойда әншіге ақша беру "ғасырлар бойы қалыптасып келе жатқан ұлттық дәстүр" және одақ бас тарту "құрметсіздік ретінде қабылдануы мүмкін". Ал желіде шенеуніктің әрекетін қолданушылар қызу талқылады.

⚡Қазақстандық теннисші Александр Бублик Гонконгте өткен ATP-250 санатына енетін турнирде жеңіске жетіп, келесі аптадан бастап ATP рейтингінде 10-орынға көтеріледі. Қазақстан теннисшісі Гонконгтегі турнир алдында рейтингте 11-орында тұрған. Жарыстағы жеңісінің арқасында рейтингідегі ұпайын көбейтті.

Осылайша Бублик ерлер арасында әлемдік рейтингіде үздік ондыққа енетін алғашқы қазақстандық теннисші болмақ. Бұл – Қазақстан спорты үшін тарихи көрсеткіш.

Бублик Гонконгтегі турнирдің финалында италиялық Лоренсо Музеттиді (әлемдік рейтингте 7-орында тұр) екі сетте жеңді – 7:6 (7:2), 6:3.

Әйелдер арасында Елена Рыбакина қазір WTA рейтингінде үздік ондыққа енген. Рыбакина әлемдік рейтингіде бесінші орында тұр.

Рыбакина мен Бублик Ресейде туған, он шақты жыл бұрын Қазақстан азаматтығын алған еді.

Қазақстан теннисшілері енді жылдың алғашқы Grand Slam турнирі Australian Open турниріне қатысады. Бұл жарыс 18 қаңтарда басталады.