⚡АҚШ Ирандағы наразылықты басып-жаншып жатқан билікке қатысты "қатаң шаралар" қабылдауды қарастырып жатыр деп мәлімдеді АҚШ президенті Дональд Трамп.

Air Force One президент ұшағында журналистердің "Иран билігі наразыларды өлтіру арқылы қызыл сызықтан аттады ма?" деген сауалға Трамп "олар [қызыл сызықтан] аттауды бастап кеткен сияқты" деп жауап берді.

"Біз бұған өте қатты мән беріп отырмыз. Әскерилер жағдайды зерттеп жатыр және біз өте қатаң шаралардың бірнеше нұсқасын қарастырып жатырмыз. Шешім қабылдаймыз" деді АҚШ президенті.

Қостанай тұрғыны "Тиктокта қазақтарды қорлағаны үшін" сотталды. Адвокат үкіммен келіспейді

Қостанайдың 44 жастағы тұрғыны Юлия Хон "Тиктоктағы тікелей эфирде қазақтарды қорлағаны үшін" екі жылға сотталды. Қостанайдағы №2 сот тұрғынды "Ұлт араздық қоздыру" бабымен айыпты деп тапқан. Бұл туралы сотқа сілтеп Tengrinews және Tobolinfo сайттары хабарлады.

Соттың хабарламасына қарағанда, Хон 2024 жылы қарашада Тикток желісінде Ресей мен Украина арасындағы соғысты талқылаған тікелей эфирге кіріп, қазақтарды қорлайтын сөз айтқан.

Істі қараған сот Хонның кінәсі тікелей эфирден алынған видеомен, куәгерлердің сөзімен, сараптамамен дәлелденді деп тапқан. Айыпталушы кінәсін ішінара мойындаған. Сот үкіміне сай, ол жазасын қатаңдығы минимальды колонияда өтеуі тиіс.

Айыпталушының адвокаты Валерий Ли Tobolinfo сайтына "тікелей эфирде Хонды да қорлағанын, ал Хон бүкіл ұлтты емес, нақты адамды балағаттағанын" айтқан. Қорғаушы үкімге қарсы шағым түсіретінін де жеткізген.

Соттың хабарлауынша, Хонның көзі көрмейтін ұлы бар екені ескеріліп, жазасы жеңілдетілген.

Қазақстанда әлеуметтік желіде, көшеде қандай да бір ұлтқа, елге қарсы балағат сөз айтқан адамдар Қылмыстық кодекстегі "Ұлтаралық, діни алауыздық қоздыру" бабымен жауапқа тартылады.

Былтыр Threads платформасында қазақтар мен мұсылмандардың намысын қорлайтын пікірлер жариялаған қарағандылық Алика Мұхамадиева осы баппен 3,5 жылға сотталған. Сот Мұхамадиеваның екі жасар баласы барын, айыпталушының сот процесі кезінде кінәсін толық мойындап, өз ісіне шын жүректен өкінгенін ескеріп, оның жаза өтеу шарасын кейінге қалдырған еді.

Бұған қоса, Ресейшіл мазмұндағы бейнероликтер жариялап танылған көкшетаулық блогер Аслан Төлегенов те "ұлтаралық араздық қоздырды" деген айыппен 3 жыл 9 айға сотталған.

Былтыр қарашада Алматы облысында "Қытай туын өртеген" 19 адам "алауыздық қоздыру" айыбымен істі болып жатыр.

Ал Алматыда сот Qaznews24 сатиралық паблигінің авторы Темірлан Еңсебекті "араздық қоздыру" бабы бойынша кінәлі деп тауып, оған бес жыл бас бостандығын шектеу жазасын кескен. Ол пабликте "Йоу, орыстар" әнін қолданғаны үшін жауапқа тартылды.

Қазақстанның бұрынғы президенті Нұрсұлтан Назарбаевтың Үшқоңыр резиденциясы оның жиені Нұрәли Әлиевке қарасты технологиялық компанияға өтті. Бұған дейін ол экс-президентке тиесілі қордың меншігінде болған.

🛥️🛳️ 11 қаңтарда Таиландтың Пхукет аралы маңындағы теңізде туристер мінген ұшқыр шағын кеме балық аулайтын кемемен соқтығысып қалған.

Жергілікті билік дерегінше, туристер кемесінде 52 жолаушы мен 3 экипаж мүшесі болған. Жолаушылар арасында Ресей, Қазақстан, Қырғызстан, Өзбекстан, Польша және Ұлыбритания азаматтары бар.

БАҚ жазуынша, теңіздегі апат салдарынан 18 жастағы Ресей азаматы қаза тауып, тағы 20-дан астам адам ауруханаға жеткізілген.

Қазақстан сыртқы істер министрлігі туристер мінген кемеде Қазақстанның сегіз азаматы болған деп хабарлады. Бәріне медициналық көмек көрсетілген, зардап шеккен үш қазақстандық ауруханада жатыр. Дәрігерлер олардың денсаулық жағдайын тұрақты деп бағалаған.

Қырғызстан сыртқы істер министрлігі де теңізде апатқа ұшыраған кемеде екі қырғыз азаматы болғанын растады. Олар зардап шекпеген.

Ал Өзбекстан азаматтары арасында зардап шеккендер туралы әзірге ресми ақпарат болған жоқ.

❗Қара теңізде Қазақстанның мұнайын күтіп тұрған екі танкерге дрон шабуылдады - Reuters

13 қаңтарда Қара теңізде Каспий құбыр консорциумы (КҚК) маңында Қазақстаннан келетін мұнайды күтіп тұрған екі танкерге дрон шабуылдағаны айтылды. Бұл туралы Reuters агенттігі сегіз дереккөзіне сілтеп хабарлады.

Reuters агенттігінің ақпаратынша, грекиялық Delta Tankers компаниясына тиесілі Delta Harmony танкеріне "ТеңізШевройлдан" келетін мұнайды, ал Matilda танкері (грекиялық Thenamaris компаниясына тиесілі) Қарашығанақтан келген мұнайды тиеп әкетуі керек болған.

"Қазмұнайгаз" Қазақстан мұнайын күтіп тұрған Matilda танкері шабуылға ұшырағанын растады. Компания қазір шығын көлемі есептеліп жатыр деді. Thenamaris компаниясы да Matilda танкеріне екі дрон шабуылдағанын растады.

"Зардап шеккендер жоқ, танкер аздап бүлінген, тексерістен кейін бүлінген жерді жөндеуге болатыны анықталды" деген компания Reuters агенттігіне. Ал Delta Tankers компаниясы Reuters агенттігіне жауап бермеген.

Танкерлерге шабуылды кім жасағаны әзірге айтылмады. Украина да, Ресей де шабуыл жайлы ешқандай мәлімдеме жасамады. КҚК да ешқандай пікір білдірмеді.

Бұған қоса, грекиялық TMS компаниясы иелік ететін Freud танкері де, Delta Tankers компаниясына тиесілі Delta Supreme танкері де дрон шабуылына ұшыраған.

⚡Иран наразының бірін «өлім жазасына кеспек»

Құқық қорғау ұйымы Иран режимі наразылық кезінде ұсталған наразының бірін «өлім жазасына кескелі жатыр» деп хабарлады.

Норвегияда орналасқан Iran Human Rights ұйымы дереккөздеріне сілтеп, наразылыққа шыққан 26 жастағы Ерфан Солтани «Құдайға қарсы соғыс ашты» деген айыппен 14 қаңтарда дарға асылатынын айтады. Солтани алты күн бұрын ұсталған еді.

Иран ресми өкілдері Солтаниге қатысты хабарламаға ресми мәлімдеме жасамады. Дегенмен Ирандағы Ислам революциясы сақшылары корпусына жақын Tasnim ақпарат агенттігі 13 қаңтарда «сот органдары наразылыққа қатысқан бірнеше адамға айыптау үкімдері шыққанын» жазды.

❗Иранда 2 мыңдай адам қаза тапқан - Reuters

Ирандағы билікке қарсы наразылықтан қаза тапқандардың саны мыңнан асып кеткені айтыла бастады. Reuters агенттігі Ирандағы қауіпсіздік қызметкеріне сілтеп, екі мыңдай адам қаза тапқанын жазды. Қаза тапқандары санына бейбіт тұрғындар мен орган қызметкерлері бар.

БҰҰ-ның адам құқығы бойынша басқармасының өкілі Джереми Лоуренс Женевадағы конференцияда «хабарламаларға қарағанда, жүздеген адам өліп, мыңдаған адам қамалған» деді. Ал 12 қаңтарда Iran Human Rights ұйымы дереккөздеріне сілтеп, 650 адам қаза тапқанын жазған.

Иранда бес күннен бері интернет бұғатталған. Сондықтан қаза тапқандардың нақты санын анықтау қиын.

⚡АҚШ президенті Дональд Трамп Ирандағы наразыларға қайырылып, "көмек келе жатыр" деді

"Иран патриорттары, НАРАЗЫЛЫҚТЫ ЖАЛҒАСТЫРЫҢЫЗДАР, ӨЗДЕРІҢІЗГЕ ТИЕСІЛІ ИНСТИТУТТЫ БАСЫП АЛЫҢЫЗДАР!!! Адам өлтіргіштер мен абьюзерлердің есімін есте сақтаңыздар. Олар бұл үшін жауап беретін болады. Мен наразыларды өлтіру тоқтағанша Иранның ресми өкілдерімен барлық кездесуді тоқтаттым. КӨМЕК КЕЛЕ ЖАТЫР" деп жазды ол TruthSocial желісінде.

АҚШ-тың Иранға қатысты баж салығы: Қазақстан даму сценарийлерін бақылап отыр

Елдің сауда және интеграция министрлігі АҚШ-тың Иранмен сауда жасайтын елдерге 25 пайыз баж салығын енгізу туралы шешіміне қатысты осындай мәлімдеме жасады.

"Әзірге ықтимал шаралардың қолдану параметрлері әлі нақты белгісіз, осыған байланысты министрлік әртүрлі даму сценарийлерін бағалап жатыр", – деді Қазақстан сауда және интеграция министрлігінің ресми өкілі Тойгүл Жұбанисова.

⚡Қазақстан энергетика министрлігі Қара теңізде, Каспий құбыр консорциумы маңында Қазақстанның мұнайын тасуға арналған екі танкер дрон шабуылына ұшырағанын растады. Ведомство кемелерге шабуыл жасалғанда мұнайлар тиелмегенін, танкерлер бос болғанын, Қазақстан шығынға ұшырамағанын айтады.

Мальта туымен жүрген Matilda танкері Қарашығанақтан келетін мұнайды, Либерия туымен жүрген Delta Harmony танкері "ТеңізШевройлдан" келетін мұнайды күтіп тұрған. Екі танкер Грекияның компанияларына тиесілі екені айтылған.

Министрліктің хабарлауынша, Matilda танкерінде жарылыс болған, бірақ өрт шықпаған. Қаза тапқандар мен зардап шеккендер жоқ. Алдын ала ақпарат бойынша, кеме бүлінбеген, теңізде жүзе алады. Ал Delta Harmony кемесінде өрт шығып, сөндірілген, зардап шеккендер жоқ дейді министрлік.

Ресейлік тележүргізуші, кремльшіл пропагандист Владимир Соловьев жеке эфирінде Ресей Орталық Азия, Армения сияқты «өз ықпалындағы елдердегі мәселелерге» назар аударып, ол жақта да арнайы әскери операция жүргізуді жоққа шығармау керек деді.