💬 Каспий құбыр консорциумының (КҚК) теңіз терминалындағы айлақ құрылғыларының біріндегі жоспарлы жұмыс толық аяқталды

Құрылғыны жөндеу жұмыстары былтыр дрон шабуылына дейін басталған. Қарашаның аяғындағы шабуыл салдарынан терминалдағы басқа бір құрылғы зақымданған еді.

Жөндеуден өткен құрылғыда жүк тасымалдау жүйесіне 21 қаңтарда гидравликалық сынақтар жүргізіліп, одан кейін су астындағы мұнай құбырындағы шеткі манифольд ашылып, мұнай тиеу үшін танкер айлаққа қойылды, деп хабарлады жексенбі күні КҚК баспасөз қызметі.

Осылайша, қазіргі уақытта теңіз терминалында мұнай жөнелту екі айлақтық құрылғы арқылы штаттық режимде жүзеге асырылып жатыр дейді консорциум.

🔗Толығырақ

⚡️2026 жылғы 24 қаңтарда Стамбұл қаласының Шишли ауданында Өзбекстан азаматы әйелдің сүйегі табылған. Түрік басылымдарының жазуынша, қоқыс ақтарып жүрген жергілікті тұрғын контейнер ішінен басы жоқ адам сүйегін тауып алған.

Өзбекстанның Стамбұлдағы бас консулдығының хабарлауынша, түрік құқық қорғау органдары марқұмның кім екенін анықтаған.

Консулдық осы қылмысқа қатысы бар деген күдікпен Өзбекстанның екі азаматы ұсталғанын айтты. Олар Түркиядан Грузияға ұшаққа мініп кетіп қалмақ болған жерінен қамауға алынған.

🔴 Axios басылымы Украинадағы соғысты аяқтауға арналған АҚШ, Ресей және Украина делегацияларының үшжақты келіссөзінің келесі кездесуі 1 ақпанда Әбу-Дабиде өтуі мүмкін деп жазды. Басылым мұны аты-жөні аталмаған америкалық шенеуніктің айтқанына сүйеніп жазды. Бұған дейін 23-24 қаңтарда өткен келіссөздер — соғыс басталғалы бері осындай форматтағы алғашқы кездесу — жаңа раунд өткізу жөнінде уағдаластықпен аяқталғанын Батыс басылымдары, украиналық медиа мен Ресейдің ТАСС агенттігі де жазған.

Axios сөзін келтірген америкалық ресми тұлғалардың пікірінше, Ресей, Украина және АҚШ делегацияларының Әбу-Дабидегі кездесуі келіссөздердің келесі кезеңіне өту жолындағы маңызды қадам болған. Басылым сөйлескен дереккөздердің бірі тараптар Ресей мен Украина президенттерінің кездесу ықтималдығы да талқылағанын айтып, "Путин мен Зеленскийдің кездесуіне өте жақын" қалғанын жеткізген. Оның сөзінше, келесі келіссөз раундының сәтті өтуі әлгіндей кездесудің алғышарты бола алады.

🔗Толығырақ

❗️ Францияның EOS Technologie компаниясы Украинаға 500 шақырымға дейін қашыққа ұша алатын және әуеде бес сағатқа дейін қалықтуға қабілетті Rodeur 330 үлгісіндегі әскери дронның шағын партиясын жеткізген дейді France Presse агенттігі.

Өндіруші компания Rodeur 330 дронын екі оператор он минутқа жеткізбей құрастыра алады, ал аппарат бес сағатқа дейін әуеде қалықтап жүре алады дейді. Украиналық NV басылымы дрон жылдамдығы сағатына 120 шақырымға дейін жетеді және ол 5 мың метр биікке көтеріле алады деп жазды.
🔗Толығырақ

🔴 Қазақстанның Денсаулық сақтау министрлігі Нипах вирусы қаупіне байланысты елдің барлық шекаралық өткізу бекетінде санитарлық-эпидемиологиялық бақылау күшейтілгенін хабарлады.

Адамға аса қауіпті Нипах вирусы Үндістанда және Оңтүстік-Шығыс Азияның өзге елдерінде тіркелген. Министрлік қазіргі сәтке Қазақстан аумағында Нипах вирусын жұқтыру я инфекцияны сырттан әкелу дерегі тіркелмегенін, әйткенмен алдын алу шарасы ретінде Қазақстанға Үндістаннан және Оңтүстік-Шығыс Азияның өзге елдерінен келген жолаушыларға бақылау күшейтілгенін айтады.

Қолайсыз елдер тізімі эпидемиологиялық жағдайға қарай тұрақты түрде жаңартылып отырады деп хабарлады Денсаулық сақтау министрлігі.

Нипах вирусы адамға науқас кісіден, жануарлардан (жарқанат, шошқа), лас тағам мен сусын арқылы жұғды. Науқас адамның қызуы көтеріліп, басы ауырып, тұла бойын әлсіздік басып, ауыр түріне шалдықса, жүйке жүйесі зақымдалып, пневмония қоса асқынуы мүмкін деп ескертеді мамандар.

Нипах вирусына қарсы вакцина әлі табылған жоқ дейді Денсаулық сақтау министрлігі.

🗣 26 қаңтар күні Астанада Қазақстан Конституциясына өзгерістер енгізу жөніндегі комиссияның екінші отырысы өтті

Онда бейбіт жиналыстар өткізу тәртібі, неке институты, адам құқықтарын қорғау, саяси партиялар мен кәсіподақтар қызметі, сондай-ақ президент өкілеттіктеріне қатысты бірқатар ұсыныс қаралды.

Мәжіліс депутаты Снежанна Имашева Конституцияның 32-бабындағы азаматтардың бейбіт митинг өткізуіне шектеу қою ауқымын кеңейту туралы ұсыныс айтылғанын хабарлады. Жиын өткізуге қойылатын бұрыннан бар шектеулерге қосымша себептер ретінде конституциялық құрылымның негіздерін қорғау, ұлттық қауіпсіздікті қамтамасыз ету және қоғамның рухани-адамгершілік құндылықтарын сақтау секілді жаңа негіздер қосылады.

Депутат "бұл өзгеріс жиналу еркіндігі мен мемлекет пен қоғам мүдделері арасындағы тепе-теңдікті нақтылауға бағытталған" деп түсіндірді.

Қолданыстағы Конституцияның 32-бабында азаматтар бейбіт, қарусыз түрде жиналып, митингілер, демонстрациялар, шерулер мен пикеттер өткізуге құқылы деп көрсетілген. Бейбіт жиын өткізуге мемлекеттік қауіпсіздік, қоғамдық тәртіп, денсаулықты сақтау және өзге адамдардың құқықтарын қорғау мақсатында ғана шектеу қойылуы мүмкін екені жазылған.

🔸Комиссияның екінші отырысында тағы қандай ұсыныстар болғанын толығырақ мына жерден оқыңыз:

🔴 Қазақстан президенті Қасым-Жомарт Тоқаев қоғамда деструктивті контент тарататындардың әрекетіне құқықтық баға беру қажет деді Астанада Бас прокуратурада өткен кеңесте.

"Технологияның қарқынды дамуы ақпараттық кеңістіктің түбегейлі трансформациясына жол ашады. Қоғамды жікке бөліп, азаматтарды бір-біріне қарсы қоятын деструктивті ақпарат таратуға бейіл адамдар да бар. Мұның бәрі өшпенділікке бастайтын ешкімге қажетсіз, тіпті қауіпті пікірталасқа жалғасады", – деді Тоқаев.

Ол технологиялардың қарқынды дамуын бәзбіреулер теріс мақсатта пайдаланып, азаматтарды бір-біріне қарсы қоятын, өшпенділік тілін қоздыратынын айтты.

"Жасанды интеллектіні осындай адамдар ақпараттық қаруға айналдырып, заңға қайшы келетін контенттерді көптеп тарата бастайды. Бұған жол беруге болмайды. Ондай әрекеттерге құқықтық баға беріп, жауапкершілікке тарту қажет", – деген президент азаматтарға мұндай контентті таратудың құқықтық салдарын тұрақты түрде түсіндіру қажеттігін айтты.

🔸🔺 Бас прокуратурадағы жиында Тоқаев мұнан өзге не айтқанын мына сілтемеден оқыңыз:

💬 Ресей әскері Сириядағы Камышлы аэродромынан кетіп жатыр

Дамаск үкіметі жергілікті күрд күштеріне қарайтын аумақтарды бақылауға талпынып жатқан шақта Ресей Сирияның солтүстік-шығысындағы Камышлы әуежайынан әскерін шығарып жатыр. Reuters дереккөзінің айтуынша, Сирияның жаңа билігі Ресейден базадан кетуді сұраған.

Кейінгі екі күнде ресейлік әскери техника мен ауыр қару Хмеймим базасына көшіріліп жатыр. Камышлыдағы Ресей әскерінің бір бөлігі Хмеймимде қалады, бір бөлігі еліне қайтарылады.

🔴"Бір асығыстық бар". Серік Бейсембаевпен Конституция реформасы жайлы сұхбат

Конституцияға енгізілмек өзгерістерді талқылайтын комиссия құрыла сала бір жұмаға жетпей үш рет отырыс өткізіп, онда митинг өткізу тәртібі, неке институты, адам құқықтарын қорғау, саяси партиялар мен кәсіподақтар қызметі, вице-президент өкілеті және өзге де мәселелер бойынша ұсыныстар айтылды. Адам, қоғам, мемлекет өмірі үшін маңызды тақырыптарды талқылауды биліктің тездетіп жатқаны нені білдіреді? Әлеуметтанушы Серік Бейсембаевтан сұрадық.

🔗Толығырақ оқыңыз

💬 Bloomberg: Қарашығанақ операторлары Қазақстанға $4 млрд төлеуге міндеттелуі мүмкін

Халықаралық соттан жеңілген Қарашығанақ кенішін игеріп жатқан ірі операторлар, арасында италиялық Eni мен британдық Shell де бар, Қазақстан үкіметіне $4 млрд көлемінде өтемақы төлеуге міндеттелуі мүмкін. Бұл жөнінде Bloomberg жазды.

Басылымның жазуынша, дегенмен сот төленетін өтемақы көлемін нақты айқындамаған. Тараптар сот шешімін апелляцияға беруі ықтимал. Сот келісімде қарастырылмаған артық шығындарды мемлекеттің өзі өтеп келді деген Қазақстан үкіметінің уәжін орынды деп тапқан.

“Қазақстанның сырттағы заңнамалық кеңесшілері сот шешіміне сәйкес, Қарашығанақ жобасы бойынша өзара әріптестер – арасында Chevron Corp., Lukoil PJSC және ҚазМұнайГаз да бар – $2 пен $4 млрд аралығында қайтаруына тура келеді деп санайды. Ақшаны қайтару тетігі өнімді бөлісу туралы келісім аясында мұнайды үлестіру формуласын өзгерту арқылы жүзеге асырылады” деп жазды басылым.

Сот отырысы Лондонда өткен. Дереккөздің айтуынша, сот мұнай компанияларының оқиға мерзімінің өтуіне байланысты істі тоқтату туралы өтініштерін кері қаққан.

Қарашығанақ кенішін Eni (29%), Shell (29%), Chevron (18%), Lukoil (13.5%) және “Қазмұнайгаз” (10%) игеріп жатыр.