Сот алқасы, прокурор мен Бишуиновтың қорғаушысы әрі әйелі Гүлшат Бишуинова бір залда. Адвокаттар сотқа онлайн қосылды. Ал блогердің жақтастарына арнайы екі зал бөлінген. Екі зал да лық толы. Мирболатты қолдауға тіл жанашырлары азаматтық белсенділер келді

Иранның Решт қаласындағы наразылықта қаза тапқандардың мәйіттерінің видеосы желіде тарап кетті. Қаңтардың басында Ирандағы билікке қарсы наразылықта биліктің күштері наразыларға оқ атқаны айтылады. Ал АҚШ-та орналасқан Human Rights Activists in Iran ұйымы наразылықта 5800-ден аса адам қаза болды дейді.

АҚШ ұшақ тасығыш кемесі Таяу Шығысқа жетті. Иранға соққы жасала ма?

Таяу Шығысқа АҚШ әскерінің шоғырлануы Иранға соққы жасала ма деген сұрақты күшейтті. Вашингтон әлі ешқандай шешім қабылданған жоқ дегенімен, сарапшылар жағдайдың ушығу ықтималдығы жоғары деп отыр.

🔗Толығырақ оқыңыз

⚡Алматы қалалық сотының сот алқасы Мирболат Мырзатайұлына шыққан үкімді өзгеріссіз қалдырды

Прокурор өз сөзінде блогер тілге қатысты “арандату сипатындағы сұрақтар қойып”, “тіл білмегені үшін” мекеме жетекшісін қызметтен босатуды талап етті деді. Ал қорғау жағы бірінші инстанцияда шыққан сот үкімінің күшін жойып, блогерді ақтауды сұрады.

Былтыр қарашада бірінші инстанциядағы сот Мирболат Мырзатайұлын “Алауыздық қоздыру” бабы бойынша кінәлі деп танып, 4 жылға бас бостандығынан айырған.

Блогердің әйелі Гүлшат Бишуинова апелляциялық сот шешіміне келіспейтінін жеткізді

❗Тоқаев еңбек және халықты әлеуметтік қорғау министрі Светлана Жақыпованы қызметінен босатты.

Жақыпова бұл қызметке 2023 жылы қыркүйекте тағайындалған еді.

❗КҚК-ға шабуыл жайлы жазбалардан терроризмге шақыру белгілері анықталған жоқ

Украинаның Каспий құбыр консорциумына (КҚК) шабуылын қолдаған қазақстандықтардың жазбаларында мемлекетке сатқындық пен терроризмге шақыру белгілері анықталған жоқ. Бұл туралы 27 қаңтарда мәдениет және ақпарат министрі Аида Балаева мәлімдеді. Tengrinews сайтының жазуынша, Балаева мұны депутаттық сауалға жауап ретінде айтқан.

🔹Айдос Сарымның шағымы

2025 жылы 17 желтоқсанда депутат Айдос Сарым Бас прокуратура мен Мәдениет және ақпарат министрлігінен Каспий құбыр консорциумына шабуылдауға үгіттегендердің сөзіне "терроризмді насихаттау" және "мемлекетке опасыздық жасау" баптары аясында құқықтық баға беруге шақырған. Сарым депутаттық сауалында Қазақстан үшін аса маңызды инфрақұрылым нысанына шабуылды желіде ашық "қолдайтын және құптайтын жазбалар жарияланып жатыр, бұл ұлттық мүддеге соққы боп тиеді" деген.

Осыдан соң Астананың полиция департаменті "Әлеуметтік, ұлтаралық араздық қоздыру" бабымен қылмыстық іс қозғап, сараптама тағайындаған.

🔹КҚК-ға жасалған шабуыл

29 қарашада Украина теңіз дрондарымен Ресейдің Қара теңіздегі танкерлері мен мұнай инфрақұрылымына шабуыл жасаған. Осы кезде КҚК-ның портына да дрон түскен. Cалдарынан мұнай айдайтын үш құрылғының бірі істен шыққан. Бұл шабуылдан соң Қазақстан Украинаға қарсылық білдірген еді. Украина СІМ шабуыл Қазақстан немесе басқа үшінші елге бағытталмағанын, бар мақсаты – басқыншының әрекетін тежеу екенін айтқан.

КҚК мұнай құбырының ұзындығы – 1500 км. Бұл құбыр арқылы Еуропаға тасымалданатын мұнайдың 80 пайызы Қазақстанда өндіріледі. Мысалы 2024 жылы КҚК арқылы 68,6 млн тонна мұнай экспорттаған, оның 55 млн тоннасы – Қазақстан өнімі.

❗Тоқаевтың жарлығымен Асқарбек Ертаев еңбек және халықты әлеуметтік қорғау министрі болып тағайындалды.

Ертаев 2024 жылдан бері осы ведомствода вице-министр қызметін атқарып келген.

Жаңаөзенде белсенді Әсет Әбішев 15 тәулікке қамалды

Әлеуметтік желіде тараған видеоларға қарағанда, полиция қызметкерлері белсендіні Маңғыстау облысы Жаңаөзенде жүрген кезде бөлімшеге алып кетіп, ізінше сот өткен.

"Белсенділер экстремист емес" тобының хабарлауынша, сот кешкі 8-ден бастап, түнгі 1.45-ке дейін созылған. Сот шешіміне қарағанда, белсендінің қамалуына былтыр сәуірде Степногорск түрмесі маңында Марат Жыланбаевты қолдау шарасы түрткі болған.

Видео: "Белсенділер экстремист емес" тобы

❗Жамбыл облысында сарбаз қаза болды. Не белгілі?

Жамбыл облысында әскери борышын өтеп жүрген сарбаз 27 қаңтарда қаза тапты. Бұл туралы бас прокуратура хабарлады.

Ақпаратқа қарағанда, солдат қарудан өзіне оқ атып алған. Бұл іс бойынша ішкі істер министрлігі сотқа дейінгі тергеу бастап, жедел тергеу тобы құрылған. Солдаттың қазасын бас прокурор қадағалауына алып, Жамбыл облысындағы сарбаз қаза тапқан бөлімшеге прокурордың орынбасары, бас әскери прокурор, ішкі істер министрлігінің әскери-тергеу департаментінің басшысы жіберілген.

🔹Бас прокуратура әскери бөлімшелерді тексермек

23 қаңтарда Өскемендегі әскери гарнизонда да бір сарбаз қаза болған. Құрлық әскері қолбасшылығы сарбаз қарауыл қызметін атқару кезінде өзіне бекітілген қарудан өзіне оқ атып, алған жарақаттан көз жұмды деген.

Әскерде сарбаз өлімі жиілеген тұста бас прокуратура елдегі әскери бөлімдердің қауіпсіздігі тексерілетінін мәлімдеді.

«Әскерге алынған сарбаздардың өмірі мен денсаулығын қорғау, қауіпсіздік мәселесі жақын арада бас прокуратураның арнайы коллегиясында қаралады» деп мәлімдеді бас прокуратура.

🔹Әскери борышты өтеуге қарсылық

Кейінгі кезде Қазақстанда сарбаздар арасында өлім-жітім жиілеп барады. Қазақстан ер азаматтарды әскери борышын өтеуге міндеттейтін елдер қатарында. Сондай-ақ елде келісімшарт негізінде қызмет ету тетігі қарастырылған. Әскердегі қайғылы оқиғалар көбейген тұста толықтай келісімшарт үлгісін көшуге үндегендер болған. Бірақ қорғаныс министрлігі толықтай келісімшартқа өту бюджетке үлкен салмақ түсіретінін айтқан.

Әскери бөлімшелер сарбаздардың өлімін көбіне суицидпен, жеке отбасылық мәселелермен және денсаулық жағдайымен байланыстырады. Бірақ марқұм болған солдаттардың туыстары мұнымен келіспей, балалары кісі қолынан қаза тапты деп күдіктенеді.

t.me/azattyq

❗Қазақстан теннисшісі Елена Рыбакина Grand Slam жарыстарының қатарына енетін Australian Open жарысының жартылай финалына шықты.

"Багет"

Әлемнің бесінші ракеткасы Рыбакина ширек финалда әлемнің екінші ракетасы польшалық Ига Швентекті 7:5, 6:1 есебімен жеңді. Теннисте 6:1 есебін "багет" дейді. Француз наны бір санына ұқсас болғандықтан теннисте 6:1 есебі "багет" деп аталып кетті. Сондықтан желіде жанкүйерлер "Рыбакина Швентекке багет ұстатып жіберді" деп жазып жатыр. Рыбакина алғашқы төрт кезеңде рейтингте өзінен төмен тұрған теннисшілерден басым түсті.

Рыбакинаның статистикасы

Қазақстан теннисшісі биылғы Australian Open-де бірде-бір сет жеңілмеді, бес ойында кортта аз уақыт жұмсады, кейінгі 19 ойынның 18-інде жеңіске жетті. Ол енді жартылай финалда америкалық Джессика Пегуламен (6-ракетка) ойнайды.

Рыбакинаның жетістігі

Рыбакина Australian Open жарысының жартылай финалына екінші рет шықты. Ол 2023 жылғы турнирдің финалында ойнап, Арина Сабаленкаға (Беларусь) есе жіберген. Рыбакина бір рет Grand Slam жарысын жеңген. Яғни, 2022 жылы Лондондағы Wimbledon турнирінде чемпион болған. Ол – Grand Slam турнирін жеңген алғашқы қазақстандық теннисші. Ресейде туған Рыбакина 2018 жылы Қазақстан азаматтығын алған.

Жартылай финалға шығу жетістік пе?

Теннисте жүлде қоры, ұпайы және беделі жоғары төрт турнир бар. Бұл – Аustralian Open, Roland Garros (Франция), Wimbledon (Британия) және АҚШ-тағы US Open жарыстары. Grand Slam деп аталатын додалардың ширек финалына, жартылай финалына шығу жетістік саналады. Себебі берілер ұпайы да, сыйақысы да жоғары. Мысалы, Рыбакина жартылай финалға шыққаны үшін 841 мың доллар және 780 ұпай иеленді. Ал жеңіске жеткен теннисші бұдан да көп қомақты қаржы мен рейтингіне 2000 ұпай алады.