⚡Жаңа Конституцияға өлім жазасына тыйым салу нормасын енгізу ұсынылды

Қазақстанда өлім жазасына тыйым салуды және адамның өмір сүруге деген құқығын жаңа Конституцияға енгізуді ұсынды. Бұл ұсыныс 29 қаңтарда Конституциялық комиссияның отырысында айтылды.

Бұл ұсынысты жасаған депутат, комиссия мүшесі Сергей Пономарёв "адамның өмір сүруге құқығы – жоғарғы құндылық, құқық пен еркіндің іргетасы" деді.

Депутаттың бұл ұсынысын адам құқығы жөніндегі уәкіл Артур Ластаев қолдап, өмір сүруге құқықты Конституцияға бекіту керек деп мәлімдеді.

"Өмір сүру құқығы – әр адамның ажырамас әрі абсолютті хақысы. Ешкім адамды өмірінен айыруға құқығы жоқ" деген норманы бекітуді ұсынамын. Тағы бір маңыздысы "Өлім жазасына тыйым салынады" деген норма, - деді Ластаев.

2003 жылы Қазақстанның сол кездегі президенті Нұрсұлтан Назарбаев өлім жазасына мораторий жариялаған. Ал 2021 жылы қазіргі президенті өлім жазасына тыйым салатын заңға қол қойды.

❗Қазақстанда жаңа Конституция қабылдауды ұсынды

Қазақстанда мүлде жаңа Конституция қабылдау ұсынылды. Бұл ұсыныс 29 қаңтарда Астанада конституциялық комиссияның бесінші отырысында айтылды.

🔹Республикалық адвокаттар коллегиясының төрағасы Мәди Мырзағараев "Өзгерістердің ішінде Конституцияның концепциясын көбірек өзгертетін маңызды бастамалар аз емес. Мұның бәрі - қазіргі қоғам мен уақыттың талабы. Сондықтан конституциялық комиссия аясында жаңа Конституция мәселесін қарастыру керек деп санаймын" деді.

🔹Мәжіліс депутаты Дания Еспаева "қазір талқыланып жатқан реформалар Конституцияға әдеттегідей түзету енгізуден де артық. Қазір біздің алдымызда елдің негізгі заңын өзгерту мен толықтырудан да үлкен іс тұр" дейді.

🔹Ал Айдос Сарым "кешегі отырыста өзгеріс 77 бапты қамтитыны айтылды, бұл дегеніміз негізгі заңның 80 пайызы деген сөз. Сондықтан, жеке өзім және басқа да әріптестерім жаңа Конституция ұабылдау мәселесін көтеруді дұрыс деп санайды" деп мәлімдеді.

Қазақстанның қазіргі қолданыстағы Конституциясы 1995 жылы қабылданған. Бірақ бұл Конституция бірнеше рет өзгерген еді.

Қазақстандағы бірнеше банк шетелге "7 трлн теңге жөнелтпегендерін" мәлімдеді

🔹Қай банктер?

Қазақстандағы "Халық банк", "Алтын банк", "Отбасы банк", "Хоум кредит банк", "Еуразиялық банк", Alatau City Bank, Bank RBK, ForteBank, "Центр Кредит банк", "Нұрбанк" және "Фридом банк" шетелге "7 трлн теңге жібермегендерін" мәлімдеді. Бұл туралы банктерге сілтеп, ҚазТАГ агенттігі хабарлады.

Мәселен, "Отбасы банктың" баспасөз қызметі "бұл біздің банк емес" деген. Alatau City Bank "бұл ақпараттың өзге қатысы жоқ" деді.

🔹7 трлн теңге жайлы ақпарат қайдан шықты?

Кеше, 28 қаңтарда Қазақстан президенті Қасым-Жомарт Тоқаев Қаржылық мониторинг агенттігіндегі жиында елдегі банктердің бірі шетелдерге 7 триллион теңгеден (шамамен 14 млрд доллар) аса қаржыны заңсыз "жөнелткенін" айтқан.

"Жақында [Қаржылық мониторинг агенттігінің] төрағасы [Жанат] Элиманов қазақстандық банктердің бірі арқылы былтыр көршілес елден басқа мемлекеттерге 7 триллион теңгеден астам қаржы "жөнелтілгені" туралы баяндады" деген еді.

Тоқаев 7 трлн теңгені шетелге қай банк жібергенін, ақша қай елдерге шыққанын ашып айтпаған.

Сол күні кешкісін Ақорда сайтынан, елдегі ақпарат агенттіктерден, сайттардан Тоқаевтың 7 трлн теңге туралы сөзі алынып тасталған. Ақорда да, сайттар да ақпарат неге алынғанына түсінік берген жоқ.

⚡АҚШ президенті Трамп Ресей президенті Путиннен Украина қалаларын бір апта атқыламауды сұрағанын айтты.

"Путиннен Киев пен Украинаның басқа қалаларын бір апта шабуылдамауды сқрадым. Ол бұған келісті" деді Трамп Ақ үйдегі министрлермен жиналыста.

Бұған қоса, Трамп Ресей мен Украина арасындағы келіссөзде "үлкен прогресс бар" деп мәлімдеді.

⚡Қазақстан теннисшісі Заңғар Нұрланұлы Australian Open жарысының жасөспірімдер арасындағы турнирінде жартылай финалға шықты. Ол ширек финалда Кай Томпсонды (Гонконг) үш сетте жеңді - 3:6, 7:6 (7:4), 6:4.

Ойын үш сағаттай уақытқа созылды. Үшінші сетте Нұрланұлының аяғының бұлшық еті құрысып, медициналық көмек алуға мәжбүр болды. Дегенмен бұған қарамастан ойынды өз пайдасына шешті.

«Жарыс басында жартылай финалға жету мақсат болған, енді турнирді алуым керек. Себебі US Open жарысында жартылай финалдың дәмін таттым, енді нәтижемді жақсарқым келеді» деді ойыннан соң ол.

17 жастағы теннисші былтыр US Open жарысының жасөспірімдер турнирінде де жартылай финалға дейін жеткен.

🎾Australian Open жарысында үш қазақстандық теннисші қалды. Заңғардан бөлек әйелдер арасында Елена Рыбакина финалда Арина Соболенкомен (Беларусь) кездеседі. Ал Анна Данилина сербиялық Александра Круничпен әйелдер арасындағы жұптық сынның финалынды ойнайды. Үшеуінің де ойыны сенбі, 31 қаңтарда болады.

Ресей пропагандашылары постсоветтік елдерге тағы тиісті. Бұл жолы саясаттанушы Сергей Михеев “Вечер с Владимиром Соловьёвым” бағдарламасында бұл елдер “өз орындарын білуі керек” деп мәлімдеді.

Тоқаев: енгізілетін өзгерістер ауқымына қарасақ, жаңа Конституция қабылдауымыз керек

30 қаңтарда еріктілер форумы кезінде сөйлеген президент Қасым-Жомарт Тоқаев "егер болашақта Конституцияға қандай да бір өзгерістерді енгізу қажет болса, ол референдум арқылы енгізілуі керек" деді.

Тоқаевтың бұл сөзі қазір талқыланып жатқан Конституцияға енгізілетін түзетулерге қатысты ма, жоқ па, белгісіз. Ол өз сөзінде осы комиссияның жұмысын мұқият қадағалап отырғанын айтып, жаңа Конституция қабылдау қажеттігін де алға тартты.

"Кешегі отырыстағы пікірталаста Комиссия мүшелері «Ата Заңға енгізілетін өзгерістер ауқымына қарасақ, жаңа Конституция қабылдауымыз керек» деген байлам жасады. Шын мәнінде, ұсынылған түзетулер жобасы елді институционалдық-құқықтық тұрғыда жаңғыртумен ғана шектелмейді. Сонымен бірге бұл қадам тұтас мемлекеттік жүйені қайта түзуге жол ашады. Түбірімен өзгерген мүлдем жаңа құжаттың бейнесі қалыптасты" деді Тоқаев

Мүлде жаңа Конституция жобасы туралы кешеден бері жиі айтылып жатыр.

❗Кремль Киевке шабуыл жасамауға келіскенін растады

Путиннің баспасөз хатшысы Дмитрий Песков Кремль Трамптың 1 ақпанға дейін Киевке шабуыл жасамай тұра тұру ұсынысымен келіскенін мәлімдеді.

Оның сөзінше, АҚШ президенті мұны "келіссөзді сәтті жүргізу мақсатында" ұсынған.

Бұған дейін Трамп Путиннен Киев пен Украинаның басқа да қалаларына шабуыл жасамауды сұрағанын, Ресей президентінің келіскенін айтқан. Ал Песков тек Киев жайлы айтып отыр.

Ал Харьков пен Херсон облыстарының басшылығы Ресей түнде шабуыл жасағанын мәлімдеді. Херсонда шағын автобусқа Ресейдің соққысынан бір адам қаза тауып, бес адам жараланғаны айтылды.

⚡Қазақстан теннисшісі Елена Рыбакина Australian Open жарысының жеңімпазы. Ол финалда әлемнің бірінші ракеткасы Арина Соболенконы үш сетте жеңді.

Бұл – Рыбакинаның карьерасындағы екінші Grand Slam титулы. Ол 2022 жылы Британияда өтетін Уимблдон жарысында жеңіске жеткен.

Қазақстан теннисшісі Елена Рыбакина Australian Open жарысының кубогын алған сәт.

Фото: Reuters

❗Британиялық экс-теннисші Анннабель Крофт BBC Radio 5 эфирінде "Рыбакина бабында болса, жарақатсыз ойнаса, вирус жұқтырып алмаса, жеңілмейтін ойыншы. Соққылары таза, тіпті дыбысы да бөлек. Соққыларын төмен әрі көлденеңнен ұру ғажап. Допты корттағы сызықтарға да дәл түсіре алады. Доп асырулары да таң қалдырады. Рыбакина әйелдер теннисінде доп асырудан ең мықты теннисші деп санаймын" деді.

Қазақстан теннисшісі Australian Open жарысындағы үшін рейтингіне 2000 ұпай және 2,7 млн доллар сыйақы алады. Келесі аптадан бастап ол әлемдік рейтингіде бесінші орыннан үшінші орынға көтеріледі.