🗣Украинада Нұрлан Сабыровқа қарсы қылмыстық іс қозғалғаны хабарланды

Украинада ресейлік және қазақстандық әзілкеш Нұрлан Сабыровқа қарсы сотқа дейінгі тергеу амалдары басталды. Бұл жөнінде украиналық заңгер Андрей Пронин өзінің телеграм-желісінде хабарлады.

Заңгердің сөзінше, Украина қауіпсіздік қызметі заңгердің шағымынан кейін Сабыровқа қарсы "Басқыншы елге көмектесу" қылмыстық бабы бойынша іс ашқан. Заңгердің айтуынша, алдағы уақытта Нұрлан Сабыровқа іздеу, оның ішінде халықаралық іздеу де жарияланып, экстрадициялау туралы мәселе қозғалуы мүмкін.

💬 Өскеменде ауа ластануына байланысты оқушылар қашықтан оқиды

16 ақпанда Өскемен қаласында барлық мектеп оқушылары қашықтан оқиды. Бұл жөнінде Өскемен қаласының білім басқармасы Instagram парақшасында хабарлады.

Білім басқармасының жазбасына комментарий қалдырған кейбір қолданушылар шешімді құптап "сыртқа шықсаң, ауа жоқ" екенін жазды.

"Көшеде, Абай даңғылы аумағы жағында сасық иіс, газ, жүру мүмкін емес, бірден жөтеле бастайсың" деп жазды almira_pitanie есімді қолданушы.

⚡️️АҚШ әскери күштері Үнді мұхиты аумағында иран мұнайын тасымалдады деген күдікпен америкалық санкциялар тізіміне енгізілген Veronica III танкерін ұстады.

Министрлік мәліметінше, АҚШ әскері кемені Кариб теңізі аймағынан бастап Үнді мұхитына дейін бақылауда ұстаған.

"Кеме президент Дональд Трамп енгізген карантин шектеуін айналып өтуге тырысты", - делінген ресми мәлімдемеде.

Өткен аптада америкалық әскери десант Үнді мұхитында Aquila II танкерін қолға түсірген. Әскери мамандар ол кемені де Кариб теңізінен бастап бақылап отырған. Танкер санкция салынғанына қарамастан, Венесуэла мұнайын Қытайға жеткізуге әрекет жасады деген күдікке ілінген.

❗️Қазақстанның қорғаныс министрлігі 16-18 ақпан аралығында Жетісу және Алматы облыстарында әскери бөлімдер дайындығын тексермек.

"Алматы, Қонаев және Талдықорған қалаларында әскери техниканың қозғалысына байланысты автожолдардың жекелеген учаскелерінде қозғалысқа уақытша шектеулер енгізілуі мүмкін",

– деп хабарлаған министрлік жұртшылық пен БАҚ өкілдерін "жалған ақпаратқа сенбеуге және тек ресми ақпарат көздеріне сүйенуге" шақырған.

Бұл шара кезінде қандай әскери бөлімдер мен әскери техника түрлерінің дайындығы тексерілетіні және олар нақты қай жерге баратыны айтылмаған.

🔸 Польша президенті Кароль Навроцкий Polsat News телеарнасына берген сұхбатында елдің ядролық жобаға қатысуын "қатты қолдайтынын" мәлімдеді.

Оның пікірінше, халықаралық тұрақсыздық күшейіп, қауіпсіздік саласындағы жағдай белгісіз болып отырған шақта Польша бұл бағыттағы жұмысты "барлық халықаралық нормаларды сақтай отырып" бастағаны жөн болмақ.

"Біз – қарулы қақтығыстың дәл шекарасында орналасқан мемлекетпіз. Агрессивті, империялық Ресей федерациясы Польшаға қалай қарайтыны белгілі",

– деді Навроцкий.

Польшада ядролық бағдарлама пайда болса, оған Мәскеудің реакциясы қандай болуы мүмкін деген сұраққа президент Навроцкий "Ресей кез келген нәрсеге агрессивті реакция білдіруі мүмкін" деп жауап қатқан.

🗣Еуропа одағының сыртқы саясат жөніндегі жоғары өкілі Кая Каллас одаққа мүше мемлекеттер үкіметтері Украинаның одаққа кіруінің нақты мерзімін атауға әлі дайын емес деп есептейтінін мәлімдеді.

Калластың бұл пікіріне Латвия президенті Эдгарс Ринкевичс те қосылған.

"Иә, біз Украинаға Еуропа одағында орын барын түсінеміз, иә, көптеген мемлекет басшыларымен әңгіме барысында олар нақты күнді белгілеуге дайын емес-ау деген ой туады",

– деді Латвия президенті.

Ринкевичс Украинаны Еуропа одағына мүше етіп қабылдау "көп жағдайда бейбіт келісімге байланысты" екенін айтқан.

"Бейбіт келісім бола ма, жоқ па? Ресейдің қандай да бір әрекет жасамақшы екенін көріп тұрған жоқпын. Егер Ресей әрекет етпесе, онда келісім де болмайды",

– деді ол.

Сенбі күні өткен Мюнхен қауіпсіздік конференциясы барысында Украина президенті Владимир Зеленский Ресеймен бейбіт келісім жасасу үшін қауіпсіздік кепілдіктерінің бір бөлігі ретінде елдің Еуроодаққа қосылу мерзімін белгілеу қажет екенін тағы қайталады.

🔴Human Rights Watch құқық қорғау ұйымы Қазақстанның конституциялық комиссиясы Конституцияға енгізуге ұсынған өзгертулер билік тармақтары арасындағы тепе-теңдік жүйесіне және адамның негізгі құқықтарына қатер төндіреді деп мәлімдеді.

Қазақстан билігі Негізгі заңға енгізілмек өзгертулерді "заңдылық пен тәртіпті" нығайтуды және саяси жүйені жетілдіруді көздейтін қадам деп сипаттап отыр. Алайда HRW өкілдерінің пікірінше, жобадағы бірқатар тұжырымдар, мәселен, құқықтарды қоғамдық тәртіп пен мораль мүддесі үшін шектеуге мүмкіндік беретін нормалар бұлыңғыр жазылған және олар ой-пікір бостандығын, бірлесу еркіндігін және бейбіт жиналыстар өткізу құқығын өз бетінше шектеу үшін қолданылуы мүмкін.

Құқық қорғаушылар саяси партиялар мен кәсіподақтарға шетел қаржысын пайдалануға тыйым салуды, үкіметтік емес ұйымдарды шетелден қолдау алатыны туралы ақпаратты ашық жасауға міндеттеуді және ереуілге шығу құқығы жөнінде ештеңе көрсетілмеуін сынға алған. Олар мұндай жағдай азаматтық қоғамға қысым көрсетуге әкелуі мүмкін екенін айтқан.

HRW ұйымын жобада некеге тек "ер мен әйел арасындағы одақ" ретінде анықтама берілгені, оған қоса халықаралық құқықтың ұлттық заңнамадан басым екені жазылған баптың алынып тасталуы және омбудсменді тағайындау тәртібінің өзгеруі де алаңдатып отыр. Ұйымның бағалауынша, бұл өзгерістер құқықтық қорғаныс кепілдіктерін әлсіретуі ықтимал. Бұған қоса HRW жаңа жобаға сын айтқандарға қысым жасалып жатқанын мәлімдеген.

🔺Қазақстанның Ұлттық қауіпсіздік комитеті (ҰҚК) Ресейден қуылған әзілкеш Нұрлан Сабыровқа қатысты Қылмыстық кодекстің жалдамалылық туралы бабы бойынша тексеріс бастаған. Бұл туралы комитеттің баспасөз қызметінен алған дерекке сүйеніп Tengrinews сайты жазды.

Тексеріс бастауға белсенді Марат Тұрымбетовтің Қазақстанның Бас прокуратурасына берген арызы түрткі болған. Арызда Сабыров "Легион Вагнер Истра" деп аталатын әскери бөлімшеге 10 мотоцикл табыс еткені түсірілген видео жайлы айтылған. Ол видео былтыр жазда Ресейдің Истра қаласының басшысы Татьяна Викушеваның Telegram-арнасында жарияланған. Қазір ол пост өшірілгенімен, оның көшірмесі бірнеше пабликте сақталып қалған.

Қазақстанның Қылмыстық кодексіндегі жалдамалылық туралы бапта жеті жылдан 12 жылға дейін бостандығынан айыру жазасы қарастырылған. Толығырақ

🗣Қырғыз президенті Садыр Жапаров Ұлттық қауіпсіздік қызметінің бұрынғы басшысы Қамшыбек Ташиевпен кездескенін айтты

"Иә, біз кездестік. Кеше кешке оны қабылдадым. "Демал, досым, денсаулығыңды күт, сабыр сақта" дедім. Досымның айтуынша, ол "ақсақалдармен" де, "көксақалдармен" де сөйлеспеген. Осыған сүйене отырып, ол адамдар досыма айтпай, жасырын жоспар бойынша өз бетінше әрекет еткен деген ой түйдім",

– деді президент мемлекеттік "Кабар" агенттігіне сұхбатында.

Жапаров бұған қоса Ташиев алдағы уақытта қандай да бір мемлекеттік қызметке бармайды деген. Оның "ақсақалдар" дегені – мерзімінен бұрын президент сайлауын өткізуге шақырған ашық үндеу авторлары. Өткен аптада ол үндеуге қол қойғандардың үшеуін – Эмилбек Ұзақбаев, Құрманбек Дыйканбаев пен Бекболот Талғарбековты Қырғызстан ішкі істер министрлігі жаппай тәртіпсіздік ұйымдастыру ісі бойынша ұстаған.

Жапаров 10 ақпанда Ташиевті ұлттық қауіпсіздік жөніндегі мемлекеттік комитеттің төрағасы және үкімет төрағасының орынбасары қызметінен босатқан. Ташиев президентпен қатар елдегі ең ықпалды саясаткерлердің бірі саналып келген еді.
Толығырақ оқыңыз

🗣Пхеньянда "шетелдегі әскери операцияға қатысқандардың" отбасына арналған тұрғын үй ауданы ашылды

Солтүстік Кореяның басшысы Ким Чен Ын Пхеньянда «шетелдегі әскери операцияда» қаза болған сарбаздардың отбасыларына арналған жаңа тұрғын үй ауданының лентасын қиды деп хабарлады Солтүстік Кореяның мемлекеттік KCNA ақпарат агенттігі 16 ақпанда.

Рәсімге Ким Чен Ынның қызы Ким Джу Е, жоғары лауазымды шенеуніктер мен партия мүшелері, қаза болған сарбаздардың отбасы мүшелері және «шетелдегі әскери операцияға қатысқан әскерилер» қатысты.

Ресейлік ТАСС ақпарат агенттігі көше «Ресейдің Курск облысындағы шайқасқа қатысқандардың құрметіне» ашылғанын хабарлады.

📹Қайрат Сатыбалды мен бұрынғы әйелінің пәтер дауы. Ал баспана мемлекетке өтіп кеткен

Нұрсұлтан Назарбаевтың немере інісі Қайрат Сатыбалдының бұрынғы әйелі Асылжан Есенқызы Азаттыққа сұхбат беріп, қазір бастан кешіп жатқан қиындығы жайлы айтты. Оның сөзінше, атына жазылған пәтерінің меншік құқығы өзінің сыртынан өзгеге ауысып, кейін мемлекет иелігіне өтіп кеткен.

🔗Толығырақ көріңіз

🔴17 ақпанда Алматының әкімшілік соты Азаттық тілшісі Мақпал Мұқанқызына "Сайлауға байланысты қоғамдық пiкiрге сауал салуды жүргiзу шарттарын бұзғаны" (120-баптың 3-бөлігі) бұзғаны" үшін 15 айлық есепті көрсеткіш көлемінде айыппұл салды. Журналистің отбасылық жағдайына байланысты судья айыппұл көлемін 30 пайызға (шамамен 45 мың теңге) қысқартты.

Журналисті дүйсенбі күні таңертең Алматының Медеу аудандық прокуоратурасы шақыртып, Мұқанқызына Х әлеуметтік желісіндегі жеке парағына Қазақстанда 15 наурызға белгіленген жалпыхалықтық референдум жөнінде сауалнама жариялағаны үшін әкімшілік жауапқа тартылатынын айтқан.

Оның үстінен Әкімшілік құқық бұзушылық Кодексінің 120-бабы бойынша хаттама толтырып, істі сотқа жіберген.

Сейсенбі күні әкімшілік сот журналистің өкілі заңгер Ольга Диденконың өтінішін қанағаттандырмай, Мақпал Мұқанқызына айыппұл салу туралы шешім шығарған.

🔴Конституция жобасы: билік үгітті күшейтті, сын шетте қалды. Қалима Тәжіқұлмен сұхбат

Билік Конституцияны өзгертуді қолдайтын коалиция құрып, ауқымды ақпараттық науқан бастады. Алайда қоғамдағы пікірталас екі түрлі медиа кеңістікте әрқалай өрбіп жатыр. Мемлекеттік БАҚ ұсынылған өзгерістерді саяси жаңғыру деп таныстырды. Ал құқық қорғаушылар мен сарапшылар кей нормалар азаматтық бостандықтарды шектеуі мүмкін деп алаңдайды. Азаттық медиа-сарапшы Қалима Тәжіқұлмен сұхбаттасты.

🔗Толығырақ оқыңыз