⚡️ Референдум бюллетенін алғаны туралы бөтен кісінің қолы жайлы дауға ОРК өкілінің түсіндірмесі

Алматылық құқық қорғаушы Маржан Аспандиарова 16 наурыз күні референдум учаскесіне барғанында, өзінің орнына белгісіз біреу қол қойып кеткенін көргенін айтып, заң орындары мен Орталық референдум комиссиясына шағым түсіргенін хабарлаған.

17 наурыз күні Азаттық тілшісі Нұргүл Тапаеваның сұрағына жауап берген ОРК төрағасының орынбасары Шавхат Өтемісов ол мәселеден өздері хабардар екенін айтып, "бұл сондағы учаскелік комиссия мүшесінің қатесі" деп түсіндірді.

Өтемісовтің сөзінше, "учаскеге дауыс беруге көп адам келгендіктен ол шатасып, тізімдегі өзге адамға бюллетень берілгені туралы басқа жерге қол қойғызған".

– Біз шұғыл шара қабылдап, ол адамды жұмыстан шығардық. Ал басқа мәселелер біздің құзырымызға жатпайды, тиісті органдар бұл мәселеге жауап береді деп ойлаймын, – деді Өтемісов Азаттық тілшісіне.

Сейсенбі күні Астанада Қазақстан Конституциясы жобасы бойынша жалпыұлттық референдумның түпкілікті қорытындысы жария еткен ОРК өкілдері тіркелген заң бұзу деректері туралы да айтты, алайда ол референдумның түпкілікті қорытындысына әсер ете алмайды деді.

Сейсенбі күні Астанада Қазақстан Конституциясы жобасы бойынша жалпыұлттық референдумның түпкілікті қорытындысы жария етілгеннен кейін өткен брифингте Азаттық тілшісі Нұргүл Тапаева Орталық референдум комиссиясына дауыс беруге дейінгі кезеңіндегі үгіт-насихат науқаны біржақты болды деген сын пікірлерге байланысты сұрақ қойды.

– ОРК үгіт-насихат жұмыстарына араласпайды, біздің негізгі жұмысымыз - хабарландыру, дауыс берушіге қай күні, қай жерде дауыс бере алатыны туралы мәліметті жеткізу. Ал үгіттеу жұмысы басқа органдарға, басқа адамдарға қатысты. Жалпы, Қазақстан Конституциясы бойынша әрбір адам, қоғамдық ұйым үгіт-насихат жұмысымен айналыса алады, оған құқылы, – дeп жауап берді ОРК төрағасының орынбасары Шавхат Өтемісов.

❗Қазақстан президенті Қасым-Жомарт Тоқаев жаңа Конституцияға қол қойды. Бұл туралы Ақорда хабарлады.

❗Израиль Иранның қауіпсіздік кеңесінің хатшысы Әли Лариджани (суретте) мен "Басидж" күштерінің басшысы Гулямреза Солейманиді өлтіргенін мәлімдеді.

Лариджанидің қазасын Израиль қорғаныс министрі Исраэль Кац, Солейманидің өлімін ЦАХАЛ хабарлады. Иран жоғары шенді әскери басшылардың қазасын растаған жоқ.

🔹Лариджани кім? "Басидж" қандай күш?

Лариджани – Ирандағы ислам режиміндегі ықпалды адамдардың бірі. АҚШ пен Израильдің шабуылынан қаза тапқан Иранның рухани көсемі Әли Хаменеидің сенімді кеңесшісі болған. Лариджани Израильді жоюды ашық қолдап, бірнеше рет мәлімдеме жасаған.

Ал "Басидж" - Иран ислам сақшылары корпусының бір бөлігі. Бұл күшке көбіне жастар қосылып, Иранның аймақтарындағы діни заңдардың орындалуын және саяси көңіл-күйді бақылайды.

t.me/azattyq

❗Иран Израильге қарай ракеталар атып жатыр

Иранның мемлекеттік телеарналары "оккупацияланған аумақтарға" қарай ракеталар жіберілгенін хабарлады. Ал Израильдің қорғаныс күштері Иран Израильге қарай көп ракеталар жібергенін, қорғаныс жүйелері зымырандарды қағып түсіру үшін іске қосылғанын мәлімдеді.

⚡Қырғызстанда Ташиевтің ұлын полицияға шақырды

Қырғызстан мемлекеттік ұлттық қауіпсіздік комитетінің бұрынғы төрағасы Қамшыбек Ташиевтің ұлы Тай-Мурас Ташиев полицияға шақырылды. Бұл туралы Азаттықтың Қырғыз қызметіне дереккөздері хабарлады.

ІІМ баспасөз хатшысы Султан Макилов бұл ақпаратты растамады да, жоққа да шығармады. Ол ақпарат кейін берілетінін айтты.

32 жастағы Тай-Мурас Ташиев – Қамшыбек Ташиевтің үлкен ұлы. «Томас и Ко» компаниясы директорының орынбасары. 2021 жылы Жалал-Абад қалалық кенешіне «Ата-Журт Кыргызстан» партиясы атынан депутат болып сайланған. Кейін мандатынан бас тартты.

🔹Тай-Мурас Ташиевтің айналасындағы оқиғалар

Ақпанда желіде бұрынғы вице-премьер Бакыт Торобаев пен бизнесмен Эркинбек Жолдошалиевтің аудиосы тарап кеткен. Аудиода бизнесмен зауыты бар жерді Тай-Мурас Ташиевке бергенін, ол бір миллион долларды төлемей кеткенін айтады. Ал Тай-Мурас Ташиев айыпты жоққа шығарып, зауыт жерін 470 мың долларға сатып алғанын мәлімдеген. Торобаев болса «Қамшыбек Ташиев бизнесмен Жолдошалиевке тиесілі жерді сатып алуға көмектесуді сұрағанын, бірақ келісімге араласпағанын» айтқан.

Тай-Мурастың аты «Кыргызневтегаз» мемлекеттік мекемесіндегі жемқорлық схемасында да аталған.

🔹Қамшыбек Ташиев қайда?

10 ақпанда Қырғызстан президенті Садыр Жапаров Қамшыбек Ташиевті қызметінен босатқан. Осыдан соң ел ішінде Жапаров пен Ташиевтің «тандемі аяқталғаны» айтылған.

Ташиев қызметтен алынғанын Германияда емделіп жатып естігенін айтқан. Кейін ол Қырғызстанға оралып, кейін қайта шетелге кетті. Қамшыбек Ташиев ұлына қатысты ақпараттарға пікір білдірмеді.

⚡Тоқаев рақымшылық жарияланатынын мәлімдеді

Қазақстан президенті Қасым-Жомарт Тоқаев "азаматтар мен мемлекеттік қауіпсіздігіне қатер төндірмейтін барқатар қылмыстық және әкімшілік құқық бұзушылық бойынша тағы да рақымшылық жариялауға болады" деп мәлімдеді.

Бұл туралы ол жаңа Конституцияны қабылдау жиынында айтты.

Тоқаев 2025 жылы маусымда рақымшылық туралы заңға қол қойған еді. Ол кезде 15 мың адам рақымшылыққа ілінетіні айтылған.

Хаменованың түрме жазасы жеңілдетілді

"Пара алды" деп айыпталып, 7 жылға сотталған Атырау облысы әкімінің бұрынғы орынбасары, экс-депутат Бақытгүл Хаменованың түрме жазасы бас бостандығын шектеу жазасына ауыстырылды. Бұл туралы Атырау қаласындағы сотқа сілтеп, "Ақжайық" сайты хабарлады.

Хаменоваға үкім 2022 жылы қарашада шығып, 7 жыл түрме жазасына кесілген. Бірақ кәмелетке толмаған екі баласы бары ескеріліп, жазасын 3 жылдан соң өтеуге міндеттелген. 10 наурызда үш жыл мерзімі аяқталған тұста сот оның жазасын бас бостандығын шектеуге алмастырды.

Сот Хаменованың "үш жылда қоғамдық тәртіпті бұзбағанын, әкімшілік жазаға тартырмағанын, бала тәрбиесімен айналысқанын ескеріп", жазасын жеңілдетті.

Хаменова әкім орынбасары болып тұрған кезде Абай ескерткішіне бөлінген тендерден 4,5 млн теңге пара алды деп айыпталған. Бірақ ол өзіне тағылған айыпты мойындамаған еді.

Хаменова депутат болған кезде елдің сол кездегі президенті Нұрсұлтан Назарбаевқа мақтау сөздер айтып жұрт көзіне түскен.

Украинадағы соғысқа қарсы болып, Қазақстанға қашып келген 17 жастағы Ресей азматы Тимур Турковтың оқиғасы есіңізде ме? Қазақстан билігі оған пана іздеуші тұлға мәртебесін берді. Бұл жөнінде оның адвокаты Айгүл Орынбекова хабарлады.

Пана іздеуші тұлға мәртебесі оның ресми түрде халықаралық қорғауға өтініш берген адам деп танылғанын айғақтайды және ісі қаралып біткенше ол Қазақстан аумағында бола алады.

Ата-әжесімен тұратын жас баланың Батыс Қазақстан шекарасын заңсыз кесіп өткен хикаясын Азаттық былтыр жазған.

❗Қырғызстан ішкі істер министрлігі Тай-Мурас Ташиевтің (мемлекеттік ұлттық қауіпсіздік комитетінің бұрынғы төрағасы Қамшыбек Ташиевтің ұлы) полицияға шақырылғанын жоққа шығарды.

Бұған дейін Тай-Мурас Ташиевтің сұраққа шақырылғаны айтылған.

⚡АҚШ-тың терроризмге қарсы орталығының басшысы Ирандағы соғысқа қарсылық ретінде өз еркімен қызметінен кетті.

АҚШ-тың терроризмге қарсы ұлттық орталығының директоры Джо Кент Ирандағы соғысты қолдамай қызметінен кетті.

Кент Трампқа жазған хатында "Иранда болып жатқан соғысты қолдай алмайтынын", "Иран АҚШ-қа қауіп төндірмегенін" жазған. Ол "бұл соғыс Израильдің лоббиімен басталды" деп санайды.

Ал Трамп Кенттің қызметінен кеткеніне жауап ретінде "Оны ылғи да жақсы жігіт деп санағанмын, бірақ ол қауіпсіздік мәселесінде өте әлсіз екенін білгенмін" деді. Бұған қоса, Трамп "Иран қауіп төндірді" деп санайды.

БАҚ: БҚО-да кәмелетке толмаған қыз баланы зорлады деп күдікке ілінген шенеунік мерт болды

Полицияға сүйенген “Мой город” басылымының жазуынша, 11 наурызда күдіктінің жағдайы кенет нашарлап, Оралдағы облыстық аурухананың реанимация бөліміне жатқызылған.

Дәрігерлер оған бауырдың улануы диагнозын қойған. 16 наурызда ер адам есін жимаған күйі көз жұмған. Полиция сотқа дейінгі тергеу амалдарын бастады.

Басылымның жазуынша, оқиға Шыңғырлау ауданында болған. Алдын ала ақпаратқа қарағанда, полицияға зардап шеккен қыздың әкесі шағым түсірген. Ол шенеунікті айыптап, қызының зорланғанын мәлімдеген. Сол кезде БҚО полициясы ақпаратты растап, аталған факт бойынша “Кәмелетке толмаған қызды зорлау” бабы бойынша қылмыстық іс қозғалғанын айтқан.

Басылымның жазуынша, кейін құқық қорғау органдары тергеу барысында “зорлау” расталмағанын хабарлаған. Ал 16 жастағы қыз бен анасы күдіктіге шағымы жоқ екенін, олардың “қатынасында” мәжбүрлеу болмағанын айтқан.

Алайда басылымның жазуынша, жәбірленуші қыздың әкесі ақпарат шындыққа сәйкес келмейтінін айтқан, ал полиция қылмыстық іс жалғасып жатқанын жеткізген. 27 ақпанда БҚО прокуратурасы күдікті изоляторға қамалғанын хабарлады.

Жыл басынан бері 3 335 қазақ тарихи отанына оралып, қандас мәртебесін алды деп хабарлады еңбек және халықты әлеуметтік қорғау министрлігі.

Келген қандастардың жартысына жуығы – Қытайдан (47,8%), едәуір бөлігі – Өзбекстаннан (43,6%) келген. 2,7% – Түрікменстаннан, 2,2% – Монғолиядан, 2% – Ресейден және 1,7 –басқа елдерден келген.

Қазақстанға келген қандастардың шамамен 58 пайызы – еңбекке қабілетті жаста.

Олар республиканың түрлі өңіріне қоныстанған. 2026 жылдың екі айының қорытындысы бойынша Ақмола, Абай, Қостанай, Павлодар, Атырау, Батыс, Шығыс және Солтүстік Қазақстан облыстарына 569 қандас қоныстанған.

Сурет: Түркіменстан қазақтарының тарихи отанына оралған сәті. 2021 жыл

“Атажұрт” белсенділерінің соты 2 сәуірге шегерілді. Бұл жөнінде адвокат Шынқуат Байжанов хабарлады.

“Менің қорғауымдағы Нағыз Ата жұрт азаматтарының қылмыстық ісін қарау соты 2 сәуір 2026 жылға сағат 10.00- ге қалдырылды” деп жазды адвокат.

Ал сотталушылардың бірі Тұрсынбек Қабидің әйелі Оралхан Әбен Азаттыққа сотты созбалақтап созып жатқанына, күйеуінің денсаулығына алаңдап отырғанын айтты.

“Сотты созбақтап кетті. 19-20 наурыз жалғасады деп еді. Енді сәуірдің 2-сі деп өзгертті. Мен күйеуімнің денсаулығына қатты алаңдаймын. Күйеуім науқас, қан қысымы көтеріліп, жүрегі қысылып, аяғы ауырып жүр. Құқық қорғау ұйымдарынан көмек сұраймын” деді ол.