Ясмина Токсанбаева Азия ойындарында марафондық спорттық жүрістен жарысты бірінші болып аяқтады. Алайда кейін оның нәтижесі аяқ-киіміне қатысты наразылықтан соң жойылып, спортшы жарыстан шеттетілді. Жағдайдың анық-қанығы.

Қазақстан басшысы Берлинге ресми сапармен барған күні, 28 қыркүйекте немістің Handelsblatt басылымында жарияланған авторлық мақаласында Германияға стратегиялық маңызы бар шикізат саласындағы ынтымақтастықты кеңейтіп, бірлескен өндірістік тізбектер құруды ұсынған.

Оның айтуынша, Қазақстан қазір Еуропа экономикасы үшін стратегиялық маңызы бар шикізаттың 34 түрінің 21 түрін өндіріп отыр, солардың қатарында энергетика, машина жасау, микроэлектроника және цифрлық технологияларда қолданылатын литий, кремний, кобальт, ниобий, вольфрам және мыс бар.

Тоқаев Германияға шикізатты сатып алумен шектелмей, геологиялық барлау мен өндіруден бастап, өңдеу, компоненттер шығару және материалдарды қайта пайдалануға дейінгі бірлескен өндірістік тізбектер құру мүмкіндігі барын айтады.

Энергетика саласында Қазақстан Еуропа одағы шеттен алатын мұнай көлемінің шамамен 13 пайызын және табиғи уранның 20 пайызын қамтамасыз етеді, 2025 жылы Қазақстаннан Германияға жеткізілген мұнай көлемі 10 миллион тоннадан асты деп жазады автор.

Көлік саласында, Тоқаевтың айтуынша, Қытайдан Еуропаға жөнелтілетін жүктердің құрлықтағы транзитінің шамамен 85 пайызы Қазақстан аумағы арқылы өтеді. Ол сондай-ақ неміс компанияларын Қазақстандағы әуе жүк тасымалы мен әуе хабтарын дамытуға белсендірек қатысуға шақырған.

Тоқаев металлургия, мұнай-химия, тамақ өнеркәсібі, теміржол машина жасау, жаңартылатын энергетика және цифрландыру салаларын да ынтымақтастықтың перспективалы бағыттары ретінде атады. Оның сөзінше, Қазақстан Германия нарығына өңделген өнімнің 80-нен астам түрін қосымша жеткізе алады.

🚫💸 Путин ЕАЭО елдеріне, Өзбекстан мен Тәжікстанға қолма-қол ақша алып шығуға шектеу қойды

Ресей президенті Владимир Путин жеке тұлғаларға Ресейден Еуразия экономика одағы елдеріне (Армения, Беларусь, Қазақстан мен Қырғызстан), сондай-ақ Өзбекстан, Тәжікстан және Әзербайжанға бір миллион рубльден (11 800 доллар) асатын қолма-қол ақша алып шығуға тыйым салды.

Мұндай шектеу Путин 29 қыркүйекте шығарған жарлықта жазылған. Заңды тұлғалар мен жеке кәсіпкерлерге Ресейден әлгі аталған елдерге рубль экспорттауға тыйым салынады.

Бұған дейін жеке тұлғаларға өзімен бірге алып шығатын қолма-қол ақшаға қойылған шектеу 100 000 АҚШ долларына (шамамен 8,5 миллион рубль) тең еді.

Бір миллион рубльден асатын сомадағы ақшаны әлгі елдерге тек халықаралық әуежайлар арқылы алып шығуға болады, бірақ ол үшін банк құжаттарының көшірмелері немесе шоттан ақша алынғанын растайтын басқа құжаттар болуы шарт.

2022 жылдың наурыз айынан бастап Ресейден шетелге шыққанда әр адамға 10 мың АҚШ долларынан асатын көлемдегі шетел валютасын алып шығуға шектеу қойылған. Ал Путиннің жарлығында көрсетілмеген елдерге қолма-қол ақшаны, егер декларацияда көлемі атап жазылған болса, бір миллионнан асса да алып шығуға болады деп жазады Азаттықтың Орыс қызметі.

🇰🇿Азия ойындарындағы қазіргі нәтиже қандай?

🔹Жалпы есеп

Жапонияда өтіп жатқан Азия ойындарында Қазақстан қазірше 9 алтын, 14 күміс, 25 қола медальмен жалпы есепте 8-орында келеді. Өткен аптада төртінші орында тұрған Қазақстанды қазір жалпы есепте Өзбекстан (14 алтын), Таиланд (12 алтын), Бахрейн (11 алтын), Иран (10 алтын) озды. Ал алғашқы үштіктегі Қытай (143), Жапония (45), Оңтүстік Корея (24) басқа елдерден ұзап барады.

🔹29 қыркүйектегі нәтиже

Бүгін, 29 қыркүйекте Қазақстан бір күміс, екі қола медаль иеленді. Жеңіл атлетикадан биіктікке секіруде Кристина Овчинникова күміс жүлдегер атанса, кураштан Арайлым Шегенова және стенд атудың трап күрінен Қазақстан ерлер құрамасы қола медаль алды.

Сондай-ақ бокстан Айбек Оралбай (+90 кг) финалға шықты. Ол жартылай финалда үндістандық Нарендеруді жеңді. Финалда өзбекстандық Жахонгир Зокировпен рингіге шығады.

🔹Қазақстанның тоғыз алтынын кімдер алды?

🥇Алексей Луценко – велоспорт, ерлер, жекелей жарыс
🥇Алексей Луценко – велоспорт, ерлер, топтық жарыс
🥇Рината Сұлтанова – велоспорт, әйелдер, топтық жарыс
🥇Софья Берульцева – каратэ
🥇Жоламан Биғабыл – каратэ
🥇Қадырбек Шынбаев – ММА
🥇Еркінқали Бүркіталин – ММА
🥇Владислав Яковлев/Иван Чернухин – академиялық есу
🥇Семсерлесуден Қазақстан ерлер құрамасы (шпага)

Полиция Маңғыстаудағы қайғылы оқиға туралы “жалған ақпарат таратқан” төрт адам жауапқа тартылғанын хабарлады

ІІМ баспасөз қызметінің хабарлауынша, Д.С. және Г.С. есімді екі адам Facebook-та әскери қызметкер А.А. туралы ақпарат жариялаған.

Полицияның хабарлауынша, олар жазбада “әскери қызметкер жолдасын құтқарып, өз күшімен жағаға шыққанын” және “оның ерлігі мен құтқарылу жағдайы әдейі жасырылып” отырғанын жазған. Олар ақпаратты туыстары мен желіден алғанын айтқан.

“Аталған мәліметтер шындыққа сәйкес келмейді және қорғаныс министрлігі ресми түрде жоққа шығарды” деп жазылған полиция хабарламасында.

Полицияның хабарлауынша, бұған қоса, Шымкент және Көкшетау тұрғындары да әкімшілік жауапқа тартылған. Полицияның жазуынша, Шымкент тұрғыны тағы бір әскери қызметкердің қаза болғаны, оның туыстарына қысым көрсетіліп, ақша талап еткен деген жалған ақпарат таратқан. Көкшетау тұрғыны да соған ұқсас жазба жариялаған. Төрт адамның әрқайсысына 20 АЕК көлемінде айыппұл салынған.

25 қыркүйекте Ресей президенті Владимир Путин Еуропада орыс тілді халықтың құқығы шектеліп жатқанын айтты. Бірақ ол Ресей ешқандай әскери операция дайындамайтынын, бейбіт жолмен әрекет ететінін тағы қайталады. Дәл осы күні кремльшід «РИА Новости» сайты «Ресейді тағы бір арнайы әскери операция күтіп тұр» деген тақырыппен мақала жариялап, кейін алып тастады. Мақалада Литваға соққы жасау сценарийлері талданған.

Украина Херсон облысының Ресей басып алған аумағынан 14 баланы қайтарды

Украина Херсон облысының Ресей әскеріне қарайтын аумағынан 14 баланы қайтарды. Херсон облысы әскери әкімшілігінің жетекшісі Александр Прокудиннің сөзінше, 6-17 жас аралығындағы 4 ұл бала мен 10 қыз бала қайтарылған.

Прокудин оралғандардың арасында Ресей әскері әскери тіркеуге тұруға мәжбүрлеген 16 жастағы жасөспірім барын да айтты. Жыл басынан бері Херсон облысының оккупацияланған бөлігінен 204 бала қайтарылды деді ол.

Украина билігінің ресми мәліметі бойынша, 2022 жылдың 24 ақпанынан бері Украина аумағынан Ресейге 200 мыңнан астам бала депортацияланған. Bring Kids Back UA бастамасы аясында Украина 2600-ден астамын қайтара алды.