СІМ: Непалдағы апаттан кейін іздестірілген үш қазақстандықтың бірі табылды

Тамыздың соңында Непалдағы жойқын тасқыннан кейін "із-түзсіз жоғалғандардың" қатарында болған Қазақстан азаматы табылды. Ал екі қазақстандықтың қайда екені белгісіз деп хабарлады 8 қазанда Қазақстан сыртқы істер министрлігі.

"Бұған дейін із-түзсіз жоғалғандар арасында Қазақстаннан үш турист болған: екеуі Непалдан, біреуі Тибеттен. Непалда болғанда хабар үзілді делінген бір азаматымызға хабарласа алдық. Ол апат болған аймаққа сапарын шегерген. Қазір Қазақстанда" деді министрліктің ресми өкілі Жанболат Үсенов.

Ал қалған екі қазақстандықтың туыстары ДНҚ-талдауы сияқты адамды анықтауға көмектесетін процедуралардан өткен.

5 қазанда Непал билігі іздеу-құтқару операциясын ресми түрде аяқтады. Ал Тибетте іздеу әлі жалғасып жатыр. Непал мен Қытай шекарасы аумағында болған жойқын тасқыннан қаза болғандар 1,5 мыңнан асты. 5 мыңнан астам адам із-түзсіз жоғалған.

Киев мэрі тұрғындарға мүмкіндігінше қаладан кетуге кеңес берді

Киевтің мэрі Виталий Кличко Ресей әскерінің шабуылына байланысты қала тұрғындарын уақытша астанадан кетуге шақырды.

France-Press ақпарат агенттігіне берген сұхбатында Кличко қала “тірі қалу” режиміне көшетінін айтып, Ресей әскері маңызды инфрақұрылым нысандарын соққылап жатқандықтан
жаппай дағдарыс қаупі туындағанын жеткізді.

8 қазанда күндіз және кешке Ресей әскері Киевтегі ең ірі энергетика нысандарына шабуылдаған. Бұл жөнінде Украина энергетика министрі Денис Шмыгаль хабарлады, бірақ жай-жапсарын айтпады.

Қалада жарық өшіп, метроның жұмысы уақытша тоқтатылды. Бейсенбі күні кешке Киевтің кәріз жүйесі уақытша істемей қалғаны белгілі болды.

“Қанша жақсы дайындалсақ та, егер әуе қорғаныс жүйесі жұмыс істемесе, жағдайымыз мүшкіл болуы мүмкін” деді Кличко AFP агенттігіне.

Дегенмен Киев мэрінің сөзінше, мәселе толық эвакуация жөнінде болып отырған жоқ, себебі бұл “қаңыраған қалаларды алу үшін Путин күткен ең жақсы сценарий болмақ”.

Журналист Асхат Ниязов Бұтақты шатқалында қалай құрылыс жүріп жатқаны жөнінде видео жариялады.

“Алматы тауларында тұманда орманды жойып жатыр. Бұл “Бұтақты”. Көбі ол жақта ағашты қалай кесіп жатқаны көрген. Егер шабылған ағаштардың ізімен жүрсеңіз, мынадай көрініске тап боласыз. Құрылыстың паспортын таба алмадық. Құрылысшылардың өздері не салып жатқанымызды өзіміз де білмейміз деп жауап берді” деп жазды журналист.

Алматы әкімдігі Бұтақтыда тау кластері дамытылады деп мәлімдеген. Әкімдіктің мәліметінше, мұнда қанатты жол станциясы салынып, инженерлік желі төселеді.

Үкімет Алматы тау кластері туризмін дамытудың 2025-2029 жылдарға арналған кешенді жоспарын былтыр ақпанда бекіткен. Жоспарға қарасақ, Іле-Алатауының Алматы жақ бөлігіндегі Кімасар, Бұтақты және Қотырбұлақ шатқалдары арқылы "Шымбұлақ" тау шаңғысы курорты, "Oi-Qaragai Lesnaya Skazka" таудағы курорт-отелі және "Pioneer" тау сауықтыру кешені өзара байланысып жатқан туристік кеңістікке айналады.

Бұтақты – ерекше қорғалатын Іле Алатау ұлттық паркі аумағында орналасқан. Бұған дейін жергілікті экологтар бұрын құрылыс салу үшін ерекше қорғалатын аумақтың статусы өзгертілуі керек болған болса, қазір осы жобаға бейімдеп "тиісті заңнамалық өзгерістер" енгізілгенін, ол “ерекше қорғалатын аумақта” да құрылыс жүргізуге мүмкіндік беретінін айтып алаңдаушылық білдірген.

Жобаға қатысы бар компаниялар барлық "экологиялық талаптарды сақтауға" уәде берген, алайда экологтар бұған күмән келтіреді.

Рубио: Ресейдің Украинадағы соғысы аймақтық қақтығысқа ұласуы мүмкін

АҚШ мемлекеттік хатшысы Марко Рубио Ресейдің Украинаға қарсы соғысы тығырыққа тірелгенін, алайда тараптардың бірі жағдайды өзгерту үшін қауіпті әрекеттерге барса, қақтығыс кең ауқымды аймақтық соғысқа ұласуы мүмкін екенін ескертті.

НАТО мүшелері – Исландия, Грекия және Португалияға жасаған сапарының соңғы аялдамасы Лиссабонда сөйлеген Рубио Вашингтон соғысты түптің түбінде келіссөз арқылы реттеу қажет деп санайтынын және дипломатиялық күш-жігерге жәрдемдесуге дайын екенін айтты.

Рубио бұл сөзді айтқанда Украинаның Краматорск қаласына ондаған адамның қазасына әкелген шабуыл жасалды. Жергілікті биліктің хабарлауынша, 8 қазан күні қаладағы екі автобусқа жасалған соққыдан кемі 33 адам мерт болған.

Азаттық тілшісі мемлекеттік хатшыдан Ресейдің Украинаға шабуылы және НАТО-ның шығыс шекарасындағы қауіпсіздік жайлы сұрады. Рубио бұл қақтығысты тығырыққа тірелген "өте қауіпті соғыс" деп атап, мұндай соғыс әдетте келіссөзбен немесе эскалациямен аяқталады деді.

Бірінші нұсқа қос тараптан күрделі компромисті қажет етеді. Екінші нұсқада не Ресей, не Украина әскери тепе-теңдікті өзгерту үшін соғысты ушықтыруға баруы ықтимал. "Бұл өте қауіпті" деді Рубио.

Қазақстанда Ресей өтінішімен ұсталған Украина азаматы Любовь Рожанская босатылды

Бұл жөнінде оның адвокаты Алексей Прянишников “Неміс толқынына” хабарлады. Рожанская Еуроодақ елдерінің біріне ұшып кеткен.

Басылымның жазуынша, Рожанскаяны босатуға Украина билігі, атап айтқанда сыртқы істер министрлігі мен омбудсмен күш салған. Бұған дейін адвокат “Қазақстан Украинамен Рожанская бойынша конструктивті диалог жүргізіп жатқанын” хабарлаған еді.

1 қазанда Қазақстан билігі өзінің немересін Украинаға алып кетпек болған Украина азаматы Любовь Рожанскаяны ұстаған. Ресейде оны бала ұрлауға әрекеттенді деп айыптаған. Ақпаратқа қарағанда, Ресейдегі қызы мен оның екінші күйеуі “өзара келісімге сәйкес” Рожанскаяға немересін Астанаға ұшаққа отырғызып жіберуі керек болған. Немересін Ресей жағы ақыры жібермеген.

Қазақ-қырғыз музыкасындағы трендке не себеп?

Биыл Бейбітшілік бойынша Нобель сыйлығы БҰҰ-ның Адам құқығы бойынша бұрынғы жоғарғы комиссары Нави Пиллэйге – бейбітшілік пен халықаралық құқықты нығайтуға күш салғаны үшін берілді.

Ауғанстанда миллиондаған адам ас-ауқатын әрең тауып отыр. Жоқшылықтан қысылғандардың кейбірі тіпті бүйрегін сатуға мәжбүр.

Алматы түбінде жануарларды ұстайтын орын иесін өлтіріп кеткен. Полиция тергеу жүріп жатқанын хабарлады

Алматы облысында бұралқы иттерді ұстайтын "Твардовский дом" негізін қалаушы Владимир Тепляковтың өлімі тергеліп жатыр. Полиция департаменті қылмыстық іс қозғалғанын хабарлады.

"Қатысты тұлғаларды ұстауға бағытталған тиісті тергеу және жедел-іздеу шаралары жүріп жатыр. Қазіргі кезде оқиғаның жай-жапсары анықталып жатыр" деп жазылған облыстық полиция департаментінің хабарламасында.

Тепляковтың қазасы туралы жазбалар әлеуметтік желіде 8 қазанда пайда болды. Қолданушылар оның қазасына орай көңіл айтып жатыр. Ізінше желіде оны өлтіріп кеткені жөнінде ақпарат шықты.

Владимир Тепляков он жылдан астам уақыт бойы "Твардовский дом" орнын азық-түлік және өзге де заттармен қамтамасыз еткен. Қазір ондағы иттер мен мысықтардың күтімсіз қалғаны хабарланды. Қыс жақындаған тұста "Твардовский дом" үйін сақтап қалу үшін қаражат та жинастырылып жатыр.

7-9 қазан арасында Ресейдің Украинаға жасаған әуе шабуылдарынан 70-тен аса адам қаза тауып, 200-ден аса кісі жараланды. Жапа шеккендер мен марқұмдар арасында балалар бар. Қыс жақындаған сайын Ресейдің энергетика нысандарына жасаған шабуылдарынан Украина жарық пен жылусыз қала ма деген қауіп күшейіп отыр.

Ресейде Қазақстан азаматын Украинаға тыңшылық жасады деп айыптап отыр

Қазақстан азаматы Роман Беловқа Ресейде "Украинаға тыңшылық жасады" және "экстремизмді қолдады" деген айып тағылып отыр. Адам құқықтары мен заңдылықты сақтау жөніндегі Қазақстан халықаралық бюросының ақпаратына қарағанда, ФСБ-ның Орынбор облысы бойынша басқармасының тергеу бөлімі тергеуді аяқтады.

Роман Белов 47 жаста. Ол Байқоңырда татуаж салумен айналысқан. Құқық қорғаушылардың айтуынша, 2025 жылы қарашада оны "фитнес-орталықты әрлеуге көмектес" деп алдап, Орынборға апарған. Өткізу бекетінде басына қара қап кигізіп, асфальтқа құлатып, ұрып-соққан, бұдан соң тергеу изоляторына жеткізген. Содан бері 11 айдай уақыт жертөледегі жалғызадамдық камерада отыр.

Ресей тергеушілерінің болжамы бойынша, Белов белгісіз адамға қандай да бір кесте берген. Қылмыстық іс құпияланғандықтан тағылған айыптың қаншалықты негізді екенін тексеру мүмкін емес.

Тамызда құқық қорғаушыларға Беловтың оқиғаны сипаттап жазған хаты тиді. Онда ол тергеу изоляторындағы жағдайды баяндайды.

«2025 жылдың 18 қарашасында "Ресей қарулы күштері туралы ақпаратты Украина арнайы қызметінің өкілдеріне жеткізу мақсатында жинады және тыңшылық жасады" деген күдікпен қылмыстық іс қозғалды. Мен таңғалғаннан мырс етіп едім, мені бірден жан-жақтан соққылады. Айыптауды жоққа шығарып, мұны істемедім деп айттым. Басымнан ұрды, сонда да жоққа шығара бердім. "Өмір бойы түрмеде отырасың..." деп қорқыта бастады, қорлады, намысыма тиді. Егер мойындамасам, әйелім түрмеге түсетінін, кем дегенде балаларым балалар үйіне жіберілетінін айтты»

Саят Исанов Қазақстан қарулы күштері арнайы операциялар күштерінің қолбасшысы лауазымына тағайындалды. Тиісті өкім Ақорда сайтында жарияланды.

Бұған дейін осы қызметті атқарған Айдос Мырзахметов қорғаныс министрі болып тағайындалған еді. Каспийде 14 сарбаздың өмірін қиған ауыр оқиғадан кейін қорғаныс саласында басшылар ауыстырылған.

АҚШ Ресеймен дизель бойынша операцияларға рұқсат берді

9 қазанда АҚШ қаржы министрлігі ресейлік дизельмен операция жүргізуге рұқсат беретін бас лицензия шығарды. АҚШ бұған дейін мұндай операцияларға санкциямен тыйым салған еді. Шетелдік активтерді бақылау басқармасының (OFAC) лицензиясы ресейлік дизельді сатуға, тасымалдауға, түсіруге, импорттауға рұқсат береді. 2027 жылдың 7 сәуіріне дейін күшінде болады.

Дегенмен лицензия қаражатты Ресей орталық банк, Ресей ұлттық әл-ауқат қоры немесе қаржы министрлігінің Америкадағы қаржы мекемелеріне аударуға рұқсат бермейді.

АҚШ-тың шешімін Украина сынады. Ал Кремль бұл “ғаламдық экономикаға оң әсер ететінін” мәлімдеді.

"Қазатомөнеркәсіп" ресейлік компанияға уран сатудан бас тартты, бірақ Қытайға тасымалдауға келісті

Қазақстанның "Қазатомөнеркәсіп" ұлттық уран компаниясы ресейлік "Росатомға" қатысы бар Uranium One Group кәсіпорнына табиғи уран тасымалдау туралы шешімді мақұлдамады. Тиісті шешімді "Қазтомпромның" акционерлері 7 қазан күнгі кезектен тыс жиналыста қабылдады деп хабарлады компания.

Дауыс беруге қатысқан акционерлердің 88,4 пайызы жиналыс кезінде дауыс беруден қалыс қалды. Қатысушылардың 5,39 пайызы келісімшартты қолдап дауыс берді, ал 6,27 пайызы қарсы болды.

"Қазатомөнеркәсіп" жай-жапсарын ашып жазбады. Жиналысқа қатысушылардың Uranium One Group компаниясымен жасалуы мүмкін келісімге не үшін қарсы болғаны белгісіз.

Дегенмен сол акционерлер жиналысында тағы бір келісім – қытайлық State Nuclear Uranium Resource Development Company Limited (SNURDC) компаниясымен келісім мақұлданды. "Қазатомөнеркәсіп" уран концентратын сатып алу-сату туралы келісімшартты мақұлдады. Уран мен отын жинақтарын жеткізуге жауапты қытайлық SPIC еншілес компаниясымен жасалған келісімнің құны жарияланбады.

Каспийде қаза болғандардың отбасына берілетін өтемақы мөлшері жарияланбайды

Маңғыстау облысында оқу-әскери жаттығу кезінде қаза болған немесе жарақат алған әскери қызметкерлердің отбасына берілетін өтемақы мөлшері, сонымен бірге көмек алушылардың жеке деректері олардың туыстарының өтініші бойынша және құпиялылықты сақтауға байланысты жарияланбайды. Бұл туралы Қазақстан Халық кеңесінің мүшесі және Маңғыстау облысы қоғамдық кеңесінің төрағасы Бекмұрат Жүсіпов мәлімдеді деп жазды Lada.kz.

«Отбасы мен туыстарының шешіміне түсіністікпен қарауларыңызды сұраймыз. Комиссияның жұмысы аяқталды. Түскен барлық қаражат белгіленген рәсімдерге сәйкес бөлінді және тиісті шешімдер құжатталды» деді ол.

Ташкентте 10 мың долларын жоғалтып алған қазақстандыққа ақшасы қайтарылды

Ташкентке көлік сатып алуға барып, сондағы метрода 10 мың долларын жоғалтып алған Қазақстан азаматының ақшасы толық қайтарылды деп хабарлады Өзбекстан ішкі істер министрлігінің баспасөз қызметі.

Тергеушілердің айтуынша, Ташкент метросында станциялардың бірінен асығыс түсіп бара жатқанда Қазақстан азаматы сөмкесінен 10 мың доллар түсіп қалғанын байқамаған. Ақшасы жоғын көлік базарына барғанда байқап, жақын маңдағы полиция бөлімшесіне жүгінген.

Ақша біраз уақыт жерде жатқан, ешкім оған мән бермеген. Кейінірек Ташкент метросының баспасөз қызметі жолаушының ақша тауып алғаны көрінетін видео жариялады. Құқық қорғау органдары бақылау камераларының көмегімен иесін анықтап, ақшасын қайтарды. Face ID жүйесі де ақша иесін табуға көмектескен.

Журналист-зерттеуші Болот Теміров Лондонда халықаралық The Albies сыйлығын алды

Қырғызстан соты "экстремистік қызметпен" айналысты деп таныған журналист-зерттеуші Болот Теміров "Әділет үшін" қоры тағайындаған халықаралық The Albies International сыйлығын алғанын хабарлады. Азаттықтың Қырғыз қызметінің хабарлауынша, марапаттау рәсімі 7 қазанда Лондонда өтті.

Теміров бұл марапат өзінің туған елі Қырғызстанда материалдары "экстремистік" деп танылған Temirov Live және "Айт, айт десе" жобалары жұмысының халықаралық деңгейде танылғанын білдіреді деді.

Халықаралық Albies сыйлығы Болот Теміров пен оның әйелі, журналист-зерттеуші Махабат Тәжібекқызына берілді. Алайда Тәжібекқызы марапаттау рәсіміне қатыса алмады. 25 тамызда Бішкек соты оған Лондонға баруға рұқсат бермеді.

The Albies сыйлығын 2022 жылдан бері актер Джордж Клуни мен оның әйелі – адам құқығы бойынша адвокат Амаль Клуни негізін қалаған "Әділет үшін" қоры тағайындайды. Сыйлық адам құқығы мен әділетті қорғау саласында істеген тұлғаларға беріледі.

Трамп Украинаға "жаңа президент керек" деп санайды

Ақ үй маңында журналистердің сұрақтарына жауап берген АҚШ басшысы Дональд Трамп Украина президенті Владимир Зеленскийді Ресейдің мұнай өңдеу зауыттарына соққы жасағаны үшін сынады. Трамптың айтуынша, соққының салдарынан дизель отыны қымбаттаған. Ол Зеленскийді сонымен бірге соғысты аяқтағысы келмейді деп те айыптады.

“[Украинаға] келісім жасай алатын жаңа басшы табуға кеңес бергенмін. Ол көп келісім жасай алған болар еді, бірақ қандай да бір себептен ешқашан жасаған емес” деді Трамп.

Трамп сонымен бірге Вашингтон Киевтен Ресейдің мұнай өңдеу зауыттарына соққыны доғаруды сұрағанын растады.

“Зеленскийге “не істегің келсе, соны істе, бірақ дизель отынына соққы жасамашы” дедік. Ал ол не істеп жатыр? Алады да, дизель отынына соққы жасайды. Ол барлығын істей алады, бірақ сол нәрсені істей алмайды” деді Трамп

Yandex-тің дата орталықтарына дрон шабуылынан кейін Қазақстанда компанияның қызметінде ақау пайда болды

Жексенбі, 11 қазанда Қазақстанда Yandex-тің бірқатар қызмет түрлері істемей қалды.

“Достар, қазір кей сервисімізде техникалық мәселе туындап, олардың жұмысы уақытша қиындауы мүмкін. Бұл жағдайдан хабардармыз. Мамандарымыз сервистер жұмысын мүмкіндігінше тезірек қалпына келтіру үшін бар күшін салып жатыр. Қолайсыздық үшін кешірім сұраймыз.” деп хабарлады Яндекс Go Qazaqstan жексенбі күні.

Қолданушылардың айтуынша, қазір Қазақстанның кейбір қалаларында Yandex taxi қызметін пайдаланғысы келгендер қосымшаны ашып, көлікке тапсырыс бергісі келсе, “көлік жоқ” деген жазу шығады.

Бұған дейін ақпарат құралдары Ресейде Yandex-тің дата орталықтарына украин дрондары шабуыл жасағанын хабарлаған еді. Sota-ның жазуынша, 9 қазанға қараған түнгі соққыдан компанияның Калугадағы дата орталығы бүлінген. Оның алдында компанияның Рязань облысындағы дата орталығына шабуыл жасалған.