☄️ Ресей шабуылдарынан Украинада жеті адам қаза тапты: төртеуі - Харьковте, үшеуі Ивано-Франковскіде

Жексенбі күндіз Харьковтің Немышля ауданында үйінді астынан шығарылған 35 жастағы әйел ауыр жарақаты салдарынан кейін ауруханада қайтыс болды деп хабарлады қала әкімшілігінің басшысы Игорь Терехов.

Кешке қарай Ресей әскері Харьковке қайта шабуылдап, қала маңындағы азық-түлік дүкенін нысанаға алған. Шабуылдан 16 жасар жасөспірім, 19 жастағы қыз бен 51 жастағы әйел қаза болған.

Харьков облысы аумағында ондаған ғимарат және автокөліктер бүлінді деп хабарлады аймақ әкімшілігінің төрағасы Олег Синегубов.

Ивано-Франковскіде ресейлік дрондар соққысынан үш әскери қызметкер қаза тауып, тағы үшеуі жараланғанын қала мэрі Руслан Марцинкив мәлімдеді. Шабуылдан көпқабатты тұрғын үйлер мен коммерциялық нысандар зақымдалған.

🇰🇿🇧🇪 Бельгия королі Филипп жұбайымен Қазақстанға мемлекеттік сапармен келді

Жексенбі күні Қазақстан президенті Қасым-Жомарт Тоқаев елге мемлекеттік сапармен келген Бельгия королі Филипп пен Матильда патшайымды Астанада әуежайдан қарсы алды. Бұл туралы Ақорданың баспасөз қызметі хабарлады.

Ұшу алаңында меймандарды құрмет қарауылы сап түзеп қарсы алған. Әуежайда өткен қысқа әңгімеде Тоқаев король мен жұбайының бұл сапары екі ел арасындағы қарым-қатынасты одан әрі нығайту үшін маңызды екенін айтқан.

"Қазақстанға қош келдіңіздер. Сапарларыңыз мемлекетіміздің дамуындағы өте маңызды кезеңмен тұспа-тұс келіп отыр. Жалпы, еліміз өркендеп, экономикасы ілгерілеп келеді. Сіздердің сапарларыңыз екіжақты қарым-қатынасқа тың серпін береді деп айтуға болады" деген Тоқаев.

Король Филипп Қазақстан басшысына қонақжайлығы үшін алғыс айтып, жоғары деңгейде өтетін келіссөздер табысты болады деген сенім білдірген.

"Ұшақ трапынан қазақ жеріне қадам басқан сәттен бастап көрсетілген сый-құрмет үшін сізге алғыс айтамын. Үш күндік сапармен келгенімізге қуаныштымыз әрі еліңізбен жақынырақ танысамыз деп сенемін" деген Бельгия королі.

🇺🇸🇺🇦 Трамп Ресей мен Украина "энергетикалық бітімге" келгенін айтты. Зеленский оны тосын жаңалық деп атады

АҚШ президенті Дональд Трамп Ресей мен Украина арасында "энергетикалық бітім" күшіне енгенін жариялады. Ол өзінің Truth Social әлеуметтік желісіндегі парақшасында бұл келісімге "екі тарап та келісті" деп жазып, "Оны бұзбаңыздар!" деп ескертті. Алайда ол бұл бітімнің нақты шарттары мен нені көздейтіні жайлы ештеңе айтқан жоқ.

Украина президенті Владимир Зеленский Axios басылымына Трамптың бұл мәлімдемесі өзі үшін тосын жаңалық болғанын айтты, бірақ егер бітім екіжақты болса, Украина оны қолдауға дайын екенін жеткізді.

"Егер президент Трамп бұл жайлы Путинмен келіскен болса, онда бізге атысты тоқтату қашан басталатынын айтыңыздар. Біз дайынбыз және оны қабылдаймыз" деген Зеленский.

Кейінірек Зеленский өзінің ресми Telegram-арнасында Трамптың мәлімдемесінен соң НАТО бас хатшысы Марк Рюттемен, Финляндия президенті Александр Стуббпен және Канада премьер-министрі Марк Карнимен телефонмен сөйлескенін хабарлады. Ол Украина атысты тоқтатуды қолдайтынын және мұндай қадамды Ресейдің де қолдауы маңызды екенін атап айтты.

"Америка тарапынан егжей-тегжейін күтеміз. Өз тарапымыздан жағдайды ушықтырмауға, адам өмірін қорғауға және соғысты тоқтатып, ұзақмерзімді бейбітшілікке кепілдік беретін қажетті шешімдерді әрдайым қолдаймыз" деп жазды Украина президенті.

Мәскеу бұл мәлімдемеге байланысты әзірге ресми түсініктеме берген жоқ.

🇺🇦 Зеленский Украинада президент сайлауын өткізу шартын атады

Украина президенті Владимир Зеленский елде президент сайлауын өткізу үшін соғыс қимылдарын 60 күнге толық тоқтату қажет екенін мәлімдеді. Мұны ол америкалық ABC News телеарнасына сұхбатында айтты.

"Мен президент Трампқа және оның командасына бірнеше рет айтқам: егер ол сайлау арқылы қандай да бір өзгерісті қаласа, президент Путинге айтсын – бізге екі ай, яғни 60 күн бойы толық бітім берсін, сонда біз сайлауды ұйымдастырамыз. Әрине, біз халқымыздың, нақты айтқанда украин халқының кез келген таңдауын қабылдауға дайынбыз" деген Зеленский ABC тележүргізушісі Джонатан Карлға.

Украина президенті қолданыстағы заңнамада соғыс болып жатқанда сайлау өткізуге тыйым салынғанын еске салды.

"Бірақ ең бастысы – ол үшін адамдарға дауыс беруге мүмкіндік жасап, сайлау инфрақұрылымының қауіпсіздігін қамтамасыз ету. Әрине, қашан, қалай және кімге дауыс беру керектігін украиндар өздері ғана шешеді" деген Зеленский.

10 қазанда АҚШ президенті Дональд Трамп Украина президенті лауазымында жаңа адам болғанын көргісі келетінін мәлімдеген. Оның пікірінше, Владимир Зеленский Ресеймен соғысты аяқтау үшін жеткілікті күш-жігер жұмсап жатқан жоқ.

"Оларға мәмілеге келе алатын жаңа көшбасшы қажет" деген Трамп Ақ үйде журналистерге.

Трамптың Зеленскийге таққан негізгі кінәсі – Украина қарулы күштерінің Ресейдегі мұнай өңдеу зауыттарына жасап жатқан шабуылдарына байланысты. АҚШ президенті Зеленскийден "жаһандық мәселе тудыратын" мұндай әрекеттерді тоқтатуды талап еткенін, бірақ шабуылдар тоқтамағанын алға тартқан.

🇸🇦 Эр-Рияд әуежайына тағы шабуыл жасалды: бір кісі өліп, 11 адам жараланған

💥 Сауд Арабиясының астанасы Эр-Риядтағы халықаралық әуежай тағы да шабуылға ұшырады. Салдарынан бір адам қаза тауып, 11 адам жараланған деп хабарлады Associated Press пен Reuters.

Билік органдарының мәліметінше, қаза тапқан адам – Пәкістан азаматы. Сауд Арабиясы бастаған коалиция күштері 11 қазанда жолаушыларға арналған № 4 терминалға белгісіз снаряд түсіп, салдарынан өрт шыққанын айтқан.

Бұл – Сауд Арабиясы бастаған коалиция Йемендегі хуситтерге қарсы әскери операция бастағаннан бері өткен апта ішінде Эр-Рияд әуежайына әуеден жасалған төртінші шабуыл. 10 қазанда әуежайға жасалған әскери соққыдан 13 адам қаза тауып, 300-ден астам адам жараланған еді.

Бұл шабуылдарға жауапкершілікті Иранның қолдауына арқа сүйеген йемендік хуситтер өз мойнына алды. Кейінгі шабуылдан соң әуежай жабық тұр деп хабарлады басылымдар.

🇰🇿 Қазақстан Сауд Арабиясының азаматтық инфрақұрылымына жасалған шабуылдарды айыптады

Қазақстан сыртқы істер министрлігі Сауд Арабиясындағы азаматтық инфрақұрылым нысандарына жасаған шабуылдарды айыптаған.

"Мұндай шабуылдар халықаралық құқық нормаларын бұзады. Оларға гуманитарлық тұрғыдан жол беруге болмайды. Бұл әрекеттер Йемендегі ахуалды тұрақтандыру жөніндегі күш-жігерге нұқсан келтіріп, қақтығысты саяси жолмен реттеуге кедергі келтіреді" деген Қазақстан СІМ 11 қазанда таратқан мәлімдемесінде.

Астана шабуылдарды дереу тоқтатуға және дағдарысты тек саяси-дипломатиялық құралдар арқылы шешуге шақырған.

Қазақстан Сауд Арабиясы корольдігімен ынтымақтастық танытып, оның БҰҰ Жарғысына сәйкес өз егемендігі мен қауіпсіздігін қорғауға құқылы екенін растаған.

👮‍♀️🆘 "Басына қап кигізіп алып шыққан". Алматыда 61 жастағы тұрғынның қазасына күдікті төрт адам ұсталды

12 қазанда Алматы қаласының полиция департаменті 61 жастағы адамның өліміне байланысты тергеу амалдары барысында қылмыстың мән-жайы, күдіктілердің жеке басы және олардың марқұмның пәтерін заңсыз иемденуге қатысы болуы мүмкін екені анықталғанын хабарлады.

"Төрт күдікті уақытша ұстау изоляторына қамалды. Қазіргі уақытта қажетті жедел-тергеу іс-шаралары жүргізіліп жатыр. Қылмыстық істі тергеу үшін ІІМ-нің ең тәжірибелі қызметкерлерінен арнайы тергеу-жедел тобы құрылды. Тергеу барысы Ішкі істер министрінің жеке бақылауында" деп хабарлады департамент.

Полиция көпқабатты үй подъезіндегі бейнебақылау камерасының видеоларын жариялады. Онда үйге сырттан кірген екі ер адам баспалдақпен жоғары көтерілгені, келесі кадрда басына қап кигізілген әлдебір адамды иығына салып алып, жоғары жақтан баспалдақпен түскен ер кісінің подъезден сыртқа шығып кеткен сәті көрінеді.

Оқиға қашан, нақты қай үйде болғаны туралы әзірше ақпарат жоқ. Полиция тергеу мүддесіне байланысты өзге ақпарат жария етілмейтінін айтты.

▶️ Харьковте ресейлік дрон көпқабатты үйге түсіп, бес адам жараланған

12 қазан таңертең Ресей әскері Харьков қаласының Киев ауданындағы көпқабатты тұрғын үйге шабуылдап, салдарынан бес адам зардап шеккен. Қала мэрі Игорь Терехов әлгі тұрғын үйдің подъездерінің бірінде 7-қабаттан 9-қабатқа дейін орналасқан пәтерлер қирап, өрт шыққанын айтты.

Харьков облыстық әскери әкімшілігінің төрағасы Олег Синегубов ресейлік тағы бір дрон спорт мекемесінің ғимаратына түскенін хабарлады.

Одесса облысының оңтүстігінде Ресей әскерінің шабуылынан "Новая почта" пошта операторының ғимараты зақымданған. Облыстық әскери әкімшілік жетекшісі Олег Кипердің айтуынша, адамдар зардап шекпеген.

Днепропетровск облысы Павлоград ауданында Ресей күштері шабуылынан кейін жергілікті кәсіпорын аумағында ірі өрт шыққан. Украинаның Төтенше жағдайлар жөніндегі мемлекеттік қызметі ауқымы едәуір өрт сөндірілді деп хабарлады, бірақ қандай нысан зардап шеккенін нақтыламады.

📝 Тоқаев елдегі мәслихаттардың бәрін таратып, кезектен тыс мәслихат сайлауын өткізуді ұйғарды

Қазақстан президенті Қасым-Жомарт Тоқаев елдегі мәслихаттардың өкілеттігін мерзімінен бұрын тоқтату туралы жарлық шығарды. 12 қазанда президенттің ресми сайтында жарияланған құжат сол күннен бастап қолданысқа енгізілді.

Президент жарлығында барлық деңгейдегі мәслихаттардың өкілеттігі мерзімінен бұрын тоқтатылатыны айтылған.

Бұған қоса Тоқаев Орталық сайлау комиссиясына барлық деңгейдегі мәслихаттар депутаттарын кезектен тыс сайлауды тағайындау, оны дайындау мен өткізуді ұйымдастыру жөніндегі шаралар қабылдауды тапсырған.

Кезектен тыс сайлау ұйымдастыруды материалдық-техникалық және қаржы жағынан қамтамасыз етуді Тоқаев үкіметке, Астана қаласының, облыстардың, Алматы және Шымкент қалаларының әкімдері жүктеген.

Мәслихат депутаттарын кезектен тыс сайлау нақты қай кезде өтетіні әзірше ресми жарияланған жоқ.

🏅 Экономика бойынша Нобель сыйлығы америкалық екі ғалымға беріледі

2026 жылғы экономика саласындағы Нобель сыйлығын америкалық ғалымдар Роберт Холл мен Майкл Вудфорд алады. Мұндай шешімді 12 қазанда Швецияның корольдік ғылым академиясы жариялады.

Холл мен Вудфорд тұрақтандырушы экономикалық саясат жүргізу мүмкіндіктерін кеңейткен макроэкономикалық модельдер әзірлеген еңбегі үшін Нобель сыйлығына лайық деп танылды. Олардың зерттеулері экономикалық құбылуларды талдауға және экономиканың тұрақтылығын сақтауға бағытталған шаралардың тиімділігін бағалауға мүмкіндік береді.

Жылдағы дәстүрге сай, экономика саласы бойынша Нобель сыйлығы кімге берілетінін жариялау қазан айының басынан бері жалғасқан Нобель апталығын қорытындылайды. 6 қазаннан бері медицина мен физиология, химия, физика, әдебиет және бейбітшілік салаларында биыл Нобель сыйлығы берілетін адамдардың аты-жөні жарияланған.

Айта кетерлігі, өзге Нобель сыйлықтарынан айырмашылығы – экономика саласындағы сыйлық Альфред Нобельдің өсиетінде қарастырылмаған. 1968 жылы Швецияның орталық банкі тағайындаған оның ресми атауы – Альфред Нобельді еске алуға арналған экономика ғылымдары бойынша Швеция мемлекеттік банкінің сыйлығы. Сыйлық иегерлерін Швецияның корольдік ғылым академиясы анықтайды.

🌟 Газ қоры мол Қазақстан мен Өзбекстан неліктен Ресейге тәуелді болып барады?

Совет одағы тұсында Өзбекстан газы ондаған жыл бойы Ресейге жеткізіліп тұрды. Мұны Қазақстан арқылы өтетін "Орталық Азия – Орталық" құбыры арқылы іске асырды. Қазір тасымал кері бағытта жүріп жатыр: газ қоры мол Өзбекстан Ресейдің көк отынын сатып алушыға айналды. Қазақстан да Ресей газын импорттауды арттырып отыр. Орталық Азиядағы ең қуатты деген екі ел неліктен Ресей газына тәуелді болып қалды? "Газпром" осы аймақ арқылы Оңтүстік Азияға шыққысы келе ме? Азаттықтан оқыңыз