⛽ Түркия АҚШ-тың келісімімен ресейлік дизельдің бір бөлігін алмақ

Түркия Мәскеу мен Вашингтон келісімі аясында Ресей әлемдік нарыққа шығаратын дизель отынының бір бөлігін сатып алады. Мұны Түркияның энергетика министрі Алпарслан Байрактар айтты деп жазды Reuters.

Министр келісім Түркияның энергетикалық қауіпсіздігі үшін маңызды екенін атап өткен. Оның сөзінше, Түркия бұл мәселеде Ресейге ішінара тәуелді.

"Ресей кейінгі айларда осы проблемаға тап болғаннан кейін дизель отыны экспортына шектеу енгізді. Енді олар Трамппен дизель жөнінде келісімге келді. <…> Біз жүргізген келіссөздер нәтижесінде осы дизельдің бір бөлігін Түркия алады", – деген Байрактар.

Бірақ ол отынның көлемі мен жеткізілетін мерзімін нақтылаған жоқ.

🇺🇸🇮🇱 Трамп Израильдегі сайлау қарсаңында Нетаньяхуға қолдау білдірді

АҚШ президенті Дональд Трамп Израиль парламентін сайлау қарсаңында сол елдің қазіргі премьер-министрі Беньямин Нетаньяхуге қолдау білдіріп, мәлімдеме жасады. Ол Нетаньяхуды Иранмен күрестегі "ұлы жауынгер" және "бейбітшілік жолындағы серіктес" деп атады.

"Израильде басқа басшы, яғни Бибиден [Нетаньяхудың лақап аты] өзге кез келген адам болғанда, Америка бұл жұмысты өзі істеуге мәжбүр болар еді. Ал мен ондайды қаламаймын", – деп жазды Трамп Truth Social желісінде.

Трамп Нетаньяхуды "Израиль үшін осыншама көп іс атқарған ел – Құрама Штаттар талап ететін" серіктес деп сипаттады.

Осы мәлімдемесінен бес күн бұрын Трамп Израильдегі сайлауда қандай да бір кандидатты қолдау жайлы әлі ойланбағанын айтқан. Оған дейін Трамп Нетаньяху мен оның командасын Иранға қарсы әскери науқанға жеткілікті қатыспады деп сынаған еді.

Нетаньяху АҚШ президентіне алғыс айтып, Израильдің Ақ үйде Трамптан артық одақтасы ешқашан болған емес деп мәлімдеді.

"Біз бірге ұлы істер атқардық. Алдағы екі жылда да миссиямызды бірге аяқтап, Иранның ядролық бағдарламасын жоямыз", – деп уәде етті ол.

27 қазанға белгіленген сайлауда Нетаньяхуға басты бәсекелес болатын Израиль армиясының бұрынғы бас қолбасшысы әрі "Яшар" партиясының жетекшісі Гади Эйзенкот Тель-Авив университеті студенттерімен кездесуде АҚШ президентін сыйлайтынын, бірақ Израиль демократиялық ел екенін және премьер-министрді азаматтардың өзі таңдайтынын айтқан.

🤩 Қауіп төмен, бірақ сақтық қажет: денсаулық сақтау министрлігі маймыл шешегінің алдын алу жолдарын ескертті

Қазақстанның Денсаулық сақтау министрлігі елде маймыл шешегі таралу қаупі төмен деп бағаланғанымен, инфекция сырттан әкелінуі ықтимал екенін жоққа шығармайды.

Министрліктің түсіндіруінше, жекелеген мемлекеттерде дерт оқиғаларының тіркелуі мен халықаралық көлік қатынасының қарқындылығы вирустың Қазақстан аумағына өту қаупін тудырады. Алайда қоздырғыштың берілу ерекшеліктеріне байланысты, бұл дерттің халық арасында жаппай өршу ықтималдығы аз. Қазіргі уақытқа дейін көліктің барлық түрінде жүргізілген санитариялық-карантин тексерулері кезінде аса қауіпті инфекция жұқтырған немесе ондай күдікке ілінген бірде-бір адам тіркелген жоқ деп хабарлады мекеме.

Инфекцияның енуіне жол бермеу үшін елде кешенді шаралар атқарылған: мемлекеттік шекарадағы өткізу бекеттерінде бақылау күшейтіліп, дене қызуын қашықтан өлшейтін құралдармен жабдықталған, қауіпті аймақтардан келген азаматтарды қадағалау және ведомствоаралық әрекет ету алгоритмдері қолданысқа енгізілген.

Денсаулық сақтау министрлігі азаматтарға терісінде белгісіз бөртпесі бар адамдармен тығыз қарым-қатынастан аулақ болуға, жеке гигиена талаптарын сақтауға және бөтен төсек-орын мен киімді пайдаланбауға кеңес береді.

Егер адамның дене қызуы көтеріліп, басы және бұлшықеті ауырса, лимфа түйіндері ұлғайса немесе бөртпе сияқты белгілер пайда болса, дереу дәрігерге жүгініп, қандай шет мемлекеттерге сапармен барғанын ескертуі қажет.

🇺🇦 АҚШ Украинаға қайтадан барлау деректерін бере бастады

Украина президенті Владимир Зеленский NBC News телеарнасына берген сұхбатында Вашингтонның үш күндік үзілістен кейін ресейлік баллистикалық зымырандар ұшырылғанын ескертіп отыруды қайта бастағанын хабарлады.

"Біз бұған дән ризамыз. Қазір бәрі жұмыс істеп тұр", – деді Зеленский.

Оның сөзінше, Украина мұндай ақпаратты АҚШ-тан ғана ала алады. Әйткенмен украин әскерінің Starlink спутниктері байланысын пайдалануына қойылған шектеулер әлі күшінде қалып отыр.

9 қазанда Трамп америкалық және әлемдік нарықтарға ресейлік дизель отынын жеткізу жөнінде Владимир Путинмен келісімге келгенін жариялаған. Осыдан кейін Вашингтон Киевтен ресейлік МӨЗ-дерге шабуыл жасауды тоқтатуды талап етті.

Киев Ресей Украинадағы азаматтық инфрақұрылымдарға шабуылды тоқтатса келісетінін айтып, өз уәжін келтірді, бірақ Ресей Украинаға әуе шабуылдарын тоқтатқан жоқ.

Әуе соққыларын біржақты тоқтатуға көнбеген Киевке АҚШ барлау ақпаратының бір бөлігін беруді уақытша тоқтатып, Starlink жұмысын шектеді деп мәлімдеді Зеленский.

🇷🇺 БАҚ: Путин Трамп пен Си Цзиньпинге Украина мәселесін Зеленскийсіз талқылауды ұсынған

The Wall Street Journal (WSJ) басылымының мәліметінше, Путин соғысты тоқтатуды талқылау үшін Трампқа Қытай басшысы Си Цзиньпиннің қатысуымен үшжақты саммит өткізуді ұсынған.

Журналистердің дерегі бойынша, мұндай бастама Путин мен Трамптың 9 қазанда телефонмен сөйлескенде айтылған. Сол кезде тараптар ресейлік дизель отынын жеткізу жөнінде де келіскен.

Кездесу 18-19 қарашада Қытайдың Шэньчжэнь қаласында өтетін Азия-Тынық мұхиты экономикалық ынтымақтастығы саммиті аясында өтуі мүмкін. Шараға Украина президентін қатыстыру қарастырылмаған.

Кремльдің баспасөз хатшысы Дмитрий Песков WSJ басылымына кездесу өткізу мүмкіндігі талқыланып жатқанын, бірақ оны өткізу және күн тәртібі бойынша әзірге келісім жоқ екенін растаған.

Басылымның Америка әкімшілігіндегі дереккөзінің хабарлауынша, Трамп саммитке қатысуға әлі келісім бермеген. Газет сөйлескен дереккөздердің айтуынша, Қытай АҚШ президенті қатысқан жағдайда ол келіссөзге қарсы емес.

☄️💥 Ресей түн жамылып Киевке тағы шабуылдады

Ресей дүйсенбіге қараған түні Киевке әуеден шабуылдады. Украина ішкі істер министрлігінің деректері бойынша, шабуылдар салдарынан 21 жастағы қыз қаза тауып, кемінде 8 адам зардап шеккен. Жер үстіндегі метро станциясы бүлінген.

Киев мэрі Виталий Кличконың дерегінше, Соломенка ауданында дрон бөлшектері көпқабатты тұрғын үйге түсіп, үш адам жараланған.

Луцк, Ровно, Кропивницкий және Днепр қалаларына әуеден шабуыл жасалғаны туралы хабарлар түсті. Днепрде 84 жастағы қарт әйел зардап шеккен.

Украина президенті Владимир Зеленский 18 қазанда Bloomberg агенттігіне берген сұхбатында өз елі әуе шабуылына қарсы қорғаныс құралдарынан тапшылық көріп отырғанын айтып, Ресей адамдардың өмірін барынша қиындату мақсатымен Украина қалаларының инфрақұрылымына қарқынды шабуылдарды жалғастырып жатқанына тағы да назар аударған.

Зеленский жуырда Украинадағы Starlink спутниктері арқылы интернет байланысы жүйесінің жұмысы Америка билігінің пәрменімен шектелгенін тағы да алға тартты.

Бұған дейін АҚШ президенті Дональд Трамп, мемлекеттік хатшы Марко Рубио және АҚШ-тың басқа да жоғары лауазымды өкілдері бұл мәлімдемелерді жоққа шығарған еді.

🔴 Тәжікстан Германия депортациялаған оппозициялық белсендіні 17 жылға түрмеге қамады

Германиядан 19 жастағы ұлымен бірге Тәжікстанға депортацияланған оппозициялық белсенді Асадулло Бобоев 17 жылға сотталған. Бұл туралы 19 қазанда Freedom for Eurasia (FFE) құқық қорғау ұйымы хабарлады.

Толық ақпаратты оқу үшін INSTANT VIEW жазуын басыңыз👇

⌨️ Қазақстан интернет-алаяқтық ісі бойынша Қытайдың 13 азаматын еліне қайтарды

Қазақстанның Ұлттық қауіпсіздік комитеті ел аумағында халықаралық интернет-алаяқтық жүйесін ұйымдастырды деген күдікке ілінген Қытайдың 13 азаматын ұстағанын хабарлады. Олардың бәрі Қазақстаннан шығарылып, Қытай билігіне тапсырылған.

ҰҚК 19 қазанда шетелдік азаматтар Қазақстанда заң талаптарын бұзған деп хабарлады. "Тексеру кезінде олардан көптеген компьютерлік техника мен ұялы телефон, Starlink спутниктік байланыс жабдықтары, сондай-ақ криптоәмияндардағы қомақты қаражат табылды" деді ҰҚК.

Арнайы қызметтің дерегінше, бұл топ Қазақстан резиденті емес өзге елдердің азаматтарына қарсы әрекет еткен, болжам бойынша, олардың іс-әрекетін біреулер шетелден үйлестіріп отырған болуы мүмкін.

Комитеттің дерегінше, ұсталған адамдардың кейбірі отанында осындай іс-әрекеті үшін іздеуде жүргені белгілі болған. 16 қазанда Қытайдың 13 азаматының бәрі әкімшілік тәртіп бойынша Қазақстан аймағынан шығарылып, өз елінің құзырлы органдарының қолына тапсырылған.

ҰҚК таратқан ақпаратта күдікті топтың іс-әрекетінен зардап шеккендер қай елдің азаматтары екені, күдіктілер қалай әрекет еткені және қанша қаражат иеленіп кеткені нақты айтылмаған.

🇺🇳 БҰҰ Газа секторына азық-түлікпен көмектесуді азайтады

БҰҰ құрылымындағы Дүниежүзілік азық-түлік бағдарламасы (WFP) Газа секторы тұрғындарына берілетін көмек көлемін қаржы азаюына байланысты қысқартатынын хабарлады.

Қыркүйек айында бөлінген қаржы 1,6 миллион адамды қамтуға жеткен болса, енді бөлінетін қаражаттың кемуіне байланысты көмек алатындар қатарынан Газаның 500 мың тұрғыны шығып қалғалы тұр.

WFP барынша көп адамды қамту үшін бір адамға берілетін тағам көлемін азайтпақ. Мұқтаж жандар бұрынғыдай аптасына екі емес, бір ғана азық-түлік жиынтығын алады, оның өзінде көлемі бұрынғыдан аз болады. Таратылатын ыстық тамақ саны 250 мыңнан 150 мыңға дейін қысқарады.

"Қатынау қиын аймақтарда, соның ішінде Израиль әскери бақылау орнатқан "сары сызыққа" жақын жерде тұратын отбасылар енді ыстық тамақты күнде емес, күнара алатын болады", – деді WFP өкілдері.

Бұған қоса, 75 мың отбасына төленетін ақшалай жәрдемнің мөлшері де кемиді.

💥 Харьков өңірінде саябаққа түскен дрон алты адамның өмірін қиды

19 қазан түстен кейін Харьковтен оңтүстік-батысқа қарай, майдан шебінен ондаған шақырым қашықта орналасқан Новая Водолага кентінің орталық саябағына ресейлік дрон шабуыл жасады деп хабарлады Украина полициясы.

Облыс билігінің кейінгі дерегінше, 6 адам қаза тапқан, олардың екеуі – бала. Тағы 14 адам (арасында балалар да бар) жараланған.

Ішкі істер министрі Иван Выговский саябақта адам аяғы көп кезде, соның ішінде баламен жүргендер де болған, дрон соққы бергенін айтты. Шабуыл салдарынан дәмхана ғимараты да бүлінген.

Украина президенті Владимир Зеленский бұл шабуылды "нағыз айуандық" деп атады. Оның жазуынша, қаза тапқандар арасында жақында ғана бір жасқа толған Ангелина есімді қыз бен оның анасы бар. Сондай-ақ 11 жасар қыз баланың да өмірі қыршынынан қиылған.

🇺🇸🇺🇦 Зеленский АҚШ сенаторларына Starlink жұмысындағы ақаулар жайлы айтты

Америкалық сенаторлар Ричард Блюменталь (демократ) мен Том Тиллис (республикашыл) 19 қазанда Украина президенті Владимир Зеленскийге телефон шалып сөйлесті. Әңгімеге Конгресстің тағы бірнеше мүшесі қатысқан.

Блюментальдің айтуынша, Зеленский Украинаның Starlink байланысын қолдану мен АҚШ-тан барлау ақпаратын алу барысында әлі де қиындықтар көріп отырғанын жеткізген. Сенатор бұл жайтқа алаңдап отырғанын айтты. Оның сөзінше, Зеленский егер "Путин келісетін болса", Ресей мен Украинаның бір-бірінің энергетика нысандарына шабуыл жасауды өзара тоқтатуға Киев дайын екенін мәлімдеген.

Бұған қоса Блюменталь Конгресстегі екі партияның өкілдері де Украинаны қолдауда бір ұстанымда екенін және мұны нақты іспен көрсететінін хабарлады.

Бұған дейін сенатор Блюменталь – марқұм әріптесі Линдси Грэмнің есімімен аталған, Ресейге қарсы жақында қабылданған санкциялар туралы заң жобасы авторларының бірі – АҚШ президенті Дональд Трамптың Ресейге қатысты кейінгі әрекетін қатты сынға алған еді. Зеленский де АҚШ әкімшілігінің бұл қадамдарын қош көрмейтінін айтқан. Трамп болса Ресеймен дизель отынын жеткізу жөніндегі келісімді Мәскеудің Украинадағы бейбітшілік туралы келіссөзден шығып кетуіне жол бермеу мақсатымен жасадым деп түсіндірген.