ባህሩ ተካ - Bahiru Teka

👉 የእቁብ ሰብሳቢዮች ግድፈቶች ! እቁብ ማለት በአንድ ወይም በተወሰኑ ሰዎች አማካይነት የተለያየ መጠን ያለው ገንዘብ እየተሰሰበሰበ ለሰብሳቢው /ዎች የተወሰነና የእቁብ ከፋዮቹ የተስማሙበት የገንዘብ መጠን እንደ ደሞዝ እየተከፈ በአማና አስቀምጠው ሀላፊ ሆነው ሰብስበው በየተራ ለእቁብተኛው በእጣ ወይም ያለ እጣ እንዲሰጥ የሚደረግበት አሰራር ነው ። የዚህ አይነቱ አሰራር ከሸሪዓዊ ህግጋቶች በማይጋጭ…

ተጨማሪ ነጥቦች በእቁብ ሰብሳቢዮች ግድፈቶች !

ከላይ ባየናቸው በእቁብ ሰብሳቢዮች ላይ ከሚታዩ ግድፈቶች ውስጥ እንደማሳያ ሶስት ነጥቦችን ጠቅሼ ነበር ። መጨረሻ ላይ ደግሞ በማስታወሻ ለእቁብ ሰብሳቢው መጠኑ የሚታወቅ ደሞዝ እቁብተኞቹ ተስማምተው መክፈላቸው በምንም መመዘኛ ከወለድ ጋር እንደማይገናኝ ማስታወሴ ይታወቃል ። ይሁን እንጂ ይህ ደሞዝ የሚባለው ነገር ሰብሳቢዮቹ በሚፈልጉትና በሚያመቻቸው መልኩ ከእቁብተኛው ላይ የሚወስዱት እንጂ ሰብሳቢው ሀላፊነት ወስዶ ሰብስቦ ለሚያከፋፍልበት በስምምነት በየቀኑ ወይም በሳምንት ወይም በወር የሚከፈል እንዳልሆነ በጣም ከብዙ እቁብ ከፋዮች በደረሰኝ መረጃ ለማወቅ ችያለሁ ።
በመጀመሪያ ደሞዝ ማለት አንድ ሰው ለሚሰጠው አገልግሎት በምትክነት በስምምነት ወይም በማህበረሰቡ በሚታወቅ መጠን የሚከፈል ገንዘብ ነው ።
በስምምነት ማለት አሰሪና ሰራተኛ ተስማምተው የሚወስኑት ክፍያ ሲሆን በማህበረሰቡ የሚታወቅ መጠን ማለት አንድ ሰው የሆነ ስራ ሳይነጋገር አሰርቶ ለዛ ስራ ምን ያክል እንደሚከፈል በማህበረሰቡ የሚታወቅ ሲሆን አሰሪው በዛ መጠን እንዲከፍል ሲደረግ ነው ። እዚህ ጋር መታወቅ ያለበት ደሞዝ ማለት አንድ ሰው ለሰራበት በምትክነት የሚከፈል ገንዘብ ነው የሚለው ነው ።
እቁብ ሰብሳቢዮች ደሞዝ በሚል ከሚወስዱት የሰው ሐቅ ውስጥ የሚከተሉት ይገኙበታል : –
አንደኛ – ሰብሳቢው ከእቁብ ሰብሳቢዮቹ የሰበሰበውን ገንዘብ የመጀመሪያ እጣ ለሰብሳቢ በሚል መውሰድ !
ይህ በምንም መመዘኛ ደሞዝ ሊሆን አይችልም የሰው ሐቅ ያለአግባብ መብላት ነው ። ምክንያቱም እንዴት አንድ ሰው ስራ በጀመረ የመጀመሪያ ቀን በአመት ወይም በሁለት አመት የሚያልቅን የእቁብ ገንዘብ ደሞዜ ነው ብሎ ይወስዳል ? ደሞዝ ማለት ከሰሩ በኋላ የሚቀበሉት ክፍያ ሆኖ ሳለ !
ሁለተኛ – እቁብ ሰብሳቢው የሚሰበስበው በየቀኑ ሆኖ የሚያልቀው በ105 ቀን ይሆናል ። ነገር ግን ሰብሳቢው ለአባላቶቹ ያለ እጣ በ30 ቀን ወይም በ20 ቀን እሰጣችኋለሁ እያለ የ5ቱን ቀን ለራሱ ወስዶ ለእቁብተኞቹ የ100 ቀን ይሰጣል ። ይህ ሽያጭ ውስጥ የሚገባ ሲሆን ሁለቱም የወለድ አይነት ያገኘዋልና በፍፁም ደሞዝ አይባልም ።
ሶስተኛ – ሰብሳቢው ለእቁብተኞቹ ሰብስቦ በእጣ እየሰጠ ይቆይና መጨረሻ ላይ ሁሉም እቁብተኛ ሙሉ እቁብ እንዲጥል አድርጎ አንድ ሙሉ እጣ ለራሱ መውሰድ ! ይሄኛውም በዘዴ የሰውን ሐቅ ያለ አግባብ መብላት ነው ። ምክንያቱም አንድ እቁብ ሰብሳቢ በየቀኑ አስር ሺህ ብር ከዘጠና ሰዎች ሰብስቦ ዘጠኝ መቶ ሺህ ብር ለሁሉም እቁብተኛ ከሰጠ በኋላ ዘጠና አንደኛው ቀን የሚሰበሰበው ዘጠኝ መቶ ሺህ ብር የሱ ነው ማለት ነው ። ይህ ማለት ሰብሳቢው በወር ሶስት መቶ ሺህ ብር ነው ማለት ነው ደሞዙ ‼ ። ገርሞ ገርሞ ይገርማል ። ተመልከቱ ሰብሳቢው በደሞዝ ስም እንዴት የሰው ሐቅ እንደሚዘርፍ ! በመሆኑም እቁብ የሚጥል ሰው ማወቅ ያለበት እቁቡ ጤነኛ እንዲሆን ለሚሰበስበው ሰው ከእቁቡ ጋር ሳይገናኝ በየቀኑ ወይም በየሳምንቱ ወይም በየወሩ ለሰብሳቢው ስንት መክፈል እንዳለበት ተነጋግሮ ለብቻው እየከፈለ እቁቡ ሳይጨምርና ሳይቀንስ ለሁሉም በእኩል መድረስ ያለበት መሆኑ ነው ።
ማሳሰቢያ : – አንድ እቁብ ሰብሳቢ በተፈቀደውና በተከለከለው መንገድ በአንድ እቁብ ስራ ካሉ ሰዎች የሚቀበል ከሆነ በተፈቀደው መልኩ የሚከፍሉ ሰዎች ባልተፈቀደ መልኩ የሚቀበል መሆኑን ካወቁ በሐራም እየተባበሩ ስለሆነ አይፈቀድላቸውም ።
ውድ ወንድሞች ልጆቻችሁን የምታሳድጉበትን ሪዝቅ በሐራም ከማደባለቅ ተጠንቅቃችሁ አላህን ፈርታችሁ በትክክል የሚሰራ ካጣችሁ ትታችሁት ሪዝቃችሁን ከአላህ ጠይቁ ። የሪዝቁ ባለቤት እሱ ነውና የምታገኙበትን መንገድ ንፁህ አድርጉ ለማለት እወዳለሁ ።

http://t.me/bahruteka