#магілёў #sacral_unity #sacral_graveyard
Фінальны допіс пра каталіцкія могілкі Магілёва.
Гэтую неагатычную капліцу пачатку ХХ ст. вы, верагодна, успомніце. Яна неаднаразова з'яўлялася на канале. Самастойна ці ў кантэксце Берасцейскай уніі, бо ў 1996 годзе была асвечана як грэка-каталіцкая царква іконы Маці Божай Бялыніцкай.
А вось на гэтым свежым здымку капліца паўстае з новымі пластыкава-шклянымі дзвярыма замест старых драўляных, праз якія смутна праглядаюцца сляды рамонту ўнутры. Хацелася б думаць, што нейкія часовыя захады, але такі крэатыўны дызайн, што ёсць сумневы.

Тут у альбоме сабраў усе здымкі з гэтых могілак.

#валожын #sacral_urban
Добрай раніцы жадае чытачам постдажыначны Валожын.
Да галоўнага рэспубліканскага свята жыцця гэтага году нафігачылі шмат муралаў на камяніцах, якія адсылаюць да жыцця месца ў перыяд чорна-белых здымкаў. Чамусці вырашылі дзеля іх ахвяраваць звыклымі зімарадкам і коткай. Затое ў горадзе з'явіліся мастак Рушчыц ды драматург-паэт Дунін-Марцынкевіч, якія пахаваныя ў Валожынскім раёне.

#магілёў #sacral_catholic
Калі вам давялося наведваць Магілёў, ці заходзілі вы ў касцёл святога Станіслава? Калі не, то вам пашчасціла, бо ёсць шанец атрымаць шмат эстэтычнай асалоды ад патэнцыйнага візіту. Вось вам, так бы мовіць, трэйлер ды тызер.
Але ня гледзячы на ўсю прыгажосць, ёсць пэўная праблема, якую падаравалі нам рэстаўратары. У 90-х гадах было прынята рашэнне вярнуць сценам арыгінальны барочны выгляд XVIII ст. Праз што былі знішчаны без фіксацыі і даследвання як пазнейшыя фрэскі ХІХ ст. так і пашкоджанымі аказаліся найстаражытнейшыя слаі. Таму зараз на сценах шмат выяваў наўпрост перамалявалі нанова.
Гучыць сумна, але выглядае ўражліва.
Яшчэ за савецкім часам касцёл страціў унікальны арган з керамічнымі трубамі, створаны ў 1912 годзе. Затое ў 2018-м сюды з нідэрланскага Эйндховена прывезлі і ўсталявалі арган 1928 года вырабу.