ឯកឧត្តម ដាវ អានសាន នាយកប្រតិបត្តិនៃមជ្ឈមណ្ឌលអភិវឌ្ឍន៍កម្ពុជា បានចូលរួមក្នុងកិច្ចពិភាក្សា និងចែករំលែកបទពិសោធន៍ក្រោមប្រធានបទ «ស្វែងយល់អំពីមាគ៌ាអភិវឌ្ឍន៍របស់ប្រទេសចិន៖ ទស្សនៈកម្ពុជាចំពោះបក្សកុម្មុយនីស្តចិន (CPC)» ដែលរៀបចំដោយផ្ទះយុវជនដើម្បីមិត្តភាពកម្ពុជា-ចិន នៅថ្ងៃទី១៥ ខែកក្កដា ឆ្នាំ២០២៦។ កម្មវិធីនេះបានប្រមូលផ្តុំអ្នកនយោបាយ អ្នកស្រាវជ្រាវ អ្នកសិក្សា អ្នកសារព័ត៌មាន តំណាងសង្គមស៊ីវិល និងថ្នាក់ដឹកនាំយុវជន ដើម្បីផ្លាស់ប្តូរទស្សនៈអំពីតួនាទីរបស់បក្សកុម្មុយនីស្តចិនក្នុងការជំរុញការអភិវឌ្ឍ និងទំនើបកម្មរបស់ប្រទេសចិន ព្រមទាំងពិភាក្សាអំពីកាលានុវត្តភាពនៃកិច្ចសហប្រតិបត្តិការកម្ពុជា-ចិន។

ក្នុងឱកាសនេះ ឯកឧត្តមនាយកប្រតិបត្តិ បានចូលរួមចែករំលែកទស្សនៈ និងផ្លាស់ប្តូរយោបល់ជាមួយអ្នកចូលរួមលើប្រធានបទពាក់ព័ន្ធនឹងអភិបាលកិច្ច ការអភិវឌ្ឍសេដ្ឋកិច្ច ការអប់រំ នវានុវត្តន៍ និងការពង្រឹងទំនាក់ទំនងរវាងប្រជាជន និងប្រជាជន ដោយសង្កត់ធ្ងន់លើសារៈសំខាន់នៃការរៀនសូត្រពីបទពិសោធន៍អភិវឌ្ឍន៍ និងការលើកកម្ពស់កិច្ចសហប្រតិបត្តិការដើម្បីគាំទ្រការអភិវឌ្ឍប្រកបដោយចីរភាពរវាងកម្ពុជា និងចិន។

ប្រភពរូបភាព៖ ផ្ទះយុវជនដើម្បីមិត្តភាពកម្ពុជា-ចិន

ឯកឧត្តម ដាវ អានសាន នាយកប្រតិបត្តិនៃមជ្ឈមណ្ឌលអភិវឌ្ឍន៍កម្ពុជា បានចូលរួមពិធីចុះហត្ថលេខាលើការប្រព្រឹត្តទៅនៃ «បណ្តាញស្រាវជ្រាវកម្ពុជា» នៃទីស្តីការគណៈរដ្ឋមន្ត្រី នាព្រឹកថ្ងៃពុធ ទី២២ ខែកក្កដា ឆ្នាំ២០២៦ នៅទីស្តីការគណៈរដ្ឋមន្ត្រី។

ស្របតាមចក្ខុវិស័យចូលរួមជំរុញការអភិវឌ្ឍកម្ពុជាផ្អែកលើមូលដ្ឋានពិត វិទ្យាសាស្ត្រ និងវិជ្ជាជីវៈ ម.អ.ក ជឿជាក់ថា ការបង្កើត «បណ្តាញស្រាវជ្រាវកម្ពុជា» នឹងក្លាយជាយន្តការ និងវេទិកាជាតិដ៏សំខាន់មួយ សម្រាប់ពង្រឹងកិច្ចសហការរវាងស្ថាប័នស្រាវជ្រាវ ក្នុង និងក្រៅប្រទេស ផ្លាស់ប្តូរចំណេះដឹង និងលើកកម្ពស់ការស្រាវជ្រាវផ្អែកលើភស្តុតាង ដើម្បីគាំទ្រដល់ការរៀបចំ និងការអនុវត្តគោលនយោបាយជាតិស្របតាមរបៀបវារៈអភិវឌ្ឍន៍ជាតិ។

ម.អ.ក សូមថ្លែងអំណរគុណយ៉ាងជ្រាលជ្រៅជូនចំពោះ ឯកឧត្តមបណ្ឌិតទេសរដ្ឋមន្ត្រី ឆែម គាតរិទ្ធី ប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ដែលបានអញ្ជើញម.អ.ក ចូលរួមជាសមាជិកនៃគំនិតផ្តើមជាតិដ៏មានសារៈសំខាន់នេះ។ ម.អ.ក ទន្ទឹងរង់ចាំធ្វើការយ៉ាងជិតស្និទ្ធជាមួយសមាជិកទាំងអស់នៃបណ្តាញ ដើម្បីរួមចំណែកលើកកម្ពស់ការស្រាវជ្រាវ ការបង្កើតចំណេះដឹង និងការរៀបចំគោលនយោបាយផ្អែកលើភស្តុតាង សម្រាប់ការអភិវឌ្ឍប្រកបដោយចីរភាពរបស់កម្ពុជា។

ពីទំនាក់ទំនងបុរាណទៅជាកិច្ចសហប្រតិបត្តិការត្បូងពេជ្រ៖ ការវិវត្តជាប្រវត្តិសាស្ត្រនៃទំនាក់ទំនងកម្ពុជា–ចិន និងបច្ច័យក្នុងបរិបទសហសម័យ
___
ម.អ.ក សូមធ្វើការចែករំលែក អត្ថបទស្រាវជ្រាវដែលនិពន្ធដោយ លោក សុខន តារាពី នាយករង ម.អ.ក ចុះផ្សាយនៅក្នុងទស្សនាវដ្តី សហសម័យកម្ពុជា វ៉ុល០៤ លេខ០២។

អត្ថបទនេះត្រូវបានសរសេរឡើងក្រោមកិច្ចសហការរវាង ម.អ.ក ផ្ទះយុវជនសម្រាប់មិត្តភាពកម្ពុជា-ចិន និងទស្សនវដ្តីសហសម័យកម្ពុជា ដើម្បីលើកកម្ពស់ការស្រាវជ្រាវ ការចែករំលែកចំណេះដឹង និងកិច្ចសន្ទនាគោលនយោបាយ ស្តីពីទំនាក់ទំនងកម្ពុជា–ចិន។

អត្ថបទនេះបង្ហាញពីការវិវត្តជាប្រវត្តិសាស្ត្រនៃទំនាក់ទំនងកម្ពុជា–ចិន ចាប់ពីការផ្លាស់ប្តូរទំនាក់ទំនងតាំងពីបុរាណ និងការកសាងទំនុកចិត្តរវាងប្រទេសទាំងពីរ រហូតដល់ការអភិវឌ្ឍទៅជាភាពជាដៃគូយុទ្ធសាស្ត្រគ្រប់ជ្រុងជ្រោយនាពេលបច្ចុប្បន្ន។ អត្ថបទ ក៏បានវិភាគអំពីមូលដ្ឋាននៃភាពជាដៃគូដ៏រឹងមាំនេះ ដែលផ្អែកលើការគោរពគ្នាទៅវិញទៅមក ការមិនជ្រៀតជ្រែកកិច្ចការផ្ទៃក្នុង ការគាំទ្រគ្នាទៅវិញទៅមក និងកិច្ចសហប្រតិបត្តិការដែលផ្តល់ផលប្រយោជន៍រួម ព្រមទាំងពិនិត្យលើន័យសំខាន់របស់ទំនាក់ទំនងនេះក្នុងបរិបទតំបន់ និងពិភពលោកដែលកំពុងវិវត្ត។

ទាញយកអត្ថបទជាភាសាអង់គ្លេស៖ ម.អ.ក