⚡️ Берденовтың контршабуылы: Шымкент әкімінің орынбасары Жиембайдың соттағы сөзіне жауап қатты...

Шымкент әкімінің орынбасары Руслан Берденов атышулы Ернар Жиембайдың бүгінгі соттағы мәлімдесіне қатысты пікір білдірді деп жазады Ertenmedia.

Оның сөзінше, айыпталушының аузынан шыққан сөз тап-таза жала.

"Бұл ма, бұл шантаж. Соттағы мәлімдемесін үнсіз тыңдап отыра алмадым. Жиембай осы оқиға орын алған алғашқы сәттен бері істі барынша бұрмалауға тырысып келеді. Онымен ең соңғы рет шекеме мылтық төсеген күні кездескенмін. Одан бері ешқандай байланыс болған емес", – дейді Берденов.

Шенеунік сот басталғалы бері Жиембайдың төңірегі оның адвокаттарымен байланысып, ымыраға келуді ұсынғанын жеткізді.

"Егер кешірсеңіздер, шу шығармаймыз деп қорғаушыларыма төтесінен айтты. Келіспеген жағдайда шатақ шығарамыз, ақпарат алаңында лаң жасаймыз деп сес көрсетті. Жиембайдың әкесі өзін-өзі өртейді дегенге дейін барды", – дейді Берденов.

Шенеуніктің айтуынша, ол әлгіндей арандатуға еріп кетпеген және әуелгі ұстанымынан айнымаған. Оның сөзінше жанжалдың жалғыз себебі Жиембайдың кәсіби міндетін адал атқарудан қашуы.

"Жұмысын ашық әрі таза жүргізуді талап еттім. Арамыздағы дау тек жұмысқа қатысты өрбіді. Барлығын "қызғаныш", "әйел" тақырыбына бұру таза манипуляция. Мен оның жұбайын танымаймын, отбасымен де араласқан емеспін. Ол мен үшін қатардағы мердігер болды", – деді әкім орынбасары.

Жиембайдің мәлімдемесінде Шымкент әкімі Ғабит Сыздықбековтың де аты аталған еді. Берденовтің пайымдауынша мұның астарында тағы сол бопса мен беделге нұқсан келтірудің белгісі бар.

Шенеунік қазіргі ұстанымынан айнымайтынын тағы бір мәрте шегелеп өткен екен.

"Депутаттық мерзімім аяқталған соң да, мемлекетке адал қызмет ету жолынан тайған жоқпын. Соңғы үш жылымды осы жолға арнадым. Қала әкімінің шақыруымен Шымкентке келіп, ашық, адал жұмыс істеуге, халыққа шынайы көмек көрсетуге күш салдым", – дейді.

Ол соттың әділ әрі ашық өтеріне сенімді. Алайда, бір нюанс бар. Желідегі жұрт "Берденов Жиембаймен бетпе-бет келуге қаймыға ма, неге сотқа қатыспайды?" деген сыңайдағы сауал қоюда.

"Қазір денемде аңшы мылтығынан атылған 60-тан астам бытыра бар. Бұл ресми түрде тіркелген дәлел. Кейбіреу менің үнсіздігім мен сотқа қатыспауымды әлсіздік деп бағалап жатыр екен. Қателесесіздер, үнсіздік келісім деген сөз емес. Мен әділетті сотты күтіп отырмын", – деп жауап қатыпты Сыздықбековтың орынбасары.

Айта кетелік, бұған дейін Ернар Жиембай Берденовке қатысты біраз даулы мәліметті жария еткен болатын. Оның айтуынша, сол күнгі оқиғаға жұмыс емес, қызғаныш мәселесі триггер болған.

Erteńmedia сот процесінен жедел хабар таратып отырады. Бізге тіркеліп алыңыз 👇

📱 Erteńmedia

⚡️КТК-ның соңғы күзі: Кремльден қашқан қазақ мұнайының "Баку бағдары"

Кремль Қара теңіздегі негізгі порттарына шетелдік танкерлердің кіруіне уақытша тыйым салды. Бұрын порттағы қозғалысты Көлік министрлігі бақылайтын, 21 шілдеден бастап бұл міндет ФСБ-ның құзырына өтті деп хабарлайды Ertenmedia.

Көршіміз мұндай шешімді әскери жағдаймен байланыстырып отыр.

Мәскеудің әрекеті қазақ мұнайының экспортына тұсау болуы ықтимал. Елдегі қара алтынның 80 пайызы Каспий құбыр консорциумы (КТК) арқылы Еуропаға жөнелтіледі.

Консорциумның негізгі үлескерлері әмірикалық Chevron мен ExxonMobil компаниялары. Ресей порттарына қойылған шектеу осы бағыттағы мұнайдың экспортын түгелдей тоқтатуға дейін апаруы мүмкін. Әлемдік нарық осының әсерінен шамамен 2 пайыз мұнайынан айырылғалы тұр.

Мәскеу мұны Еуроодақтың 21 шілде күні енгізген жаңа санкциясына жауап ретінде жасаған. ЕО Ресейден теңіз арқылы келетін шикі мұнай мен мұнай өнімдеріне толық эмбарго жариялады. Тек құбыр арқылы тасымалданатын мұнайға ғана уақытша рұқсат етілген. Батыстың мақсаты басқыншы елдің мұнайынан кезең-кезеңімен бас тарту.

Осындай аумалы-төкпелі шақта Астана мұнай экспортын әртараптандыруды едел-жедел қолға алды.

Қазақстанның Энергетика министрі Ерлан Ақкенженов биыл Баку–Тбилиси–Жейхан (БТЖ) құбырымен тасымалданатын мұнай көлемін 1,7 млн тоннаға жеткізу көзделгенін мәлімдеді. Былтыр бұл көрсеткіш 1,4 млн тонна болса, биыл жарты жыл ішінде 800 мың тонна қазақ мұнайы аталған құбыр арқылы Еуропа нарығына шыққан.

Қазақстанның КТК-дан өзге экспорт жолдарын іздеуіне түрткі болған жайттар аз емес.

Былтыр тамызда Новороссийск сотының шешімімен КТК жұмысы бір айға тоқтатылғанда, ел билігі балама бағыттардың маңызын анық ұқты. Сол кезде президент Тоқаев Транскаспий бағытын дереу қарастырып, жедел іске асыруға тапсырма берген еді.

Сөйтіп, 2023 жылдың басында қазақ мұнайы БТЖ арқылы тұрақты түрде тасымалдана бастады. Әзербайжанның SOCAR компаниясы бұл бағытта өз инфрақұрылымын модернизациялап, қазақ мұнайының транзитіне жол ашты.

Биыл қаңтарда Қашаган кен орнынан алғашқы мұнай танкермен Әзербайжанға жетіп, БТЖ-мен Еуропаға жөнелтілді.

Жуырда ғана президент Тоқаевтың Түркия басшысы Ердоғанмен кездесуінде де осы бағыттағы мұнай транзитінің көлемін арттыру мәселесі талқыланды. Биыл алғашқы алты айдың өзінде БТЖ арқылы экспортталған мұнай көлемі былтырғыдан 12 пайызға артқан.

❗️ Бірақ жаңа бағыттың да шешуді қажет ететін мәселесі жеткілікті. Мысалы, Ақтау портының өткізу қабілетін арттырып, ірі танкерлерді көбейту керек. Каспий теңізінің суы тартылуы себепті, порт түбін тереңдету жұмыстары да күн тәртібінде тұр.

Қазақ мұнайының сапасы да Әзербайжан тарапы үшін маңызды мәселе. Kazakh Light мұнайы Azeri Light-тан құрамындағы күкірттің көптігімен ерекшеленеді, сапасы төмендеу. Сондықтан екі елдің мұнайын бір құбырмен араластыру Әзербайжан мұнайының нарықтағы бағасын төмендетуі ықтимал.

Сол үшін қазақ мұнайына бөлек құбыр қажет. Бұл ретте бұрыннан бос тұрған Баку–Супса құбыры қайта назарға ілікті.

Ұзындығы 836 шақырым, мұнай жүгірту мүмкіндігі жылына 6 млн тоннаны құрайтын Баку–Супса құбыры кезінде Әзербайжан мұнайын Ресей аумағын айналып өтіп, таза күйінде Батыс нарығына шығару мақсатында салынған. Қазақстан осы құбырды экономикалық тұрғыдан да, геосаяси тұрғыдан да тұрақты балама ретінде көріп отыр.

Тоқ етерін айтқанда, Баку–Тбилиси–Жейхан және Баку–Супса бағыты қазақ мұнайының Кремльге тәуелділігін төмендетуге мүмкіндік береді. Қазақстан үшін БТЖ құбыры экономикалық дербестікті нығайтатын Әзербайжанның өзіндей сенімді әрі салмақты балама.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Ақордадан "моральдық қолдау" іздеген Путин Тоқаевқа қоңырау соқты...

Ресей басшысы Владимир Путин Қазақстан президенті Қасым-Жомарт Тоқаевқа хабарласып, АҚШ-пен жүргізген келіссөздерінің мән-жайын баяндады.

Кремль мұны екі ел арасындағы одақтастық пен стратегиялық әріптестік аясындағы әңгіме деп сипаттаған деп жазады Ertenmedia.

Ақорданың хабарламасы қысқа қайырылғанымен, оның тасасындағы маңызды жайттарды Президенттің баспасөз хатшысы Руслан Желдібай егжей-тегжейлі жеткізді.

Желдібайдың сөзінше, телефон арқылы тілдесуге бастамашы болған Ресей тарапы. Әңгіме негізінен Украинадағы соғысты реттеу жолдарын қарастыруға бағытталған.

Путин АҚШ президентінің арнайы өкілі Стив Уиткоффпен болған кездесудің қорытындысын жеткізіп, диалогтың конструктивті түрде өткенін атап өткен.

Тоқаев тараптардың Украинадағы шиеленісті реттеуге ұмтылысын оң бағалап, Қазақстан әрқашан мәселені бейбіт шешудің жақтаушысы екенін атап өтті.

Бұған дейін Путиннің Уиткоффпен кездесуі екі ел арасындағы «өзара түсіністік сигналдарымен алмасу» ретінде сипатталған болатын. Осы кездесуден соң АҚШ президенті Дональд Трамп Путин және Зеленскиймен жеке жүздесуге ықыласты екенін мәлімдеді.

Кремль де Путиннің мұндай форматтағы кездесуден бас тартпайтынын хабарлады. Ресей президентінің көмекшісі Юрий Ушаков келіссөз алаңы ретінде БАӘ аумағы ұсынылғанын айтты.

Сондай-ақ, Желдібай Қазақстан президентінің қарашада Мәскеуге жоспарланған сапары маңызды екенін атап өтті.

Онда Тоқаев Ресеймен әріптестік және одақтастық байланыстарды тереңдету мәселелерін талқыламақ.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Назарбаев әулетіне адал қызмет еткен генерал абақтыдан шықты...

ҰҚК-нің Шекара қызметінің бұрынғы басшысы, кезінде Назарбаевтар әулетімен байланысы бар компанияға артықшылық берген генерал Дархан Ділманов бостандыққа шықты. Бұл туралы Қылмыстық-атқару жүйесі комитеті мәлімдеді деп жазады Ertenmedia.

«Аталған азамат сот үкімімен белгіленген мерзімді толық өтеген соң босатылды», – деп нақтылады комитет өкілі.

Ділманов осыдан екі жарым жыл бұрын қызметін асыра пайдаланғаны үшін төрт жылға сотталған. Сот оны шенінен, марапаттарынан және бағалы мүлкінен айырған еді. Қамауда отырған мерзімі жаза мерзіміне есептелгендіктен, генерал мерзімінен бұрын еркіндікке шықты.

Ілгеріде атышулы болған бұл істің түбі Назарбаевтар отбасына тірелген. Генералдың үстінен қозғалған қылмыстық іс пандемия кезеңіндегі шекарадағы заңсыздыққа қатысты еді.

Сол уақытта Қазақстан мен Қытай арасындағы тауар айналымы тұралап қалған тұста, генерал Ділманов «Eurotransit Cargo» компаниясы үшін арнайы «жасыл дәліз» ұйымдастырған.

Нәтижесінде компанияның жүк көліктері кеденнен еш кедергісіз өтіп, өзге тасымалдаушыларға қарағанда басымдыққа ие болған.

Кейін компанияның Назарбаевтың қызы Дариға Назарбаеваның отбасымен байланысы бар екені анықталған. Арнайы дәліздің арқасында олар 1750 жүк рейсін ұйымдастырып, 4 миллиард теңгеден астам табыс тапқан.

Мұндай әрекет нарықтағы өзге тасымалдаушыларды шетке ығыстырып, олардың наразылығын тудырған. Тергеу генералдың Назарбаевтармен байланысы бар фирма мүддесін заңсыз лоббилегенін анықтаған.

Осы іс бойынша Ділмановпен бірге тағы жеті адам сотталды. Барлығы өз кінәсін мойындады.

Солардың бірі логистикалық кешеннің иесі мемлекетке өз еркімен құны 5 миллиард теңгеден асатын мүлкін тапсырған.

Ділмановтан басқа сотталғандарға жеңілірек жаза кесілгенімен, оларға мемлекеттік қызметке жол түбегейлі жабылған.

Дархан Ділманов Шекара қызметінің басшылығына 2015 жылдың шілдесінде тағайындалып, 2022 жылдың сәуіріне дейін басқарды. Қаңтар оқиғасынан кейін көп ұзамай қызметінен кетуге мәжбүр болған.

Жаңа Қазақстанға ҰҚК-нің экс-басшысы Кәрім Мәсімовпен және оның төңірегіндегі бұрынғы генералдармен байланысы жоқ жаңа буын әскери басшылар қажет болды. Ал Ділманов дәл сол «ескі гвардияның» өкілі еді.

Ол 2022 жылдың маусымында қамауға алынған. Кейін сот шешіміне апелляция бергенімен, нәтиже шықпаған.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Түрме табалдырығындағы трагедия: "Дикий Арманның" анасы ақтық сөзін айта алмай кетті...

Қостанай түрмесінде жазасын өтеп жатқан атышулы Арман Жұмагелдиевтің анасы Роза Жұмагелдиева дүниеден озды. Бұл туралы алғаш болып Instagram желісінде Арманның жақын серіктесі саналатын Нұржан Иманалиев хабарлады деп жазады Ertenmedia.

Иманалиевтің айтуынша, марқұм соңғы күндерінде ұлымен кездесу үшін Қостанайға барған. Ұлымен жүздесуден соң жүрегі шыдамай ауруханаға түскен ол көп ұзамай өмірден өткен.

Алайда Арманның адвокаты Рена Керимова кездесудің мүлдем болмағанын айтады.

«Ұлымен жүздесу қиын болды, рұқсат алу мәселесі шешілмеді. Роза Жұмагелдиева Қостанайға барып, баласымен кездесе алмай, сол жерде қайтыс болды», – деді Керимова.

Адвокаттың сөзіне сенсек, өлімнің алдын ала себебі микроинсульт.

Еске салсақ, Арман Жұмагелдиев Қаңтар оқиғасы кезінде жаппай тәртіпсіздік ұйымдастырды деген айыппен 20 жылға сотталған болатын.

Танымал саясаткер Жақсыбек Құлекеев "Ақорда үшін күрес" атты еңбегінде Дикий Арман мен ілгерідегі Иманалиевке қатысты біраз тың инсайдпен бөліскен еді.

"Арман соңғы 5 жыл бойы Қазақстанның қылмыс әлеміндегі оқиғаларға жауапты болған, оған КНБ-де істейтін кураторлары көмектескен. Тергеу "Жұмагелдиев ұзақ уақыт комитеттің 5-ші департамент жетекшісі Руслан Ысқақовтың бақылауымен қызметін жалғастырып келді" деген қорытындыға келген. Алайда, кімді-кімді өз мақсатына пайдаланғаны толық түсінікті емес.

Бір абзацта Ысқақов Арманға Қазақстандағы трансұлттық қылмыстық топтардың елдегі қылмыстық жағдайға ықпалын жою үшін серіктес болуға ұсыныс жасаған десе, бір абзацта, Ысқақов "Әділ Қытай", "Айшуақ Жантүгел" қылмыстық топтарын ұстау бойынша іс-шараларды ұйымдастырып, Шпек деген лақап атқа ие Рамазан Ғаббасовты қамауға атсалыса отырып, Дикийді оперативтік іс-шаралардан қорғап отырған делінеді.

Демек, ҰҚК алаңды түрлі ОПГ-дан тазартып, ал Арманның тобын айналып кетіп отырған.

Жұмагелдиев ҰҚК-ның қамқорлығына сүйеніп, аймақтарға өз қарақшыларын қойып, тұтас Қазақстанды Нойс деген лақап аты бар Нұржан Иманалиевке тапсырған. Иманалиев қазір түрік түрмесінде отыр...", – деп жазған еді Құлекеев.

Кітапта айтылғандай ҰҚК-дан нұсқау алған Арман Алматыға 17-ші желтоқсан күні келіп, ешкімге білдірмей, өзге ОПГ қатысушыларымен кездескен.

Ал 5-ші қаңтарда Ысқақов Жұмагелдиевке адам жинап, алаңға баруды тапсырады. Арман ол жақта Мәслихат депутаты Қайрат Құдайбергенмен кездесіп, жақтастарының әрекетін ұйымдастыра бастайды.

Жұмагелдиевтің тапаншамен қаруланған адамдары қаладан 30-дан астам адамды ұстап, "Рицт Карлтон" қонақүйінің паркингі мен "Қазақстан" қонақ үйінің банкет залында күштеп ұстаған.

"Тергеу дерегінше, ол адамдарды камераға түсіріп, есірткі тұтынғанын, мародерлік жасап, Әблязов құрған ҚДТ саяси қозғалысының мүшеміз деп айтуға мәжбүрлеген. Артынша кураторы Ысқақовтың нұсқауы бойынша ұсталғандары ҰҚК-ға тапсырған" дейді Құлекеев.

Жұмагелдиевке қатысты тарау мұнымен аяқталмайды.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Уашингтондағы "ғасыр декларациясы": Трамптың төрелігімен түйінделген тарихи текетірес

Армения мен Әзербайжан басшылары Уашингтонда тарихи келісімге қол қойды деп хабарлайды Ertenmedia.

АҚШ президенті Дональд Трамптың тікелей араағайындығымен жүзеге асқан декларация екі ел арасындағы көпжылдық қарулы қақтығысқа нүкте қойып, бейбіт қатынас пен дипломатиялық диалогқа жол ашты.

Құжат Армения премьері Никол Пашинян мен Әзербайжан президенті Илхәм Әлиевтің тікелей келіссөздері нәтижесінде қабылданған.

Тараптар қол жеткізілген бейбіт келісімді толық бекіту мен ратификациялауды мойнына алды. Сондай-ақ, өзара егемендік пен аумақтық тұтастықты құрметтеу, әскери текетірестен бас тарту міндетін де өз жауапкершілігіне алып отыр.

Декларацияның басты тармағының бірі өңірдегі көлік қатынасын жақсарту және Әзербайжанның негізгі аумағы мен Нахишеван эксклавы арасын жалғайтын жаңа транспорттық дәліз ашу. Армения аумағы арқылы өтетін осы дәліз Иранмен шектесетін тұстан орын тебеді.

АҚШ басшысының атымен «Трамптың халықаралық бейбітшілік және өркендеу маршруты» аталған осынау көлік бағыты Әзербайжан мен Нахишеван арасында тікелей байланыс орнатып, Бакудің Түркиямен экономикалық қарым-қатынасын нығайтады деп күтілуде.

Ақ үйдің баспасөз хатшысы Анна Келлидің айтуынша, дәліз Арменияның егемендігі мен аумақтық тұтастығын толық сақтай отырып қызмет етпек. Ұзындығы 32 шақырымды құрайтын дәліз арқылы адамдар мен тауардың кедергісіз қозғалысы қамтамасыз етіліп, аймақтың экономикалық дамуына тың серпін бермек. Келісімге сәйкес, дәлізді 99 жыл бойы АҚШ компаниялары жүзеге асыру құқығына ие болды.

Президент Тоқаев Әзербайжан мен Армения арасындағы келісімді тарихи жетістік деп бағалады.

Оның пікірінше, АҚШ президентінің жеке араласуы және тараптардың саяси ерік-жігері арқасында ғана көпжылдық күрделі мәселе шешімін тапқан.

Сонымен қатар, Тоқаев бұға Ақорданың да атсалысқанын атап өтті. Біздің ел келіссөздердің маңызды параметрлерін талқылау үшін Алматы қаласын екі елдің сыртқы істер министрлері кездесетін алаң ретінде ұсынған еді.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Берденов ісіндегі фантастика мен факті: Ернар Жиембайдың жақындары мәлімдеме жасады...

Шымкент әкімінің орынбасары Руслан Берденовке жасалған қастандық әрекетке қатысты істің мән-жайы күрделене түсті деп жазады Ertenmedia.

Айыпкер Ернар Жиембайдың жақындары ақпараттың бұрмаланып, істің шынайы бейнесі бүркемеленіп жатқанын мәлімдепті. Олар оқиғаға қатысты бірқатар күмәнді жайттарды алға тартып отыр.

"Жәбірленушінің 60 бытыра туралы ақпараты алғашқы бейнежазбасымен сәйкес келмейді, онда ол сыртқы киімсіз аурухана төсегінде және жамбасынан жоғары ешқандай жарақатсыз жатыр.

Берденовтің денесінен барлығы 3 дана бытыра қалдығы табылған. Сот отырысына дейін ол емін-еркін қозғалып жүрген. Бұған 1 тамызда өз аяғымен Шымкент қаласы әкімдігіне барғаны дәлел.

Бұдан оның жарақаты жеңіл болуы мүмкін және сотқа әдейі келмеуге әрекет жасаған деген күдік туындайды", – дейді айыпкердің әкесі.

Жиембай Пірәлиев бұған қоса сол күнгі оқиғаға қатысты кейбір детальдарды толықтырған екен.

"Жүргізуші менің ұлымды құлатып, жәбірленушіні құтқарғаны туралы ақпарат жалған. Бейнежазба мен жүргізушінің сотта берген жауабы ұлымның қолында сол уақытта ештеңе болмағанын растайды.

Аңшылық қарудан 5 оқ атылды, ал адам аяғында тұрды. Басты себебі, ұлым тікелей атпады, оқ жәбірленушіге рикошетпен тиген. Оқ таусылғасын Ернар мен Берденов әлі де аяғында тұрып, әңгімелесті. Бұл ақпарат іс материалындағы ресми бейнежазбамен расталады", - дейді ол .

Пірәлиевтің айтуынша, аңшылық қарудан 5 рет тікелей атқан оқтан тірі қалу тек фантастикалық фильмдерге үйлесімді. Ал Берденовтің алғашқы және кейінгі жауабында айырмашалық бар.

"Кейінгі жауабында, ол менің ұлым оған қансырап жатқан кезінде қаруды басына қойып атуға оқталғаны туралы мәлімдеді. Бұл факт сараптамалық баға бойынша теріске шығарылады. Мен ұлымның әрекеттін ақтауға тырыспаймын. Бірақ ел шындықты білуі керек", - дейді Ернар Жиембайдың әкесі.

Келесі сот отырысында куәгерлерден жауап алу жалғасады.

Ertenmedia істің барысын назарда ұстайды. Бізге тіркелуді ұмытпаңыз👇

📱 Erteńmedia

⚡️ Профессордың соңғы үміті: үйінен айырылған ұстаз президент Тоқаевқа үндеу жолдады...

Белгілі қаламгер, профессор Кәкен Қамзин алаяқтардың арбауына түсіп, пәтерінен айырылып қалғанын мәлімдеді.

Қартайған шағында үйсіз-күйсіз қалудың аз-ақ алдында тұрған ұстаз әзірде ғана президент Тоқаевқа үндеу жолдады деп жазады Ertenmedia.

Алаяқтардың күрделі схемасына сеніп қалған профессордың жағдайы тым ауыр.

Жетпістен асқан шағында жанарына үміттен гөрі үрей толып, көшеде қаламын ба деген уайыммен күн кешуде.

"Алаяқтыққа қарсы ешкімнің иммунитеті жоқ. Басыма түскен жағдайдан құтқарсаңыз екен. Егде тартқан шағымда үйсіз-күйсіз далада қалғалы тұрмын", - деді осы ретте Кәкен Қамзин президент Тоқаевқа жолдаған үндеуінде.

Ұлағатты ұстаздың басына түскен ауыр сынақтан сырт қалмайық.

Кәкен ағаға көмек қолын созамын деушілер мына реквизиттер арқылы қолдау білдіре алады:

📌 KASPI, HALYK: +7 775 650 5809 (Әсел Қ.)

Ұстаздың басынан өткен жағдайды күні кеше журналист Нұрсейіт Жылқышыбай егжей-тегжейлі баян еткен. Сұхбаттың толық нұсқасы осы жерде: https://youtu.be/kvJ9Hh_QQpU

📱 Erteńmedia

⚡️ "Сайран" автовокзалындағы анархия: Сатыбалдының сабыры сарқылды...

Алматы әкімі Дархан Сатыбалды «Сайран» автобекеті маңындағы ретсіздік пен бейберекетсіздікті қатаң сынға алып, полициядан бұл аумақты тәулік бойы бақылауға алуды талап етті деп жазады Ertenmedia.

Қала басшысы Әуезов ауданына арнайы барып, жергілікті коммуналдық қызмет пен басқарма басшыларымен көшпелі жиын өткізді.

Әсіресе кешқұрым жеке такси жүргізушілерінің Car City сауда орталығы мен «Сайран» автовокзалы айналасына шоғырлануы аймақ тұрғындарының мазасын қашырып, тазалық пен қауіпсіздікке нұқсан келтіруде.

«Мұндағы бейберекет қозғалыс пен лас орта, айғай-шу тұрғындарды әбден қажытты. Кешке таман емін-еркін жүріп-тұру қауіпті болып барады. Полиция осы аумақты бақылауды күшейтіп, тәртіп орнатуы қажет», – деді әкім.

Сондай-ақ, ауданның бет-бейнесін жақсарту үшін 2025 жылға қарай 37 ғимараттың сырт келбеті бірыңғай стильге сай жаңартылады. Жасыл желек пен саябақтарды дамытуға ерекше көңіл бөлінбек.

Қазірдің өзінде аулаларды абаттандыру, көшелерді жарықтандыру және ағаш отырғызу жұмыстары қарқынды жүруде.

Сапар барысында әкім Әуезов ауданы тұрғындарымен жеке жүздесіп, олардың өтінішін тыңдады. Халық көбіне үй шатырын жөндеу, баспана және әлеуметтік көмекке қатысты сауалдарын қойды. Қала әкімі бұл мәселелердің барлығын жіті қарап, шешімін табуға уәде берді.

Айта кетейік, бұған дейін президент Тоқаев қала әкімдігіне Алматының жоғарғы бөлігінде әлеуметтік және туристік нысандардан басқа тұрғын үй кешендері мен нүктелі құрылыс жүргізуге мораторий енгізуді тапсырған еді.

• Коллаж: Erteńmedia.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Бағанашылдан Қонаевқа қоныс аударған 39 баланың өмірі қалай өзгерді?

Бағанашылдағы бейімдеу орталығынан Қонаев қаласындағы жаңа ғимаратқа көшкен балалардың осында орналасқанына 20 күн толып үлгерді.

Бүгінде орталыққа орналастырылған 39 жасөспірім жаңа мекенге біржолата үйренісіп, жайлы ортаның игілігін көруде.

Жаңа орталықтың іші кең әрі жарық, спорттық алаң, шығармашылық студия, оқу және ойын бөлмелері мен заманауи жатын бөлмелерден тұрады.

Мұнда әр маманның жеке кабинеті бар, әрбір бөлме бүгінгі заман талабына сай жасақталған. Балалар бұл жердің көңіл-күйге жайлы әсер ететінін айтады.

Облыстық білім басқармасының айтуынша, жаңа орталыққа Бағанашылдағы балалар үйінен емес, тек бейімдеу орталығындағы жасөспірімдер ғана көшкен. Барлығы балалардың өзімен келісіліп, заң талаптары сақталған.

Енді санаулы күннен кейін бұл жасөспірімдер үшін алғашқы қоңырау соғылып, Қонаев қаласындағы мектептер мен гимназияларда білім алмақ. Жаңа орта, жаңа мектеп балалардың болашаққа деген сенімін нығайтқандай.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Зеленскиймен тілдескен Тоқаев: Украинаның тұтастығы талқыланбайтын талап...

Президент Тоқаев Украина басшысы Владимир Зеленскиймен әңгімеде Қазақстан халқының Украина тарихына, мәдениеті мен тіліне құрметпен қарайтынын жеткізді деп жазады Ertenmedia.

Ол қақтығыс басталғалы бері Қазақстанның ұстанымы өзгермегенін еске салды:

Астана әділеттілікке негізделген тұрақты бейбітшілікті қолдайды.

Қазақстан БҰҰ Жарғысының орындалуын, мемлекеттердің шекарасы мен аумақтық тұтастығының бұзылмауын басты қағида санайды.

Тоқаев қазіргі күрделі жағдайда салмақты әрі ақылмен әрекет етудің маңызы зор екенін айтты.

Оның пікірінше, ең басты міндет Украинаның мемлекет ретінде сақталып қалуына кепілдік беру.

Ол қауіпсіздік мәселесіне ерекше назар аудару керектігін ескертіп, аумақтық дау-дамайдың тіпті уақытша келісімдердің де жүзеге асуына қиындық туғызатынын атап өтті.

Екі ел басшысы өзара тиімді бағыттар бойынша Қазақстан мен Украина қарым-қатынасының алдағы перспективасын да талқылады.

Бұдан бір күн бұрын, яғни 8 тамызда Тоқаев Ресей басшысы Владимир Путинмен де телефон арқылы сөйлескен еді. Әңгіме барысында Путиннің Трамптың арнайы өкілімен кездесуі және Украина мәселесін шешудің жолы сөз болған.

Сарапшылар Тоқаевтың бірер күннің ішінде екі жақпен де тілдесуін ақылды дипломатиялық қадамның көрінісі деп бағалауда.

Қазақстан қос тараппен де ортақ тіл табыса білетінін аңғартты, бірақ халықаралық құқық пен елдердің аумақтық тұтастығын қорғау ұстанымынан еш айнымайтынын да нақты көрсетіп отыр.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ "Міржақыптан" кейінгі жаңа меже: "Оян, қазақ" фильмінің авторлары ауқымды жобаға кірісті...

"Ахмет. Ұлт ұстазы", "Міржақып. Оян, қазақ!" секілді тарихи фильмдермен танылған шығармашыл топ тағы бір тың жобаны қолға алды деп жазады Ertenmedia.

Режиссер Мұрат Есжан мен продюсер Айсәуле Әбілда бұл жолы мотивациялық бағыттағы толықметражды фильм түсірмек.

Продюсердің айтуынша, туындыға шынайы өмірден алынған оқиға арқау болған. Фильм тәуелсіздіктің елең-алаңындағы мұнай-газ саласындағы күрделі оқиғалар мен талас-тартысты бейнелейді.

Сол тұстағы қым-қиғаш, қайшыласқан оқиғаларды көрсету арқылы авторлар қазақ киносында бұрын қамтылмаған тың тақырыпты қозғағалы отыр.

"Фильмнің басты идеясы ауылда туған қарапайым қазақ баласының қажырлы еңбегімен биікке көтеріліп, жетістікке жетуі. Жобаны жүзеге асыруға нақты өмірде болған оқиға арқау болды. Сол оқиғаның кейіпкерлері мен куәгерлері ұсыныс білдірген соң, сценарий жазуға кірістік. Идеяның біздің құндылықтармен үйлескені де маңызды болды", – дейді Айсәуле Әбілда.

Жаңа фильмнің сценарийі режиссер Мұрат Есжанның авторлығымен тоғыз ай бойы шетелде жазылған. Үш бірдей тарихи жобадан кейін шығармашылық пауза алған авторлар жаңа идеяға тыңғылықты дайындықпен келген.

"Жаңа жоба "Міржақып. Оян, қазақ!" секілді жобалармен рухы жағынан үндес. Фильм көрерменге "бәрі мүмкін" деген сенім сыйлауды мақсат етеді. Сценарий сапасы мен әктерлік құрамды іріктеуге де ерекше екпін берілді. Көрермен бұрынғы фильмдерде көрген әктерлер қайталанбайды", - дейді Айсәуле Әбілда.

Көрерменге қазақы колориттегі шабыт пен сенім сыйлайтын сапалы кино түсіруді мақсат тұтып отырған шығармашыл топ 10 тамызда түсірімге кірісіп кетті.

"Бұл біздің үлкен экранға дайындап жатқан алғашқы туындымыз. Бұған дейінгі жобаларды көрермен жылы қабылдады, сыншылар да оң бағасын берді. Үш бірдей ауқымды тарихи фильмнен кейін бізге аз-кем үзіліс керек болды. Сол үзілістің жемісі осы жоба", – дейді өз кезегінде режиссер Мұрат Есжан.

Шытырман оқиғаға толы фильмді алдағы уақытта кинотеатрлардан көре аласыздар.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Варшавадағы "тыңшы" қазақ: Польша НАТО-ның құпиясына қызыққан дипломатты тұтқындады...

Польша билігі дипломатиялық мәртебесі бар қазақ азаматын тыңшылық жасады деген айыппен тұтқынға алды.

Бұл туралы бірқатар БАҚ дерекөзге сілтеп хабарлады деп жазады Ertenmedia.

Даудың дәл ортасында қалған дипломат Қазақстанның Украинадағы елшілігінде әскери атташе көмекшісі қызметін атқарған.

Польшаның ішкі қауіпсіздік агенттігінің (ABW) мәліметінше, күдікті наурыз бен шілде аралығында Варшава мен Быдгощ қалаларында астыртын әрекет еткен.

Ресми Варшаваның пайымынша, қазақ дипломаты елдің ұлттық қауіпсіздігіне нұқсан келтіретін құпия мәліметтерді жинаумен айналысқан.

Әсіресе, НАТО альянсының әскери инфрақұрылымына қатысты ақпараттарды астыртын жолмен қолға түсірмек болған екен.

Дипломаттың тұтқындалуы 30 шілдеде жүзеге асып, Варшава аудандық соты оны үш ай мерзімге қамауға шешім шығарған. Дегенмен күдікті өзіне тағылған кінәні мойындаудан бас тартып, тек қысқа ғана түсініктеме берумен шектелген. Егер кінәсі дәлелденсе, Польша заңы бойынша 5 жылдан 30 жылға дейін бас бостандығынан айырылуы мүмкін.

Оқиғаға қатысты Польшаның премьер-министрі Дональд Туск та пікір білдіріп, ел қауіпсіздігіне қатер төндіргендердің жазасыз қалмайтынын мәлімдеді.

Қазақстанның ресми мекемелері әлі мардымды жауап қатпай отыр. Сыртқы істер министрлігі әскери мәселеге байланысты пікір бере алмайтынын айтып, жауапкершілікті Қорғаныс министрлігіне ысырған.

Польша тарапы ресми хабарламасында күдіктінің нақты қай елдің атынан әрекет еткенін әзір ашып айтқан жоқ. Қазақ дипломатының айыбы нақтыланса, екі елдің арасында үлкен дипломатиялық дағдарыс туу қаупі бар.

Айта кетейік, Қазақстан мен Польшаның дипломатиялық байланысы 1992 жылдан бастау алады. Сауда және парламентаралық әріптестік жыл сайын жанданып, 2023 жылғы екі елдің тауар айналымы 1,23 млрд долларды құраған еді.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Жамбылдағы беспредел: әкімнің бейқамдығы, имамның үнсіздігі және өгей әкенің озбырлығы...

Жамбыл облысы Талас ауданына қарасты Көктал ауылында ұзақ жыл бойы өгей әкеден қорлық көрген балалардың оқиғасы өңірдегі заң мен тәртіптің ахуалынан хабар бергендей.

Қазір бұған қатысты қылмыстық іс қозғалып, күдікті екі ай мерзімге қамауға алынды деп жазады Ertenmedia. Контексті айта кетейік...

Осыдан бірнеше күн бұрын малды өріске шығарған үш ағайынды үйге оралмай, ұшты-күйлі жоғалып кеткен. Анасы полицияға арызданғасын, іздеу салынған балалар Алматыдан табылған. Олар туған әкесі мен аналарының әпкесін паналауға мәжбүр болған. Кейіннен ағайындылар Тараздағы тұрмыстық зорлық-зомбылықтан жапа шеккендерді қабылдайтын орталыққа жеткізілген.

Белгілі болғандай, олар өгей әкесінен 5 жыл бойы зәбір көріп келген. Жасөспірімдерді ұрып-соғып, телефондарын тартып алып, күнделікті мал бағуға мәжбүрлеген.

Үш ұлдың үлкені, 16 жастағы егіздің сыңары колледжге түскенімен, өгей әкесі оның шәкіртақысын түгелдей өз қалтасына басып, баланы оқуға жібермей қойған. Он жасар Ұзақбай төртінші сыныпта оқуы керек болғанымен, қара танымайды, жазу-сызуға қабілетсіз күйде қалған.

Жәбірленушілердің жақындары бұған ауыл әкімі мен жергілікті имамның қатысы бар деп есептейді. Олардың айтуынша, ауыл әкімі Қайрат мырза мен имам әлгі отбасымен жақын араласқан, жағдайдан хабардан болған. Алайда балалардың тағдырына бас қатырмаған.

"Әкім де, имам да олардың басындағы жағдайды анық білді. Бірақ үнсіз қалды. Той-томалақтың ортасында жүретін олар бейбақтардың көз жасын неге көрмеді? Әкім мен имам да заң алдында жауап беруге тиіс", – дейді балалардың туысы.

Сондай-ақ олар тергеушілердің қылмыстық істі жеңілдетіп жібергеніне наразы.

Полиция "ұрып-соғу, ауыр жұмысқа шегу құлдыққа жатпайды, құлдық тек кісен мен бұғауға таңылған жағдайда ғана болады" деп отыр екен.

Қазір балалар Тараздағы дағдарыс орталығында. Туыстары оларға тиісті көмек көрсетілмегенін айтады. Ағайындылардың туған анасы өгей әкелерінің сөзін сөйлеп шығыпты.

Ербол Қарашөкеев жағдай әбден ушығып, ел ішіне тараған соң ғана қозғала бастады. Облыс әкімі арнайы жұмыс тобын құрып, істің мән-жайын анықтауға тапсырма беріпті.

Полиция іске қатысты тергеу жүріп жатқанын жеткізіп, балаларға қорлық көрсеткен өгей әкенің қатаң жазаға тартыларын мәлімдеп отыр. Балалардың өзі туған әкесімен бірге болуды қалайды. Олар ең кенже бауырын жетімдер үйіне беруге қарсы екенін жеткізіп, қоғамнан араша сұрауда.

Осының алдында Erteńmedia "Қарашөкеевтің тұсындағы Тараз 90-шы жылдарға қайта оралып жатқанын" жазған еді.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Қорытылып кеткен 600 мың теңге: қазақ тойындағы ең қымбат десерттің трагедиялы тағдыры...

Treads-те 600 мың теңгелік торттың төңірегіндегі дау толастамай тұр.

Астаналық кондитер Нұршат Ақбергенова мен Әселина Батыр дейтін блогердің арасындағы батл елді екіге жарған жайы бар деп жазады Ertenmedia.

Нұршат Ақбергенова блогердің тапсырысымен туған күн кешіне салмағы 18 келі болатын ерекше торт әзірлеген. Бір апталық еңбектің нәтижесінде торттың бағасы 600 мың теңгеге шыққан.

Алайда кондитер тапсырыс берушіден алдын ала алған 100 мың теңгеден басқа ақшасын ала алмай жүр.

"Материалдарға ғана өз қалтамнан 440 мың теңге жұмсадым, әр тиынының чегі қолымда тұр. Торттың сапасына, жасалуына ешкімнің шағымы болған жоқ. Бірақ тапсырыс беруші еңбегімді елеген жоқ. Бір апта бойы төрт адам еңбек еттік. Қазір өз ақымды ғана емес, қызметкерлерімнің де ақшасын бере алмай отырмын. Мен екі баланы жалғыз өсіріп отырған анамын. Торттың ақысын күтіп шаршадым", – деді Нұршат Ақбергенова.

Ал Әселина Батыр өз кезегінде торттың бағасын алдын ала білмегенін алға тартып отыр. Блогердің айтуынша, тәттінің бағасын кондитер оған тек шара аяқталғаннан кейін, торт желініп болған соң ғана жіберген.

"Ол жағдайды әсірелеп, халықты маған қарсы қойып отыр. 600 мың теңге туралы алдын ала келіскен жоқпыз. Мен тапсырыстың 100 мың теңгесін алдын ала төледім. Тортты алар сәтте қанша екенін нақты сұрағанымда, "кейін жазамын" деген жауап естідім. Бағаны алдын ала білгенде, мұндай тортқа тапсырыс бермес едім", – дейді блогер.

Кондитер болса, тапсырыс берушінің үнемі ойын өзгертіп, қосымша талап қойғанын айтып ақталуда. Нұршаттың сөзіне қарағанда, бағаның қымбаттығы сол талаппен тікелей байланысты.

Жанжал ушыққан соң Әселина Батыр заңгер жалдап, "жала жабу мен бопсалау" бойынша сотқа арыз әзірлеп жатқанын мәлімдеді.

Оның сөзінше, кондитер бағаны әдейі жасырған.

Желідегі жұрттың пікірі қақ жарылып, қырықпышақ болып жатыр. Бір топ "тауар бағасын алдын ала айту керек еді" деп блогерді жақтаса, келесі тарап "тортты тауысып тастаған соң қымбатсынып отыр" деп кондитерге қолдау білдіруде.

Сіздің ойыңызша, қазақ тойындағы ең қымбат десерттің шын бағасы қанша болуы керек еді?

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️ Берденов ісінің астарындағы ақша дауы: Шымкент әкімдігі «Тұрғын үй Шымкентті» тергеп жатыр...

Шымкентте «Тұрғын үй Шымкент» компаниясының қызметіне тексеріс басталды. Компанияны бұған дейін қала әкімінің орынбасары Руслан Берденовке қастандық жасады деп айыпталған Ернар Жиембай басқарған деп жазады Ertenmedia.

Дей тұрғанмен қала әкімдігі тексерістің Жиембай ісімен байланысы жоқ екенін мәлімдеп отыр.

Әкімдік өкілдерінің айтуынша, аудит тұрғын үйлерге жасалған жөндеудің сапасын тексеріп, бюджет қаражатының мақсатты жұмсалғанын анықтауға бағытталған.

Ал Ернар Жиембай мен әкім орынбасары арасындағы кикілжің «қаржыға қатысты болды» деген қауесетті әкімдік жоққа шығарды.

«Тұрғын үй Шымкент» компаниясы 2023–2025 жылдарға арналған тұрғын үй-коммуналдық шаруашылықты жаңғырту бағдарламасы бойынша бюджеттен 4 миллиард теңгеден астам қаржы алған.

Биыл компания 15 үйді жөндеп біткен, тағы 10 нысанда жұмыс жалғасуда. Жыл соңына дейін 22 үй толық жаңартылмақ.

Күрделі жөндеуге жауапты мердігерлерді тұрғын үй кеңестері өздері таңдайды. Әкімдік мамандары қаржының барлығы қайтарымды екенін, тұрғындардың төлемдері арқылы бюджетке қайта түсетінін айтып отыр.

«Қаржыландыру мен есеп беру процесі ашық әрі анық жүргізіледі», – деп хабарлады әкімдік.

Сондай-ақ, «Тұрғын үй Шымкентті» тендерге қатысудан шеттету туралы мәселе көтерілмегені белгілі болды. Компанияның құрылтайшысы қала әкімдігі.

Бұған дейін Берденовке қастандық ісі бойынша сот ісінде айыпталушы шендіге шенеунікке мылтық кезеніп, оқ атуының себебін егжей-тегжейлі айтып берген.

Жиембай оқиғаның жұмысқа түк қатысы жоғын, бәрі де жеке бастың мәселесінен, нақтырақ айтқанда қызғаныштан туындағанын мәлімдеген еді.

«Қоғам мұның ақ-қарасын білгені дұрыс. Мұны ел естісе екен деймін. Оқиғаның астарында қызметке қатысты ешқандай дау жоқ, бәріне қызғаныш түрткі болды. Ол келіншегімнің телефонына «сен сұлусың» деген хабарлама жіберген. Бұдан бөлек суретіне де лүпіл басқан», — деген еді ол.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️Үш жүз қазаққа көмек керек! Депутат Сайыров дабыл қақты...

Ауғанстаннан босып, екі жылдан бері Пәкістанның Карачи қаласын паналап отырған 40 қазақ отбасының тағдыры қыл үстінде тұр деп жазады Ertenmedia.

"Олар кез келген сәтте қайтадан Ауғанстанға кері қайтарылуы мүмкін", деп дабыл қақты Мәжіліс депутаты Ерлан Сайыров.

Бұл туралы депутатқа Карачиде тұрып жатқан Хамит Жорабай есімді қазақ хабарлаған.

Оның айтуынша, екі жыл бұрын Пәкістанды паналап барған үш жүз қазаққа осы елдің Қазақстандағы елшісі қолдау білдіруге уәде берген. Бірақ содан бері ешқандай көмек көрсетілмеген.

Енді Пәкістан билігі босқын мәртебесі жоқ қандастарымызды Ауғанстанға мәжбүрлі түрде қайтармақшы.

"Сыртқы істер министрлігі бұл жағдайдан хабардар. Бірақ олардың айтуынша, қандастарымыздың қолында "қазақ" деген анықтама жоқ. Ол құжатты алу үшін қайтадан Ауғанстанға оралу қажет екен. Егер олар Ауғанстан жеріне қайтатын болса, көретін күні тозақ болатыны сөзсіз", – дейді депутат.

Осыған орай, Ерлан Сайыров үкіметбасы Бектенов пен Сыртқы істер министрі Мұрат Нұртілеуге үндеу жолдады. Депутаттың пайымынша, мемлекет қандастарымызға қол ұшын беруге міндетті.

Оларды Қазақстанға көшіріп әкелуге мүмкіндік болмаса, онда бұл мәселені БҰҰ-ның алдына қою керек.

«Үш жүз қазақтың босқын мәртебесін БҰҰ арқылы мойындатудан басқа амал жоқ. Тек солай ғана қандастарымызды аман алып қала аламыз", – деді депутат.

📱 Erteńmedia

⚡️ Зеленский Украина аумағын саудаға салуға құқым жоқ деп мәлімдеді...

Украина президенті Владимир Зеленский ел аумағының бір бөлігін Ресейге беру туралы ақпаратты жоққа шығарды деп жазады Ertenmedia.

Бұған дейін батыстың ықпалды басылымы The Telegraph Украина президенті Ресеймен бейбіт келісімге келу үшін территориялық жеңілдіктерге дайын деген ақпарат таратқан еді.

Зеленский «Интерфакс-Украинаға» берген сұхбатында бұл мәліметті толықтай теріске шығарды.

"Мен "Телеграф" журналистерімен тілдескен емеспін. Алайда ақпараттық кеңістіктің қалай дайындалатынын жақсы білемін. Алдымен „Украина жерін айырбастауға дайын“ деген қауесет таратады, одан соң халықтың, блогерлердің, сарапшылардың реакциясын бақылайды. Мұның бәрі ақпараттық алаңды дайындаудың белгілі бір әдісі", – деді ол журналистермен кездесуде.

Зеленскийдің айтуынша, ел аумағын өз қалауы бойынша бөліп беру ешкімнің қолынан келмейді. Бұл заңға немесе Конституцияға ғана емес, моральдық қағидаға да қарсы әрекет.

"Мемлекет ешкімнің жеке меншігі емес. Донецк облысының 30 пайызы да біреудің жеке иелігі емес. Аумақ айырбастау мәселесі өте нәзік тақырып. Мұндай келісім Украинаның қауіпсіздігі мен тәуелсіздігіне тікелей қатысты. Елді ешкімнің алдында жығып беруге менің құқым жоқ", – деп түйіндеді ол.

Бұған дейін The Telegraph басылымы Зеленскийдің позициясы өзгергенін, Трамп пен Путиннің 15 тамыз күні Аляскада өтетін келіссөзі алдында ол территориялық жеңілдіктерге көнуі мүмкін екенін хабарлаған болатын.

Бірақ Украина президенті бұл мәліметті толық жоққа шығарып отыр.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia

⚡️Сыздықбековтің "салқын душы". Шымкент әкімдігі Берденов-Жиембай жанжалынан іргесін аулақ салуда...

"Тұрғын үй Шымкент" компаниясының қызметіне аудит жүргізетінін айтқан әкімдік тексерістің Жиембай ісіне қатысы жоғын мәлімдеп отыр.

Кикілжіңге "ТОО-дағы ақша айналымы түрткі болды" деген қауесетті де теріске шығарып үлгерді. Компанияны тендерге қатысудан шеттету туралы мәселе көтерілмегені белгілі болды.

"Әкімдік Берденов пен Жиембай арасындағы дауға саяси реңк беруден бас тартып, екі тарапты теңдей алыстатып, мәселені тұрмыстық деңгейге түсіруге күш салып жатқандай әсер қалдырады", - деп пайымдайды осы тұста Ertenmedia.

Сыздықбеков басыбүтін әкімдікке бағынатын компанияны жанжал ошағы етіп көрсетуге құлықты емес. ТОО-ға қатысты барлық дерек қолында тұрғасын, дәл осы тұста аудит жүргізу арқылы алдағы уақытта пайда болатын түрлі-түрлі спекуляцияның алдын алмақ.

Әкім іске қатысты әлдебір маңызды ақпаратты жариялауға әлі ерте деп есептеп отырғандай.

Тергеушілер тарапынан сұрақ туындап қалса, қолдағы дәлел мен аудит қорытындысын құзырлы органның алдында тосып, шешуші сәтте (бәлкім, Берденов сөйлей бастаған кезде) әкімдік беделін қорғап қалуға қамданып жатқан секілді.

Берденов пен Жиембайдың жанжалына "тұрмыстық дау" деген ресми анықтама бермесе де, әкімдіктің ілгерідегі мәлімдемесі еріксіз осындай ойға жетелейді.

Қала басшысы екі тарапқа да салқын қарап, мәселеге өзінің табиғи ағысымен жүруге ерік беріп отыр. Әдетте мұндайда кейбіреулер асығыс шешім қабылдап, қоғам қысымына шыдамай, популистік әрекетке барып жатады. Осы орайда әкімнің әліптің артын бағу стратегиясы әзір ең ұтымды әдіс.

Сыздықбеков бір жағынан қоғамдық пікірді бақылауда ұстаса, екінші жағынан әкімдіктің өз ішіндегі түрлі күштердің тартысын сыртқа шығармауға тырысуда.

Бұл тұрғыда аудит көпфункционалды әрі күні бұрын ойластырылған қадам.

Сыздықбеков соңғы кезде өршіп кеткен "Тұрғын үй Шымкентке" қатысты түрлі-түрлі алып-қашпа әңгімені сап тыймақшы.

Біздіңше желідегі "Берденов пен Жиембайдың жанжалы компаниядағы былықтан тұтанды" деген тұспал Ғабит Әбдімажитұлына ұнамайды. Берденовті жемқорлықпен күрескер ретінде дәріптеу де өзін-өзі ақтамайтын сценарий. Атышулы ТОО толықтай әкімдіктің иелігінде. Кикілжіңнің түп-төркіні компанияның миллиардтарына тірелсе, ендеше қала басшысының беделіне де сөзсіз көлеңке түседі.

Сыздықбеков мұндай тәуекелге саналы түрде барып отыр. Аудит жүргізу арқылы барлық жауапкершілікті өз мойнына алып, "Тұрғын үй Шымкент" қызметінің "тазалығын" құжат жүзінде дәлелдеуді мақсат тұтуда.

Біздіңше қала басшысы жанжалдың түп-тамырын біледі және аудиттің де таза шығарына сенімді.

Аудит таза шығар болса, Берденов пен Жиембай арасындағы конфликті әкімдік дәлізінен алыстап, сотта тұрмыстық сипаттағы сценарийге екпін берілуі мүмкін.

Бұл жайлы тағы бір тың материал дайын тұр. Бізге тіркелуді ұмытпаңыз👇

📱 Erteńmedia