⚡️«Сюцай» сынды індеттің иесі кім: Сарымның Балаеваға бағытталған батыл сауалы...

Депутат Айдос Сарым Ақпарат министрі Аида Балаеваға сауал жолдап, елдегі ақпараттық кеңістікте күмәнді тренинг пен далбаса дәрістердің тым көбейіп кеткеніне алаңдаушылық білдірді, деп жазады Ertenmedia.

Оның пікірінше, бүгінде бұл мәселе жеке адамның таңдау еркіндігі шеңберінен шығып, тұтас қоғамға қауіп төндіретін «пандемияға» айналған.

«Кез келген әлемжеліні ашсаңыз жалған пайғамбарлар, ғалымсымақтар мен алаяқтар ұйымдастырған сансыз семинар, курс пен дәрістен көз сүрінеді. Осындай күмәнді схемаға алданып, мыңдаған адам жиған-терген табысынан айырылуда», – дейді депутат.

Сарымның айтуынша, кейбір тренингтер эзотерикалық қаржы пирамидасына айналып кеткен. Мұндай «менталды індет», «психологиялық есірткіге» тіпті тұтас ұжымдар мен отбасылар шырмалып қалған.

Бұған қоса, депутат мемлекетке қарасты компаниялар мен квазимемлекеттік сектор да тренинг пен тимбилдинг деген желеумен осыған репутациясы күмәнді коучтердің қызметін сатып алатынын, сол үшін қымбат қонақүйлерге тапсырыс беріп, бюджет қаржысын оңды-солды шашатынын сынады.

«Мемлекет қаржылық алаяқтықпен, киберқылмыспен, нашақорлықпен, түрлі сектамен арпалысып жатыр. Аталған қауіптің барлығын бойына жинаған осындай күмәнді топтар мен олардың төбе басында тұрған жетекшілермен неге күреспейміз?» – деген сауал қойды депутат.

Айдос Сарым министрліктен:

«Сюцай» секілді ұйымдардың қызметі мен олардың қоғамға әсері бақыланып отыр ма, мұндай ұйымдардың әрекетіне ғылыми тұрғыдан баға беріле ме, халық арасында ақпараттық-түсіндіру жұмысы жүргізіле ме және мемлекетте осы бағытта жұмыс істейтін білікті мамандар мен ғылыми ресурстар жеткілікті ме деген сұрақтарға жауап беруді талап етті.

Айта кетелік, бұған дейін Ertenmedia «Атамекен» палатасының «сюцай» деп аталатын күмәнді ағым өкілдерін шақырып, бизнесмендерге тренинг өткізбек болғанын жазған еді.

Бізге жазылып алыңыз👇

https://t.me/ertenmedia

⚡️Бектеновтің дедлайны: Тоқаев түзетуді талап еткен бағдарламада қандай шикілік бар...

Шағын бизнес пен қымбатшылықтан қажыған халықтың шағымы Ақордаға жеткен тәрізді.

Тоқаев Үкіметке апта соңына дейін қазіргі экономикалық реформаның кем-кетігін түзету жоспарын әзірлеуді тапсырды, деп хабарлайды Ertenmedia.

Президент бағдарламадағы басымдықты шағын және орта бизнесті қолдауға, халықтың табысын арттыруға бағыттауды міндеттеп отыр.

Мемлекет басшысының айтуынша, экономикалық саясат негізінен ел мүддесі мен жаһандық трендке сай келеді. Дегенмен бағдарламаның нақты орындалуын шағын бизнесті көтермелеуге, инвестициялық ахуалды жақсартуға және жалпы экономиканы сауықтыруға бейімдеу керек.

Бектеновтың 48 сағат уақыты бар...

Бұған дейін Ertenmedia-ға пікір білдірген экономист Расұл Рысмамбетов биліктің кедейлікпен күрес стратегиясы жұмыс істемейтінін айтқан.

«Халықта капитал жоқ. Тіпті үтік пен шәугімге дейінгі шағын дүниені де кредитке алатын болдық. Қымбат зәулім үйлер аңырап-қаңырап тұр. Оған көшіп барады-ау деген орта таптың табысы ортайып қалған. Тапқан табысыңның тең жартысын тамаққа жұмсау, шыны керек трагедия», — деген еді ол.

Бірер ай бұрын Тоқаев жаңа Салық кодексіне қол қойған.

2026 жылғы 1 қаңтардан бастап құжатқа сәйкес қосылған құн салығының базалық мөлшерлемесі 12 пайыздан 16 пайызға дейін көтеріліп, жеке табыс салығының прогрессивті шкаласы енгізіліп, «байлыққа салынатын салық» пайда болады.

Кодекс қабылданған соң бизнес өкілдері оның тәуекелі жоғары екенін мәлімдеді. Сарапшылар кәсіпкерлер үшін алдағы жылдар «тіршілік үшін күрес кезеңіне» айналатынын айтуда. Жаңа салық саясаты бухгалтерияны қиындатып, шығынды арттырып, микробизнеске ауыр соққы болмақ. Көптеген шағын кәсіпкер жеңілдетілген режимнен айырылуы мүмкін.

Елдегі екі таңбалы инфляция қазақтардың қалтасын қағып-сілкіп жатыр. Halyk Finance есебінше тұрғындардың жалпы шығынының 52,5 пайызы азық-түлікке жұмсалады екен.

Мәжіліс депутаты Асхат Рақымжановтың дерегінше Қазақстанда кедейлік деңгейі соңғы он жылда екі есеге жуық өскен. 2015 жылы халықтың 2,7 пайызы кедей деп есептелсе, 2024 жылдың соңында бұл көрсеткіш 5,1 пайызға жеткен.

Бізге жазылып алыңыз👇

https://t.me/ertenmedia

⚡️Туыстар тепкісіндегі тағдыр. Бір үйдің бес баласы баспанадан айырылып, анасынан ажырады...

Ақтөбеде бес бала видео үндеу жолдап, қоғамнан араша сұрады, деп хабарлайды Ertenmedia.

Олар аналарының еркінен тыс психиатриялық ауруханаға жатқызылғанын, ал өздері балалар орталығына түскенін айтып, көмек сұрап отыр.

Балалардың үлкені Құралайдың сөзінше, жанжалға себеп баспана мәселесі.

"Қазір біз “Аяла” балалар орталығындамыз. Бір-ақ күнде анамызды психиатриялық ауруханаға алып кетті. Біз осында тап болдық. Үй сатылғанда туыстар анамды өз үлесінен бас тартуға мәжбүрледі. Енді бауырларымды жетімдер үйіне жіберуі мүмкін. Біз қорқып отырмыз. Әкеміз ішімдікке салынған, анамыз бізді жалғыз өзі бағып келді. Бір-ақ күнде бүкіл отбасымыз быт-шыт болды", – дейді қыз.

Құралайдың айтуынша, үй сатуға келіспеген соң, туыстары үйге басып кіріп, анасын соққыға жыққан.

Сол оқиғада полиция шақырған тәтесі анасына жала жауып, «қолында пышағы бар, адамдарға шабуыл жасады» деген сылтаумен ауруханаға жатқызған. Құралай бұл жайтты толық видеоға түсіргенін де айтып отыр.

Балалардың анасы қазір Алматыдағы Республикалық психикалық денсаулық орталығында емделуде. Ақтөбе облыстық денсаулық сақтау басқармасы 1986 жылы туған әйелдің психиатриялық есепте тұрғанын растады.

Балаларға алғаш болып қол ұшын созған ерікті Әсел Мұхан оларды өз қамқорлығына алған. Оның сөзінше, балалар әлі күнге дейін анасын уайымдап, туыстарынан қауіптенеді.

Қазіргі таңда балалар омбудсмені Динара Закиева балалардың анасымен байланыста екенін, әйелдің Алматыда диагнозын қайта тексертіп жатқанын жеткізді.

Әкесі болса, 2021 жылы ажырасқалы отбасынан бөлек тұрады, балалар өміріне араласпайды әрі ішімдікке тәуелді екені белгілі болды. Әйелдің жеке баспанасы жоқ, қазір ол дағдарыс орталығының көмегіне мұқтаж.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️ШҚО экологиясындағы «эпидемия»: 130 миллиондық «аванспен» ұсталған Ботабаев...

ШҚО-ның экология департаментін басқарған Мамай Ботабаев аса ірі көлемде пара алғаны үшін 10 жылға сотталды, деп хабарлайды Ertenmedia.

Orda-ның мәліметінше Антикор оны былтыр шілдеде жол-құрылыс компаниясы басшысының орынбасары Қанат Дырынбаевтан 8,5 млн теңге алып жатқан жерінде ұстаған.

Тергеу дерегінше, бұл бастапқы аванс қана. Ботабаев жалпы алғанда 130 млн теңге көлемінде пара алмақ болған.

Сот процесінде бұрынғы шенеунік өз кінәсін мойындаған жоқ. Дегенмен, сот оған 10 жыл 1 ай мерзімге бас бостандығынан айыру жазасын тағайындады. Пара берген Қанат Дырыңбаев та дәл осындай мерзімге сотталды.

Бұл іске қатысы бар тағы бір тұлға «Инком-Шығыс» ЖШС-ның басшысы Марат Ақылғазин. Ол пара ақшасын заңдастырмақ болғаны үшін 6 жылға бас бостандығынан айырылды.

Тергеу барысында Ақылғазин Дырынбаевтың заңсыз табысын өз компаниясы арқылы жасыруға әрекеттенгені дәлелденген. Үкіммен келіспеген тарап апелляциялық шағым түсіруі мүмкін.

Айта кету керек, Мамай Ботабаев Шығыс Қазақстан облысының экология департаментін небәрі жарты жыл басқарған.

Оған дейін Абай облысында қызмет етіп, бұл лауазымға парамен ұсталған бұрынғы басшы Данияр Әлиевтің орнына келген еді. Әлиев қазір колонияда жазасын өтеп жатыр.

Әлиевтің тұтқындалуына бір ай қалғанда оның орынбасары Рауан Тұраров та алтын өндіруші компаниядан пара алғаны үшін 7 жылға сотталған болатын. Осылайша, ШҚО экология департаментінің соңғы үш басшысы да парамен ұсталып, түрмеге қамалды.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Жұманғарин Конгреспен келісуге кетті: Қазақстан мен АҚШ арасындағы соңғы тосқауыл алынбақ...

Ақорда мен Ақ үй қырғиқабақ соғыс заманынан қалған сауда шектеуінен құтылуға жақын, деп хабарлайды Ertenmedia.

«Орта Азия жаһандық геосаяси пазлдың маңызды бөлшегі болады» деген әулие Бжезинскийдің болжамы ақиқатқа айналуда.

Уашингтонға жұмыс сапарымен барған вице-премьер, Ұлттық экономика министрі Серік Жұманғарин АҚШ Конгресі мүшелерімен кездесуде атышулы Джексон–Вэник түзетуін алып тастауды екі сағат бойы талқылаған екен.

Әзірге екі ел арасындағы сауда-саттыққа осы түзету ресми түрде кедергі келтіріп тұр. Жұманғарин аталған шектеуді жою процесін Конгресс тездетеді деген үмітте.

Министрдің айтуынша, Қазақстан америкалық инвесторлар үшін сенімді серіктес және бизнесті кеңейтуге ашық ел. Ол АҚШ Сауда палатасының өкілдерімен кездесуде екі ел арасындағы әріптестікті білім беру, цифрландыру және энергетика саласында тереңдетуді ұсынған.

Қазір Қазақстанда 30-ға жуық шетелдік университет бар, олардың екеуі әмерикалық оқу орындары.

Америкалық конгрессмендер бұл мәселеде Қазақстанға толық қолдау көрсетуге дайын екенін жеткізген. Бұған дейін сенатор Джеймс Риш пен конгрессмен Роберт Адерхольт Джексон–Вэник түзетуін алып тастауды қолдайтындарын және екі ел арасындағы тұрақты сауда шарттарын орнату маңызды екенін айтқан еді.

Айта кетейік, қазіргі АҚШ мемлекеттік хатшысы, бұрынғы сенатор Марко Рубио аталған түзетуді «ескірген әрі абсурд» деп атаған болатын.

Ол Қазақстанның нарықтық экономика талаптарына сай екенін және ДСҰ сынағынан сәтті өткенін алға тартқан. Дегенмен Джексон–Вэник түзетуін түпкілікті алып тастау үшін АҚШ Конгресінің келісімі қажет.

Бұған дейін әйгілі Atlantic Council аналитика орталығы бізге қатысты терең талдау жасап, 78 млн тұрғыны бар аймақты Қытай мен Ресейдің талауына беріп қоймауды үндеген еді.

"Астананың геосаяси потеницалымен санасатын кез келді. Экономикадағы (біз айтқан soft power) әріптестік бұдан былай АҚШ-тағы министрлер кабинетінің деңгейінде қаралуы тиіс, оны жұмыс тобына ысыра салуды доғару қажет", — деген еді Atlantic Council.

❗️Әміриканың халықаралық саясаттағы бағыт-бағдарына ықпал ететін The National Interest журналы да осы сарында сөйлеген еді. Басылым «аз уақыттан кейін Қазақстанда орыстың пенсионерлері ғана қалады…» деп болжап отыр.

Конгресс Жексон және Веник заңына termination (күшін жойса) жасаса, Қазақстанға ағылатын ақша мен инвестиция, тауар атаулы ондаған, жүздеген есе өседі. Ресейдің экономикалық экспанциясын тежейтін паритет пайда болады. АҚШ ел нарығына енсе, ескі Қазақстаннан қайтарылған ірі компаниялар америкалық кәсіпкерлердің иелігіне берілуі мүмкін. Оның жалғыз жолы Жексон және Веник заңының күшін жою.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Бензин мен тарифтің «тайм-ауты»: Үкімет халықтың қалтасына қарайлай бастады...

Қазақстан үкіметі бензин мен коммуналдық қызмет бағасының өсуіне мораторий жариялады, деп хабарлайды Ertenmedia.

Үкіметтің баспасөз қызметінің мәліметінше, 16 қазаннан бастап елде инфляцияны ауыздықтап, халық пен бизнесті қолдауға бағытталған шаралар іске қосылады.

Атап айтқанда, инфляциялық жағдай тұрақталғанша АИ-92 маркалы бензин мен дизель бағасы қымбаттамайды.

Сондай-ақ 2026 жылдың бірінші тоқсаны аяқталғанша коммуналдық қызмет тарифтерінің де өсуіне жол берілмейді. Тарифті тұрақтандыру коммуналдық саладағы шығындарды оңтайландыру есебінен жүзеге асады.

Шағын және орта бизнесті қолдау мақсатында жаңа бастамалар қолға алынып жатыр.

Мәселен, 2026 жылдың 1 қаңтарынан бастап микро және шағын кәсіпкерлік субъектілеріне салық тексеруі, камералдық бақылау және келісімшарттарға қатысты сот талаптары тоқтатылады.

Бұдан бөлек, жеңілдетілген салық режиміндегі 44 қызмет түрінен басқа барлық сала бойынша шектеулер алынып тасталады.

Арзан ипотека көлемі екі есе ұлғайып, 500 млрд теңгеге жетеді. Тұрғын үй құрылысында «Наурыз», «Наурыз-Жұмыскер» және әскерилерге арналған «Әскери баспана» бағдарламалары кеңейтіледі. Құрылыс компанияларымен үш жылдық баға тұрақтылығын қамтитын офтейк-келісімдер жасалады.

Сондай-ақ, автокөлік сатып алуға арналған жеңілдетілген несие жалғасып, жеке тұлғаларға автокөлік лизингі енгізіледі. Бұған қоса «Бәйтерек» холдингі кәсіпкерлікті қолдаудың қосымша тетіктерін әзірлейді.

Айта кетелік, бүгін Тоқаев Бектеновке 48 сағат уақыт беріп, апта соңына дейін қазіргі экономикалық реформаның кем-кетігін түзетуді бұйырған еді.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Каспийде қалқып жүрген Лукойл: Лондон мен Ақорда арасында қандай ойын жүріп жатыр...

Ұлыбритания ресейлік «Лукойл» мен «Роснефть» компаниясын «қара тізімге» енгізгенімен, олардың Қазақстандағы бірқатар ірі мұнай-газ жобаларына қатысты қызметін шектемейтін болды, деп хабарлайды Ertenmedia.

Forbes-тың мәліметінше Британ үкіметі екі компанияның Қазақстан мен Әзербайжандағы стратегиялық жобаларда жұмыс істеуіне рұқсат берген.

Әсіресе, Қазақстан үшін маңызды Каспий құбыр консорциумы (КТК), «Теңізшевройл» (ТШО) және Қарашығанақ жобасы ерекше аталып, орыстардың осы жобадағы қызметін санкциядан уақытша босату қарастырылған. Аталған жеңілдік 2027 жылдың 14 қазанына дейін жалғасады.

Ресейлік компаниялар Қазақстанның мұнай-газ саласына дендеп еніп алған.

Атап айтсақ «Лукойл» компаниясы «Теңізшевройлдың» 5 пайыз, ал Қарашығанақ жобасының 13, 5 пайыз үлесіне ие. Бұдан бөлек, 2023 жылы «ҚазМұнайГаз» бен «Лукойл» Каспий теңізінің қазақстандық бөлігіндегі «Қаламқас-теңіз, Хазар, Әуезов» кен орындарын игеруге қатысты бірлескен келісімге қол қойған.

Келісім аясында «Лукойл» қазақстандық «Kalamkas-Khazar Operating» ЖШС-ның жарғылық капиталының 50 пайызын сатып алып, стратегиялық серіктес атанған болатын.

Ресейлік компанияның осы кен орындарына құятын инвестициясы алдағы жылдары 6 миллиард доллардан асатыны, ал алғашқы теңіз платформаларының іске қосылуы 2026 жылға жоспарланғаны айтылған.

Президент Тоқаев «Лукойлдың» Қазақстандағы қызметінің 30 жылдығына орай өткен іс-шарада компанияның елімізге салған инвестициясының жалпы көлемі 12 миллиард доллардан асқанын, осы уақытқа дейін 94 млн тонна мұнай және 60 млрд текше метр газ өндіргенін атап өткен еді.

Ал «Роснефттің» Қазақстандағы негізгі рөлі мұнай экспортын қамтамасыз ететін Каспий құбыр консорциумындағы үлесімен байланысты. Компания КТК-ның 7, 5 пайыз акциясына ие және қазақ мұнайының сыртқы нарыққа тасымалдануында шешуші мәнге ие оператордың бірі.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Зумерлерден сескенген билік: Ақорданы алаңдатқан Непал сабағы...

Саясаттанушы Досым Сәтпаев Ақорда пен Үкіметтің экономикалық реформаға қатысты соңғы шешіміне пікір білдірді, деп хабарлайды Ertenmedia.

Оның айтуынша, президент Тоқаев премьер Бектеновке «экономикалық саясатты халықтың мүддесіне қарай бейімдеу» туралы пәрмен берген.

Артынша Үкімет осы тапсырманы орындау үшін апыл-ғұпыл жиын өткізіп, «кабминнің» бұған дейін қабылдаған шараларының салдарымен күресуге кірісіп кеткен.

«Түсінгеніміз, үкіметтің осыған дейінгі істеген тірлігі халықтың мүддесіне қайшы келген болып тұр ғой. Жыл басынан бері желідегі қауым мен шағын-орта бизнес өкілдері де осыны қақсап айтып келді. Айналып келгенде мәселеге Тоқаев араласты, Ақорданың тоқпағы керек болды», – дейді Сәтпаев.

Саясаттанушы бүгінгі дүрбелеңнің тегін емесін, мұның артында тақап қалған референдум мен билік транзитіне түрткі болатын конституциялық өзгерістер жатқанын тілге тиек етіпті. Пікірінше, билік алдағы сайлауға дайындық аясында өз әрекетін қайта қарап отыр.

«Шын мәнінде жүйе «Қаңтардың» қайталануынан қауіптенеді. Елді әдемі ұрандармен алдаусырату саясаты нәтиже бермей тұр.

Әлеуметтік жағдай күрт нашарлап, баға өсіп, кіріс азайып барады. Әлемдік тәжірибеде көрсеткендей, халықтың қарны ашса, биліктің ұраны күресінге тасталады.

Түнеукүнгі Непал, Марокко, Мадағаскардағы кейінгі толқын жастардың (зумерлердің) көтерілісі талайды ойландырып тастады», – дейді Досым Сәтпаев.

Ertenmedia осының алдында Бектенов үкіметінің инфляцияны ауыздықтап, халық пен бизнесті қолдауға бағытталған шаралар пакетін іске қосқанын хабарлаған еді. Министрлер Тоқаевтың түртпегінен кейін қимылдай бастаған.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Түрме, тәубе және тағдыр: Мухамадиеваның мұңы мен үйқамақ үміті...

Әлемжеліде қазақтарды әжуәлап, бүтін бір ұлтты келеке еткен атышулы Алика Мухамадиеваға прокурор төрт жарым жыл түрме жазасын сұрады, деп хабарлайды Ertenmedia.

Қарағандыдағы сот процесі Қылмыстық кодекстің 174-бабы «Әлеуметтік, ұлттық, рулық, нәсілдік немесе діни алауыздықты қоздыру» бойынша жүріп жатыр.

Айыптаушы тараптың сөзінше, Мухамадиеваның әлемжелідегі жазбасы ұлтаралық жанжал туғызып, елдегі титулды ұлттың ар-намысына тиген. Мұның бәрі сараптама қорытындысымен дәлелденген.

Іс насырға шапқанын сезген күдікті елден қашып, ізін жасыруға талпынған. Дау тұтанған сәтте қазақтілді қауым провокаторды елден қууды талап еткен болатын.

Аликаның бұған дейін қазақтардан кешірім сұраған, бірақ бұл оны жауапкершіліктен босатпайтын сыңайлы.

"Сол күні қатты күйзелісте болдым. Сол сәтте не істеп қойғанымды өзім де түсінбедім", – деді ол сотта.

Сөзінше қамауға алынғанына 87 күн болған және сол уақыттан бері кішкентай қызын көрмеген. "Қызым күн сайын “Анашым қайда?” деп атама сұрақ қояды…" – деген Мухамадиева сотта көз жасын көл қылған еді.

Ол тергеу изоляторында бірге отырған діндар әйелден Құран кітапты сыйға алғанын және сол арқылы өз қателігін терең ұққанын айтып, ақталып отыр. Аликаның адвокаты да мәселені балаға сілтеп, анасынан айырмауды сұрауда.

"Айыппұл немесе үйқамақпен шектелсе жеткілікті. Тек түрмеге отырмасын", – дейді қорғаушы.

Сот соңғы сөзге дайындалу және істі түйіндеу үшін 3 қарашаға дейін үзіліс жариялады.

Ertenmedia-ға жеткен мәлімет бойынша Қарағанды тұрғыны айыппұлмен құтылмайды. Биліктің өзі де 174-бабты жұмсартуға мүдделі емес. Ақорда идеологтары мұндай жағдайда Алика секілді провокаторлар күрт көбейеді деп қауіптенеді.

Айта кетелік, Алика Мухамадиева Қарағандыда киім дүкені мен доставкі бизнесіне иелік ететін кәсіпкер. Instagram парақшасында жарияланған жазбада Мухамадиева қазақша сөйлеуді талап ететіндерді "мамбет" деп мазақ етіп, мемлекеттік тілді «полукәлбитский диалог» деп келемеждеген.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Нұрболдың нәубеті: Болаттың баласына бағытталған Бапидің «бомбасы»

Депутат Ермұрат Бапидің араласуымен Болат Назарбаевтың ұлы Нұрбол Назарбаевтың қатысы бар атышулы іс қайта жалғасты, деп хабарлайды Ertenmedia.

Бұған дейін Бәпи қарағандылық кәсіпкер Қуат Ерментаевтың шағымы бойынша Бас прокурорға жүгінген. Ерментаев өз меншігіндегі «PORUS» ЖШС-дегі үлесін "сантехниктің" ұлы рейдерлік жолмен тартып алғанын айтқан болатын.

"Рейдерлік әрекеттен кейін кәсіпкер тақырға отырған. Оның шағымымен Алматының Экономикалық тергеу департаменті 2022 жылы компаниядағы Ерментаевқа тиесілі үлесті тартып алу бойынша іс қозғаған. Алайда екі жылдан соң, “қылмыс құрамы жоқ” деген желеумен іс жабылған. Назарбаев әулетінің әмірі жүргені айтпаса да түсінікті", – дейді депутат.

Алайда 9 қазанда аталған іс бойынша тергеу қайта басталды. Бұл туралы Бас прокурор Берік Асылов мәлімдеді.

"Алматының Экономикалық тергеу департаменті Қуат Ерментаевқа тиесілі “PORUS” компаниясындағы 16 пайыздық үлесті заңсыз қайта тіркеу фактісі бойынша тергеу жүргізген. Іс қылмыс құрамы болмауына байланысты тоқтатылған еді. Алайда Ерментаев ұсынған қосымша аргументті қайта зерттеу нәтижесінде істі тоқтату туралы ескі қаулының күші жойылып, тергеу қайта жалғасты", – деді Асылов.

Әлгіден кейін Алматының Экономикалық тергеу департаменті кәсіпкерге тізе батырған Бөкеңнің баласына қатысы тергеу амалын бастап кетіпті. Істің барысы Асыловтың бақылауында.

41 жастағы Нұрбол Назарбаевты бұған дейін Бас прокуратураға қарасты Активтерді қайтару комитеті де сотқа берген-ді.

Экс-президенттің немере інісі 58 млрд теңге қарызы үшін істі болып жатыр. Оның банктегі есеп-шоты мен дүние-мүлкі бұғатталып, түрлі компаниядағы үлесіне шектеу қойылған. Бұған қоса ол елден шығу құқығынан айырылды.

Болат Назарбаев өзінің өсиетхатын алғаш рет 2014 жылы жазып, онда барлық мүлкін үлкен ұлы Нұрболдың атына табыстаған. Бөкеңнің өзі өмірден өткенмен, отбасының активі ыдырай қоймаған еді.

Соңғы кезде Нұрболға қарсы ақпараттық науқанның күшейгенін байқауға болады. Бапи бастаған депутаттар Болаттың ұлдарына күн бермейін деп тұр. Бөкең қайтыс болса да, ол үшін "Жаңа Қазақстан" алдында жауап беретін адам бар. Ол Болаттың ұлы - Нұрбол Назарбаев.

Бөкеңнің артында 9 заңды баласы, одан бөлек онға жуық заңсыз бала қалды. Оның ішінде бәйбішенің ұлдары Нұрбол мен Ербол Назарбаевтардың қолы ұзын.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Тұманды Альбионның тұтқыны: Лондондағы қонақ үйдің терезесінен қарғыған Әблязов...

Танымал журналист Марк Холлингсворт Британияның құқық қорғау жүйесінен сытылып кеткен Мұхтар Әблязов туралы бірқатар қызықты инсайдпен бөлісті, деп хабарлайды Ertenmedia.

Айтуынша, қазақ олигархы 2012 жылдың 15 ақпаны таң қылаң бере...

Лондонның қақ ортасындағы қымбат қонақүйдің бірінші қабатындағы терезеден қарғып өтіп, Британиядан оп-оңай қашып кеткен.

«Әблязов жылтырақ дүниеге құмар емес. Қымбат Armani емес, ортаңқол Marks & Spencer костюмін киіп жүретін шағын денелі олигарх Виктория вокзалына асығыс жетіп, әрі қарай Дувр портына жол тартады. Сол арада Орталық Африка Республикасының «дипломатиялық» паспортын көрсетіп, Францияға өткен», — дейді ағылшын журналисі.

Сол тұста Британ соты Әблязовқа қатысты ел тарихындағы ең ірі алаяқтық істі қарап жатқан.

Олигарх БТА банкінің 3,2 млрд фунт стерлинг қаражатын жымқырды деп айыпталған. Ұрланған қаржы шамамен жүздеген офшорлы компания мен шетелдік есеп-шотқа жасырылған болатын.

«Британияда бой тасалаған Мұхтар әлгі миллиардтарды лоббистер мен пиаршыларға жұмсап, Лондонның элиталы ауданынан аса қымбат жылжымайтын мүліктер сатып алған.

Соның ішінде атақты Хампстед ауданында бағасы 17 млн фунт тұратын 9 бөлмелі вилласы болды, әлгі вилланың ішінде 12 адам еркін сиятын түрік саунасы бар еді.

Кейіннен Кенсиңтоннан элиталы пәтер мен Виндзор саябағының түбінен 40 гектар жерді және сатып алып қойды», — дейді Холлингсворт.

Саясаткердің қуанышы ұзаққа созылмады. 2012 жылы Ұлыбритания соты Әблязовты активтері туралы жалған мәлімет бергені, құжатты қолдан жасағаны және сотты сыйламағаны үшін кінәлі деп танып, 22 айға түрме жазасына кесті.

«Оның ағылшын жерінен қалай қашқанын ілгеріде айттық. Соңғы 13 жылдан бері Әблязов Ұлыбритания сотына ұстатпай жүр.

Францияның оңтүстігіндегі Ницца мен Экс-ан-Прованс қаласында аяғын теңізге малып, жағалаудағы сәнді вилла мен жалға алынған сарайларда шалқып өмір сүруде.

Әблязов кейсі Британия мен Францияның шетелдік олигархтарға шара қолдануға келгенде әлі де шарасыз екенін көрсетеді», — дейді журналист...

Толығырақ осы тұстан оқуыңызға болады.

Сіздер үшін ізденуден шаршамайтын арнамызға тіркеліп алыңыз👇

https://t.me/ertenmedia

⚡️Құлыбаевқа қарсы крест жорығы. Депутаттар Halyk Bank атауына неге өшікті...

Қазақстанда банктер мен жекеменшік компанияларға «халық» сөзін қолдануға тыйым салынуы мүмкін, деп хабарлайды Ertenmedia.

Orda-ның мәліметінше бастаманы қолдаған 50-ден астам депутат тиісті ұсынысты «Банктер туралы» заңның 7-бабына өзгеріс ретінде енгізді.

Түзетудің негізгі авторы депутат Марат Башимов. Оның айтуынша, «халық» сөзі Ата заңда биліктің қайнар көзімен тікелей байланысты ұғым.

Мұны жеке меншік банктер мен олигархиялық құрылымдар коммерциялық мақсатта пайдаланған кезде, қоғамда «жалған қоғамдық миссия» туралы қате түсінік қалыптасып, елдің қаржы жүйесіне деген сенімге селкеу түседі.

«Конституциядағы «халық» сөзі қасиетті ұғым, ол биліктің қайнар көзі. Осындай салмақты ұғымды коммерциялық құрылымдар жарнама ретінде пайдаланып отыр. Бұл тұтынушыларды шатастырады және әділ бәсеке ережесін бұзады», – дейді Бәшімов.

Депутаттардың сөзінше, халықаралық тәжірибеде «ұлттық», «халықтық», «мемлекеттік» деген сөздер тек мемлекеттік мекемелерге ғана тиесілі, ал жекеменшік компания мұндай атауларды пайдалана алмайды.

Сондай-ақ олар Halyk Bank секілді жеке банктің «халық» сөзін пайдалануы тұтынушылардың құқығын қорғау туралы заң талаптарын бұзуы мүмкін екенін атап өтті.

Саяси сарапшы Ғазиз Әбішев бастамамен келіспей отыр.

"Конституцияда "халық" деген сөзді тек мемлекеттік немесе саяси институттарға ғана теліп қойған норма жоқ. Halyk Bank кеше құрылған жоқ, бірнеше онжылдық бойы жұмыс істеп келе жатыр. Оны ешкім мемлекеттік банк деп ойламайды. Мұндай жасанды шектеу экономикаға зиянын тигізуі мүмкін», – дейді Әбішев.

Сарапшының пікірінше, мұндай мәселені депутаттар эмоциямен емес, кәсіби қауымдастықпен талқылаған дұрыс.

"Президент Тоқаев жақында ғана инвестициялық климатқа сенімді күшейту керек деді. Ал Halyk Bank инвесторлар қауымдастығына кіреді. Мұндай мәселелені популистік емес, кәсіби тұрғыда талқылаған жөн", – деп түйіндеді ол.

Саясаттанушы Данияр Әшімбаев та осы ұстанымда.

"Депутаттардың логикасына салсақ, ертең Kaspi банктің да атауын өзгерту керек, өйткені біреу оны Каспий теңізінің иесі деп ойлап қалуы мүмкін. Forte банкі шетелше естіледі, соны да өзгерту керек пе? Мұның бәрі қоғам назарын экономикалық дағдарыстан басқа жаққа аударудың амалы сияқты", – деді Әшімбаев.

Айта кетейік, Марат Бәшімов осы мәселені бұған дейін де көтерген еді. Ол Тимур Құлыбаев бақылайтын Halyk Bank атауы азаматтық заң нормасын бұзып, тұтынушыларды шатастырып отырғанын айтқан.

"Құлыбаев? Халық атынан сөйлеуге тек конституциялық мәртебесі бар ұйымдар құқылы. Банктің "халықтық" деп аталуы заң тұрғысынан қаншалықты дұрыс? Бұл атау халықты шатастырып отырған жоқ па? Бұған кім рұқсат берген?", - деген еді ашуға булыққан депутат.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️BMW мінген депутат, дәріге зар болған бала: Шалданбаевтың шотындағы жұмбақ миллиондар...

«Amanat» партиясының депутаты, Кентау қалалық мәслихатының мүшесі Арман Шалданбаевтың аты тағы дауға қалды, деп жазады Ertenmedia.

Белгілі журналист Ботагөз Омарова депутаттың есепшотында жүздеген миллион теңге пайда болғанын айтып, оның қаражат көзінің күмәнді екенін алға тартты.

Омарованың жазуынша, депутаттың қаржылық былықтары ажырасу процесі кезінде кездейсоқ ашылған. Сот құжатына сәйкес, 2018-2021 жылдар аралығында Шалданбаевтың банктегі шоттарына 240 миллион теңгеден астам қаражат түскен.

Бұған қоса, ол жеке тұлғалардан тағы 330 миллион теңге көлемінде «қарыз» алған. Алайда депутаттың табыс декларациясында бұл сома көрсетілмеген, керісінше, табыс «нөл» деп жазылған.

Журналист депутатқа қатысты тағы бір жайтты ерекше атап өтеді.

Ажырасқан жұбайы мүгедек баласының еміне өз мүлкін сатуға мәжбүр болған кезде, халық қалаулысы BMW X7 көлігін сатып алып, жүздеген миллионға жалған келісімдер рәсімдеген.

Сот депуттатты бұрынғы әйеліне 83 миллион теңге төлеуге міндеттесе де, Шалданбаев шешімді орындаудан бас тартып отыр.

«Мәселенің ең таңғаларлық тұсы сот процесінің алдында ғана депутат желідегі парақшасында Мәжілістегі «Amanat» фракциясының жетекшісі Елнұр Бейсенбаевпен түскен суретін жариялаған. Мұны қалай түсінуге болады? Бұл кездейсоқтық па, әлде қоғам мен сотқа көрсетілген қысымның белгісі ме?» – дейді Омарова.

Депутаттыққа барар жолда да Шалданбаевтың аты түрлі жанжалмен аталған.

2019 жылы 5 желтоқсанда Бурабайдағы Rixos қонақүйінде болған пышақтасу оқиғасына оның тікелей қатысы бар екені айтылған еді. Камераға түсіп қалған оқиға кезінде Шалданбаев пен оның достары өздерінің танысы Асылбек Мәжіковке пышақпен шабуыл жасаған. Барлығы ұсталып, қамауға алынғанымен, бір аптадан кейін тараптардың татуласуына байланысты іс тоқтатылған.

Дәл сол тұста Түркістан облысының әкімі Өмірзақ Шөкеев болатын. Әкімнің аты да осы іске қатысты айтылғанымен, ресми түрде расталған жоқ. Ал оқиғадан кейін көп ұзамай Шалданбаев праймериз арқылы Кентау қалалық мәслихатының депутаты атанды.

Журналист осы мәселеге байланысты Бас прокуратураға, Қаржы мониторингі агенттігіне, Ішкі істер министрлігіне және «Amanat» партиясына ресми сұрау жолдағанын айтты. Ол депутаттың табысы мен Бурабайдағы пышақтасу оқиғасына нақты жауап алмақшы.

«Ең өкініштісі депутаттың өз мүгедек баласына емге ақша тауып беруге уақыты жоқ, бірақ Instagram-да әдемі өмірін көрсетуге келгенде аса белсенді. Өзінің туған ұлына осылай қараған депутаттың елге, мемлекетке деген қатынасы қандай болмақ?» – деп сауал тастайды Ботагөз Омарова.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Тақияның тағдыры: «Прожарканың» дауы прокуратураға жетті...

Журналист Асхат Ниязов YouTube-тегі "Прожарка" шоуында айтқан әзілі үшін заң алдында жауап беруі мүмкін, деп хабарлайды Ertenmedia.

Белгілі блогер Диас Құзайыров журналистің эфирдегі сөзін ұлттық бас киім тақияны қорлау және қазақ халқының ар-намысына тию деп бағалап, құқық қорғау органдарына шағым түсірді.

Әлемжеліде тараған видеода Асхат Ниязов тақия туралы «мүшесінде тақия ілініп тұр» деген мағынадағы дөрекі тіркес айтқан.

Блогердің пікірінше, тақия қазақ халқының ар-намысы мен абыройының символы саналатын ұлттық бас киім. Ал Ниязовтың айтқан сөзі қазақ ұлтының қадір-қасиетін әдейі кемсіту мақсатында айтылған.

Осы себепті блогер Құзайыров журналистің әрекеті ҚР Қылмыстық кодексінің 174-бабына («ұлтаралық алауыздықты қоздыру») сай келеді деп санайды.

Бұл бап бойынша 2 мыңнан 7 мың АЕК-ке дейін айыппұл салу немесе екі жылдан жеті жылға дейін бас бостандығынан шектеу не айыру қарастырылған.

Айта кетейік, аталған шығарылымға сонымен қатар режиссер Қанат Бейсекеев те қатысқан. Эфирде Қаңтар оқиғасына қатысты әжуалы пікір айтылып, қазақтілді қауымның ашу-ызасын туғызған болатын.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Құдаларға қойылған әмерикалық кісен: Нью-Йорк соты Әблязов пен Храпуновты тақырға отырғызды...

АҚШ-та БТА Банкі мен Алматы әкімдігіне қатысты атышулы сот процесінің қорытындысы жарияланды, деп хабарлайды Ertenmedia.

Нью-Йорктің Оңтүстік округінің федералды соты қазақстандық тарапқа 100 миллион доллардан астам өтемақы өндіріп беруге шешім шығарды. Оның 52 миллионы тікелей шығын ретінде есептелсе, қалған 50 миллион доллар іс ұзаққа созылғандықтан өндірілген пайыздық үстеме.

Іс Қазақстаннан 10 жылдан астам уақыт бұрын ұрланып, АҚШ аумағындағы жылжымайтын мүлік нарығына заңсыз бағытталған қаражатқа қатысты өрбіген.

Алматы әкімдігі мен БТА банкінің мүддесін АҚШ-тың әйгілі Boies Schiller Flexner адвокаттық конторасы қорғаған екен.

Қылмыстық схеманың артында Алматы қаласының бұрынғы әкімі мен БТА банктің экс-төрағасы тұр. Бір-бірімен құда-жекжат болып келетін Әблязов-Храпунов тандемі Алматы әкімдігі мен БТА банкінің қаржысын талан-таражға салып, 6 миллиард доллардан астам ақшаның ізін жасырып үлгерген. Храпуновтың ұлы Ілияс та осы афераның бел ортасында тұр.

Америкалық тараптың мәліметінше, алаяқтық желі әу баста-ақ ең мықты деген маманның өзін шатастыратын схема негізінде құрылған. Тергеу барысында жалған келісімдер мен құжаттар, жалған несие шарттары, жалған қарызды кешіру секілді түрлі манипуляция әшкереленген.

Істің айрықша деталі, сотталғандар арасында Доналд Трамппен іскерлік байланыста болған, ресейлік-америкалық кәсіпкер Феликс Сатер бар.

Сатер сот процесінде Әблязов пен Ілияс Храпуновтың Қазақстаннан ұрланған қаражатты АҚШ-қа бағыттауына белсенді атсалысқаны үшін айыпты деп танылды. Құдалардың капиталы АҚШ-тың жылжымайтын мүлік нарығына бағытталып, Сәтер мен оның серіктестерінің есеп-шотына аударылған.

Былтыр осы іс бойынша АҚШ соты Алматы мен БТА банктің пайдасына 32 миллион доллар өндірген еді. Екінші сот талқылауында қорғаушылар аргументті нығайтып, нәтижесінде өтемақы көлемі 100 млн-ға жетіп жығылды.

«Сотқа Алматы әкімдігі мен БТА банкінің өкілдерін қатыстырып, мәселенің астарында қарапайым тұрғындар мен банк салымшыларының мүддесі жатқанын көрсеттік. Храпуновтың Алматыны басқарған тұсындағы бірақ былығын судья үстеліне қойдық. Құдалар ұйымдастырған схеманың заңсыз екенін халықаралық деңгейде дәлелдедік», — дейді Boies Schiller Flexner адвокаттары.

Компанияның айтуынша осыдан кейін Әблязов пен Храпуновтың басқа елдегі активтерін іздестіру ісі қарқын алады. Cот шешімінің шеңберінде қаржы негізінен Сатерден және онымен тікелей байланысы бар компаниялардан өндірілмек.

Сот қаулысы дереу орындалатын болса, Алматы әкімдігі мен БТА банкі АҚШ-та айналымға түскен (100 млн доллар) ірі көлемдегі қаражатын қайтарады. Халықаралық тәжірибеде мұндай істе ақшаны өндіру процесі уақыт жағынан созылып кетуі де ғажап емес.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Атланттың ар жағынан атылған оқ: "Лукойлдың" қазақ жеріндегі алты миллиардтық арманы үзілді...

АҚШ Қаржы министрлігі «Роснефть» пен «Лукойлға» санкция салды әрі Мәскеуді Украинадағы соғысты дереу тоқтатып, бітімге келуге шақырды, деп хабарлайды Ertenmedia.

Әмерика билігі Ресей армиясын "асырап" отырған ірі компанияларды ұрымтал тұстан ұрып, Кремльді келіссөз үстеліне отырғызуды көздеп отыр. Санкцияға іліккен «Роснефть» пен «Лукойл» Ресейдің мұнай-газ нарығындағы алпауыт ойыншылар.

АҚШ Қаржы министрі Скотт Бессенттің айтуынша, санкцияның енгізілуіне президент Путиннің соғысты тоқтатудан бас тартуы себеп болған.

Министрліктің ресми мәлімдемесінде шешімнің Мәскеудің әскери амбициясын қаржыландыру мүмкіндігін шектейтіні айтылған. Жазаның салмағын арттыру үшін Уашиңтон өз одақтастарын да жаңа шектеуді қолдауға шақырып отыр.

Санкцияның негізгі соққысы «Роснефть» пен «Лукойлдың» бас кеңсесіне ғана емес, сонымен қатар олардың Ресейдегі 30-дан астам еншілес кәсіпорнына бағытталған. Бұлардың қатарына «Башнефть», «Самаранефтегаз», «Сибнефтегаз», «Оренбургнефть», «Куйбышевский», «Новокуйбышевский» секілді ірі мұнай өңдеу зауыттары мен кен орындары кірген.

Құрама Штаттар аумағында аталған компаниялардың және олардың еншілес кәсіпорындарының активі бұғатталды. Әмерика азаматына және АҚШ юрисдикциясына кіретін барлық компанияға санкция тізіміндегі тұлғалармен қандай да бір қаржылық операция жасауға қатаң тыйым салынды.

АҚШ Қаржы министрлігі санкцияны бұзған әмерикалық немесе шетелдік компанияларға қатаң шара қолданылатынын ескертті. Санкция тізіміндегі компаниямен байланыс орнатқан шетелдік қаржы мекемелері де Уашиңтонның қосымша санкциясына ұрынуы мүмкін.

Осының нәтижесінде Мәскеу Украинадағы соғысқа қажетті айтарлықтай қаржылық ресурстан қағылады деген болжам бар.

Ресейлік компаниялар Қазақстанның мұнай-газ саласына дендеп еніп алған. Ол туралы егжей-тегжейлі жазған болатынбыз. Толығырақ осы тұста.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️ Кремльге картамен жеткен көмек: қазақ банктерінің Батыстан жасырып отырған құпиясы...

Еуроодақ Ресейге қарсы санкциялардың 19-шы пакетін бекітіп, тізімге ВТБ (Қазақстан) банкін енгізді. Сарапшылар мұны Қазақстанның банк секторына жасалған қатаң ескерту ретінде қабылдап отыр, деп хабарлайды Ertenmedia.

Forbes-қа пікір білдірген экономист Арман Бейсембаевтың айтуынша, су жаңа санкцияның сипаты бұрынғыдан бөлек әрі қауіп-қатері көп.

«Әзірге бізді Құдай сақтап тұр, дүлей дауылдан аман қалдық. Дегенмен мұны Қазақстанның банк секторына бағытталған сигнал деп қабылдау керек.

Бұған дейінгі санкцияның көпшілігі көзалдау, тиіп-қашып жасалған шара секілді еді. Кремль көбіне-көп мұндай шымшыма шектеуді мизей бермейтін.

Бұл жолы Батыстың мәселені тереңірек зерттеп, барынша қатаң шараға көшкені байқалады», – дейді сарапшы.

Бейсембаевтың айтуынша, ВТБ банкінің жазаға тартылуы Қазақстанның қаржы жүйесі үшін соншалықты ауыр соққы емес. Банк 2022 жылы-ақ әмірикалық санкцияға шет-жағалай ілігіп үлгерген. Оған қарағанда, былтыр санкция салдарынан ел нарығынан біржола кеткен Сбербанктің ықпалы әлдеқайда күшті еді.

«Сбербанк Қазақстанда капитализация жағынан екінші орында тұрған. Оның нарықтан ығысуы кәдімгідей білінді.

Дәл осындай санкция еліміздің банк нарығында жетекші орынға ие Kaspi-ге салынса, дүрбелеңнің көкесі сонда болар еді. Елде аласапыран болып, қаржы жүйесінің астаң-кестеңі шығар еді.

Бюджет қаражатының басым бөлігі өтетін Halyk банк санкцияға ұшыраса, оның салдарын тіпті елестету де қиын. Мойындау керек, біз мұндай сценарийге мүлде дайын емеспіз», – дейді экономист.

Бейсембаев қазақстандық банктерге аса сақ болуды ескертіп отыр. Оның болжамынша, дүлей дауыл қайта айналып соғады. Келесі санкцияның орбитасына қазақстандық банктер де ілігіп кетуі мүмкін.

«Оған себеп болатын фактор жетіп артылады. Ел ішінде қазақстандық банктердің картасын рәсімдеп, артынша Ресейге аттандыратын арнайы компаниялар бар.

Осы арқылы Ресей азаматтарына SWIFT, Visa мен Mastercard жүйесін қашықтан пайдалануға мүмкіндік беріп қойдық. Батыс саясаткерлерінің көзі соқыр, құлағы керең емес, бәрін көріп-біліп отыр.

Осы саңылау жедел түрде жабылмаса, ертең еліміздің ең ірі бес банкінің кез-келгені санкция тырнағына ілінеді. Босаңсуға әлі ерте. 20-шы және 21-ші санкция пакеті көкжиектен көрініп тұр…», – деп ескерткен екен сарапшы.

Ertenmedia-да бұған дейін Ресей армиясын «асырап» отырған «Лукойл» мен «Роснефтьтің» санкция тұзағына түскенін жазған еді.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Бейнеудегі "братва": Теміржолшыларды кім қорқытып отыр...

Маңғыстау облысындағы Бейнеу станциясының теміржолшылары еңбек жағдайына шағымданғаны үшін басшылық қысымына ұшырағанын мәлімдеді, деп хабарлайды Ertenmedia.

Жұмысшылардың айтуынша, олар еңбек жағдайын жақсарту және арнайы жұмыс киімінің сапасыздығын айтып, мәселе көтергеннен кейін қоқан-лоққыға тап болған.

Бейнеу жол дистанциясының қызметкерлері бұл туралы видеоүндеу жариялап, кәсіподақ төрағасы мен дистанция басшысы жиынға «қылмыс әлемімен байланысы бар» адамды алып келгенін жеткізді.

«Басшылық шақырған белгісіз адамдар бізге ашықтан-ашық қысым жасады. Олар «тынышталмасаңдар, жағдайларың қиын болады» деп қорқытты», – дейді жұмысшылар.

Теміржолшылар осы жағдайға тікелей қатысы бар деп санайтын «Қазақстан темір жолы» Маңғыстау магистральдық бөлімшесінің басшысы Ерназар Ізтұрғановты және басқа да жетекшілерді дереу қызметінен босатуды талап етуде.

Жұмысшылардың айтуынша, жоғарыдан қысым көрсету арқылы олардың мәселесін жапқысы келіп отыр.

Қызметкерлердің сөзіне сенсек, Маңғыстау өңірінде жұмысшылар наразылығын басу үшін ОПГ-ны пайдалану бұрыннан бар тәжірибе.

Жергілікті жұмысшылар өңірде ықпалы бар адам ретінде лақап аты "Алиба" деп танылған Әлібек Нарбековты атайды. Ол бұрын ұйымдасқан қылмыстық топқа қатысы бар, рейдерлік және бұзақылық әрекеті үшін сотты болған. Жұмысшылардың айтуынша, "Алиба" пайда болғаннан кейін аймақтағы кез келген наразылық жұмбақ жағдайда бірден тоқтайды.

Өз кезегінде «Қазақстан темір жолы» жағдайды «ішкі тұрмыстық жанжал» деп атап, өңірге арнайы тексеріс тобын жіберетінін айтты.

«Мұның бәрі бірнеше қызметкер мен аймақтық бөлімше басшылығының арасындағы түсінбеушіліктен туындаған тұрмыстық жанжал», – делінген ҚТЖ мәлімдемесінде.

Жұмысшылар болса мұны ешқандай да «түсініспеушілік» емес, керісінше еңбек құқығын қорғап, еңбек қауіпсіздігін талап еткен мамандардың үнін өшіруге бағытталған әрекет деп есептейді.

Бұған әлі де тоқталамыз. Бізге жазылып алыңыз👇

https://t.me/ertenmedia

⚡️Қазақстандағы орыс тілінің соңғы симфониясы: Мәскеудің мұңы мен қазақтың қалауы...

Қазақстанда емін-еркін таралатын Pravda еліміздегі орыс тілінің ертеңіне алаңдап отыр.

Кремль пропагандасына сұхбат берген қазақстандық саясаттанушы Максим Қазначеев қоғамдағы орыс тіліне қатысты көзқарастың өзгеріп жатқанына қынжылыпты деп жазады Ertenmedia.

Сарапшының пікірінше, егемендік ала сала, біздің элита британдық және әмірикалық жобалардың жетегінде кеткен. Негізгі кен орындары да солардың қолында, саяси элита толығымен Батысқа бет бұрған.

Айтуынша, Ақорда үшін Ресеймен арадағы шекараны ың-шыңсыз, тыныш ұстаса болғаны. Мәскеудің өзге ешқандай саяси-экономикалық маңызы қалған жоқ.

«Орысша орта барған сайын тарылып, қазақтілді ортаның өрісі кеңейіп келеді. Орыстілді қауымның көбі елден кеткісі келеді. Олардың ішінде тіпті қазақтар да аз емес. Азаматтардың шамамен 75-80 пайызы болашағын басқа елмен байланыстырады. Әсіресе, Ресейге көшу үрдісі күшті. Қазақстандағы орыстар арасында: «ерте ме, кеш пе, мұнда бүлік болуы мүмкін» деген үрей басым», – депті саясаттанушы.

Қазначеевтің пайымдауынша, Қазақстандағы әлемжеліні Батыс елшіліктері басқарады екен. Әлгі жерде Ресейге қарсы русөфобтық агитация белсенді жүргізіледі.

Сарапшы орта білім саласында Ресей туралы көзқарастың өзгеріп жатқанына алаңдап отыр.

«Қазақстан тарихын мифологияға айналдырып, «деколонизация» тенденциясы күшейіп барады. Мұның бәрі Батыстан келген қорлардың ықпалымен болып жатқан процесс. Мақсат Қазақстанды «орыс әлемінен» мейлінше алыстату», – дейді Қазначеев.

Сарапшы елімізде Ресей басқыншылығын қолдайтын аудиторияның аясы тарылып жатқанын айтыпты. Оның мәліметінше, тұрғындардың 20-25 пайызы ғана Кремльді қолдайды, өзге 75-80 пайызы Батысқа қарай бағыт алған. "Әскери операция" әп-сәтте аяқталды деген үміт күл-талқан болған…

Пікірінше, Қазақстандағы Ресейдің ықпалы енді қалпына келмейді. Елдің элитасы мен жастары Мәскеуден түбегейлі алыстаған.

«Бізде Ресеймен біріккен шамамен 8 мың кәсіпорын бар. Бірақ бұл ең төменгі деңгейдегі байланыс. Одан жоғары стратегиялық, саяси деңгейде Ақорда Кремльден кетіп қалған. Түптің түбі Қазақстанның қауіпсіздігін Қытай қамтамасыз етеді. Тоқаевтың Бейжіңмен байланысты нығайтуы бекер емес. Жекешелендірудің екінші кезеңі арқылы елдегі Қытай үлесін 50%-ға жеткізу жоспарланған», – деп түйіндепті саясаттанушы.

Бұған әлі де тоқталамыз. Бізге жазылып алыңыз👇

https://t.me/ertenmedia