⚡️Сауын сиыр дәуірінің ақыры: Әбілқасымова банктерді мемлекет қазынасынан ажыратып тастады...

Қазақстанның қаржы нарығында соңғы жылдағы ең ауқымды реформа аяқталып, банктердің қызметіне түбегейлі өзгеріс енгізілді, деп хабарлайды Ertenmedia.kz.

Қаржы нарығын реттеу және дамыту агенттігінің төрағасы Мәдина Әбілқасымова осы ретте сіз бен бізге қызықты болатын бірқатар сауалға жауап қатқан екен.

Несие кімдерге берілмейді? Шамадан тыс қарыздануға тосқауыл

Халықты қарыз қамытынан сақтау үшін тұтынушылық несиенің берілу талаптары заң жүзінде қатайтылған. Мерзімі өткен берешегі бар азаматтарға, сондай-ақ соңғы 3 жылда қарызы сот немесе банк арқылы кешірілген, не соңғы бір жылда қайта құрылымдау жасалып, бірақ төлемін өтей алмаған борышкерлерге жаңа несие беруге түбегейлі тыйым салынған.

«Тәуекелі жоғары қарыз алушыларды несиелендіруге шектеу қойылды. Сондай-ақ 2027 жылдан бастап қарыз алушының табысына шаққандағы жиынтық қарыз коэффициенті енгізіледі. Қабылданған шараның нәтижесінде ірі банктер бойынша бір жыл ішінде дефолтқа ұшырайтын несиелер үлесі 5 пайыздан 2,5 пайызға дейін қысқарды», – деп мәлімдеді агенттік басшысы.

Соның арқасында кепілсіз тұтынушылық қарыздардың өсу қарқыны 2024 жылғы 30 пайыздан 2025 жылы 14,6 пайызға, ал биылғы жеті айда 3,5 пайызға дейін бәсеңдеген.

Құлаған банкті халықтың ақшасымен құтқаруға тыйым салынды

Бұрын жекеменшік банктер күреп пайда тауып, акционерлеріне миллиардтаған дивиденд үлестіретін, ал қиындық туса мемлекетке қарап отыратын. Жаңа реформа банк қожайындары мен топ-менеджментінің жауапкершілігін бірінші орынға қойды.

Енді реттеуші жыл сайын банктердің 85 пайызына толықтай стресс-тестілеу мен активтер сапасын тексеру жүргізеді. Егер банкте қаржылық тәуекел анықталса немесе капитал жеткіліксіз болса, Агенттік акционерлерге дивиденд төлеуге тікелей шектеу қояды немесе мүлдем тыйым салады.

Сондай-ақ мемлекет банктерді салық төлеушілердің есебінен құтқару тәжірибесінен біржола бас тартты.

«Жеке банктің проблемасын салық төлеушілер өтемеуі тиіс. Шығынды ең алдымен акционерлер мен инвесторлар көтереді. Мемлекеттік қолдау тек қаржылық тұрақтылыққа қатер төнгендегі ең соңғы амал ретінде ғана қарастырылады, ал мемлекет тартқан шығын кейіннен банк секторы есебінен өтеледі», – деп мәлімдеді агенттік басшысы.

Толығырақ осы тұстан оқи аласыз.

✈️ https://t.me/ertenmedia

⚡️Көк бөрінің рухы тірілген күн: Баян Мақсатқызы Тәңір танымын үлкен аудиторияға алып шықты...

Танымал продюсер Баян Мақсатқызы Тәңір танымы, адам еркіндігі мен «құлдық» санадан құтылу туралы тосын пікір білдірді деп жазады Ertenmedia.kz.

Осыған дейін Тәңіршілдік көбіне тар шеңбердегі тарихшылардың, жекелеген ғалымдар мен маргиналды белсенділердің деңгейінде ғана сөз болып келген. Бұлардың дауысы қалың бұқараға жете бермейтін, ұсынған идеясы аудиториясының аздығынан алысқа ұзамай ұмытылатын еді.

Діни жамағат әлгілерді «адасқандар» деп айыптап, қоғамдық пікірдің шетіне қарай ысырып отырды. Енді ме, енді осы алаңға атышулы Баян Мақсатқызы кіріп жатыр. Оның артында миллиондаған оқырман, әйелдер қауымы, шығармашыл жастар мен қалалық зайырлы элита тұр.

Баян кез келген ұғымды сәнге, трендке, халықтың күнделікті талқылайтын тақырыбына айналдырудың хас шебері. Ол өзінің медиалық беделі арқылы Тәңір танымын шаң басқан архивтен алып шығып, оны заманауи, эстетикалық тұрғыдан тартымды, жастардың тілінде сөйлейтін жаңа философиялық брендке айналдыру әлеуетіне ие.

Егер осы идея Баянның продюсерлік көзімен өңделіп, жаңа өмір салты ретінде насихаттала бастаса, елдегі тым діниленген орта бұрын-соңды кездеспеген аса қауіпті оппонентпен бетпе-бет келуі мүмкін. Себебі бұл жолы оларға халықтың сезімімен ойнай алатын, визуализация мен пиардың тілін жетік білетін медиа-магнат қарсы шығады.

Қазіргі қазақ қоғамы рухани таным жағынан екі үлкен лагерьге жарылып кеткені өтірік емес.

⚫️ Біріншісі – өмірдің барлық саласын шариғат талабына бағындырғысы келетін, ұлттық дәстүрдің өзін діни сүзгіге салатын консервативті қауым;

⚫️Екіншісі – зайырлы мемлекет құндылықтарын, жеке тұлғаның еркіндігін, ғылым мен өркениетті және төл тарихи бірегейлікті сақтап қалғысы келетін бұқара.

Баян Мақсатқызы осы екінші лагерьдің бейресми көшбасшысы, идеологиялық локомотиві ретінде суырылып шықты.

Ол тым діниленген қауымның қоғамға қоятын морализаторлық талаптарынан сескенбейді. Әлемжелідегі хейт пен қарғыстан да қаймығатын кейіпкер емес. Бұл ма, бұл қазақ қоғамының зайырлы бөлігіне үлкен демеу, олардың өз құқығы мен көзқарасын ашық қорғауға деген сенімін оятуы мүмкін.

Алдағы уақытта біз осы екі дүниетанымның бұқаралық мәдениеттегі, медиадағы және күнделікті өмірдегі үлкен текетіресіне куә болатын тәріздіміз. Осы тартыс болашақ Қазақстанның қандай бағытта дамитынын да айқындайтын болады.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ForteBank Қазақстандағы шағын және орта бизнеске қызмет көрсететін үздік банк атанды...

ForteBank Asian Banking & Finance Retail Banking Awards 2026 халықаралық сыйлығының SME Bank of the Year – Kazakhstan номинациясы бойынша жеңімпаз атанды деп хабарлайды Ertenmedia.kz.

Бұл марапат Банктің шағын және орта бизнесті қаржыландыруды дамытудағы және кәсіпкерлердің қаржылық құралдарға қолжетімдігін кеңейтудегі жетістіктеріне берілген жоғары баға.

2026 жылы Forte кәсіпкерлерді қолдау бағытындағы жұмысты күшейте түсті. «Даму» қорымен ынтымақтастық аясында кредиттерге кепілдік беру лимиті 102,8 млрд теңгеге дейін ұлғайтылды.

Бұл механизм тұрақты бизнес-моделі қалыптасқан және өсу әлеуеті бар компанияларға қаржат алуға мүмкіндік береді. Бүгінде Банктің шағын және орта бизнеске арналған кредиттік портфелінің 72%-і өңірлік бизнеске тиесілі, ал бір кредиттің орташа мөлшері 202 млн теңге.

ForteBank кәсіпкерлерге арналған цифрлық сервистерді одан әрі дамытуда. Банкте құжаттарды онлайн беру және қол қою мүмкіндігі енгізіліп, кредит беру процесінің негізгі кезеңдері автоматтандырылды.

Бизнес бағытының қарқынды дамуына клиенттер сенімінің артуы да оң ықпал етіп отыр. 2026 жылғы 1 тамыздағы жағдай бойынша ForteBank-тегі заңды тұлғалардың депозит көлемі 2,4 трлн теңгеге жетті. Сонымен қатар Банк корпоративтік депозиттер көлемі бойынша Қазақстандағы ең ірі үш ЕДБ қатарына енді.

✈️ https://t.me/ertenmedia

⚡️ Балаеваға түскен ауыр портфель: жаңарған Қауіпсіздік кеңесі немен айналысады?

Президент Тоқаев Қауіпсіздік Кеңесі мен оның жаңадан жасақталған дербес аппараты туралы ережелерді бекітті, деп хабарлайды Ertenmedia.kz.

Жаңарған органның нақты міндеттері шегеленіп, Қауіпсіздік кеңесі төрағасының орынбасарына жүктелген өкілеттік шеңберін айқындалды.

Аида Балаеваның құзырына Тоқаевтың актілері мен тапсырмаларының, сондай-ақ Қауіпсіздік кеңесінің шұғыл отырыстарында қабылданған шешімнің мүлтіксіз әрі толық орындалуын қадағалау міндеті жүктелді.

Бұдан бөлек мынадай стратегиялық бағыттар да Балаеваның бақылауында болады:

❤️ Ұлттық қауіпсіздікті қамтамасыз ету, елдің қорғаныс қабілетін арттыру, заң мен тәртіпті сақтау саласындағы меморгандар мен ұйымдардың жұмысын үйлестіру;

❤️ Ақпараттық және киберқауіпсіздік, соның ішінде ЖИ-ді қолдану және дербес деректерді қорғау мәселесін қадағалау;

❤️ Сыбайлас жемқорлық пен экономикалық қылмысқа қарсы іс-қимыл шараларын реттеу;

❤️ Азаматтық қорғаныс, төтенше жағдайлардың алдын алу салаларын бақылау;

Халықаралық ынтымақтастық байланыстарын орнату және Қауіпсіздік Кеңесі аппаратының қызметін ұйымдастыру.

Қауіпсіздік Кеңесі мен оның аппаратының негізгі міндеті ретінде жаһандық сын-қатерге, геосаяси ахуалға және ел ішіндегі жағдайдың өзекті қырларына тұрақты әрі кешенді талдау жүргізу белгіленді.

Реформаланған Қауіпсіздік кеңесінің аппараты енді АП-ның құрылымына кірмейді. Ол өз алдына дербес мемлекеттік орган ретінде тікелей Президентке бағынады және есеп береді.

Құрылым ұлттық қауіпсіздіктегі тәуекелдерді талдап, мембасқарудың орнықтылығын қамтамасыз етеді және Тоқаев шешімдерінің сөзбұйдаға салынбай, дер кезінде орындалуына институционалды қолдау көрсетеді.

Әзіргі жарлық тамыздың соңында басталған Қауіпсіздік кеңесін түбегейлі қайта құру үдерісін заңдық тұрғыдан толық тиянақтады. Президент басқаратын алқалы орган стратегиялық шешімдердің орындалуын қадағалайтын дербес орталыққа айналды.

Қауіпсіздік кеңесіндегі құпия фигура Геннадий Зуев туралы мәліметті осы тұстан оқи аласыз.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Қазақ-қырғыз достығының қара жәшігі немесе Кенесарыға келгенде кілт үзілетін туыстық...

Астанада оқып жүрген қырғыз қыздарының Кенесары ханның аруағына тіл тигізуі (бас сүйегінен шарап ішеміз, ред) Ақорда мен Бішкектің сыйластығына сызат түсіретін фактор деп жазады Ertenmedia.kz.

Қос бойжеткеннің камера алдында көз жасын көлдетіп, кешірім өтінгенімен мәселе шешілмейді. Әлгілердің аузынан шыққан ауыр сөз көрші елдегі мем.идеологияның тікелей көрінісі деп ашық айта аламыз.

Қазақ-қырғыз бір туған деcек те, екі елдің мектеп қабырғасынан бастап оқытылатын тарихында қарама-қайшылық жетерлік. Солардың ең күрделісі де, жанды жері де хан Кененің тұлғасы.

Қазақ даласы үшін Кенесары – Ресейдің отарлау саясатына қарсы келген соңғы заңды хан, қасиетті қаһарман. Ал қырғыз тарихнамасында ол Ормон ханның жеріне, Сарыбағыш руларына жорық жасаған «қатыгез феодал», өз жерін қорғаған қырғыздардың бейбіт ауылдарын шапқан агрессор ретінде сипатталады. Мұндай оқулықпен өскен жас ұрпақтың санасында Кенесарыға деген өшпенділік сәби кезден сана түкпіріне сіңеді.

Екі мемлекет тәуелсіздік алған 30 жылдан астам уақытта осы ортақ тарихи жараның аузын емдеуге, 1847 жылғы Кекіліксеңгір қырғынын саясаттандырмай, ғылыми деңгейде объективті сараптауға бірде-бір рет батыл қадам жасалмады.

Жиырма жастағы студент қыздардың ойына «ханның басынан шарап ішеміз» деген сұмдық метафора көктен салбырап түскен жоқ. Бұл ма, бұл сол елдің билік кулуарында, көше мен ас үйде айтылып жүрген қарадүрсін түсініктің сыртқа тебуі.

Соңғы жылдары қырғыз қоғамында ұлттың пайда болуына қатысты ғылыми негізсіз этномифтер де етек жайып жатыр. Осы құбылыс желіге тарап, өзін «тарихшы» санайтын белсенділер «қазақтар бертінде ғана құралған, түбі бізден тараған» дейтін қисынсыз әңгімелерді ашық айтатын болды. Мемлекет тарапынан мұндай сандырақтарға тоқтау салынбады, керісінше ұлтшыл электоратты жұбатудың таптырмас құралы ретінде пайдаланылды.

Нәтижесінде, заманауи біліммен қаруланудың орнына, желідегі қысқа роликтерден сауат ашқан қырғыз жастары көрші халықтың мемлекеттігі мен тарихын жоққа шығаруды үйреншікті әдетке айналдырды. Астанадағы оқиға осының айнасы.

Әлгі әлгі екі бойжеткен ше? Анығы, кешегі үндеу үрейден туған формальды қадам. Олар жазадан құтылу үшін қазақ тілінде сөйлеп, кешірім сұрағанымен, санасындағы «басқыншы Кенесары» образы немесе қырғыз қоғамындағы «қазақ бізден тараған» деген түсінік жойылып кеткен жоқ.

Ресми Бішкек өз еліндегі тарихи мифтер мен жалғыз сенімді көршісіне бағытталған ауыр риториканы ауыздықтауға күш салмаса, ал Астана мәдени-ақпараттық жұмысты күшейтпесе, ертең мұндай оқиғалар жаппай сипат алуы мүмкін.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Базарбек оқиғасынан кейінгі бір ай: жол апатынан зардап шеккен Нұржігіт үйіне оралды

Экс-депутат Бақытжан Базарбек мінген көліктегі жол апатында ауыр жарақат алған 36 жастағы Нұржігіт Қошанов бір айдан астам уақытқа созылған емдеу курсынан кейін ауруханадан шықты, деп хабарлайды Ertenmedia.kz.

Дәрігерлер өміріне қауіп төніп, комаға түскен азаматтың беті бері қарағанын растап, оны үйіне жіберді.

Тасжолдағы оқиғаның мән-жайы

Қайғылы оқиға 15 тамыз күні Жамбыл облысы аумағынан өтетін «Батыс Еуропа – Батыс Қытай» халықаралық автожолында орын алған.

Нұржігіт Қошанов көліктердің жүруіне кедергі келтірмеуі үшін жолда көлік қағып кеткен малдың өлексесін шетке сүйреп шығармақ болған. Дәл осы сәтте оны экс-депутат Бақытжан Базарбек тақымдаған көлік қағып кеткен.

Комада өткен күндер және ахуалдың жақсаруы

Апаттан кейін Нұржігіт аса ауыр жағдайда жансақтау бөліміне жеткізіліп, ұзақ уақыт ес-түссіз жатты. Дәрігерлер оның өмірін аман алып қалу үшін күрделі медициналық шараларды жүргізді.

Зардап шегуші ауруханада ем қабылдаған бүкіл уақыт бойы Бақытжан Базарбек оның отбасының жанынан табылып, емдеу барысын жеке бақылауында ұстады. Экс-депутат науқастың жағдайы туралы желідегі парақшасы арқылы жұртшылықты үнемі хабардар етіп келді.

Дәрігерлердің күтімі мен дер кезінде көрсетілген көмектің нәтижесінде бір айдан астам уақыт төсек тартып жатқан азаматтың жағдайы жақсарып, отбасына аман-есен оралды.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Мемлекеттің таксиге кеткен миы: Білікті кадрлар 180 мың теңгеден қашып жатыр...

Меморгандардағы білікті мамандар мардымсыз айлық пен шектен тыс жүктемеге шыдамай, жаппай жеке секторға немесе такси жүргізуге кетуде. Сөй деген экс-депутат Мұрат Әбенов қатардағы қызметшілердің әлеуметтік жағдайы жемқорлыққа жол ашатынын ескертіп, мәселені шешу үшін Үкіметке ұсыныс жолдайтынын мәлімдеді, деп хабарлайды Ertenmedia.kz.

Әбенов жақында такси қызметін пайдалану кезінде бұрынғы мемлекеттік қызметкермен кездескен. Көлік тізгіндеген азамат кезінде салық органдарында қызмет еткен, қазір жеке көлігімен айына 800 мыңнан 1 миллион теңгеге дейін таза табыс тауып жүргенін айтқан.

Бұрынғы инспектордың айтуынша, мемлекеттік мекемедегі 180-200 мың теңге көлеміндегі айлық отбасын асырауға мүлдем жетпеген. Оған қоса таңертеңнен түнге дейін созылатын тынымсыз жұмыс пен сенбі күнгі кезекшілік отбасындағы ұрыс-керіске себеп болған.

Саясаткер меморгандардағы жағдайдың психологиялық қысымын бұрынғы салықшының сөзі арқылы жеткізді. Мемлекеттік қызметшілер жеке кәсіпорындарды тексеруге барғанда, бизнестегі мамандардың өздерінен 3-4 есе көп жалақы алатынын көріп, қынжылады екен.

«Тексеруге барғанда, алдымызда отырған жеке компания мамандарының жалақысы біздікінен 3-4 есе көп екенін көретінбіз. Олар біздің айлықты естіп, кейбіреуі аяп қарайды, енді біреуі «бұған қалай күн көресіңдер, пара алатын шығарсыңдар» деп күдіктенетін. Нарықта бизнес көп табыс тауып, ал оларды тексеретін мемлекеттік қызметкерлер әлдеқайда аз айлық алса, бұл сыбайлас жемқорлыққа тікелей жол ашады», – деп жазды Мұрат Әбенов.

Қазіргі таңда тәжірибелі кадрлар жеке секторға кезегімен кетіп жатыр. Әсіресе сотта ірі алпауыт компаниялармен айтысып, мемлекет қазынасына миллиардтаған теңге қайтарған тәжірибелі заңгерлер мен салықшыларды бизнес өкілдері жоғары жалақы ұсынып, өзіне тартып алуда.

Экс-депутаттың айтуынша, ел мүддесін қорғайтын майталман мамандар кеткеннен кейін мемлекеттік органдар сотта дәрменсіз күй кешеді. Қалған тәжірибесіз қызметкерлер ірі корпорациялар жалдаған мықты адвокаттарға қарсы тұра алмай, тек ресми қағазды оқып берумен шектеледі.

Әбенов мұнымен тоқтаған жоқ. Тағы бірнеше тың мәлімет айтты. Толығырақ осы тұста.

✈️ https://t.me/ertenmedia

⚡️Қатаң жазаланады: Бозымбаев Каспийдегі сарбаздардың қазасына қатысты мәлімдеме жасады...

Маңғыстау облысындағы трагедиядан кейін шұғыл құрылған Үкіметтік комиссия жетекшісі, премьердің орынбасары Қанат Бозымбаев арнайы мәлімдеме жасады. Вице-премьер қайғылы оқиғаға жол берген барлық лауазымды тұлға ең қатаң жазаға тартылатынын жеткізді, деп хабарлайды Ertenmedia.kz.

Үкімет өкілі қайғылы жағдайға кінәлілерге қатысты ұстанымын нақты жеткізді:

«Қайғылы оқиғаға кінәлі әрбір лауазымды тұлға заңға сәйкес ең қатаң жазасын алады», – деп мәлімдеді Қанат Бозымбаев.

Үкіметтік комиссия басшысы марқұм сарбаздардың жақындарына мемлекет тарапынан толық материалдық және өзге де қажетті әлеуметтік көмек берілетінін хабарлады. Қолдаудың өз уақытында әрі нақты көрсетілуін өзі тікелей қадағалайтынын айтты.

Сонымен қатар вице-премьер тергеу органдарының қылмыстық іс бойынша жүргізіп жатқан барлық іс-қимылдарын жеке бақылауында ұстауға уәде берді.

Қайғылы оқиға 24 қыркүйек күні Каспий теңізі жағалауындағы жоспарлы әскери оқу-жаттығу барысында болған. Ауа райының кенеттен бұзылып, екпінді дауылдың тұруынан 17 әскери қызметшіні ағыз ашық теңізге алып кетті.

Соңғы деректер бойынша, 12 сарбаз көз жұмды, үшеуі құтқарылып, қалған екі адамды іздестіру шаралары әлі де жүріп жатыр. Бүгін елімізде Мемлекет басшысының өкімімен Жалпыұлттық аза тұту күні жарияланған. Ақтау гарнизонында Бас прокуратура қозғаған қылмыстық іс бойынша ведомствоаралық жедел-тергеу тобы жұмыс істеуде.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

✈️ https://t.me/ertenmedia

⚡️Каспийдегі сарбаздар қазасы: Қорғанмин-нің 5 бірдей лауазымды тұлғасы қамауға алынды

Каспий теңізіндегі оқу-жаттығу кезінде әскери қызметшілердің қаза табуына байланысты Қорғанмин-нің жүйесіндегі жоғары және аға басшылық құрамның 5 бірдей лауазымды тұлғасы ұсталды, деп хабарлайды Ertenmedia.kz.

Ұсталғандар арасында кімдер бар?

Құзырлы органдардың мәліметінше, қолға түскен офицерлерге ауыр зардапқа әкеп соққан қызметке салғырт қарау және кеме жүргізу ережесін өрескел бұзу бойынша айып тағылып отыр.

Күдікті ретінде қамауға алынғандардың қатарында:

- Әскери-теңіз күштері Бас қолбасшысының бірінші орынбасары – штаб бастығы;

- Екі әскери бөлімнің командирлері;

- Теңіз жаяу әскері ротасының командирі;

- Әскери катердің командирі бар.

Барлық 5 лауазымды тұлғаға ресми түрде күдікті мәртебесі берілді. Қазір олар Ақтау қалалық полиция басқармасының уақытша ұстау изоляторына қамалды.

Төтенше жағдайдың мән-жайы

Адам өліміне әкеп соққан оқиға бойынша сотқа дейінгі тергеп-тексеру шараcын Ішкі істердің Әскери-тергеу басқармасы жүргізіп жатыр.

Қайғылы оқиға 24 қыркүйек күні Ақтау қаласынан 43 шақырым жердегі Каспий теңізі жағалауында орын алған. «Хазар қорғаны – 2026» оқу-жаттығуы кезінде қолайсыз ауа райына қарамастан, «Қайсар» катерінен жеке құрамды жағаға түсіру операциясы жүргізілген.

Салдарынан екпінді дауыл мен жойқын толқын сарбаздарды ашық теңізге алып кеткен.

Тергеу нені анықтайды?

Қазір жедел-тергеу тобы жауынгерлік тапсырманы ұйымдастыру және өткізу кезінде шешімдердің қалай қабылданғанын жан-жақты тексеруде.

Атап айтқанда:

- Оқу-жаттығу кезіндегі қауіпсіздік талаптарының сақталуы;

- Гидрометеорологиялық ахуалдың және ауа райының ескерілуі;

- «Қайсар» катерінің техникалық жарамдылық жағдайы;

- Жеке құрамның амандығына жауапты командирлердің нақты әрекеттері толық тексеріледі.

Тергеу барысы Ішкі істер мен Бас прокуратураның ерекше бақылауына алынған.

Видео: policia.kz

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Жауапкершіліктен жалтармаймыз: 14 сарбазынан айырылған Қорғаныс министрі мәлімдеме жасады...  

Қорғаныс министрі Дәурен Қосанов Маңғыстау облысындағы оқу-жаттығу кезінде опат болған әскери қызметшілердің қазасына қайғырып, көпшілікке үндеу жолдады. Ведомство басшысы оқиғаға кінәлілер заң алдында жауапқа тартылатынын жеткізді деп хабарлайды Ertenmedia.kz.

Қоғам тарапынан әскер басшылығына қойылып отырған сыни сауал мен талаптарды толық түсінетінін жеткізген ол ведомствоның жауапкершіліктен қашпайтынын атап көрсетті.

«Бүгін елімізде жалпыұлттық аза тұту күні. Өз атымнан, Қорғаныс министрлігі және Қарулы күштердің бүкіл жеке құрамы атынан қаза тапқан әскери қызметшілердің ет жақындарына қайғырып көңіл айтамын. Отбасылардың қайғысын түсінемін. Қоғамның бізге қойып отырған талап-сұрақтарын да түсінемін. Біз жауапкершіліктен жалтармаймыз. Ата-аналардың бізге өз ұлдарын сеніп тапсырғанын, ал бүгін орны толмас қазаға ұшырап отырғанын жеткізу маған да өте ауыр тиіп отыр. Оқиғаның барлық мән-жайы мен себептері анықталып жатыр. Осы жағдайға байланысты кінәлі адамдар жауапқа тартылатын болады», – деді Дәурен Қосанов.

Атап өткеніндей, Қорғанмин марқұмдардың отбасыларымен тікелей байланыс орнатқан. Мемлекет тарапынан зардап шеккен әр шаңыраққа жан-жақты көмек көрсетіледі.

Министр сөзінің соңында марқұмдардың жақындарына сабыр тілеп, көңіл айтуын түйіндеді.

«Қара жамылған отбасылармен үнемі байланыстамыз. Оларға барлық қажетті көмек көрсетіп жатырмыз. Қаза тапқан әскери қызметшілердің отбасылары мен қоғам алдындағы міндетімізді түсінеміз. Арыстай азаматынан, ұлдарынан айырылған әр отбасының қайғысына ортақпын. Әскери міндетін атқаруда қаза тапқан азаматтарымыздың жатқан жері жайлы, топырағы торқа болсын», – деп түйіндеді Қосанов.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Басымды иіп, кешірім сұраймын: Қорғаныс министрі қаза тапқан сарбаздардың шаңырағына барды...

Президент Тоқаев Маңғыстау облысындағы оқу-жаттығу барысында қаза тапқан әскери қызметшілердің отбасыларына арнайы көңіл айту жеделхатын жолдады. Қорғаныс министрі Дәурен Қосанов қара жамылған шаңырақтарға арнайы барып, марқұмдардың туған-туыстарына көңіл айтып, әскерилердің алдында басын иетінін жеткізді деп хабарлайды Ertenmedia.kz.

Қаралы шаңырақта көпшілікпен бірге тізе бүккен министр орын алған ауыр қаза үшін кешірім сұрап, жағдайға жауаптылардың ешқайсысы жазасыз қалмайтынын ашық айтты.

Ведомство басшысы қазаның күллі елге ортақ екенін жеткізіп, марқұмның жақындарына сабыр тіледі.

«Құрметті ата-аналары, туысқандары! Мен Қорғаныс министрімін. Басымды иіп, сіздердің алдарыңызға көңіл білдірейін деп келдім. Қайғы сіздердікі ғана емес, күллі қазақ елінің қайғысы. Кешіріңіздер... Балаларыңыз үшін сабыр сақтаңыздар. Қаза тапқан азаматтарымыздың жатқан жері жәннатта болсын. Барлық кінәлі адамдар жазасына тартылады, соны біліңіздер», – деді Дәурен Қосанов.

Қаралы отбасыға президент Тоқаевтың көңіл айту жеделхаты оқылып, ресми түрде табысталды. Мемлекет басшысы Отан алдындағы антына адал болған марқұм жауынгерлердің есімі ұмытылмайтынын, олардың мем.наградаға ұсынылатынын мәлім етті.

«Бүкіл халқымыз сіздермен бірге аза тұтып отыр. Менің тапсырмам бойынша оқыс оқиғаның себептері мен мән-жайын анықтайтын үкіметтік комиссия құрылды. Кінәлілердің барлығы заңға сәйкес жазасын алады. Сіздерге жан-жақты көмек пен қолдау көрсетіледі. Аталған мәселе менің тікелей бақылауымда болады. Қайғыларыңызға ортақпын. Қиын сағатта әулеттеріңізге сабыр тілеймін. Бекем болыңыздар», – делінген Мемлекет басшысының жеделхатында.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Каспийдегі қаралы қасіреттен соң: Тоқаев Қорғаныс министрін қызметінен алды

Мемлекет басшысы Қасым-Жомарт Тоқаевтың Жарлығымен Дәурен Қосанов Қорғаныс министрі қызметінен босатылды. Жоғары лауазымды шенеуніктің қызметінен кетуі Маңғыстау облысындағы оқу-жаттығу кезінде 14 әскери қызметшінің қаза табуынан кейін орын алды, деп хабарлайды Ertenmedia.kz.

Ресми хабарламада отставканың нақты себебі аталмағанымен, қоғамда мұндай қадам соңғы күндері теңізде орын алған қайғылы оқиғаның тікелей салдары деп бағалануда.

Министрдің қызметтен босатылуына 24 қыркүйекте Каспий теңізі жағалауында өткен «Хазар қорғаны – 2026» жоспарлы оқу-жаттығуы кезіндегі төтенше жағдай себеп болды. Ақтаудан 43 шақырым жердегі полигонда ауа райының кенеттен бұзылуы салдарынан «Қайсар» әскери катерінен жағаға түсірілген 17 жауынгерді екпінді толқын ашық теңізге алып кеткен еді.

Нәтижесінде 14 сарбаз қаза тауып, үшеуі аман қалды. Ел Президенті 25 қыркүйекті елімізде Жалпыұлттық аза тұту күні деп жариялаған болатын. Қоғам мен әлеуметтік желі қолданушылары, сондай-ақ бірқатар саясаткерлер қорғаныс саласының басшылығын қарамағындағы сарбаздардың қазасы үшін моралдық жауапкершілікті мойнына алып, отставкаға кетуге шақырған еді.

Аталған іс бойынша Бас прокуратура мен Ішкі істер министрлігінің жедел-тергеу тобы қызметке салғырт қарау және кеме жүргізу қағидаларын бұзу баптары негізінде қылмыстық іс жүргізуде.

Қазірдің өзінде Қорғаныс министрлігі жүйесіндегі жоғары және аға офицерлік құрамның бес бірдей өкілі қамауға алынды. Олардың арасында Әскери-теңіз күштері Бас қолбасшысының бірінші орынбасары – штаб бастығы, екі әскери бөлімнің командирлері, теңіз жаяу әскері ротасының командирі мен әскери катердің жетекшісі бар.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️Несиеге дейінгі жеті аялдама: Онлайн кредит бұрынғыдай оңай берілмейді...

1 қазаннан бастап банктер мен микроқаржы ұйымынан (МҚҰ) онлайн несие алу ережесі ресми түрде өзгерді. Енді интернет арқылы кепілсіз несие немесе микроқарыз рәсімдеу үшін бірнеше батырманы баса салу жеткіліксіз, клиент міндетті түрде арнайы сауалнамадан өтуге тиіс, деп хабарлайды Ertenmedia.kz.

Қаржы нарығын реттеу агенттігі бекіткен жаңа талап, ең алдымен, алаяқтың арбауына түсіп қалатындарды қорғауға және несиені қайта қаржыландыру (рефинансирование) кезіндегі былықты тыюға бағытталған.

7 сұрақтан тұратын сүзгі: банк сізден нені білгісі келеді?

Бұрын алаяқтар телефон шалып, өзін «Ұлттық қауіпсіздік қызметкерімін» немесе «банктің қауіпсіздік бөліміненмін» деп таныстырып, адамды өз атынан несие алып, ақшаны «қауіпсіз шотқа» аударуға оп-оңай көндіретін. Азаматтар психологиялық қысыммен 5 минуттың ішінде миллиондаған қарызға батып шыға келетін.

Енді бұған тосқауыл қою үшін кез келген онлайн қарыз аларда алдыңыздан 7 сұрақ шығады. Банк сізден мынаны сұрайды:

❤️ Несие алуды сізге кім ұсынды?

❤️ Өтінішті өз еркіңізбен беріп отырсыз ба, әлде біреудің айтуымен бе?

❤️ Ақшаны нақты қандай мақсатқа жұмсайсыз?

❤️ Шарттың пайызымен, қайтару кестесімен таныстыңыз ба?

❤️Біреу сізге қысым көрсетіп, «тез ал» деп асықтырып жатқан жоқ па?

❤️ Кредит алып жатқаныңызды туысыңыздан немесе банк қызметкерінен жасыруға кеңес берілді ме?

❤️ Сізге жақында біреу қоңырау шалып: «Шотыңызға қауіп төнді, ақшаңызды құтқару керек» деді ме?

Егер жауаптан титімдей болса да күдік туса, банк автоматты түрде ақша аударуды тоқтатады. Клиентпен қайта байланысып, биометриялық тексеруден өткізеді, нөмірдің кімге тиесілі екенін тексереді. Қауіп сейілмейінше, несие берілмейді.

Қайта қаржыландыру (рефинансирование): ақша қолға берілмейді

Тағы бір өте маңызды өзгеріс кредиттерді біріктіру немесе пайызды төмендету мақсатында жасалатын қайта қаржыландыруға қатысты.

Бұрын қалай еді? Мысалы, сіздің пәленше банкте 1 млн теңге қарызыңыз бар делік. Пайызын жеңілдету үшін түгенше банктен арзанырақ несие рәсімдейсіз де, ақша қолыңызға түскенде көңіліңіз ауып, оны ескі несиені жабуға емес, той жасауға немесе басқа шығындарға жаратып жібересіз. Нәтижесінде бұрынғы бір қарыздың үстіне екінші қарыз жамалып, борыш екі есеге артатын.

1 қазаннан бастап бұл «қулық» өтпейді:

❤️ Егер сіз ескі қарызды жабу үшін жаңа банктен қайта қаржыландыру алсаңыз, ол ақша сіздің қолыңызға немесе картаңызға мүлдем түспейді.

❤️Жаңа банк сіздің келісіміңізбен қаражатты тікелей бұрынғы қарызыңыз тұрған банкке немесе микроқаржы ұйымына аудара салады.

❤️Ақша түскен бойда ескі қарыз 5 күннің ішінде автоматты түрде жабылады. Сізден ешқандай қосымша өтініш сұралмайды.

Бұдан кім ұтады, кімге қиын болады?

Көшедегі ата-апаларды адамдарды алдап ақша табатын қылмыстық топтарға үлкен соққы тиді. Себебі құрбанын «гипноздап», лезде ақша аудартып алатын жылдамдық енді жоқ, банктер клиентті сауалнамамен тоқтатып, ойлануға уақыт береді.

Сондай-ақ банктер енді онлайн несиенің барлық деректерін (қоңыраулар, хаттар, биометрия) кемінде 5 жыл сақтауға міндеттелді. Бұл кейін сотта шындықты дәлелдеуді жеңілдетеді.

Ал үнемі несие алып, оны басқа несиемен жауып, артық қаражатты басқа жаққа жұмсап үйренген тәртіпсіз борышкерлер үшін жағдай күрделене түсті. Енді қаржы тек нақты мақсатқа жұмсалады.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ «14 қаруластың аманаты»: Каспийдегі апаттан аман қалған үш сарбаз үйіне оралды...

Каспий теңізінде өткен әскери оқу-жаттығу кезінде ажал аузынан аман қалған үш сарбаз мерзімді әскери қызметін аяқтап, үйіне оралды, деп хабарлайды Ertenmedia.kz.

Әскери-теңіз күштерінің матростары Ақжол Темірхан, Қуандық Бекет және Никита Удалов туған жеріне жетті. Бірақ бұл жолы әскерден қайтқандарды әдеттегідей ән-күй мен салтанатты марш емес, ауыр үнсіздік пен көз жасы қарсы алды. Олар өзімен бірге суға кеткен 14 қаруласының ауыр естелігін арқалап қайтты.

Аман қалғандардың бірі, Жаңаөзен қаласының 19 жастағы тұрғыны Ақжол Темірхан ауруханадан жақында ғана шыққан. Ол Маңғыстаудан шақырылып, сол оқиғадан тірі қалған жалғыз жауынгер. Ақжол ауылына орала салысымен ата-анасымен бірге қаза тапқан барлық 14 жолдасының отбасына арнайы барып, жеке көңіл айтуды ұйғарған.

Атыраулық Қуандық Бекет пен Батыс Қазақстанның тумасы Никита Удалов та жақындарымен қауышты. Вокзалдағы туыстарымен құшақтасқан сәттері әлемжеліде тарап, елдің қабырғасын қайыстырды.

Еске сала кетейік, 24 қыркүйекте Каспийдегі жаттығу кезінде күрт көтерілген қатты дауыл 17 әскери қызметшіні ашық теңізге алып кеткен-ді. 14 сарбаз мерт болып, тек осы үш жауынгер аман құтқарылды. Тоқаевтың жарлығымен оларға «Ерлігі үшін» медалі берілді, ал қаза тапқандарға марапат марқұм болған соң табысталды.

Ашығын айтқанда, трагедия тек 14 шаңырақтың қара жамылуымен шектелмейді. Каспийдегі жағдай бейбіт күнде сарбазын сақтай алмаған әскери жүйенің былығын жайып салды. Президент Қорғаныс министрі Дәурен Қосановты бірден қызметінен қуды.

Қазір әскери бөлім мен катер командирлері, тіпті Әскери-теңіз күштері бас қолбасшысының бірінші орынбасарына дейін қамауда отыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Қорғанминнің 50 нысанында шұғыл аудит: Тоқаев Смайыловқа тексерісті үдетуді жүктеді...

Қорғаныс министрлігіне қарасты 50 нысанда, оның ішінде 48 әскери бөлімде бюджет қаржысының жұмсалуы мен техникалық жағдайға қатысты жоспардан тыс шұғыл аудит жүргізіліп жатыр деп хабарлайды Ertenmedia.kz.

Президент Тоқаев Жоғары аудиторлық палата төрағасы Әлихан Смайыловты қабылдап, ведомстводағы тексеру жұмысының барысын тыңдады. Кездесу қорытындысы бойынша Мемлекет басшысы Бас аудиторға Қорғанминдегі аудитті тыңғылықты жалғастыруды және қадағалау тетіктерін түбегейлі жетілдіруді нақты жүктеді.

Бұл жолғы аудиттің ауқымы мен сипаты мүлде бөлек. Ревизияны сапалы жүргізу үшін мемлекеттік аудит саласының білікті мамандарымен бірге байланыс және IT саласының тәуелсіз сарапшыларынан арнайы жедел топ құрылған. Тексерушілер әскери бөлімшелердің материалдық-техникалық қамтамасыз етілуін, жеке құрамның жауынгерлік дайындығын, инфрақұрылымның жай-күйін және қару-жарақты жаңғыртуға бөлінген қаржының қайда кеткенін тікелей сүзгіден өткізуде.

Әлихан Смайылов мемлекеттік қорғаныс тапсырысы бойынша жүргізілген кезеңдік аудиттің аяқталғанын да жеткізді. Оның қорытындысы бойынша анықталған заңбұзушылықтарды жою үшін Үкіметке және тиісті органдарға 57 нақты ұсыным мен тапсырма жолданған.

Ашығын айтқанда, әзіргі ауқымды тексеріс кездейсоқ басталған жоқ. Бұған дейін Маңғыстау облысындағы Каспий теңізінде өткен оқу-жаттығу кезінде 14 әскери қызметші қаза тауып, елді дүр сілкіндірген еді. Соның артынша Бас қолбасшы мен екі вице-министр қызметінен қуылды. Ендігі кезек тек кадрлық тазартумен шектелмей, армияның қаржылық қуыс-қалтарысын түгел ақтаруға ұласқан сыңайлы.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Маңғыстау қасіретінен кейінгі тергеу: Тоқаев Балаеваның есебін тыңдады...

Маңғыстаудағы теңіз жаттығуы кезінде 14 әскери қызметшінің қаза табуы Қазақстанның Қарулы күштерінде жылдар бойы қордаланған жүйелі дағдарыстың бетін ашты. Жүргізілген алғашқы тексеріс қорытындысымен бірден 13 қылмыстық іс тіркеліп, бес лауазымды тұлға қамауға алынды, деп хабарлайды Ertenmedia.kz.

Президент Тоқаев әзірде ғана Қауіпсіздік кеңесі төрағасының орынбасары Аида Балаева басқарған арнайы комиссияның алғашқы есебін тыңдады. Қосанов?

Ақорда таратқан ақпаратқа сүйенсек, Каспийдегі трагедияға бұрынғы басшылық тарапынан әскери шараларды жоспарлау кезінде жіберілген өрескел қателіктер мен тиісті бақылаудың болмауы тікелей себеп болған.

Тергеу кезінде десант түсіруді ұйымдастыру, қауіп-қатерді алдын ала бағалау және сарбаздардың қауіпсіздігін қамтамасыз ету мүлдем талапқа сай жүргізілмегені әшкереленді. Қылмыстық салғырттық фактісі бойынша қазірдің өзінде 5 лауазымды тұлға қамауда отыр.

Бірақ мәселе тек бір жаттығудың былығымен шектелмейді. Тексерудің бірінші кезеңінде-ақ мемлекет мүлкін жымқыру, қызметтік өкілеттікті асыра пайдалану және әскердегі әлімжеттік деректері бойынша 13 қылмыстық іс ашылды. Жеке құрамға күш қолдану мен жарғыдан тыс қарым-қатынастар әлі күнге дейін тыйылмай тұрғаны ресми деңгейде расталды.

Айта кетелік, 24 қыркүйек күні болған апаттан кейін Президент Қорғанмин Дәурен Қосановты қызметінен босатып, орнына Айдос Мырзахметовті тағайындаған еді. Енді жаңа басшылық пен комиссия армияны түбегейлі реформалау жоспарын дайындауы тиіс.

Ашығын айтқанда, осынау тексеріс қорғаныс жүйеміз тек сыртқы қауіпке ғана емес, өз ішіндегі жауапсыздық пен жемқорлыққа да дәрменсіз екенін көрсетті. Бейбіт күнде командирлердің қателігінен 14 сарбаз толқынға жұтылып кетсе, ел тыныштығын кімге сеніп тапсырамыз деген сауал бүкіл қоғамды мазалап отыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Семей тағы да үлгермеді: Бектенов Абай облысы әкімінің орынбасарын жазалауды тапсырды...

Қазақстанда жылыту маусымы ресми түрде басталғанымен, барлық өңір бірдей қысқа дайын болып шықпады. Абай облысы жылу желілерін белгіленген мерзімде тапсыра алмай, Үкіметтен сөгіс естіді, деп хабарлайды Ertenmedia.kz.

Премьер Бектеновтің мәлімдеуінше, еліміз бойынша барлық жылу көздері мен инженерлік желілер 1 қазанға дейін толық дайын болуға тиіс еді. Алайда Абай облысы осы қатаң талапты бұзып, бекітілген кестеге сыймай қалған.

Семейдегі жылу желілерін жөндеу және жаңғырту жұмыстарының дер кезінде аяқталмауы салдарынан Үкімет басшысы облыс әкімінің осы салаға жауапты орынбасарын тәртіптік жауапкершілікке тартуды тапсырды.

Ашық дереккөздер мен облыстық әкімдіктің құрылымына көз жүгіртсек, өңірде тұрғын үй-коммуналдық шаруашылығы мен энергетика мәселелерін әкімнің орынбасары Бекжан Бапышев қадағалайды. Демек, негізгі жауапкершілік те тікелей осы шенеуніктің мойнына ілінбек.

Айта кетелік, Семейдің жылу жүйесі соңғы жылдары еліміздегі ең осал әрі проблемалы нүктелердің бірі болып қалып отыр.

Біздіңше, тәртіптік жаза әрі кетсе, сөгіс қана. Бірақ қыстың қақаған аязында тоңып отыратын қарапайым тұрғындар үшін әкім орынбасарының сөгіс алғанынан үйі жылып кетпейді. Мәселе нақты нәтижеде.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ Мешіттегі қамшы: сауат ашу лагерінде шәкірттерін сабаған ұстаз қызметтен қуылды

Алматы облысы Қарасай ауданындағы «Түркістан-1» мешітінде діни сауат ашу курсына келген жасөспірімдерді аяусыз ұрып-соққан оқытушы жұмыстан шығарылды, деп хабарлайды Ertenmedia.kz.

Желіде тараған бейнебақылау камерасының жазбасынан мұғалімнің сыныптағы жасөспірімдерді бірнеше мәрте ұрып, тіпті қамшыға ұқсас затпен аяусыз сабағанын анық көруге болады. Рухани тәрбие береді деген орындағы бассыздық қоғамда үлкен резонанс тудырды.

Қазақстан мұсылмандары діни басқармасы оқиға маусым айының басында «Имани жаз» сабақтары кезінде болғанын мойындады. Мүфтияттың түсіндіруінше, оқушылар өзара кикілжіңге түскенде, оқытушы Дүйсехан Нұрберді оларды тәртіпке шақырмақ болып, «эмоцияға беріліп, педагогикалық әдепке сай келмейтін әрекетке жол берген».

Оқиға желіге тарағаннан кейін мешітте шұғыл жиын өтіп, ұстаз кінәсін мойындап, ата-аналардан кешірім сұраған.

Ресми хабарламада тіпті ата-аналардың да оған еш шағымы жоқ екені, мұны жазбаша және бейнежазба түрінде растағаны айтылады. ҚМДБ бұйрығымен ол жұмысынан дереу босатылды.

Ашығын айтқанда, бала құқығы аяққа тапталған мұндай ауыр фактіні «ата-ана кешірді» немесе «эмоцияға берілді» деген сөзбен жылы жауып қою өте қауіпті үрдіс. Мешіт қабырғасындағы зорлық-зомбылыққа тек тәртіптік шара емес, құқық қорғау органдары тарапынан да нақты құқықтық баға берілуі керек.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia

⚡️ 14 сарбаздың қазасы: Әскери-теңіз күштерінің бұрынғы бас қолбасшысы қамауға алынды

Қазақстан Қарулы күштері Әскери-теңіз күштерінің бұрынғы бас қолбасшысы қызметіне салғырт қарағаны үшін ұсталып, сот санкциясымен қамауға алынды, деп хабарлайды Ertenmedia.kz.

Ішкі істердің әскери-тергеу басқармасы бұған Каспий теңізіндегі жаттығу кезінде әскери қызметшілердің қаза табуына байланысты қозғалған қылмыстық іс аясында барып отыр. Қамауға алынған 1-дәрежелі капитан шеніндегі бұрынғы главком.

Айта кетейік, жақында ғана Президент өкімімен Қанат Ниязбеков Әскери-теңіз күштерінің бас қолбасшысы лауазымынан босатылған еді. Онымен бірге қорғаныс министрінің екі орынбасары да қызметінен қуылған-тын.

Еске салсақ, 24 қыркүйекте Маңғыстау облысында өткен оқу-жаттығу кезінде күтпеген жағдайда 17 әскери теңізге ағып кеткен. Олардың тек үшеуі ғана аман құтқарылып, 14 сарбаз ажал құшты.

Қазір осы факт бойынша жан-жақты тергеу жүріп жатыр: қауіпсіздік шараларының сақталуы, ауа райының ескерілуі және құтқару жұмыстарының ұйымдастырылуы тексерілуде. Осыған дейін Қарулы күштердің бес лауазымды тұлғасы ұсталып, күдікті деп танылған еді. Енді сол тізімнің басына бұрынғы бас қолбасшының өзі шықты.

Ашығын айтқанда, Каспийдегі трагедия қорғаныс саласындағы жүйелі проблемалардың бетін ашып берді. Тоқаев қатысқан соңғы жиында ведомстводағы тексеріс қорытындысы бойынша бірден 13 қылмыстық іс қозғалғаны айтылды. Мемлекет мүлкін жымқыру, қызмет бабын асыра пайдалану, әлімжеттік пен тәртіпсіздік мұның бәрі жылдар бойы жиналған іріңдей ашылып жатыр.

Ал біз бұған әлі де тоқталамыз. Бізге жазылып алыңыз👇

✈️ https://t.me/ertenmedia