ኩባንያችን በ‘ስትራይድ ኢትዮጵያ 2.0 ሰሚት’ ለዲጂታል ኢኮኖሚ ግንባታ ላበረከተው የላቀ አስተዋጽኦ እውቅና ተሰጠው!

በኢኖቬሽንና ቴክኖሎጂ ሚኒስቴር አዘጋጅነት የተካሄደው «ስትራይድ ኢትዮጵያ 2.0 ሰሚት» ጉባኤ የሀገራችንን የሳይንስ፣ ቴክኖሎጂ እና ፈጠራ የ50 ዓመታት ጉዞ ከመዘከር ባሻገር፣ ባለፉት ዓመታት በዲጂታል ዘርፉ የተመዘገቡ ስኬቶችን የገመገመ ሲሆን፤ የቀጣይ የቴክኖሎጂ ሽግግር ስትራቴጂያዊ አቅጣጫዎችን ቀይሷል።

ኩባንያችን የቴሌኮምና የዲጂታል መሠረተ ልማቶችን በስፋት በመገንባት ረገድ ያከናወናቸው አበይት ተግባራት የተብራሩ ሲሆን የ4ጂ እና የ5ጂ ኔትዎርክ ሽፋንን በማስፋፋት፣ የፋይበር ዝርጋታን በማፋጠን፣ በዓለም አቀፍ ግንኙነት ያከናወናቸው ሥራዎች ቀርበዋል፡፡

በቴሌብር አስተማማኝ የፋይናንስ አካታችነትን በማረጋገጥ ከጥሬ ገንዘብ ነፃ የሆነ ዘመናዊ የዲጂታል ኢኮኖሚ በመፍጠር የዜጎችን ሕይወት ከማቅለል ባሻገር ለሀገራዊ የኢኮኖሚ ሽግግር ቁልፍ ሞተር መፍጠሩ በመድረኩ ተብራርቷል።

ግብርናን፣ ትምህርትን፣ ጤናን፣ ቱሪዝምን እና ማዕድንን የመሳሰሉ ወሳኝ ዘርፎችን በስማርት ቴክኖሎጂ በማዘመን ረገድ ያበረከተው ቁልፍ ሚና እንዲሁም ከተሞችን በስማርት ሲቲ መፍትሔዎች በማዘመን የመንግሥትና የግል ተቋማትን አሠራር ይበልጥ ቀልጣፋ እንዲሆን ያከናወናቸው ተግባራት በዝርዝር ተብራርተዋል።

በመርሐ ግብሩ ኩባንያችን በ«ዲጂታል ኢትዮጵያ 2025 ስትራቴጂ ስኬት እና የኢትዮጵያን ዲጂታል ሽግግር በማፋጠን» ረገድ ላበረከተው የላቀና ሁለገብ አስተዋጽኦ ከፍተኛ የክብር እውቅና ተበርክቶለታል፡፡

ኩባንያችን ለተሰጠው እውቅና ልባዊ ምስጋናውን እያቀረበ፣ በቀጣይም የ«ዲጂታል ኢትዮጵያ 2030» ራዕይን ዕውን ለማድረግ የተጣለበትን አደራ በቁርጠኝነት መወጣቱን ይቀጥላል።