أعوذ بك .. من هم تكرار الأيام
من دون لا افرق مشرقي عن مغيبي

احفظ حما صدري من اضغاث الأحلام
ولا تحوجني يالله لمشرح طبيبي

ولا توري زلتي .. عين لوّام
ولا ينذكر في غيبتي غير طيبي

ربيّ قني من شر نفسي والأوهام
والأمنيات اللي ما هي من نصيبي

صحيح ماني ضمن عبادك الصالحين
‏لكني أخشاك يارب وذنوبي جبال

‏أبكي على الحال ؟ ولا أبكي على الغايبين ؟
‏فراقهم لامحالة جاي في كل حال

‏إن آفل النور و أزرت تبصر النور عين
‏ماخفت من مغرب الشمس ودنو الزوال

‏الخوف ؟ لو تنطفي روحي مع الراحلين
‏الروح ماتملك القدرة إلا على الأشتعال

ناس تنام وناس تصبح على خير
‏وأنا على الموال — ماسك جهازي

‏لـو السهر يعطي شهادات تقدير
‏كان من البارح خذيت أمتيـازي

والله لا أورّدها على كيف مَشهاي
‏ وسفينتي تجري بكيفي ومَشهاها

‏ماني من اللي دون الأهداف شكّاي
‏بوصل لها ثم أتبجح — واتعداها

عوّدت نفسي ماتحسّف على شي
‏لأن العمر ما يحتمل للحسايف

‏بعيش لحظات الفرح دامني حي
‏وبزرع الضحكه بجرد الشفايف

‏ولا ألحِق الشرهات شيٍ ماهو لي
‏ولا عدت اجزع من فراق الولايف

‏إن غاب غالي فالحزن باخذ شوّي
‏أيام .. وتروّح علومه طرايف

‏موصيٍ قلبي لا شفت الخطا عيّ
‏امّا تعدلها .. أو تصد عايف

أقفى وأنا عيني تلد الطرف صوبه من بعيد
‏وإذا ماهي تنعاج له الأرقاب من تنعاج له؟

‏هو شافني معتدّ في نفسي وخلاني وحيد
‏مايدري اني رغم هذا الكبرياء .. أحتاج له

عسى الله يبيح الكلمة اللي بدون حروف
‏من النظرة اللي طيّحتني على ظلي

‏لياليك ياحلمٍ رسمته على المكشوف
‏ياوجدي على هاك الليالي ويا غلّي

‏أمر المنازل وأدري إن المنازل طوف
‏عسى الغالي اللي من ورا الطوف يفطنْ لي

‏أنا والله إني يوم مريتها ملقوف
‏أدور على دمعٍ نثرته على خلي

‏سلامي على اللي وجهها ماهو بمألوف
‏لا أشبّه عليها وجه ثاني ولا أحلّي

‏أنا لي ورا نجد العذيّة حشاشة جوف
‏لاهب الهوى من صوبها جيتها كلي

انا لا تباطيتك .. علي الولّه ينشاف
‏يبّين على العاشق وينشاف فـ عيونه

‏احبّك جعل حبٍ يجي من بعدك يْعاف
‏وانا حالفٍ حُبك مع الوقت ما اخونه

‏ليا شفت وجهك والله ان ماعلّي اخلاف
‏فلا تنشد اللي شاف غايتْه وش لونه !

‏عيونك مثل مجدٍ قِصر دونه اللي خاف
‏وانا اللي يحب المجد ويموت من دونه

أقفيت وأنا اكبر من التبرير والعذر السمين
‏حتى لو إن خاطري . . ما كل شي يصبّره

‏القلب يكسره اللسان ولا تجبّره اليدين
‏مهو عظم كل يوم . . تكسره وتجبّره

‏ما عاد عندي فرصة تهدر من العمر الثمين
‏واللي بـ ينشدها من أسباب الفراق تخبّره

‏حيث انه اوّل شخص يسقط من عيوني مرتين
‏وانا عيوني من سقط منها . . ما عاد تعبّره

وأخاف .. لا منك بغيتي تنامين
‏ما أحدٍ يمد لحافك ليا استويتي

‏وأخاف ما أحد يقول لك يوم تدعين
‏أبشرك .. زانت بعد ما دعيتي !

‏وأخاف .. لا قمتي وخاطرك شين
‏ما أحدٍ يعرف من نظرتك وش بغيتي

‏وأخاف واجد واجد إنك تروحين
‏يا ويلي .. ان رحتي ولا عاد جيتي!

الخطاوي، والسفر، والضيق، وثرثره النسيم
‏ما بقت في خاطري غير الدروب اللي تدور

‏كل درب ٍ مرني، من غير مقصد أو مقيم
‏غير وجهي، ما عرفني، كل ما مرّه شعور

‏يا وجودي، لا غدى وقتي على صدري وخيم
‏والأمل ضايع، و ما بين الضلوع أصبح قبور

‏ما طلبت إلا كفافك، لا هدايا ولا نعيم
‏بس أبي ظلّك، إذا غابت عن الراحة جسور

‏ما حكيت إلا لربّي، والبقى صدرٍ كظيم
‏ما أبوح إلا لموطن صمته أكبر من بحور

‏من عرفتك، ما تبسّمت الجروح، ولا نعيم
‏غير صوتك، لا لفاني، قام يفرحني حضور

لن يمر عليك أحن منّ :
‏" ودّي أزرع بسمتك وأرضيك وأهديك المسرّه
‏ولو تجفّ من الضما والجور بدموعي سقيتك "❣️

أحنّك وأداري جسمك تصيبه الابره
‏" لو انها تغزّك كنّ بالقلب غزّتها "

‏انا اللي فداك الين ما يسكن بقبره
‏وفدا غرّةٍ لا مرّت البيض هزّتها

‏ترى الليله اللي جابتك ماهي بـ غبره
‏ تناسيت كل اللي مضى لي في حزتها

‏سليلة شجاعٍ بالكرم ما انقصر شبره
‏وجدانك " التاريخ " غنّى في عزّتها

‏حتى الثوابت تغير من مواقعها
‏الثابت ان كل شيٍ في الزمن وارد

‏عن مغريات الحياه وعن مواجعها
‏محتاج قلب البليد وسجة الشارد

‏لا طابت النفس مابه شي يقنعها
‏لو تمسح العقل ولا تمسح المارد

‏بعض العلاقات تشبه لو نرجعها
‏القهوه البارده والشاهي البارد

أنا ما همِّني لا صار سيلي عارفٍ مجراه
‏أبفرش ضحكتي بعيون كل الِّلي يمروني

‏أنا لاني طريقٍ محدٍ صابر على ممْشاه
‏ولاني دربٍ أخضر كل من جوني تمشُّوني

‏وأنا ماني بـ بحرٍ كل من جاني شرب من ماه
‏أنا صفحه من التَّاريخ تذكرني ما تنْساني..