АҚШ армияси Венесуэлада ҳокимиятни ўзгартириш учун тайёр – Пентагон

АҚШ мудофаа вазири Пит Хегсет Венесуэладаги вазият юзасидан кескин баёнот берди. Унинг сўзларига кўра, Пентагон ҳокимиятни ўзгартириш учун “Америка армиясининг барча мавжуд ресурсларини ишга солишга тайёр”. Буни вазир “президент даражасидаги қарор” деб атади.

Хегсетнинг таъкидлашича, АҚШ ҳарбийларининг Венесуэлада гиёҳванд моддалар контрабандаси билан шуғулланган кемага ҳужуми фақат “бошланиш” бўлиши мумкин.

“Бизда ҳавода, сувда ва кемаларда зарур воситалар мавжуд. Бу биз учун жуда жиддий вазифа ва у бир зарба билан чекланиб қолмайди,” — деди Хегсет Fox телеканалига берган интервьюсида.

Куни кеча АҚШ президенти Доналд Трамп ҳам ўз баёнотида АҚШ ҳарбийлари халқаро сувларда ҳаракатланаётган ва Америкага йўл олган қайиқдаги 11 нафар “террорчи”ни йўқ қилганини маълум қилган эди.

“Биз бу қайиқда кимлар борлигини, улар нима қилаётганини ва кимни вакиллик қилаётганини аниқ билардик”, — деди Хегсет Fox News эфирида.

Халқаро муносабатларда янги кескинлик
Журналистлар ҳужумнинг халқаро муносабатларга, айниқса, Хитой билан алоқаларга бўлиши мумкин таъсири ҳақида савол берганида, Хегсет жавобни кескин шаклда ифода этди:

“Ташвишланиши керак бўлган ягона шахс — президентликка номзод Николас Мадуро. У гиёҳванд моддалар савдосининг бошида турган, ҳақиқий сайловсиз ҳокимиятни эгаллаган ва АҚШ томонидан 50 миллион долларни ўғирлашда айбланаётган шахс”, — деди Пентагон раҳбари.

Вашингтоннинг бу баёноти Венесуэла бўйича янги кескин босқич бошланганидан дарак бермоқда. Хегсетнинг сўзлари Пентагоннинг нафақат наркотрафикка, балки Мадуро ҳокимиятига қарши ҳам кенг кўламли операцияларга тайёрлигини англатади. Бу эса нафақат Каракас, балки Москва ва Пекин билан муносабатларда ҳам янги сиёсий тортишувларга олиб келиши мумкин.

@gayratkhodjasaydaliev

«Ҳинд Ражабнинг овози» — Венецияни ларзага солган фожиа

Венеция кинофестивалида тунислик режиссёр Кавтар Бин Хониянинг «Ҳинд Ражабнинг овози» фильми тақдимоти бўлиб ўтди. Намойиш якунида бутун зал ижодий гуруҳни 23 дақиқа давомида тик туриб олқишлади. Бу овоз — бутун дунё эшитиши керак бўлган овоз эди.

Фильм 2024 йилда Ғазода Исроил кучлари томонидан ўлдирилган беш ёшли Ҳинд Ражабнинг ҳақиқий воқеасига асосланган. Амакиси ва қариндошларининг жонсиз таналари орасида, автомобиль вайроналари ичида қолиб кетган қизалоқ мўъжиза туфайли Фаластин Қизил Ярим ой жамиятига қўнғироқ қилишга муваффақ бўлади. У соатлар давомида ёлғизлик ва қўрқув ичида ёрдам кутади. Бироқ на унинг ўзи, на уни қутқариш учун йўлга чиққан тиббиёт ходимлари омон қолади.

Режиссёр Бин Хония учун бу лойиҳа шунчаки кино эмас, балки инсоний бурчдир.

«Мен Ҳинднинг овозини илк бор эшитганимда, унинг сўзларидан ҳам кучлироқ нарсани — бутун Ғазонинг ёрдам сўраб қичқириғини ҳис қилдим. Ва бу фарёдга ҳеч ким жавоб бермади», — дейди у.

Фильмда Ҳинднинг ҳақиқий телефон ёзувларидан фойдаланилган бўлиб, воқеа қутқарувчилар нигоҳи билан ҳикоя қилинади.

Премьера зали сукунат ва кўз ёшларга тўлди. Томошабинлар ва журналистлар ҳиссиётларини яшира олишмади. Танқидчилар фильмни «бу йилги фестивалнинг энг таъсирли ва долзарб асари» дея эътироф этди.

Актриса Сажа Килани:

«Ҳинднинг овози ҳимояга муҳтож эмас. Унинг ўзи — ҳақиқат. Бу қисса фақат Ҳинд ҳақида эмас, бу Ғазода ҳалок бўлган минглаб болаларнинг тақдири».

Фаластинлик актёр Мўтоз Малҳис:

«Мен 10 ёшимда худди шундай даҳшатларни бошдан кечирганман. Ҳинднинг овозини эшитиб, ўз болалигимга қайтдим. Бу мен учун актёрлик эмас, ҳаётимнинг бир парчаси эди».

Ҳинднинг онаси Виссам Ҳамада фильм орқали дунё ҳамжамияти Ғазодаги урушни тўхтатишга киришишидан умидвор.

«Бутун дунё биздан юз ўгирди. Энди фақат санъат ва ҳақиқатгина овозимизни эшиттириши мумкин», — дейди у.

Лойиҳанинг аҳамиятини англаган ҳолда, уни Бред Питт, Хоакин Феникс ва режиссёрлар Жонатан Глейзер ҳамда Альфонсо Куарон каби Ҳолливуд юлдузлари ижрочи продюсер сифатида қўллаб-қувватлади. Премьерада шахсан иштирок этган Хоакин Феникс ва унинг рафиқаси Руни Мара ижодкорларни қучоқлаб, ўз ҳурматини изҳор қилди.

«Ҳинд Ражабнинг овози» — бу шунчаки бир қизалоқнинг аччиқ қисмати ҳақидаги фильм эмас. Бу — бутун бир халқнинг эътиборсиз қолдирилган фожиасини, тингланмаган овозини бутун дунёга эшиттиришга қаратилган қудратли киноасардир.

@gayratkhodjasaydaliev

Ҳамма Ўзбекистон билан муносабатларини "қизғанади"

Ўзбекистон ва АҚШ етакчилари стратегик шерикликни мустаҳкамлашга келишдилар

5 сентябрь куни Ўзбекистон Республикаси Президенти Шавкат Мирзиёев Америка Қўшма Штатлари Президенти Дональд Трамп билан телефон орқали мулоқот қилди. Суҳбат икки томонлама стратегик шерикликни янада кенгайтириш ва амалий ҳамкорликни чуқурлаштириш масалаларига бағишланди.

АҚШ раҳбари сўнгги йилларда Янги Ўзбекистонда амалга оширилаётган иқтисодий ислоҳотлар, модернизация жараёнлари ва аҳоли фаровонлигини оширишга қаратилган сиёсатни юқори баҳолади. Мирзиёев эса ўз навбатида Трамп маъмуриятининг ички ва ташқи сиёсатдаги натижаларини самимий табриклади ҳамда Америка томонининг халқаро ва минтақавий барқарорликка қўшаётган ҳиссасини эътироф этди.

Иқтисодий ва бизнес ҳамкорлик

Суҳбатда иқтисодий йўналишлар алоҳида ўрин тутди. Икки мамлакат ўртасида савдо ҳажми сўнгги йилларда барқарор ўсиш қайд этгани ва 2024 йилда 15 фоизга ошгани таъкидланди. Шу асосда бизнес кооперациясини чуқурлаштириш, янги савдо битимлари ва йирик лойиҳаларни амалга ошириш масалалари муҳокама қилинди.

Ҳамкорлик портфели фуқаро авиацияси, электротехника ва энергетикадан тортиб қишлоқ хўжалиги, рақамли технологиялар, молия, инновациялар ва таълим соҳаларигача қамраб олган. Шу ойнинг ўзида АҚШнинг етакчи компаниялари билан қатор учрашув ва музокаралар ўтказилиши ҳам кўзда тутилмоқда.

Хавфсизлик ва гуманитар алоқалар

Мулоқотда хавфсизлик соҳасида терроризм, экстремизм ва ноқонуний миграцияга қарши курашиш бўйича самарали ҳамкорлик олиб борилаётгани қайд этилди. Шунингдек, маданий ва таълимий алмашинувлар кенгайиб, Тошкентда АҚШнинг нуфузли олий таълим муассасалари филиаллари муваффақиятли фаолият юритмоқда.

АҚШ Президенти Ўзбекистон миллий терма жамоасининг келгуси йили ўтказиладиган футбол бўйича жаҳон чемпионатида илк бор қатнашиши муносабати билан табрик сўзларини изҳор этди ва жамоага омад тилади.

Халқаро кун тартиби ва минтақавий ҳамкорлик

Телефон мулоқоти чоғида халқаро масалалар юзасидан ҳам фикр алмашилди. Хусусан, “C5+1” формати доирасида Марказий Осиё давлатлари ва АҚШ ҳамкорлигини чуқурлаштириш долзарб аҳамият касб этиши таъкидланди.

Шу билан бирга, Шавкат Мирзиёев Дональд Трампни Ўзбекистонга расмий ташриф билан келишига таклиф этди.

Президентларнинг телефон орқали мулоқоти очиқ, конструктив ва дўстона руҳда кечди. Томонлар амалий ҳамкорлик лойиҳаларини илгари суриш ва олий даражадаги мулоқотларни изчил давом эттиришга келишиб олдилар.

Ушбу телефон суҳбати яқинда бўлиб ўтган Шанхай ҳамкорлик ташкилоти саммити ортидан амалга ошгани диққатга сазовор. Минтақавий мулоқотлар кучайган бир пайтда Вашингтон билан стратегик шерикликни мустаҳкамлаш Ўзбекистон ташқи сиёсатининг мувозанатли ва прагматик йўналишини яна бир бор кўрсатиб турибди.

@gayratkhodjasaydaliev

“Исроил урушни тўхтатишга рози бўлди”

АҚШ президенти Дональд Трамп ҲАМАС гуруҳига мурожаат қилиб, Исроил Ғазодаги урушни тугатиш шартларини қабул қилганини маълум қилди ва гуруҳни зудлик билан ўт очишни тўхтатиш таклифини қабул қилишга чақирди. Бу ҳақда Трамп ўзининг Truth Social ижтимоий тармоғида ёзиб, бу огоҳлантиришни ҲАМАС учун "сўнгги" деб атади.

Таклифнинг батафсил шартлари ҳақида Трамп аниқлик киритмаган бўлса-да, маълумотларга кўра, таклиф АҚШ президентининг махсус вакили Стив Уиткофф томонидан ҲАМАСга юборилган. Унга кўра, АҚШ қуйидагиларни кафолатлайди:
• Гаровга олинганларни озод қилиш: ҲАМАС Ғазода қолган барча гаровга олинганларни зудлик билан озод қилиши шарт. Айни пайтда 48 нафар гаровга олинган шахс Ғазода экани, улардан 20 га яқинигина тирик бўлиши мумкинлиги айтилмоқда.
• Исроилнинг ҳарбий операциясини тўхтатиш: АҚШ барча гаровга олинганлар озод этилгандан сўнг Исроилнинг Ғазодаги ҳарбий операцияси тўхтатилишини кафолатлайди.
• Маҳбусларни алмашиш: Бунга жавобан, Исроил ўз қамоқхоналарида сақланаётган уч мингга яқин фаластинлик маҳбусни озод қилишга розилик берган.

Трампнинг сўзларига кўра, ҳамма гаровга олинганларнинг қайтишини ва урушнинг тугашини истайди. Бу унинг ҲАМАСга биринчи ультиматуми эмас. Март ойида ҳам у гуруҳга шунга ўхшаш "сўнгги огоҳлантириш" берган эди. Вашингтон бу янги таклифнинг узоқ давом этаётган можарога чек қўйишига умид қилмоқда.
Ҳозирча ҲАМАС гуруҳи бу таклифга қандай муносабат билдиргани ҳақида аниқ маълумот йўқ. Вазиятнинг ривожланиши ва гуруҳнинг қарори можаронинг келгуси тақдирини белгилаб бериши мумкин.

@gayratkhodjasaydaliev