Festival doirasida turli sohalarda muvaffaqiyatga erishgan mutaxassislar ishtirokida qiziqarli uchrashuvlar, mazmunli suhbatlar va mahorat darslari o‘tkazildi. Tadbir davomida universitetimiz talaba-qizlari ham faol ishtirok etib, o‘zlarini qiziqtirgan savollarga javob oldilar, soha mutaxassislarining tajribalari bilan tanishib, yangi bilim va ko‘nikmalarga ega bo‘ldilar.

Festival spikerlari:

🔹 Umida Olimova — oliy ma’lumotli jurnalist. U jurnalistika sohasi, kasbiy rivojlanish va zamonaviy media imkoniyatlari haqida fikr-mulohazalar bilan o‘rtoqlashdi.

🔹 Umida Zayniddinova — ginekolog-reproduktolog. U ayollar salomatligi va bu borada zarur bilimlarga ega bo‘lishning ahamiyati haqida suhbat olib bordi.

🔹 Yodgoraxon Karimjonova — etiket bo‘yicha ekspert. U muomala madaniyati, odob-axloq qoidalari va kundalik hayotda etiketning o‘rni haqida ma’lumot berdi.

🔹 Asal Ziyodova — yosh tadbirkor, “Bolalar akademiyasi” maktabi asoschisi. U tadbirkorlik faoliyati, tashabbuskorlik va o‘z maqsadlari sari intilish borasidagi tajribalari bilan o‘rtoqlashdi.

Festival talaba-qizlar uchun nafaqat yangi bilim va tajribalar olish, balki o‘ziga bo‘lgan ishonchni mustahkamlash, fikr doirasini kengaytirish va kelajak rejalarini yanada aniq belgilashga xizmat qiladigan mazmunli muloqot maydoniga aylandi.

“QizlarFest” — bilim, ilhom va imkoniyatlar uchrashgan maskan! Bunday tadbirlar yoshlarning salohiyatini ro‘yobga chiqarish, ularni faol va tashabbuskor bo‘lishga undash hamda jamiyatda o‘z o‘rnini topishiga ko‘maklashishda muhim ahamiyat kasb etadi.