«Hilol-nashr» нашриёти халқаро саммитда

Истанбулдаги Сабоҳиддин Заим университетида Халқаро исломий китоб ноширлари уюшмаси Бош ассамблеясининг очилиш маросими бўлиб ўтди. Унда исломий китоблар нашри бўйича халқаро саммит ҳам ўтказилмоқда. Бу анжуманга «Hilol-nashr» нашриёти ҳам таклиф этилган.

Халқаро исломий китоб ноширлари уюшмасининг Бош ассамблеясида 72 дан ортиқ давлатдан 240 дан зиёд аъзо иштирок этмоқда.

Халқаро саммит 27 сентябргача давом этади.

Халқаро исломий китоб ноширлари уюшмаси (International Union of Islamic Book Publishers ёки IUIBP) бутун дунё бўйлаб диний адабиёт нашр этувчи профессионалларни бирлаштирадиган халқаро тармоқдир.

Уюшманинг асосий мақсади ва вазифалари жаҳон миқёсида исломий китоб нашриёти соҳасини ривожлантириш, нашриётлар ўртасида муаллифлик ҳуқуқлари ва таржима бўйича ҳамкорликни йўлга қўйиш, маданий алоқаларни мустаҳкамлашдан иборат.

Уюшманинг асосий иш фаолияти ва халқаро анжуманлари Истанбулда ўтказилади.

Бугунги кунда уюшмага дунёнинг 72 дан ортиқ давлатидан 240 дан зиёд нашриёт, жумладан, «Hilol-nashr» нашриёти ҳам аъзо бўлган.

Халқаро исломий китоб ноширлари уюшмаси вакили доктор Муҳаммад Ағиракча Тошкентга келганида юртимиздаги ижодкор ва ноширларни халқаро лойиҳаларга жалб қилиш мақсадида юртимиздаги етакчи диний-маърифий нашриётлар, хусусан, «Hilol-nashr» нашриёти вакиллари билан ҳам учрашиб, музокаралар ўтказган эди.

🕋 @islomuz

Доктор Айман Сувайд ҳазратлари юртимизда

Ўзбекистон мусулмонлари идораси раиси, муфтий шайх Нуриддин Холиқназар ҳазратлари ташаббуси билан диний соҳа мутахассисларининг малакасини ошириш бўйича бир қатор ишлар тизимли равишда амалга оширилмоқда. Хусусан, «Қуръони карим ва тажвид» ўқув курслари ўқитувчиларининг тажвид илми бўйича билимларини ошириш мақсадида хорижлик мутахассисларни жалб қилиш режалаштирилган.

2026 йил 26 сентябрь куни юртимизга «Ҳозирги замон Жазарийси» номи билан танилган, Қуръон қироати ва тажвиди мутахассиси, доктор, шайх Айман Сувайд ҳафизаҳуллоҳ ташриф буюрди. Бу ҳақда @alquranuz телеграм канали хабар берди.

Нуфузли меҳмонни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, «Қуръон ва тажвидни ўргатиш» бўлими раҳбари шайх Али Файзуллоҳ Махдум ва бир қатор масъул ходимлар кутиб олдилар.

Маълумот ўрнида жорий йилнинг 28 сентябрь — 14 октябрь кунлари устоз, доктор Айман Сувайд иштирокида «Тажвид дарслари» бўлиб ўтади. Дарсларда Ўзбекистон мусулмонлари идораси тасарруфидаги ўрта ва олий таълим муассасалари ҳамда «Қуръони карим ва тажвид» ўқув курслари педагог-ўқитувчилари иштирок этадилар.

🕋 @islomuz

Индонезияда халқаро конференция ўтказилмоқда

Жорий йилнинг 25-28 сентябрь кунлари Индонезиянинг Жакарта шаҳрида замонамизнинг етук уламолари ва бош имомлари иштирокида International Grand Imams Conference (IGIC 2026) Халқаро Бош имомлар конференцияси бўлиб ўтмоқда.

Ушбу нуфузли анжуман «Масжидлар ҳамжиҳатлиги, диний дипломатия ва глобал тинчлик» («Masjid Harmony, Religious Diplomacy and Global Peace») мавзусига бағишланган.

Халқаро анжуманда юртимиздан Тошкент ислом институтининг «Ҳадис ва Ислом тарихи фанлари» кафедраси доценти в.б. шайх Саййид Раҳматуллоҳ Термизий иштирок этмоқда.

🕋 @islomuz