​📚 ПОЛ КАЛАНИТИ. "КОГДА ДЫХАНИЕ РАССТВОРЯЕТСЯ В ВОЗДУХЕ"
⠀
Бұл менің есіме өлімді түсірген кітап. Әдетте өлім туралы ойласақ, неге екенін бойды қорқыныш, үрей билейді ғой. Ал бұл кітапты оқығаннан кейін Полдың өлімге деген көзқарасынан ба, өлім маған соншалықты қорқынышты көрінбеді. Өлім тым жақын, жақын да болса алыс секілді...
⠀
🌺НЕГІЗГІ ОЙЫ:
Бұл белгілі нейроxирург Пол Каланитидің өмірбаянына арқау болған кітап. Әдетте дәрігерлерді ауырмайтындай көреміз ғой. Ал дәрігерлердің өздері ауырса ше? Кітапта дәрігердің ішкі толғаныстары, жаман ауруды қалай қарсы алғаны, онымен қалай күрескені, өзін дәрігердің емес, пациенттің орнында қалай сезінгені суреттеледі. Бұл кітап маған өмірді қадірлеуді үйреткендей... Соңында ағыл-тегіл жылағаным бөлек әңгіме.
⠀
🌺БЕРЕТІН БАҒАМ:
9/10 Кітаптың тілі жеңіл. Бір деммен оқылады. Әсерлі. Оқыған адамның өкінбесі анық.
⠀
🌺КІТАПТЫ ҚАЙДАН АЛУҒА БОЛАДЫ?
Электронды нұсқасын менің телеграм каналымнан табасыздар. Ал қағаз нұсқасын іздесеңіздер, интернет дүкендер көмекке келер.
⠀
Ойымызға ой қосатын кітапты ғана оқиық! 🤗
⠀
#marfu_reads
#marfu_bookblogger
#Марфуғадан_кітап📚
#1жылда100кітап
#МарфуғаШапиян #кітап #книги #book #bookblogger #книгоман #полкаланити #когдадыханиерастворяетсяввоздухе

​📚ДЖОН ГРЭЙ. "МУЖЧИНЫ С МАРСА, ЖЕНЩИНЫ С ВЕНЕРЫ"

Бұл кітап туралы көп естіген едім. Бірақ оқудың сәті түспей жүрген. Құрбымнан алғаныма біраз болса да, үйде құр тұр еді. Интернетсіз демалысымда қызыға, құныға оқып шыққан кітаптардың бірі болды. Өте қызық екен.
⠀
🌺НЕГІЗГІ ОЙЫ:
Танымал псиxолог Джон Грэйдің бұл кітабы алғаш 1992 жылы жарық көріп, бірден бестселлер болған екен. Содан күні бүгінге дейін жұрттың бәрі іздеп оқитын кітаптар қатарында.

Автор мұнда негізінен ер мен әйелдің қарым-қатынасы жөнінде сөз қозғайды. Ерлердің Марстан, ал әйелдердің Венерадан, яғни түрлі планеталардан келгенін айтады. Соған орай олардың ойлауы да, түрлі нәрселерді қабылдауы да әртүрлі. Ер мен әйелдің арасында түсініспеушілік осыдан келіп туады екен. Яғни ер адам әйелді өзіндей көреді, ал әйел ер адамды өзі секілді ойлайды деп ойлайды. Сосын ұрыс-керіс, соңы отбасылардың ажырасуына ұласады.
⠀
Джон Грэй бұл кітабында отбасылық түрлі мәселелерді әйел қалай қабылдайтынын, еркек қалай қабылдайтынын егжей-тегжейлі сипаттап, оларға түрлі практикалық кеңестер береді. Кітап талай отбасының сақталып қалуына ықпал еткен екен.
⠀
🌺БЕРЕТІН БАҒАМ:
9/10 Кітап ұнады. Жаңадан білген дүниелерім де өте көп болды. Осы кезге дейін олардың болмысындағы көөөп нәрсені білмеген екенмін. Енді әкем мен бауырымның кей жағдайларда неге басқаша әрекет ететінін түсіндім. Олардың болмыстары басқа екен ғой. Болашақта бұйыртса күйеуіммен де тіл табысамын деген ойдамын ☺️
⠀
Бұл кітапты ерлер де, әйелдер де оқығаны жөн. Әсіресе отбасылы адамдар оқыса, тіпті керемет. Күйеуінің немесе әйелінің тілін таба алмай, түсініспеушілер көбейіп кетсе, осы кітап сіздің қарым-қатынаста қай жерден қате жіберіп жүргеніңізді айқындап береді. Кейін тұрмыс құрған соң Алла қаласа, тағы бір оқимын деп қойдым 😊
⠀
🌺КІТАПТЫ ҚАЙДАН АЛЫП ОҚУҒА БОЛАДЫ?
Әдеттегідей электронды нұсқасы телеграм каналымда болады.

#1жылда100кітап
#marfu_reads
#marfu_bookblogger
#марфуғадан_кітап📚
#кітап #книги #books #bookbloger
#джонгрэй #мужчинысмарсаженщинысвенеры

Абай атамыздың бүгінгі туған күніне кішкентай шәкірттеріммен түсірген видео еді 😊
https://youtu.be/TkNIvir2nS4

​Алматыға табаным тие сала бірінші кезекте барғым келетін жер - КӨКЖАЙЛАУ. Жылдың қай мезгілі болса да, жаңбырлатып, қар омбылап, талай шыққан едім. Ал жазда бұл өлкенің сұлулығы тіпті керемет. Жекеге келген сұрақтарға байланысты мұнда қалай баруға болатыны туралы айтып берейін.
⠀
✅Көкжайлауға не үшін баруымыз керек?
📌 Себебі, бұл Алматы секілді үлкен шаһарда тұрып, бір сәтке табиғатпен тілдесетін, таудың сұлулығын сезінетін, көзіңді, көңіліңді демалдыратын, бір сәт қаланың шуы мен қарбаласын артта қалдырып, біраз уақытқа бойыңа күш-қуат жинайтын, ең аяғы офисте тапжылмай отырып жұмыс істейтіндерге бір сергіп қайтуға болатын таптырмас мекен. Әрі өзі қалаға да тиіп тұр. Бару да оңай.
⠀
✅ Көкжайлау қай жақта?
📌 Іле Алатауы ұлттық табиғи паркіне қарасты алқапта. Алматыдан бар-жоғы 10 шақырым жерде.
⠀
✅ Көкжайлауға қалай баруға болады?
📌 Жеке көлігіңіз болса, Алматыдан Медеуге баратын жолға түсіп, қала тұрғындары су алатын бұлақтың жанынан көлігіңізді қалдырасыз. Қазір ол жерге "Ақбұлақ" деп жазып қойған екен. Көлік қалдыратын арнайы орындар бар. Ал көлігіңіз болмаса, Достық көшесінің бойымен Алматыға қарай жүретін автобустардың біріне отырып, "Просвещенец" деген аялдамадан түсіп қаласыз. Сол түскен жеріңізден Көкжайлауға баратын жол бағыт-бағдар, белгілер арқылы анық көрсетілген.
⠀
✅Жол ұзақтығы қанша?
📌 Біз асықпай, жан-жағымызға қарап, фотоға түсіп, демалып, 3 сағат дегенде көтерілдік. Кейбір жылдам жүретін жандар 1,5-2 сағатта Көкжайлаудың басында отырады. Қайту барғандағыдан азырақ уақыт алады. Таңертең ертерек шыққан тиімді.
⠀
✅ Орташа бюджет
📌 Автобусқа және тамағыңызға есептесеңіз болғаны. Қаладан жейтін дүниелеріңізді салып алып, Көкжайлауда тамақтансаңыздар да болады.
⠀
Көкжайлауға курорт салынады деген әңгіменің шыққанына 4-5 жылдың жүзі болды. "Аңдыған жау алмай қоймайды" дегендей, жергілікті тұрғындар қанша қарсы болса да, бұл іс жүзеге асатын сияқты. Сондықтан Көкжайлауды осы табиғи қалпында көріп қалуға асығыңыздар 😉
⠀
Ал сіз Көкжайлауда болғансыз ба?
⠀

#marfu_travels
#marfu_traveller
#жиһанкез_журналист
#көкжайлау #кокжайлау #кокджяйлау #kokzhailau #таңғажайыпҚазақстан #Қазақстан #туғанел #көріктімекен #qazaqstan #сакральныеместаказахстана

Өскемендемін 😇

​📚КӘМШАТ БЕКЖІГІТОВА. "ОЙЫҢДЫ ӨЗГЕРТІП, ӨМІРІҢДІ ӨЗГЕРТ"
⠀
Бұл кітап алдымнан қайта-қайта шыға берді. Мұндай кітаптарды әдетте орыс тілінде оқитынмын. Мұны да кезекті сәтсіз аударма шығар деп, оқуға асыға қоймағанмын. Бірақ адамдардың жылы лебізінен кейін оқып көруге бел будым.
⠀
🌺НЕГІЗГІ ОЙЫ:
Кәмшат Бекжігітова бұл кітабында негізінен өз өмірін баяндайды. Түрлі қиыншылықтан қалай шыққанын, тығырықтан қалай жол тапқанын, ойын өзгерту арқылы табысқа жеткенін жазады. Өз өмірінің мысалдарын бере отырып, басқа адамдарды да өмірін жақсы жаққа өзгертуге шақырады.
⠀
Автордың ең ұтып тұрғаны, өз тәжірибесімен бөлісіп әрі шетелдік псиxологиялық кітаптарда жазылған дүниелерді қазақша жүйелеп беруінде шығар. Сосын "жақсы сөздерді" жинақтап бергені ұнады.

Жалпы өз өмірін жақсы жаққа өзгерткісі келетін әр қазақ әйелі оқуы тиіс кітап деп ойлаймын. ⠀
⠀
🌺БЕРЕТІН БАҒАМ:
7\10 Кітап жалпы ұнады. Қазақтілді аудитортяға керек-ақ дүние. Ұнағаны шығар, күнделігін де алдырдым. Енді тапсырмалаңрын орындап көрмекпін. Ал ұнамаған тұсы ішіндегі редакторлық, корректорлық қателер шығар. Қателері бар кітаптарды аса ұнатпаймын.
⠀ ⠀
🌺КІТАПТЫ ҚАЙДАН АЛЫП ОҚУҒА БОЛАДЫ?
Кітапты @sevenbooks.kz дүкенінен арзан бағаға сатып алсаңыздар болады. Өзім сол жақтан алдым.
⠀
#1жылда100кітап
#marfu_reads
#marfu_bookblogger
#марфуғадан_кітап📚
#кітап #книги #books #bookbloger
#кәмшатбекжігітова #ойыңдыөзгертіпөміріңдіөзгерт

Алматыдамын. Айттауға кетіп барам. Таксиге отырдым. Ат жақты, Шашын артына қайырған, түрі сұсты, орта жастағы аға екен. Бағдаршамда тұрмыз. Бір жас жігіт келіп қайыр сұрады. Таксист аға қолына тиындар алды да, анау жігітке ұсынды. Жәй ұсынып қоймай: "Мына жүрісің не, не істеп жүрсің? Арақ ішпе! Ішпе деймін мен саған!" деп көлік қозғалғанша біраз ақылын айтты. Ары қарай жүріп кеттік. Жолдан жиырмалардағы жас жігітті отырғызды. "Темекі көмектесе ме?" деп сұрады. "Иә" деген жауапқа: "Солай сияқты көрінеді. Ал анығында өзіңді де құртып жатырсың, айналаңды да улап жатырсың" деп біраз ұрсып алды. Ұрысқаны құдды бір үлкен ағаңның айтқан ақылындай естіледі екен. Жігіт үндемеді. Енді мен отырмын, ойланып. Әдетте,әр адам не істесе де өз құқы, өзі біледі. Ешкімнің ешкімге ақыл айтуға қақысы жоқ деген нәрселерді күнде естіп жатырмыз ғой. Бірақ маған мына таксист ағаның әрекеті жағып қалғандай) Ал ішімнен бір дауыс "жұртта не жұмысы бар?" дейді. Сіздіңше, қалай? Аға дұрыс істеді ме, бұрыс па?

👍 - дұрыс
👎- дұрыс емес

Осы жаз үшін Аллаға ерекше алғыс айтамын. Мың да бір шүкір! Танымымды арттырған, жүрегіме тыныштық сыйлаған, өміріме басқа қырынан қарауға көмектескен ерекше сапарлар көп болды. Әлxамдулиллаһ! Жалпы, мүмкіндік болса жазда жұмыс істемей, саяxаттаған жөн екен. Кейде бірнеше кітап әрең беретін дүниені бір ғана сапар беріп жатады. Осы саяxаттарым барысында маған болашақта ауылда тұру туралы ой бірнеше рет келіп қайтты)) Көпшілігі менің бұл пікіріме "тұра алмайсың" деп күліп жатыр. Бірақ маған ұнайтындай. Ал сіздер интернет ұстамайтын, жайбарақат қоңырқай ғана тіршілігі бар ауылда тұрар ма едіңіздер?

👍 - иә
👎 - жоқ

​#1жылда100кітап айдары:

АРМАН ӘЛМЕНБЕТ "БЕРЕКЕЛІ БИЗНЕСТІҢ СЫРЫ" 📚

Арман Әлменбет алғаш бұл кітапты оқуға бергенде қызық болды. Қолжазба күйінде оқып отырмын, өзге іскерлік кітаптардай емес, еліктіріп әкетіп барады. Бір кезде қарасам, кейіпкердің, яғни кітаптағы бизнесменнің өндіретін тауары маған таныс! Оу! Бұл біз күнделікті қолданып жүрген Nәtige сүтін өндіруші, айналымға қосқан кісі екен ғой! Басқа жақтарды білмеймін, біздің Астанада Nәtige сүтіне сұраныс өте жоғары. Біз ғана емес, менің мұндағы барлық туыстарым осы сүтті пайдаланады. Себебі, Nәtigeнің сүтін кәдімгі үйдің сүті секілді пісіріп ішуге, тіпті одан айран ұйтуға болады. Өзге дүкен сүттері пісіре бастасаң, іріп кетеді ғой. Сондықтан да Nәtigeнің табиғилығына шәк келтірмей, тез бітіп қалатындықтан, дүкендерден іздеп жүріп ішеміз)) Кітап өзім өнімін қолданып жүрген Ерлан Әшім атты бинесмен туралы болғаннан кейін құныға оқып шықтым. Оның сүттен басқа да компаниялары бар екен. Әрі кітапта кәсіптегі жолы қызықты етіп баяндалады. Бұл кітапты бизнеске қызығушылық танытып жүргендердің барлығы бір оқып шығу керек дер едім.

🌺 НЕГІЗГІ ОЙЫ:
Арман - кезінде көркем шығармалар жазған, қазір іскерлік әдебиетке ерекше ден қойып жүрген замандас жазушыларымыздың бірі. "Берекелі бизнестің сыры" оның бұл бағыттағы алғашқы туындысы болғанына қарамастан сәтті шыққан дүние болды деп ойлаймын.

Біз осыған дейін әлемдегі түрлі жетістікке жеткен адамдар туралы талай кітап оқыдық. Олардың жетістікке жету құпияларын білдік. Ал қазақтан шыққан ірі бизнес өкілдерінің хикаяларын біле бермейміз. "Берекелі бизнестің сыры" бізді өз еліміздегі кәсіп бастаудың қыр-сыры мен ұңғыл-шұңғылына үңілдіреді.

Кітаптың басты кейіпкері, бизнесмен Ерлан Әшім аталмыш кітапта тек өз оқиғасын баяндап қоймай, тығырыққа тірелген жағдайлардан қалай шыққанын, шешім қабылдауда қандай қасиеттер көмекке келгенін ақтарыла баяндайды. Әрі кәсіп бастағысы келетін жастарға ақыл-кеңесін де аямай береді.

🌺 БЕРЕТІН БАҒАМ:
9/10 Осы жаз Қарағандыға барған сапарымда Арманның кейіпкері кәсіпкер Ерлан Әшім мырзамен арнайы таныстым. Өйткені ол кітап оқығанды жақсы көріп қана қоймай, компаниясындағы қызметкерлерді де кітап оқуға шақырып жүрген ерекше жандардың бірі. Әрі үйінде бай кітапханасы бар. Ютуб каналыма да ол кісінің кітапханасы туралы видео түсіріп қайттым. Бұйыртса, жақында шығарамын.

Содан айтайын дегенім, Арманның кітабын оған дейін оқып алдым ғой. Кітапта бас кейіпкерді тым әспеттеген секілді көрінген. Ал Ерлан ағамен танысқаннан кейін ол кісінің болмыс-бітімін автор тура сол қалпында суреттеген екен деген ойға қалдым.

Кітаптың тілі жеңіл, тез оқылады. Әрі Арман әдебиетші болғаннан шығар, қазіргі біздің көп кітаптар секілді құрғақ емес. Оқиғалармен өріліп, тақырыпшаларға бөлініп, оқырманға ыңғайлы етіп берілген. Кітапты тек кәсіпке қызығып жүргендер ғана емес, қазақы болмыс, 1990 жылдардағы қазақ өткен әлеуметтік қиын жағдайлар туралы біліп, жалпы кәсіп саласындағы танымын арттырғысы келетіндерге де оқуға кеңес берем.

🌺 КІТАПТЫ ҚАЙДАН АЛУҒА БОЛАДЫ?
Кітапты 87774857733 (WhatsApp) нөмірі арқылы тапсырыс беріп ала аласыздар. Кітаптың бағасы 3500 теңге.

​#1жылды100кітап айдары:

ГАБРИЭЛЬ ГАРСИА МАРКЕС. "СТО ЛЕТ ОДИНОЧЕСТВА" 📚

Демалыста оқып шығуға ниет еткен кітабымның бірі Габриэль Гарсиа Маркестің "Жүз жылдық жалғыздығы" болатын. Осыған дейін Маркеспен таныстығым "Полковнику никто не пишетті" бастап, аяқтамай тастауыммен біткен еді. "Жүз жылдық жалғыздықты" да қиындықпен оқыдым. Өйткені, бұл менің осыған дейін оқып жүрген романдарымнан мүлде басқа роман еді.

🌺 НЕГІЗГІ ОЙЫ:
Маркес - осы романы үшін 1982 жылы Нобель алған тұңғыш колумбиялық. Ал Латын Америкасы бойынша төртінші. Белгілі ақын Пабло Неруда бұл шығарманы Сервантестің "Дон Кихотынан" кейінгі ең тамаша романға балаған. Расымен де романда мистика мен ақиқат шебер тоғысқан.

Маркес әр кейіпкерінің тағдырына жауапкершілікпен қарайды. Оларды дүниеге алып келіп, өмірден өткенінше оқырмандарына қадағалатып қояды. Бірақ Маркестің Буэндиаларының бәрі жалғыздық ауруына шалдыққан. Макондоның негізін қалаушы Хосе Аркадио Буэндиа ағаш түбінде қанша жыл жалғыз ғұмыр кешті, Амаранта қу тізесін құшақтап өмірден өтті, полковник Аурелиано Буэндианың жалғыздығы қандай!

Менің бір досым "Жүз жылдық жалғыздықты" ішіне жын кіріп кеткен кітап атап еді. Соның сөзінің жаны бар-ау... Кітапты оқып бітірген осы сәтте Буэндиалар әулетінің "жалғыздығы" жүрегіме кіріп алғандай сезімде отырмын...

🌺БЕРЕТІН БАҒАМ:
7/10 Маркестен көп нәрсе күтіп қойдым ба, кітап аса қатты ұнай қойған жоқ. Әйтеуір басқаша сезім, басқаша әсер. Менің жазушым емес екен, қысқасы)

🌺КІТАПТЫ ҚАЙДАН АЛУҒА БОЛАДЫ?
Кітаптың электронды нұсқасын әдеттегідей телеграм каналыма жіберіп қоямын. Сол жақта басқа да көп кітаптар бар. Жүктеп ала аласыздар. Телеграм каналымның сілтемесі профильде тұр 👆

Кезінде маған қатты ұнаған материал еді. Тауып алып, тағы бір оқып шықтым. Өйткені, жаңа әдеттер қалыптастыру керек 😊 Сіздерге де пайдасы тиіп қалар деп бөлісіп отырмын. https://rb.ru/story/vy-tozhe-mozhete/

Бүгін мұсылмандардың жыл санауы бойынша Жаңа жыл басталды. Құтты болсын! Жаңа 1440 жыл! Осыдан 1440 жыл бұрын Пайғамбарымыз (с.а.у.) туған жері Меккені, ол жақта өзіне қысым көрсеткен мүшріктерді тастап, Ислам дінінің гүлденуіне, қанат жаюына қолайлы мекен болған Мәдина қаласына қоныс аударған. Дәл осы сәтті қатты жақсы көретінім сондай, кітаптардан Пайғамбарымыз Мұхаммед (с.а.у.) пен оның шыншыл досы Әбу Бәкірдің (р.а.) Мәдинаға кіру сәтін қайта-қайта оқитынмын. Тарихшылар "Ондай қуанышты сәт бұрын-соңды болмаған" деп жазса, белгілі сахаба Әнас ибн МӘлик "Менің өмірімде дәл ондай бақытты күн болған емес" дейді. Ең қызығы, арада талай ғасырлар өтсе де, сол тарихи сәтті көз алдыма әкелген сайын менің де жанарымда жас дөңгелеп, көкірегімді ерекше бір сезім билейді. Сүйікті сахабам Омардың халифалығы тұсында басқа емес, дәл осы датаның мұсылмандардың жаңа жыл санауы болып бекітілуін түсінгендей боламын 😊 Ал енді бүгін бірінші күні басталып жатқан Мұхаррам айы туралы бірер ауыз сөз. Пайғамбарымыздың (с.а.у.): «Ораза үшін Рамазаннан кейінгі ең қайырлы ай – Алланың айы Мұхаррам» деген хадисі бар. Яғни, осы айда ораза ұстағанның сауабы мол және кешірім сұраушылар кешірімге ие болады, ин ша Алла. Алла тағала жаңа жылда жақсылықтарымызды арттырғай!

​#1жылда100кітап айдары:
⠀
ЗЕЙНЕП АХМЕТОВА. "КҮРЕТАМЫР" 📚
⠀
Зейнеп Ахметованың алғашқы кітабы "Шуақты күндерді" оқушы кезімде оқыған ем. Бауыржан Момышұлының тұлғасына ғашық болып, оның барлық кітаптарын, ол туралы жазылған кітаптарды оқып жүргенде, қолыма осы Зейнеп апамыздың кітабы түскен. Сүйсініп оқып шыққанмын. Кейін "Бабалар аманаты" сол "Шуақты күндердің" жалғасы іспетті болып еді. Ал мына "Күретамыр" өзгеше кітап екен. Яғни, баланың дүниеге келген кезінен бастап істелетін салт-дәстүр, ырым-тыйымдардың барлығы баяндалады.
⠀
🌺 НЕГІЗГІ ОЙЫ:
Кітап салт-дәстүр негізінде жазылған. Жазушы қандай да бір салттың немесе дәстүрдің нақты мағынасын, сипатын айтады да, өз өмірінен мысалдар келтіріп, тақырыпты ары қарай өрбіте түседі. Кітапты оқу барысында білмейтінім көп екенін түсіндім. Әсіресе, қыз бала келін боп түскеннен бастап, өзін қалай ұстауы, ененің оны қалай күтуі, жүктілік, жеріктік кезең, оның барлығын қалай өткеру керек, бәрі-бәрі керемет баяндалады. Сәби дүниеге келгеннен кейін оның кіндік шешесі, жасалатын шілдеханасы, киілетін итжейдесіне дейін егжей-тегжейлі айтылады. Ең аяғы байғазы мен көрімдіктің айырмашылығын білмейді екем, оны да осы кітап арқылы айырып алдым. Қысқасы, салт дәстүрін білем деген адам оқуы керек кітап екен.
⠀
🌺 БЕРЕТІН БАҒАМ:
7/10 Алла қаласа, кітаптан өз өмірімде қолданам деп түйіп алған дүниелерім көп болды. Әсіресе қыз балалар, аналар, енелер бұл кітапты міндетті түрде оқуы керек деп ойлаймын.
⠀
🌺 КІТАПТЫ ҚАЙДАН АЛУҒА БОЛАДЫ?
Кітап көптеген кітап сататын дүкендерде тұр. Бірақ басқа жерлерде қымбат болуы мүмкін, арзан бағаға Айгүл апайымыздан @abolatkhankyzy ала аласыздар.
⠀
#1жылда100кітап
#marfu_reads
#marfu_bookblogger
#марфуғадан_кітап📚
#кітап #книги #books #bookbloger
#столетодиночества
#габриэльгарсиамаркес

Бір жерде жеңілдіктер немесе акциялар болса, бүкіл танысына хабарласып, ақпарат беріп жүретін жандар болады ғой) Діни маңызды күндер жақын қалғанда мен де өзімді тура солай сезініп кетемін 😊 Хабарламай қалсам, жұрт менің кесірімнен ораза ұстамай қалғандай айтуға асығып тұрамын. Алла қаласа, қыркүйектің 20-сы Ашура күні.
Ашура күнінің маңызы баршаңызға белгілі. Адамдардың тәубесі, сұраған кешірімі қабыл болатын күн. Сондықтан бұл күнді оразамен өткізген дұрыс. Пайғамбарымыздан Ашура күнінің оразасы туралы сұрағанда: "Одан алдыңғы жылғы жасаған күнәлары кешіріледі деп Алладан үміт етемін" деп жауап берген. Ал Амр ибн Ас бұл күні ұсталған ораза бір жылдық оразаға, бұл күні берілген садақа бір жылдық садақаға тең болатынын айтқан. Және оразаны тек Ашура күні емес, алды-артынан бір күн қосып ұстау ұнамды амалға жатады. Бұл уақыт 19, 20, 21 қыркүйек күндеріне келеді екен.
Ниеттеріңіз қабыл болғай! 😊

Ораза ұстайсыз ба?
👍 - иә
👎 - жоқ