په کابل کي د امام ابو حنیفه (رحمه الله) پنځم ملي او نړیوال نندارتون پرانستل سو
د افغانستان د سوداګرۍ او پانګوني خوني نن (چهارشنبه) په کابل کي د افغانستان نړیوال نندارتون د مرکز په کوربتوب د امام ابو حنیفه (رحمه الله) د پنځم ملي او نړیوال نندارتون پرانستنه وکړه چي د رئیس الوزرا اقتصادي مرستیال ملا عبدالغني برادر اخند، د سوداګرۍ وزیر نور الدین عزیزي، د اقتصاد وزیر قاري دین محمد حنیف، ګڼو دولتي چارواکو او د بېلابېلو هیوادونو پلاوو ګډون په کښي کړی وو.
یادي خوني ویلي، دا نندارتون به د رواني تلي میاشتي تر ۲۱مي نېټې پوري دوام وکړي، چي تر ۷۰۰ په زیاتو غرفو کي د ۵۵۰ کورنیو او بهرنیو شرکتونو بېلابېل تولیدات نندارې ته په کښي وړاندي سوي دي.
اقتصادي مرستیال ملا عبدالغني برادر اخند دغه نندارتون د افغانستان او نورو هیوادونو د اقتصادي او سوداګریزه اړیکو د پراختیا له پاره مهم بللی او د هغو پر لا پراختیا ئې ټینګار کړی دی.
دا نندارتون له تېرو پنځو کلونو راهیسي د کورنیو تولیداتو د معرفت او ملاتړ، د صادراتو د زیاتوالي، د اقتصادي او سوداګریزو اړیکو د پیاوړتیا او د پانګوني د راجلبولو په موخه جوړېږي.
#MillatZagh

په شاوخوا ۷ ملیارده افغانۍ ۱۶ پروژې منظور سوې
د ریاست الوزرا د اقتصادي مرستیال ملا عبدالغني برادر اخند په مشرۍ د تدارکاتو کمېسیون په شاوخوا اووه ملیارده افغانۍ ۱۶ پروژې منظور کړي دي.
اقتصادي معاونیت ویلي، دا پروژې نن (چهارشنبه) د یاد کمېسیون په نوبتي غونډه کي منظور سوي چي د بدخشان د واخان ولسوالۍ له بروغیل څخه تر بزهای ګنبد پامیر خورد پوري د ۷۱ کیلومتره سړک بیارغول، په پکتیکا، فاریاب او بامیان کي د ولسوالیو په کچه درې روغتونونه او په هلمند کي د یوه ۳۵۰ بستریز روغتون جوړول، په اسلام کلا بندر کي د ځینو ګمرکي تأسیساتو جوړول، له قرغې بند څخه بادام باغ تحقیقاتي باغ ته د اوبو پایپ غځول او په کابل او لوګر کي د ځینو سړکونو جوړول شامل دي.
د سرچینې په وینا، دې غونډي ته د منظورۍ له پاره ۳۴ پروژې وړاندي سوي وې چي یوه لغوه، نهه تعدیل، پنځه دوهم ځل داوطلبۍ ته او درې نوري اعاده سوي دي.
#MillatZagh

د سبا (‎پنځنۍ) ورځي د یو شمېر ولایتونو او سیمي د هوا حالات:
کندهار: اسمان لمر، د تودوښي لوړه درجه ۳۴، کښته ۱۶    
کابل: اسمان لمر، د تودوښي لوړه درجه ۲۷، کښته ۱۴
هرات: اسمان څه ناڅه وریځ، د تودوښي لوړه درجه ۳۲، کښته ۱۸
هلمند: اسمان لمر، د تودوښي لوړه درجه ۳۶، کښته ۱۷       
روزګان: اسمان لمر، د تودوښي لوړه درجه ۲۸، کښته ۱۳         
بلخ: اسمان لمر، تودوښي لوړه درجه ۳۰، کښته ۱۶ 
ننګرهار: اسمان لمر، د تودوښي لوړه درجه ۲۹، کښته ۱۹       
کوټه: اسمان لمر، د تودوښي لوړه درجه ۲۹، کښته ۱۴       
نوی ډهلی: اسمان لمر، د تودوښي لوړه درجه ۳۳، کښته ۲۳
#MillatZagh

د یوناما پر دفتر برید کوونکې ډله نیول سوې
د کورنیو چارو وزارت وايي، د دغه وزارت ځانګړي شرطې د "مقاومت جبهې" هغه څلور کسیزه ډله نیولې چي په کابل کي ئې د یوناما پر دفتر د برید پلان درلود.
یادو ځواکونو پر خپل ایکس د هغوی یوه ویډیو خپره کړې چي یاد کسان پر دغه جرم اعتراف کوي.
په ویډیو کي لیکل کېږي چي له هغوی سره چاودېدونکي توکي او نور مهمات هم نیول سوي دي.
#MillatZagh

له ایران څخه د ۲۰۰۰ مېګا واټه برېښنا پر راواردولو خبري سوي
د صنعت او سوداګرۍ وزیر نور الدین عزیزي د ایران د انرژۍ له وزیر ډاکټر عباس علي ابادي سره، چي پرون د یوه پلاوي په مشرۍ کابل ته راغلی دی، له دغه هیواد څخه افغانستان ته د دوه زره مېګاواټه برېښنا د را واردولو په اړه خبري کړي دي.
د سوداګرۍ وزارت ویلي چي، دواړو لورو د امام ابو حنیفه (رحمه الله) د پنځم ملي او نړیوال نندارتون د پرانستغونډي په څنډه کي سره لیدلي او افغانستان له پاره د یادي برېښنا د وارداتو، په افغانستان کي د اوبو بندونو او د اوبو د تصفیې خونو د جوړولو، ګډو پانګونو او د اقتصادي اړیکو د پراختیا په اړه ئې خبري کړي دي.
د سرچینې په وینا، علي ابادي په دې ناسته کي عزیزي ته د ایران د سفر بلنه هم ورکړې؛ ترڅو په دغه هیواد کي د اوبو او برېښنا په جوړېدونکو نندارتونونو کي ګډون وکړي.
#MillatZagh

نن پنځنۍ د تلي میاشتي ۱۶مه نېټه، په کندهار کي نرخونه په لاندي ډول دي.
#خوراکي_توکي:
وطني ۴۴ کیلويي اوړه: په ۱۳۰۰، ۱۴۰۰ او ۱۴۵۰ افغانۍ.
قزاقي اول نمبر ۵۰ کیلويي اوړه: په ۱۵۵۰ افغانۍ.
شل لېټره غوړي: په ۲۲۲۰ افغانۍ.
لس لېټره غوړي: په ۱۱۱۰ افغانۍ.
درې لېټره غوړي: په ۳۷۰ افغانۍ.
سېله اولي هندۍ وریجي ۲۵ کیلویي: په ۲۰۰۰ افغانۍ.
وطني ۲۵ کیلويي وریجي: په ۱۶۰۰ افغانۍ.
سپیني وریجي ۲۵ کیلويي: په ۱۴۰۰ افغانۍ.
بوره: من په ۲۴۰ افغانۍ.
پلمېټ: من په ۲۶۰ افغانۍ.
کاناډایي نخود: من په ۵۰۰ افغانۍ.
ایراني اول نمبر نخود: من په ۴۴۰ افغانۍ.
ایراني دوهم نمبر نخود: من په ۳۰۰ افغانۍ.
سره لوبیا: من په ۴۰۰ افغانۍ.
سپینه لوبیا: من په ۳۴۰ افغانۍ.
مالګه: کڅوڼه په ۵۰ افغانۍ.
اولي شنې چای: کیلو په ۲۶۰ افغانۍ.
اولي توري چای: کیلو په ۲۷۰ افغانۍ.
مکروني: کڅوڼه په ۴۵ افغانۍ.
#پته: نوی سړک، د ناحیه اول چوک، د احمدې پلازې پر مخامخ، د حاجي معراج الدین او زامنو عمده پلورنځی.
#غوښي:
د پسه غوښه: له پوست سره چهاریاک په ۴۲۵ او بې پوسته په ۴۵۰ افغانۍ.
د سېرلي غوښه: چهاریاک په ۴۵۰ افغانۍ.
د غوایي غوښه: چهاریاک ۴۲۵ افغانۍ.
د چرګ صافه غوښه: کیلو په ۲۴۰ افغانۍ.
ژوندی چرګ: کیلو په ۱۶۰ افغانۍ.
#پته: د ښاروالۍ نرخونه.
#دسونتوکي:
پټرول: لېټر په ۸۲ افغانۍ.
ډېزل: لېټر په ۷۳ افغانۍ.
ګاز: په شرکت کي کیلو په ۶۳ او په عام بازار کي کیلو په ۶۵ او ۶۶ افغانۍ.
#پته: د حافظ په نوم ټول تېل پمپونه.
#داسعاروتبادله:
یو ډالر: ۶۴،۹۵ افغانۍ.
یو ډالر: ۲۸۴ کلداري.
یو ریال: ۱۷،۲۰ افغانۍ.
یو درهم: ۱۷،۷۰ افغانۍ.
یوه یورو: ۷۳ افغانۍ.
زر افغانۍ: ۴۳۷۶ کلداري.
زر کلداري: ۲۲۸ افغانۍ.
زر بانکي تومن: ۰،۲۵ افغانۍ.
یادونه: د صرافۍ بولۍ نه سته دا صرف یو اندازه ده. 
#پته: اتل صرافۍ مارکېټ، اول منزل، د منان حبیب صرافي.
#MillatZagh

په تخار کي ۶۱۴ کیلو ګرامه تاریاک نیول سوي
د تخار امنیې قومندانۍ خبر ورکړی چي، د دغه ولایت په مرکز تالقان ښار کي ئې ۶۱۴ کیلو ګرامه تاریاک نیولي دي.
یادي قومندانۍ ویلي، دا نشه يي توکي په یوه شخصي امبولانس کي ځای پر ځای سوي وو او له بدخشان څخه دغه ولایت ته قاچاق کېدل چي امنیتي ځواکونو ئې مخنیوی کړی دی.
شاوخوا ۲۰ ورځي مخکي هم په دغه ولایت کي په یوه شخصي امبولانس کي ۴۲۰ کیلو ګرامه تاریاک ونیول سول.
#MillatZagh

په سمنګان او جوزجان کي ترافیکي پېښو ۶ کسانو ته مرګ ژوبله اړولې
د سمنګان او جوزجان امنیې قومندانیو خبر ورکړی چي، په یادو ولایتونو کي د درو ترافیکي پېښو له امله درې کسان وژل سوي او درې نور ژوبل سوي دي.
یادو سرچینو ویلي، دوې ترافیکي پېښي پرون (چهارشنبه) په سمنګان کي سوي چي په نتیجه کي ئې دوه کسان وژل سوي او درې نور ژوبل سوي او یوه پېښه نن سهار په جوزجان کي سوې چي له امله ئې یوه ۵۵ کلنه ښځه وژل سوې ده.
هغوی د دې پېښو لاملونه بې احتیاطي یاده کړې ده.
وړمه ورځ په غزني کي د کابل- کندهار پر لویه لاره هم د یوې ترافیکي پېښي له امله د یوې کورنۍ پنځه کسان ووژل سول او دوه نور ژوبل سول.
#MillatZagh

د مخابراتو مرستیال وزیر په دوهم نړیوال ډيجیټلي فورم کي ګډون کوي
د مخابراتو او معلوماتي ټکنالوژۍ وزارت مالي او اداري مرستیال وزیر حافظ محمد امین جان د یوه پلاوي په مشرۍ په دوهم نړیوال ډيجیټلي فورم کي د ګډون په موخه د روسیې پلازمېني مسکو ته سفر وکړ.
یاد وزارت ویلي، امین جان او مل پلاوی به په یاد فورم کي د دغه وزارت لاسته راوړني، تجربې او ډيجیټلي اقدامات وړاندي کړي او د ګډون کوونکو هیوادونو له استازو سره به د معلوماتي ټکنالوژۍ په برخه کي د همکاریو د پراختیا په اړه خبري وکړي.
د سرچینې په وینا، دغه فورم په مسکو کي جوړېږي او د افغانستان په ګډون د بېلابېلو هیوادونو او بنسټونو استازي به د ډیجیټلي ټکنالوژۍ د پراختیا، ډیجیټل حکومتولۍ، مصنوعي ځیرکتیا، سایبري امینت، ډیجیټلي زېربناوو او د هیوادونو ترمنځ د ډیجیټلي همکارۍ په اړه خبري په کښي وکړي.
#MillatZagh

په کندز کي په ۲۵۱ میلیونه افغانۍ د یوه کمپلکس جوړولو کارونه پیل سول
د کندز ولایت د رسنیو دفتر خبر ورکړی چي، د امام صاحب ولسوالۍ په مرکزي څلور لاري کي په شاوخوا ۲۵۱ میلیونه افغانۍ د یوه سوداګریز کمپلکس جوړولو کارونه پیل سوي دي.
یاد دفتر ویلي، د دغه کمپلکس جوړولو کارونه پرون (چهارشنبه) په یوه غونډه سره پیل سول او په دوو کلونو کي به د خصوصي سکټور له خوا بشپړ سي، چي د امام صاحب د ښاروالۍ پر پنځه جریبه مځکه جوړېږي او ۲۵ کاله ئې د قرارداد موده ده.
د سرچینې په وینا، په دې پروژه کي د څلورو پنځه پوړه ییزو ودانیو جوړول شامل دي چي یوه زېرخانه او ۵۱۲ دوکانونه به ولري.
#MillatZagh

روانه اوونۍ د ښځو د حقوقو اړوند ۱۱۳ قضیې حل سوي
د امر بالمعروف، نهي عن المنکر او شکایتونو اورېدلو وزارت وایي، د رواني اوونۍ پر مهال ئې د ښځو د حقوقو اړوند ۱۱۳ قضیې حل کړي دي.
یاد وزارت ویلي، په دغو قضیو کي د اجباري نکاحګانو او کورنیو تاوتریخوالو مخنیوی، مېرمني د ولور او میراث په ګډون له خپلو حقوقو څخه برخمني کول، د شرعي نکاحګانو زمینه برابرول او د طلاق قضیې حلول شامل دي.
د سرچینې په وینا، په دې موده کي ئې د هیواد په کچه ۷۷ لويي او کوچنۍ دښمنۍ هم په دوستۍ بدلي کړي او د کوډو او جادو کولو په تور ئې نهه کسان تر نیولو وروسته اړوندو ارګانونو ته سپارلي دي.
#MillatZagh

روسیې له افغانستان سره د اوسپني پټلۍ په جوړولو کي همکاري کوي
د روسیې د ټرانسپورټ وزارت معین دیمیتري ژیرینوف وايي، هیواد ئې چمتو دی؛ ترڅو له افغانستان سره د افغان- ټرانس، بلخ- هرات، کندهار- هرات او کندهار- سپین بولدک اوسپنیو پټلیو په پروژو کي همکاري وکړي.
د ټولګټو چارو وزارت وايي، دیمیتري ژیرینوف د افغانستان د اوسپنیزي لاري د مدیریت عمومي ادارې له رئیس ملا عبدالکریم فاتح سره په یوه انلاین ناسته کي دا څرګندوني کړي او ویلي ئې دي چي، روسیه غواړي له افغانستان سره سوداګري پراخه او نوي کوریډورونه رامنځ ته کړي.
د سرچینې په وینا، دواړو لورو په دې ناسته کي د اوسپنیزي کرښي د پراختیا، د اقتصادي او سوداګریزه اړیکو د زیاتوالي، د ټرانزیټي عملیاتو له پاره د قانوني چوکاټ د رامنځ ته کولو او د بنسټیزو پروژو په برخه کي د ګډي همکارۍ په اړه هم خبري کړي دي.
#MillatZagh

د پښتو او دري ژبو د شاعر او لیکوال عبدالحنان بارکزي مقبره پیدا او ورغول سوه
د پښتو او دري ژبو د شاعر او لیکوال عبدالحنان بارکزي مقبره، چي په دې وروستیو کي د کندهار د ډنډ ولسوالۍ په مرد کلا کلي د ځینو فرهنګپالو په هڅو پیدا سوې وه، بیا ورغول سوه.
د کندهار د اطلاعاتو او کلتور ریاست هم د دغه ګام ستاینه او هرکلی کړی دی.
#MillatZagh

افغانستان او ایران د ۴۵۱ میلیونه ډالرو هوکړه لیکونه لاسلیک کړل
د افغانستان د سوداګرۍ او پانګوني خوني خبر ورکړی چي، افغانستان او ایران د شاوخوا ۴۵۱،۸ میلیونه امریکايي ډالرو په لګښت ۲۸ سوداګریز هوکړه لیکونه لاسلیک کړي دي.
یادي خوني ویلي، دا تړونونه د پنج شنبې په ماښام په کابل کي د افغانستان او ایران د خصوصي سکټورونو ترمنځ د یوه سوداګریز کنفرانس پر مهال لاسلیک سوي دي.
په دې وروستیو کي د ایران د چارواکو او سوداګرو ۱۷۰ کسیزه پلاوی کابل ته راغلی چي موخه ئې د امام ابو حنیفه (رحمه الله) په پنځم ملي او نړیوال ننداراتون کي ګډون او د افغانستان او ایران د دوه اړخیزه اقتصادي، سوداګریزه او تجارتي اړیکو د پراختیا په اړه خبري یادي سوي دي.
#MillatZagh

د کندهار د سیمنټو تولیدي فابریکې لومړني تولیدات پیل کړل
د افغانستان د صنایعو او معدنونو خونه وايي، د کندهار د ښوراندام په صنعتي پارک کي د کندهار د سیمنټو تولیدي فابریکې لومړني تولیدات پیل کړي دي.
یادي خوني ویلي، دا فابریکه په درو فازونو کي د ۱۱۳ میلیونه امریکايي ډالرو په پانګوني سره جوړېږي، چي دا مهال ئې د لومړي فاز تولیدات پیل سوي، په ورځني ډول ۱۵۰۰ مټریک ټنه سیمنټ تولیدوي او ۵۰۰ کسان په کارونو په کښي بوخت دي.
د سرچینې په وینا، د دې کارخوني د ټولو فازونو په فعالیت سره به د دې فابریکې ورځنی تولید شاوخوا ۵۰۰۰ ټنه ته ورسېږي او زرګونو هیوادوالو ته به کاري زمینه هم په کښي برابره سي.
#MillatZagh

نن پیلنۍ د تلي میاشتي ۱۸مه نېټه، په کندهار کي نرخونه په لاندي ډول دي.
#خوراکي_توکي:
وطني ۴۴ کیلويي اوړه: په ۱۳۰۰، ۱۴۰۰ او ۱۴۵۰ افغانۍ.
قزاقي اول نمبر ۵۰ کیلويي اوړه: په ۱۵۵۰ افغانۍ.
شل لېټره غوړي: په ۲۳۰۰ افغانۍ.
لس لېټره غوړي: په ۱۱۵۰ افغانۍ.
درې لېټره غوړي: په ۳۷۰ افغانۍ.
سېله اولي هندۍ وریجي ۲۵ کیلویي: په ۲۰۰۰ افغانۍ.
وطني ۲۵ کیلويي وریجي: په ۱۶۰۰ افغانۍ.
سپیني وریجي ۲۵ کیلويي: په ۱۴۰۰ افغانۍ.
بوره: من په ۲۴۰ افغانۍ.
پلمېټ: من په ۲۶۰ افغانۍ.
کاناډایي نخود: من په ۵۰۰ افغانۍ.
ایراني اول نمبر نخود: من په ۴۴۰ افغانۍ.
ایراني دوهم نمبر نخود: من په ۳۰۰ افغانۍ.
سره لوبیا: من په ۴۰۰ افغانۍ.
سپینه لوبیا: من په ۳۴۰ افغانۍ.
مالګه: کڅوڼه په ۵۰ افغانۍ.
اولي شنې چای: کیلو په ۲۶۰ افغانۍ.
اولي توري چای: کیلو په ۲۷۰ افغانۍ.
مکروني: کڅوڼه په ۴۵ افغانۍ.
#پته: نوی سړک، د ناحیه اول چوک، د احمدې پلازې پر مخامخ، د حاجي معراج الدین او زامنو عمده پلورنځی.
#غوښي:
د پسه غوښه: له پوست سره چهاریاک په ۴۲۵ او بې پوسته په ۴۵۰ افغانۍ.
د سېرلي غوښه: چهاریاک په ۴۵۰ افغانۍ.
د غوایي غوښه: چهاریاک ۴۲۵ افغانۍ.
د چرګ صافه غوښه: کیلو په ۲۴۰ افغانۍ.
ژوندی چرګ: کیلو په ۱۶۰ افغانۍ.
#پته: د ښاروالۍ نرخونه.
#دسونتوکي:
پټرول: لېټر په ۸۲ افغانۍ.
ډېزل: لېټر په ۷۳ افغانۍ.                                                             
ګاز: په شرکت کي کیلو په ۶۲ او په عام بازار کي کیلو په ۶۴ او ۶۵ افغانۍ.
#پته: د حافظ په نوم ټول تېل پمپونه.
#داسعاروتبادله:
یو ډالر: ۶۴،۸۵ افغانۍ.
یو ډالر: ۲۸۳،۳۰ کلداري.
یو ریال: ۱۷،۲۰ افغانۍ.
یو درهم: ۱۷،۷۰ افغانۍ.
یوه یورو: ۷۲،۷۰ افغانۍ.
زر افغانۍ: ۴۳۷۰ کلداري.
زر کلداري: ۲۲۸ افغانۍ.
زر بانکي تومن: ۰،۲۵ افغانۍ.
یادونه: د صرافۍ بولۍ نه سته دا صرف یو اندازه ده. 
#پته: اتل صرافۍ مارکېټ، اول منزل، د منان حبیب صرافي.
#MillatZagh

په بلخ کي ۲۵۰ جریبه مځکه له غصبه راوګرځول سوه
د عدلیې وزارت وايي، د بلخ په مرکز مزار شریف ښار کي ئې ۲۵۰ جریبه مځکه دولتي تثبیت کړې ده.
یاد وزارت ویلي، دغه مځکه د شمال زون د دولتي غصب سوو مځکو قضیو ته د رسېدګۍ اختصاصي محکمې تر ارزوني او بررسۍ وروسته "امارتي" تثبیت کړې ده.
د سرچینې په وینا، پر دغه مځکه، چي د مزار شریف ښار د اتمي ناحیې اړوند ده، د "عبدالباقي او اسماعیل فارم" موقعیت درلود.
شاوخوا دوې اوونۍ مخکي هم یاد وزارت د بلخ په "ډيپلوماټیک ښارګوټي" کي دوه زره او ۶۵۷،۶ جریبه مځکه دولتي ثبیت کړه.
#MillatZagh

په پنجشېر کي د برېښنا د ۱۰ بندونو سروې پیل سوې
د پنجشېر ویاند سیف الدین لټون وايي، د اسلامي امارت د مشر شیخ صاحب په حکم په دغه ولایت کي د برېښنا د تولید د ۱۰ بندونو د سروې کارونه پیل سوي دي.
د لټون په وینا، د یادو بندونو د سروې چاري د اوبو او انرژۍ وزارت له لوري د پنجشېر په مرکز بازارک، شتل، پریان او حصه اول ولسوالیو کي پیل سوي دي.
سیف الدین لټون ویلي، تر دې مخکي هم یوې ترکۍ کمپنۍ د دغه ولایت د پریان ولسوالۍ په بام وردار کوتل کي د برېښنا د یوه بند جوړولو سروې کړې وه، چي د ۱۰ مېګاواټه برېښنا د تولید ظرفیت ئې درلود.
#MillatZagh

په کندهار کي په ۳۲ میلیونه افغانۍ یوه پروژه بشپړه سوه
د کندهار د کلیو د بیارغوني او پراختیا ریاست په ۳۲ میلیونه، ۲۱۷ زره او ۶۰۰ افغانۍ د یوې پروژې د بشپړولو خبر ورکړی دی.
یاد ریاست وايي، په دې پروژه کي په ډنډ او سپین بولدک ولسوالیو کي د ۶۴،۵ کیلومتره کانالونو پاکول شامل دي چي د شپږو میاشتو له پاره ۸۳۹ کسانو ته کاري زمینه په کښي برابره سوې وه.
د سرچینې په وینا، یاده پروژه د سېلابي اوبو د ذخیره کولو او د خلکو له پاره د کاري زمینې برابرولو په موخه د خوړو نړیوال پروګرام په مالي ملاتړ پلي سوې ده.
#MillatZagh

سبا په ۱۰ ولایتونو کي د بارانونو اټکل سوی
د ټرانسپورټ او هوايي چلند وزارت د هوا پېژندني ریاست سبا (یک شنبه) په ۱۰ ولایتونو کي د بارانونو وورېدلو او تېزو بادونو اټکل کړی دی.
دغه وزارت ویلي، په غور، دایکندي، بامیان، میدان وردګ، خوست، پکتیا، لغمان، ننګرهار، کونړ او نورستان ولایتونو کي له ۱۰ څخه تر ۳۰ ملي متره د باران وورېدلو او په شمالي، لوېدیځو، سوېلي، سوېل ختیځو او مرکزي ولایتونو کي له ۵۰ څخه تر ۸۵ کیلومتره په ساعت کي د باد د تېزوالي اټکل سوی دی.
#MillatZagh