പത്ത് എഡിഷനുകൾ, എണ്ണം പറഞ്ഞ 152 സിനിമകൾ... എംസോണിൻ്റെ അഭിമാന ഫെസ്റ്റ് -ക്ലാസ്സിക് ജൂൺ.
തുടങ്ങി ഇത്രനാളും ഒരു മുടക്കവുമില്ലാതെ എല്ലാ ജൂൺമാസങ്ങളിലും പത്തിൽ കുറയാത്ത ക്ലാസ്സിക്കുകൾ മലയാളികളിലേക്ക് എത്തിച്ച ഫെസ്റ്റ് പത്ത് എഡിഷനുകൾ പൂർത്തിയാക്കുമ്പോൾ എംസോണിൻ്റെ കിരീടത്തിൽ ഒരു പൊൻതൂവൽ കൂടി ചേർത്തുവെക്കപ്പെടുന്നു.
ചിലരെങ്കിലും ചോദിച്ചിട്ടുള്ള ചോദ്യമാണ്, എന്തിന് ഈ ബ്ലാക്ക് ആന്റ് വൈറ്റ് സിനിമകൾക്ക് വേണ്ടി സമയം കളയുന്നു, എന്തിനാണ് ആരും ശ്രദ്ധിക്കാത്ത സിനിമകൾക്ക് സബ് ചെയ്യുന്നത്, ആ സമത്ത് പുതിയ സിനിമകൾക്ക് പരിഭാഷ ചെയ്തുകൂടേ ? അത് നിങ്ങൾക്ക് ഒരു ക്ലാസ്സിക് ചിത്രത്തിൻ്റെ വിലയറിയാത്തതുകൊണ്ടാണ്, പഴമയുടെ പൊടിപിടിച്ച ഫിലിം കൂമ്പാരമല്ല ക്ലാസ്സിക് ചിത്രങ്ങൾ, ആശയദാരിദ്ര്യം മൂർദ്ധന്യത്തിലെത്തുമ്പോൾ എണ്ണം പറഞ്ഞ സംവിധായകരും എഴുത്തുകാരും മറിച്ചുനോക്കുന്ന പുസ്തകത്താളുകളാണവ. അതിൽ കാലൂന്നിയല്ലാതെ മറ്റൊരു വിസ്മയം തീർക്കാനാവില്ല. അതിൻ്റെ അനുരണങ്ങളില്ലാതെ ഒരു സിനിമയും പിറക്കില്ല....
ഓരോ ക്ലാസ്സിക് സിനിമയും ഒരു കാലഘട്ടത്തിന്റെ അടയാളപ്പെടുത്തൽകൂടിയാണ്. തിരക്കഥയിലും സംവിധാനത്തിലും ആധുനിക കാലഘട്ടത്തിലെ സിനിമകളെപ്പോലും വെല്ലുന്ന പ്രതിഭയുടെ മിന്നലാട്ടങ്ങൾ അവയിൽ കാണാൻ കഴിയും. ചിലർക്ക്, ഇത്തവണ വന്ന മക്കെന്നാസ് ഗോൾഡ് പോലെ ഗൃഹാതുര സ്മൃതികളാണ് പല ചിത്രങ്ങളും. ഇതുവരെ വന്ന ക്ലാസ്സിക് സിനിമകളെല്ലാം കാലങ്ങൾ കഴിഞ്ഞും മലയാളത്തിൽ കാണാൻ അവസരമൊരുക്കുന്നതിന്റെ ചാരിതാർത്ഥ്യത്തിലാണ് എംസോൺ ടീമും. നിങ്ങളുടെ കുട്ടികൾക്കും, കൂട്ടുകാർക്കും മാഷുമ്മാർ സ്കൂൾ കുട്ടികൾക്കും ഈ പഴമയുടെ ഗരിമ എംസോൺ സബ്ടൈറ്റിലിന്റെ സഹായത്തോടെ പകർന്ന് നൽകുക. അവരുമറിയട്ടെ പഴയ വീഞ്ഞിന്റെ മാധുര്യം.
ഇക്കൊല്ലം ജൂൺ ക്ലാസ്സിക്ക് ഫെസ്റ്റിൽ 18 സിനിമകളുടെ സബ്ടൈറ്റിലുകളാണ് റിലീസ് ചെയ്തത്. ആസ്വദിച്ച, പ്രോത്സാഹിപ്പിച്ച എല്ലാവർക്കും നന്ദി.

https://malayalamsubtitles.org/category/classic-june-2024/

പോസ്റ്റർ ഡിസെെൻ: നിഷാദ് ജെ എന്‍