മുദ്രകളും ഭാവാഭിനയവും മാത്രം കൊണ്ട് ഇതിഹാസങ്ങളിലെ കഥകൾ ജനങ്ങളിലേക്ക് പകരുന്ന കേരളത്തിന്റെ കഥകളിയെക്കുറിച്ച് 1981-ൽ പുറത്തിറങ്ങിയ ഒരു റഷ്യൻ (സോവിയറ്റ്) അനിമേഷൻ ഹ്രസ്വചിത്രമാണ്, ടോക്കിങ് ഹാൻഡ്‌സ് ഓഫ് ട്രാവൻകോർ. മഹിഷാസുര വധവും, പരശുരാമൻ മഴു എറിഞ്ഞ് തിരുവിതാംകൂറിന് ‍ജന്മം നൽകുന്നതുമായ പുരാണ കഥകളാണ് ഈ ചിത്രത്തിൽ വളരെ മനോഹരമായ അനിമേഷനിലൂടെയും, സംഗീതത്തിലൂടെയും ദൃശ്യവൽക്കരിച്ചിരിക്കുന്നത്.

ശീതയുദ്ധ (Cold War) കാലഘട്ടത്തിൽ നിർമ്മിക്കപ്പെട്ട വെറും 10 മിനിറ്റ് മാത്രമുള്ള ഈ ഹ്രസ്വചിത്രം, റഷ്യൻ അനിമേഷൻ ശൈലിയും കേരളീയ സംസ്കാരവും തമ്മിലുള്ള അപൂർവ്വമായൊരു സാംസ്കാരിക കൂട്ടായ്മയുടെ അടയാളമാണ്.

വിയന്നയിലെ പ്രശസ്തയായ ഒരു പിയാനോ അധ്യാപികയുടെ വലിഞ്ഞുമുറുകിയ ജീവിതവും, അവളുടെ ഉള്ളിലെ വിചിത്രവും ഇരുണ്ടതുമായ രഹസ്യങ്ങളും വരച്ചുകാട്ടുന്ന അത്യപൂർവ്വമായ ഒരു സൈക്കോളജിക്കൽ ഡ്രാമയാണ് മിഖായേൽ ഹനേക്കെയുടെ ‘ദ പിയാനോ ടീച്ചർ’ (2001). കർക്കശക്കാരിയായ അമ്മയുടെ നിയന്ത്രണങ്ങളിൽ ജീവിക്കുന്ന എറികയുടെ ജീവിതത്തിലേക്ക് വാൾട്ടർ എന്ന ചെറുപ്പക്കാരൻ കടന്നുവരുന്നതോടെ, അവർക്കിടയിൽ ഉടലെടുക്കുന്ന തീവ്രമായ പ്രണയവും മാനസികമായ അധികാരവടംവലിയും കഥയെ തികച്ചും അപ്രതീക്ഷിതമായ തലങ്ങളിലേക്ക് നയിക്കുന്നു. കാമവും നിയന്ത്രണവും തമ്മിലുള്ള നേർത്ത അതിർവരമ്പുകളെ തകിടം മറിക്കുന്ന ഈ ചിത്രം, ഇസബെൽ ഹപ്പേർട്ടിന്റെ അവിസ്മരണീയമായ അഭിനയമികവുകൊണ്ട് പ്രേക്ഷകനെ ഒരേസമയം അസ്വസ്ഥനാക്കുകയും സ്തബ്ധനാക്കുകയും ചെയ്യുന്ന ഒരു മികച്ച സിനിമാറ്റിക് അനുഭവമാണ്.

🔞 കണ്ടെന്റ് ഉള്ളതിനാൽ, പ്രായപൂർത്തിയായവർ മാത്രം കാണുക.

ഒൻപത് വയസ്സുകാരനായ ഹാനി വാശിക്കാരനും കുറുമ്പനുമായ ഒരു കുട്ടിയാണ്. എന്നാൽ അവന്റെ ചേട്ടന് മാരകമായ ബ്രെയിൻ ട്യൂമർ ബാധിക്കുന്നതോടെ ആ കുടുംബത്തിന്റെ സന്തോഷം തകിടം മറിയുന്നു. തന്റെ കുസൃതികളെല്ലാം മാറ്റിവെച്ച്, മരണത്തോട് പോരാടുന്ന ചേട്ടനെ സന്തോഷിപ്പിക്കാനും അവന് താങ്ങാവാനും ആ കുഞ്ഞു ബാലൻ നടത്തുന്ന തീവ്രവും വികാരനിർഭരവുമായ ശ്രമങ്ങളാണ് ഈ ചിത്രം.

“ഗോസ്റ്റ് ഇൻ ദ ഷെൽ” സംവിധാനം ചെയ്ത മാമോറു ഓഷിയുടെ ആദ്യകാല ചിത്രങ്ങളിലൊന്നാണ് എയ്ഞ്ചൽസ് എഗ്ഗ്.

വിജനമായ, നശിച്ചുകൊണ്ടിരിക്കുന്ന ഒരു നഗരത്തിൽ ഒരു പെൺകുട്ടി വലിയൊരു മുട്ട അതീവ ശ്രദ്ധയോടെ കൂടെ കൊണ്ട് നടന്നു സംരക്ഷിക്കുന്നു. അങ്ങനെയിരിക്കെ കുരിശിന്റെ രൂപത്തിലുള്ള ഒരു ആയുധവും പേറി നടക്കുന്ന ഒരു യുവാവിനെ അവൾ പരിചയപ്പെടുന്നു.

എലിസബത്ത് ടെയ്ലർ ക്ലിയോപാട്രയായി നിറഞ്ഞാടിയ ഹോളിവുഡ് ചിത്രം. ലോകത്ത് അതുവരെ ഇറങ്ങിയതിൽ വെച്ച് ഏറ്റവും ചെലവേറിയ ചിത്രമായിരുന്നു ക്ലിയോപാട്ര. ഒരു ബ്രഹ്മാണ്ഡ ചിത്രത്തിനു വേണ്ട എല്ലാ ചേരുവകളുമായി ഇറങ്ങിയ ചിത്രത്തിന്റെ നിർമാണച്ചെലവ് അക്കാലത്ത് ഹോളിവുഡിന് പോലും താങ്ങാൻ പറ്റാത്തതായിരുന്നു. ആ പതിറ്റാണ്ടിലെ ഏറ്റവും കളക്ഷൻ നേടിയ ചിത്രങ്ങളിലൊന്നായിട്ടും, ട്വന്റിയത് സെഞ്ചുറി ഫോക്സിന് സാമ്പത്തിക ബാധ്യതയിൽ നിന്ന് കരകയറാൻ വർഷങ്ങളെടുത്തു.
റോമൻ ചരിത്രത്തിലെ ഏറ്റവും സംഭവബഹുലമായ ചരിത്രമാണ് ചിത്രം പറയുന്നത്. മികച്ച ഛായാഗ്രഹണം, വിഷ്വൽ ഇഫക്ട്‌സ് എന്നിവയടക്കം നാല് ഓസ്‌കാർ പുരസ്‌കാരങ്ങൾ നേടി.

“ഒറ്റയ്ക്ക് പോകുന്നവൻ ആദ്യം തീരും” എന്ന ഹൊറർ നിയമം സമ്മാനിച്ച, ആധുനിക സ്ലാഷർ സിനിമകളുടെ വ്യാകരണം നിർണ്ണയിച്ച കൾട്ട് ക്ലാസിക് സിനിമയാണിത്.

തീയേറ്ററുകളിൽ ഭീതിയുടെ പുതിയ തരംഗം സൃഷ്ടിച്ച ഈ ചിത്രം, നെഞ്ചിടിപ്പേറ്റുന്ന ‘ജമ്പ് സ്കെയറുകളും’ അപ്രതീക്ഷിത ട്വിസ്റ്റുകളും സിനിമാലോകത്തിനു പരിചയപ്പെടുത്തി. കാടിന്റെ വന്യതയും തടാകത്തിന്റെ നിഗൂഢതയും മനോഹരമായ ഫ്രെയിമുകളിലൂടെയും നിറങ്ങളിലൂടെയും ഇതിൽ ദൃശ്യവൽക്കരിച്ചിരിക്കുന്നു.

ഹാരി മാൻഫ്രെഡിനിയുടെ ഐക്കോണിക് സംഗീതവും, കൊലയാളിയെ അവസാന നിമിഷം വരെ ഒളിച്ചുവയ്ക്കുന്ന ശൈലിയും ചിത്രത്തെ എക്കാലത്തെയും മികച്ച സ്ലാഷർ മാസ്റ്റർപീസാക്കുന്നു. 12 സിനിമകളടങ്ങുന്ന ഒരു വൻ ഫ്രാഞ്ചൈസിക്ക് തുടക്കം കുറിച്ച, ഇത്രയും സ്വാധീനമുള്ള മറ്റൊരു സ്ലാഷർ ചിത്രം ചരിത്രത്തിൽ അപൂർവമാണ്.

ശ്രദ്ധിക്കുക (18+): R rated സിനിമ ആയതിനാൽ മുതിർന്നവർ മാത്രം കാണുക!

മികച്ച ചിത്രത്തിനുള്ള ഓസ്കർ ഉൾപ്പെടെ അഞ്ച് പുരസ്കാരങ്ങൾ സ്വന്തമാക്കിയ ഒരു ബില്ലി വൈൽഡർ ചിത്രമാണ് “ദി അപ്പാർട്ട്മെന്റ്”. ആധുനിക റൊമാന്റിക് കോമഡി ചിത്രങ്ങളുടെ “ഗോഡ് ഫാദർ” എന്ന് വിശേഷിപ്പിക്കാൻ കഴിയാവുന്ന ഈ ചിത്രം ഇറങ്ങി കഴിഞ്ഞ് 6 പതിറ്റാണ്ടുകൾക്ക് ശേഷവും സിനിമാപ്രേമികളെയും വിദ്യാർത്ഥികളെയും ഒരേ പോലെ രസിപ്പിക്കുന്നു.

ന്യൂയോർക്ക് നഗരത്തിലെ ഒരു ഇൻഷുറൻസ് കമ്പനിയിലെ ക്ലർക്കാണ് സി. സി. ബാക്സ്റ്റർ. അവിവാഹിതനായ ബാക്സ്റ്ററിന്റെ അപ്പാർട്ട്മെന്റ് അയാളുടെ കമ്പനിയിലെ പല മേലുദ്യോഗസ്ഥർക്കും തങ്ങളുടെ അവിഹിതങ്ങളും കുത്സിത പ്രവൃത്തികളും നടത്താനുള്ള ഒരു ഇടമാണ്. തന്റെ ജീവിതം തന്നെ ബാക്സ്റ്റർ ചാർട്ട് ചെയ്യുന്നത് തന്റെ മേലുദ്യോഗസ്ഥരുടെ കുന്തളിപ്പിന്റെ സൗകര്യം നോക്കിയാണ്. മേലധികാരികൾക്ക്‌ കീഴ്പ്പെട്ടുള്ള ഈ ജീവിതം കാരണം ജോലിയിൽ അദ്ദേഹത്തിന് വളരെ പെട്ടെന്ന് സ്ഥാനകയറ്റം കിട്ടുന്നു. എന്നാൽ ബാക്സ്റ്ററുടെ കമ്പനി സമുച്ചയത്തിലെ ലിഫ്റ്റ് ഓപ്പറേറ്ററായ ഫ്രാൻ ക്യൂബ്ലിക്ക് എന്ന യുവതി അയാളുടെ ജീവിതത്തിലേക്ക് കടന്നു വരുന്നതോടെ അയാളുടെ ജീവിതം ആകെ മാറിമറിയുന്നു.