ကန့်ကွက်မှုတွေကြောင့် “Blind Box” ရုပ်ရှင် ပြသမယ့်ရက် ရွှေ့ဆိုင်း

အောက်တိုဘာ ၁၅ - ၂၀၂၆
SN (VOM)

မြန်မာနိုင်ငံတဝန်းရှိ ရုပ်ရှင်ရုံကြီးတွေမှာ မနက်ဖြန် အောက်တိုဘာ ၁၆ ရက်နေ့မှစပြီး ရုံတင်ပြသဖို့ စီစဉ်ထားတဲ့ “Blind Box - ဘလိုင်းဘောက်” သရဲရုပ်ရှင်ဇာတ်ကားကြီး ပြသမယ့်ရက်ကို ကန့်ကွက်မှုတွေကြောင့် ရွှေ့ဆိုင်းထားတယ်လို့ အနုပညာရှင်အသိုင်းအဝိုင်းကနေ သိရပါတယ်။

တရုတ်ကုမ္ပဏီ POP MART ထုတ် အရုပ်ဖြစ်တဲ့ Labubu အရုပ်ကို သရဲဇာတ်ကောင် နေရာကနေ အသုံးပြုထားတာကြောင့် ရန်ကုန်မြို့ရှိ တရုတ်သံရုံးရဲ့ ကန့်ကွက်မှုနဲ့ ပြသခွင့် ဆိုင်းငံ့လိုက်ရတယ်လို့ သိရပါတယ်။

“တရုတ်သံရုံးက မြန်မာနိုင်ငံ ရုပ်ရှင်အစည်းအရုံးနဲ့ သက်ဆိုင်ရာ ဆင်ဆာအဖွဲ့ဆီကို ကန့်ကွက်စာ ပေးပို့ခဲ့တယ်လို့ သိရတယ်။ ဒီအရုပ်က ကမ္ဘာတဝန်း လူကြိုက်များသလို စီးပွားရေးအရလည်း အောင်မြင်နေတဲ့ တရုတ်နိုင်ငံထုတ် အမှတ်တံဆိပ် အရုပ်ဖြစ်တယ်။ ဒီအရုပ်ကို အနုတ်လက္ခဏာဆောင်တဲ့ သရဲတစ္ဆေ၊ ဝိညာဉ်ဆိုးအဖြစ် ပုံဖော်ထားတာဟာ ထုတ်ကုန်နဲ့ ကုမ္ပဏီရဲ့ ဂုဏ်သိက္ခာကို ထိခိုက်စေတယ်ပေါ့။ နောက်တခု ဒီအရုပ်ကိုသုံးဖို့ သက်ဆိုင်ရာ ကုမ္ပဏီဆီကနေ ခွင့်ပြုချက် ရယူထားတာလည်း မရှိဘူးလို့ သိရတယ်။ ဒါကြောင့် ပြသခွင့်ကို ဆိုင်းငံ့ပေးဖို့ ကန့်ကွက်တာ” လို့ အနုပညာအသိုင်းအဝိုင်းနဲ့ နီးစပ်သူတယောက်က ပြောပါတယ်။

အရုပ်ထုတ်လုပ်တဲ့ ကုမ္ပဏီရဲ့ ခွင့်ပြုချက်မရဘဲ အမှတ်တံဆိပ်နဲ့ ထင်ရှားစွာ ဆက်စပ်နေတဲ့ အရုပ်ကို ရုပ်ရှင်မှာ အခုလို အသုံးပြုတာဟာ မူပိုင်ခွင့်၊ ကုန်အမှတ်တံဆိပ်နဲ့ ကုမ္ပဏီရဲ့ အမှတ်တံဆိပ် ပုံရိပ်ဆိုင်ရာ ပြဿနာတွေ ဖြစ်ပေါ်နိုင်တယ်လို့ သိရပါတယ်။

ဒီအကြောင်းအရာနဲ့ ပတ်သက်လို့ ရုပ်ရှင်ဝေဖန်သူ တယောက်က “သုံးထားတဲ့ အရုပ်က သရဲဇာတ်ကောင်ဖြစ်နေတော့ အရုပ်ကုမ္ပဏီဘက်က Brand Image ထိခိုက်နိုင်ပါတယ်။ ကုမ္ပဏီဘက်ကလည်း လုံးဝ ခွင့်လွှတ်မှာမဟုတ်ပါဘူး။ Chucky, Annabelle တောင် မူလအရုပ်တွေကို ပုံစံပြောင်းရပါတယ်။ ရုပ်ရှင် ထုတ်လုပ်ရေးဘက်ကလည်း Blind Box (pop mart) နဲ့ မတူအောင် ပြန်လည်ဖန်တီးပြီး တင်ဆက်ရင်တော့ အဆင်ပြေနိုင်ပါတယ်” လို့ ပြောပါတယ်။

ဖိုးဝရုပ်ရှင်ထုတ်လုပ်ရေးက ထုတ်လုပ်တဲ့ “Blind Box - ဘလိုင်းဘောက်” ရုပ်ရှင်ဟာ Drama Horror ဇာတ်ကားဖြစ်ပြီး ဇာတ်လမ်း၊ ဇာတ်ညွှန်းနဲ့ ဒါရိုက်တာ ဒီဒီထက်အောင်က ရိုက်ကူးထားကာ အကယ်ဒမီ နေဝင်း၊ ပိုးမမှီသာ၊ အကယ်ဒမီ မင်းဦး၊ အကယ်ဒမီ ချောရတနာ၊ ဗညားဘုန်းပြည့်၊ ဆုထက်၊ ချိုမဒီသွင်နဲ့ သားချောတို့ ပါဝင်သရုပ်ဆောင်ထားပါတယ်။

ရုပ်ရှင် ထုတ်လုပ်ရေးဘက်က အခုလို ရုပ်ရှင်ပြသမယ့်ရက် ဆိုင်းငံ့တာနဲ့ ပတ်သက်လို့ ဒီကနေ့ အောက်တိုဘာ ၁၅ ရက်မှာ အသိပေးချက် ထုတ်ပြန်ထားပြီး မမျှော်လင့်ဘဲ ကြုံတွေ့ရတဲ့ အခက်အခဲတချို့ကြောင့် ရုံတင်ပြသမယ့်ရက်ကို ရွှေ့ဆိုင်းလိုက်ရတယ်လို့ ကြေညာထားသလို သရုပ်ဆောင် နေဝင်းကလည်း အကြောင်းတစုံတစ်ရာကြောင့် ခေတ္တ ရက်ရွှေ့လိုက်တယ်လို့ အသိပေးထားပြီး အသေးစိတ် အကြောင်းရင်းကိုတော့ ထုတ်ဖော် ပြောဆိုထားခြင်း မရှိပါဘူး။

Photo - CJ

#voiceofmyanmar #VOM #BlindBox #ရုပ်ရှင် #ပြသရက် #ရွှေ့ဆိုင်း

နေမမြင်အင်ပါယာ ရုပ်ရှင်ဇာတ်ကားကြီး တတိယပတ် ဆက်လက်ပြသမည်