_________
នៅព្រឹកថ្ងៃពុធ ១៤ រោច ខែមិគសិរ ឆ្នាំថោះ បញ្ចស័ក ពុទ្ធសករាជ២៥៦៧ ត្រូវនឹងថ្ងៃទី១០ ខែមករា ឆ្នាំ២០២៤ មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មបានប្រារព្វពិធីអបអរសាទរខួបគម្រប់១០ឆ្នាំនៃការបង្កើតមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មនៅសណ្ឋារគារ Hyatt Regency ។
ពិធីអបអរសាទរខួបគម្រប់១០ឆ្នាំនៃការបង្កើតមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មប្រព្រឹត្តទៅក្រោមអធិបតីភាព ឯកឧត្តម បួន សារៈមុនី រដ្ឋលេខាធិការក្រសួងពាណិជ្ជកម្ម និងជាតំណាងដ៏ខ្ពង់ខ្ពស់របស់លោកជំទាវ ចម និម្មល រដ្ឋមន្ដ្រីក្រសួងពាណិជ្ជកម្ម និង លោកមជ្ឈត្តករ សាន គីរី ប្រធាននៃមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម ព្រមទាំងមានវត្តមាន ឯកឧត្តមបណ្ឌិតសភាចារ្យ សុក ស៊ីផាន់ណា ទេសរដ្ឋមន្រ្តីទទួលបន្ទុកបេសកកម្មពិសេស និងជាសមាជិកក្រុមប្រឹក្សាពិគ្រោះយោបល់នៃ ម.ជ.ម. ជាភ្ញៀវកិត្តិយស។
ក្នុងនោះផងដែរក៏មានការចូលរួមពី សមាជិក ម.ជ.ម. ទាំងរូបវន្តបុគ្គល និងនីតិបុគ្គល ព្រមទាំងតំណាងស្ថាប័នពាក់ព័ន្ធផ្សេងៗរួមមាន៖ សាលាដំបូងរាជធានីភ្នំពេញ តុលាការកំពូល មជ្ឈមណ្ឌលមជ្ឈត្តការអន្តរជាតិហុងកុង បណ្តាសមាគម ស្ថាប័នអប់រំ ការិយាល័យមេធាវី សមាគមនអ្នកច្បាប់ និងសមាគមនធុរកិច្ចពាក់ព័ន្ធជាច្រើនទៀតផងដែរ។
កម្មវិធីនេះត្រូវបានប្រារព្ធឡើងក្នុង គោលបំណងអបអរសាទរ និងថ្លែងអំណរគុណដល់ក្រុមប្រឹក្សាប្រតិបត្តិគ្រប់អាណត្តិ សមាជិក ម.ជ.ម. ទាំងរូបវន្តបុគ្គល និងនីតិបុគ្គល និងស្ថាប័នពាក់ពព័ន្ធដែលបានជួយ កសាង និងគាំទ្រមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្មអោយក្លាយជាស្ថាប័នដែលមានសមត្ថភាពក្នុងការផ្តល់ជូនសហគមន៍ពាណិជ្ជករនូវយន្តការដោះស្រាយវិវាទពាណិជ្ជកម្មមួយក្រៅប្រព័ន្ធតុលាការដែលប្រកបដោយប្រសិទ្ធភាព។

កិច្ចប្រជុំនេះបានចាប់ផ្ដើមដោយសុន្ទរកថាបើករបស់ ឯកឧត្តម កើត រិទ្ធ ឧបនាយករដ្ឋមន្ត្រី ដែលផ្ដោតសំខាន់ទៅលើការផ្ដួចផ្ដើមបង្កើតអាជ្ញាធរនេះឡើង ចំណេះដឹងដ៏មានតម្លៃចំពោះចក្ខុវិស័យ និងគោលដៅរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។ មិនតែប៉ុណ្ណោះ កិច្ចពិភាក្សាបើកចំហដែលដឹកនាំដោយ ឯកឧត្តម ឧបនាយករដ្ឋមន្រ្តីនេះ បានសម្របសម្រួលឱ្យមានការពិភាក្សាយ៉ាងសកម្មទៅលើការយល់ដឹងឱ្យកាន់តែស៊ីជម្រៅទៅលើដំណើរការ និងតួនាទីរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។
ក្នុងឱកាសនេះផងដែរ លោកមជ្ឈត្តករ សាន គីរី ប្រធាននៃ ម.ជ.ម. បាន សម្តែងការគាំទ្រយ៉ាងមុតមាំទៅលើការបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដោយសង្កត់ធ្ងន់លើសារៈសំខាន់នៃយន្តការដោះស្រាយវិវាទដែលជាជំនួយក្នុងការលើកកម្ពស់ទិដ្ឋភាពច្បាប់ប្រកបដោយយុត្តិធម៌ និងប្រសិទ្ធភាព។
ឆ្លៀតក្នុងឱកាសនេះ លោកប្រធាន ក៏បាននាំយកវិធានស្តីពីសន្ធានកម្ម របស់ ម.ជ.ម. និងវិធានពាក់ព័ន្ធមួយចំនួនទៀត ជូនដល់ ឯកឧត្តម យ៉ម ផារ៉ូត អគ្គលេខាធិការ អ.ដ.ក ផងដែរ។
កិច្ចពិភាក្សានេះបានបង្ហាញពីជំហានដ៏សំខាន់មួយឆ្ពោះទៅកាន់ការលើកកម្ពស់យន្តការដោះស្រាយវិវាទក្រៅប្រព័ន្ធតុលការ និងការពង្រឹងបន្ថែមទៀតនូវទិដ្ឋភាពនៃការដោះស្រាយវិវាទនៅក្នុងព្រះរាជាណាចក្រកម្ពុជា។
_______
Join our social media channels:
LinkedIn: https://www.linkedin.com/company/ncac-kh
Facebook: facebook.com/ncackh
Telegram: https://t.me/ncackh