اشابج عشرتي ويغفن عالهام
خلاف العودوني استجن عالهام
اضل مجابل البيبان علهم
بداير حول يتراوون اليه

م ن

واجب فرض ينگال ابن امي اعوفه
أيغطي بل مسواك من رحت اشوفه

م.ن

يمكن مو وكتها بس بعد حبيت
لا و المشكلة ما تدري بيه أنت
و حق عيونك الـ ماحاسبلهة حساب
الـ يحب من طرف واحد يحترگ سكتة
احمد عاشور

نكِسر مَچداف عُمري بزحَمة الرُوچ
وَ وَگف بيهَ الزمَن يمَ اليكرهُون ..

لو أَحَصِل بِـ گلبَك شِبر
يَا بيت خايب يَا هَلي ؟
بِـ لَحظتها أَعوف ولايتي

ويـن أنت ملـينه النشد
والنـاس گامت ماترد
_جبار رشيد 

نعم أنا أعترفلك صرت خواف
شفت الخوف يرجف كاتلة الخوف
درب حُبك ضياع وامشي والتاف
ترى اليسمع سمع مو مثل اليشوف

سمير صبيح

ياتاركي تجهل عنائي بل جفا
ان شاعت الاخبار عني تسمع
وتركت لي قلبا بحين وداعك
نارا به النمرود فيها يطمع

شتضن بيها حيل بغيابك تركلي
مرضرض والمصاييب هم تركلي
وداعك من حرك روحي تركلي
حريجه طمع النمرود بيه

كرم السراي

البگلبه حچي وينام مكسور
من يكعد يصير إنسان ثاني؟

‏⠀
‌‏⠀
‌‏وگلهم بس انا مدلل بهذا الكون
النهر متروس بس يغار من الحب
ياهو الـ يوصلك يالـ جوة ضلعي تبات
انا الليله ونهاره ببابكم محرب
انا الـ ظل بنفسها تشوفه المرايات
انا الـ شگيت روحي من الگشر للب
ومو دوم الـ يطخ الراس ما مهيوب
السنابل واگفة والمنجل محدب

احمد عاشور

ردو من عساهم كون لا ردو
جتف طك بجتف شافونه وتعدو
جثه مشوهه وما كثر بينا الشوف
بساع وجوهم داروها من صدو
وكفو عل جرف من درو غركانين
وموش جفوفهم لو تعرف شمدو
مدو خيط منه العنكبوت يطيح
وكل هذا لمن جلبنه بيه هدو

سعد شميل

يجي باجر وكولن باجر انساك
ويجي باجر وكول لا كلت باجر

جبار رشيد

لاكيته وتغاضيت بس هو يسوة
مثل النعاس تكول طب عيني كوة

ابراهيم الكوفي

غفى رسمك بعيني من الصبا لليوم
وطيوفك طيوفي بصحوتي و النوم
نثرت العمر بدروبك و اگول ادوم
ماضنيت ماضنيت عشگك
عشگ ليله اويوم

نفحه من الورد ومن الگمر طلعه
ولك عمري انطفى شمعه بأثر شمعه
ضوگني هواك ضوگني هواك
الضحكه والدمعـه
نطرت هلال وصلك
والحصاد غيوم
ليله ليله ليله ويوم

دنيا بلا عشگ ما تنشرى وتنباع
عذب عمرالوفي بچف الوفي لو ضاع
ياحنة العيد وشهگة النعناع
حلم يمطرز بدربي
ورد ونجوم
ليلة ليلة ليلة ويوم

گصد ليك الگلب طير ويلوذ بدوح
ولگيتك رازقي طيب وملاحه تفوح
يقظه لو حلم من بين اديه تروح
والماي التبده مايرده اللوم
ليله ليله ليله ويوم

كاظم الرويعي

عاذرك
يالماتواصلني التهيت
بعد احسن مالي خلك ازعاجك
عادي ماشوفك ولاميت عليك
عندي صورة وياك مامحتاجك

كرم السراي

حبيتها
بس جان حبي بسكته.
وتدريني احبها وظلت بسكتتها.

ونتلاگه ويضيع الحݘي مدري شلون
وتسكت وعرف السالفه بصفنتها.

شاعر وعرف السالفه منين اتفوت
معقوله ماعرف الحݘي بنضرتها.

ويمر هوه الله ابينه وروحي اتموت
من گمت احسه ايحرك بگذلتها

من تمشي گامت گمت اغار من الگاع
وتطگ خضار الگاع لو سحگتها.

گتلها احبج وتضح كل مضموم
وگتلها عيني بطيفج مخلصتها

والزم بروحي اگبالها خاف اتطيح
وتگعد اگبالي وتلزم بشامتها.

لا بيها شي ينعاب ونعير بي
هوه الگمر ماخوذ من رگبتها.

هوه النده يدگ بابها يله يطيح
وݘم نهر غافي بطرف شفتها.

خيعون اهلها بكيفهم مرتاحين
يشاقونها ويغفون يم ضحكتها.

من اشتاگ اموتن وترس الدنيا اعلوگ
وبست العيون الصدك شافتها.


أثير السعداوي

اليوم روحي تون شگلهه
زاعلت شربتهه وچلهه
وتخلبصت جيب اليحلهه
تخوصرت تنشدني اعله اهلهه

فكلي الگبر خليني اشمك
وتزحزح ارد انطمر يمك
لاخرز مطشره ولمك
ولاتنلزم بالچف ولزمك

حيلي النشيط بفرگتك باد
النسمه التهب تكفخني ليغاد
الچيله اشوه من تغفه بلفاد
لاچن فرگتك عيــب تــراد

عله اللــيالي علـعـلـني
وينكسر كونه ضحك سني
چا شنهي مافززك وني
خاب احچي من تسكت تذلني

المندوم تشتم بيه عطاب
والكاظ خصره امفارگ احباب
گوم اعله حيلك گوم يتراب
الغافي حدرك شاب من شاب

مو گتلي امرلك ليش ماجيت
امتانه الزرع للماي تانيت
چا بلمگابر ليش ضليت
لو تيهت ماتندل البيت

ردتك الجرحي تصيرله اضماد
آنه الردت بس الله ماراد
سواله يومك طر بلفاد
من الناصريه او لحد بغداد

بشار الاسمر

الحِيرة من تسهر لوَادم غافِية .

شمـاته ابنـار يوم جفاڪ جـاوين
دليلـي وصـوتي لو مسمـوع جـاوين
انـه بـس انتـه الك مشكـاي جـاوين
اديـرن وجهي وانتـه انطيـت بـيه-
كرم السراي

الحمدلله اكتفيت بقله الموجود
وهم نعمه القناعه مسكته ضنوني
خل تفرغ الدنيا عيوني متروسات
ولاتنترس دنيا وفارغه عيوني