Елнұр Бейсенбаевтың Мәжіліс депутаты ретіндегі өкілеттігі тоқтатылды

Бүгін жалпы отырыста Мәжіліс депутаты Елнұр Бейсенбаевтың өкілеттігін мерзімінен бұрын тоқтату мәселесі қаралды. Осы аптада ол Қазақстан Республикасы Президенті Әкімшілігінің ішкі саясат бөлімі меңгерушісі қызметіне тағайындалды.

Елімізде газды тұтыну тәртібі өзгеруі мүмкін

Мәжілістің жалпы отырысы басталды. Бүгін депутаттар газбен жабдықтау және тауарлық газды үнемді тұтынуға қатысты жаңа заң жобасын талқылайды.

Құжатта газ ресурстарын тиімді пайдалану, ішкі нарықты тұрақтандыру және жеткізу тетіктерін жетілдіру мәселелері қарастырылған.

🏫 Кей өңірлерде оқушылар қашықтан оқып жатыр

Ауа райының қолайсыздығына байланысты еліміздің бірқатар өңірлерінде мектеп оқушылары онлайн форматқа көшті. Астанада бірінші ауысымдағы 0–6 сыныптар қашықтан білім алуда.

Шығыс Қазақстан мен Қостанай облыстарында 0–9 сынып оқушылары сабаққа үйден қатысып жатыр. Ақтөбеде барлық сыныптар, ал Павлодарда бірінші ауысымдағы оқушылар онлайн оқуға ауыстырылды.

Синоптиктер бүгін елдің басым бөлігінде қар аралас жаңбыр жауып, боран, көктайғақ және тұман болады деп болжайды. Кей өңірлерде желдің жылдамдығы секундына 30 метрге дейін жетуі мүмкін.

Түркістан облысында жол қозғалысына шектеу қойылды

Облыстық ПД мәліметінше, қалың қар мен көктайғақ салдарынан Шымкент-Түркістан бағытынан Тараз-Алматы бағыттарына қарай жүк көліктеріне шектеу қойылды.

Ауа райының қолайсыздығына байланысты полиция қызметкерлері күшейтілген қызмет режиміне көшкен.

🚉 «Астана–Талдықорған» бағыты бойынша пойыз қатынайды

Сәуір айынан бастап Талдықорған–Астана бағытында жолаушылар пойызы қатынайды.

Бұған дейін тұрғындар елордаға жету үшін Семей–Астана пойызына қосылған вагондармен немесе Алматы арқылы қатынауға мәжбүр болатын.

Бұл жолаушылардың Астанаға қысқа уақытта жетуіне мүмкіндік береді.

⚡️Канададағы мектепте атыс: 10 адам қаза тапты

Канаданың Британдық Колумбия провинциясында орналасқан мектепте болған атыс салдарынан 10 адам қаза тапты.

Мәліметке сәйкес, қаза болған алты адамның мәйіті орта мектеп ғимаратынан табылған. Тағы бір адам ауруханаға бара жатқан жолда көз жұмған. Екі адам тұрғын үйден анықталған.

Тағы 25 адам жарақат алды. Алдын ала ақпарат бойынша, атыс ұйымдастырды деген күдікті өзіне қол жұмсаған. Оның әрекетінің себебі әзірге белгісіз.

«Отбасы құндылықтарына айрықша мән берілген»

Жаңа Конституция жобасында отбасы құндылықтарына ерекше назар аударылып, ана, әке мен баланың мемлекеттің қорғауында екендігі нақты көрсетілген.

Тұрғындардың айтуынша, бұл ұлттық құндылықтарды сақтауға бағытталған маңызды қадам.

📩 Конституция жобасы бойынша 10 мыңнан астам өтініш түсті

Бұл туралы Конституциялық реформалар жөніндегі комиссияның ХІІ отырысында Конституциялық сот төрағасы Эльвира Әзімова мәлімдеді.

Оның айтуынша, ұсыныстар комиссия мүшелерінен, азаматтардан, азаматтық қоғам өкілдерінен, сарапшылар қауымдастығынан және бизнес құрылымдарынан түскен.

Барлық материалдар жүйеленіп, тақырыптық бағыттар бойынша топтастырылған.

«Ауыл» партиясы жаңа Конституция жобасын референдумға шығаруды ұсынды

Мәжіліс депутаты, «Ауыл» партиясының төрағасы Серік Егізбаев қазақстандықтарды жаңа Конституция жобасын қолдауға шақырды.

Оның айтуынша, партия аймақтарда құжатты түсіндіру мақсатында ауқымды қоғамдық талқылау жұмыстарын ұйымдастырып, бірқатар өңірде халықпен кездесулер өткізген.

Оның сөзінше, ауыл тұрғындары енгізіліп жатқан өзгерістерді күнделікті өмірге әсер ететін нақты тетіктер ретінде қабылдап отыр.

Осыған байланысты «Ауыл» партиясы Конституция жобасын жалпыұлттық референдумға шығаруды ұсынып, барша азаматтарды құжатты қолдауға шақырды.

Жаңа Ата заңды «халықтық Конституция» деуге толық негіз бар – Ерлан Қарин

Мемлекеттік кеңесші Ерлан Қарин жаңа Конституция мәтіні заңгерлер мен тіл мамандарының бірлескен жұмысы нәтижесінде оқуға жеңіл, түсінуге оңай әрі құқықтық тұрғыдан нақты құжатқа айналғанын айтты.

Бұл туралы ол Конституциялық комиссияның XII отырысында мәлімдеді.

Жоба жарияланғаннан кейін де келіп түскен ұсыныстар негізінде қосымша нормалар енгізіліп, редакциялық-стилистикалық өзгерістер жасалған.

Ерлан Қарин қоғамнан түскен сын-пікірлер мен сұрақтарға Комиссия мүшелері жедел жауап беріп отырғанын атап өтті.

Осылайша Мемлекет басшысының «Халық үніне құлақ асатын мемлекет» қағидаты аясында азаматтардың ұсыныс-пікірі барынша ескерілген.