نن پنجشنبه د کابل په بازارونو کې افغانۍ د ځینو بهرنیو اسعارو پر وړاندې په دې ډول بدلېږي.

د لوړو زده‌کړو وزیر شیخ نداء محمد ندیم کندهار ولایت ته د سفر په ترڅ کې د یاد ولایت پوهنتون اړوند د عمر تدریسي روغتون څخه لیدنه کړې ده.

د لوړو زده‌کړو وزارت وایي، نوموړي په دې لیدنه کې په تدریسي روغتونونو کې د طبي ماشینونو او تجهیزاتو پر عصري کولو ټینګار کړی دی.

د دغه وزارت په وینا، ښاغلي ندیم د کندهار پوهنتون په علمي شورا کې هم ګډون کړی او د دغه پوهنتون مسولین او استادان یې خپلو مسولیتونو ته لا زیاتې پاملرنې ته هڅولي دي.

د افغانستان د سوداګرۍ او پانګونې خونه وایي، د افغان سوداګرو او پانګه‌والو ۵۰ کسیز پلاوي د اندونیزیا په نړیوال نندارتون کې ګډون کړی.

ټاکل شوې چې دغه پلاوی د نندارتون په څنډه کې له اندونیزیایي سوداګرو او پانګه‌والو سر د لیدنې ترڅنګ د ګډو پانګونو پر فرصتونو، د صادراتو پر پراختیا او د دواړو هېوادونو د خصوصي سکټورونو ترمنځ د همکارۍ پر پیاوړتیا خبرې اترې وکړي.

د اطلاعاتو او کلتور وزیر شیخ شیراحمد حقاني او د جهادي اثارو د ساتنې عمومي رییس مفتي محمد طاهر احمد په ګډون د میدان وردګو ولایت د اطلاعاتو او کلتور ریاست اړوند مجاهد موزیم رسما پرانیستل شو.

د پرانیستې په مراسمو کې د اطلاعاتو او کلتور وزیر دغه موزیم د تېر اشغال پر وړاندې د افغانانو د مبارزې او قربانیو څرګند انځور وباله او د بډاینې لپاره یې د هر اړخیزې همکارۍ ډاډ ورکړ.

مجاهد موزیم کې ۲۶۱ قلمه نظامي او ۲۵۰ قلمه تاریخي اثار راټول شوي دي.

په مسکو کې د افغانستان سفیر مولوي ګل حسن حسن د دغه هېواد لپاره د قزاقستان له سفیر داورېن ابایف سره کتلي.

په روسیې کې د افغانستان سفارت ویلي، په دې کتنه کې د دواړو هېوادونو ترمنځ پر سیاسي، اقتصادي او سوداګريزو اړیکو او په افغانستان کې د پانګونې پر فرصتونو خبرې شوي.

دغه راز دواړو لوریو د دوه‌اړخیزو اړیکو پر دوام او پیاوړتیا ټینګار کړی.

د کارموندنې خبرتیا!
د راډیو عمومي ریاست کار اهل کار ته د سپارلو په موخه د بازارموندنې، عوایدو پراختیا او ورزشي پروګرامونو د جذب او سپانسرشیپ کارشناس خالي بست اعلان ته سپارلی.

یاد بست ته د نوم لیکنې لپاره لاندې لینک کېکاږئ⬇️
https://www.acbar.org/en/jobs/details/146208/d-bazarmondn-aaoaydo-prakhtya-ao-orzshy-proramono-d-gthb-ao-spansrshyp-karshnas

د فراه ولایت مرکز اړوند د شمالګاه په سیمه کې د یوې ترافیکي پېښې له امله دوه تنه شهیدان شوي او څلور نور ټپیان دي.

پېښه د یوه ټېلر او لکسل موټر د ټکر له امله رامنځته شوې ده.

تېره ورځ (چهارشنبه، د تلې ۲۲مه) ۱۷۷ افغان کډوال له پاکستان او ۴۶۲ له ایران څخه هېواد ته راستانه شوي دي.

د کور او ښار جوړولو وزارت وايي، چې تېره اونۍ د هېواد په درېیو ولایتونو کې یو زر او ۳۴۵ راستنو شویو کورنیو ته د دایمي مېشتېدو په موخه د استوګنې ځمکې وېشل شوې دي.
د دغه وزارت په وینا، په کندوز کې یو زر او ۲۰۵ کورنیو، په زابل کې ۱۰۰ کورنیو او په بامیان کې ۴۰ کورنیو ته د استوګنې ځمکې وېشل شوې دي.

په پېښور کې د یوه ښوونځي د چت نړېدو له امله لږ تر لږه ۲۷ زده‌کوونکي او یو ښوونکی مړه شوي او ۲۰ کسان ټپیان شوي دي.
د رویټرز خبري اژانس د راپور له مخې، چې یو شمېر زده‌کوونکي لا هم د نړېدلي چت تر خاورو لاندې بند پاتې دي او د مرګ‌ژوبلې د زیاتېدو احتمال شته.
تر دا مهاله د دغه ښوونځي د چت نړېدو لامل نه دی معلوم شوی.

لنډ خبرونه| ۱۴۰۵/۰۷/۲۳
د افغانستان د بهرنیو چارو وزیر په کابل کې د هند د سفارت له شارژدافیر سره په لیدنه کې د اسلامي امارت او هند ترمنځ د اړیکو پر اهمیت ټینګار کړی.

د چاپېریال ساتنې ادارې عمومي رییس مولوي مطیع الحق خالص، په کابل کې د قطر له سفیر ډاکټر مردف علي القاشوطي سره کتلي دي.
د چاپېریال ساتنې عمومي اداره وايي، په دې کتنه کې د افغانستان د چاپېریالي وضعیت، اقلیمي بدلون، د نړۍوالو چاپېریالي مالي فنډونو څخه د پروژو ترلاسه کولو او شته چاپېریالي ننګونو په اړه خبرې شوې دي.
د قطر سفیر په نړیوالو غونډو کې د افغانستان د ستونزو او غږ پر شریکولو سربېره له افغانستان سره د هر اړخیزو مرستو او ګډو همکاریو ژمنه کړې ده.

پېښو سره د مبارزې او چمتووالي ادارې، بامیان ولایت د ماینونو او ناچاودو توکو څخه په بشپړه توګه پاک اعلان کړ.

ملي راپور؛
د کابل ښار په اتمه ناحیه کې د ستانکزي څلور لارې ــ ټانګ لوګر سړک چارې ۸۰ سلنه بشپړې شوې دي.
بشپړه خپرونه
https://youtu.be/laVzDtn9kvk?si=_2PfCqeUv8bUAMOB

نیمروز کې د زرنج ــ دلارام لویې لارې څخه د ریګ پاکولو پروژه پیل شوه.

ځايي اوسېدونکي او یو شمېر سیلانیان، د ننګرهار د پچیر اګام ولسوالۍ اړوند تورې بوړې سیاحتي سیمې ته د غځېدلي سړک د جوړېدو غوښتنه کوي.

د اطلاعاتو او کلتور وزیر، شیخ شیر احمد حقاني، میدان وردګ ولایت ته د خپل سفر په ترڅ کې د دغه ولایت موزیم په رسمي ډول پرانیست.

د کونړ په څوکۍ ولسوالۍ کې د زلزله ځپلو ۱۰ کورنیو لپاره د استوګنې کورونه جوړ او یادو کورنیو ته سپارل شوي دي.

د هرات ولایت مقام وايي، په دغه ولایت کې د یوه تن پانګه‌وال له لوري، د پینځه میلیون ډالرو په پانګونې، د یوه سوداګریز او تفریحي مرکز د جوړولو د بنسټ ډبره کېښودل شوه.
یاد سوداګریز او تفریحي مرکز پر۴۰ جریبه ځمکه د درېیو کلونو په موده کې جوړیږي، چې تر ۲۰۰ کسانو ته به په کې د کار زمینه هم برابره شي.

د اسلامي امارت ویاند مولوي ذبیح الله مجاهد، د افغانستان لپاره د ملګرو ملتونو د مرستندوی پلاوي (یوناما) وروستي راپور ته په غبرګون ویلي، چې د یوه بې‌طرفه نړیوال بنسټ په توګه خپلې ارزونې د کره معلوماتو او عیني واقعیتونو پر بنسټ ترسره کړي.
ښاغلي مجاهد ویلي، د امربالمعروف، نهی عن المنکر او شکایتونو اورېدلو وزارت او نورو رسمي ادارو له لوري په هېواد کې د ځینو سرغړونکو اشخاصو نیونې د اړوندو ادارو د نافذه قوانینو او مقرراتو له مخې، د غیرشرعي کړنو د مخنیوي او د اشخاصو د اصلاح په موخه ترسره شوې دي، نه په خپلسري ډول.
د اسلامي امارت ویاند مولوي ذبیح الله مجاهد له یوناما پوښتلي چې ولې یې په هېواد کې ترسره شویو پرمختګونو ته انعکاس نه دی ورکړی.
ښاغلي مجاهد ویلي، چې یوناما باید د یوې بې پرې بنسټ په توګه د افغانستان او نړیوالې ټولنې ترمنځ د نیږدې والي او ورسره د سوء تفاهمونو د له منځه وړلو لپاره کار وکړي، چې د مجاهد په وینا دا کار یې نه دې کړې، بلکې، په افغانستان کې د نظام پر خلاف په پروپاګند مصروفه ده.