The Irrawaddy - Burmese
✔
75.1K subscribers
38.6K photos
2.49K videos
3 files
18.2K links
The Irrawaddy magazine and its Web site cover Burma and Southeast Asia, providing in-depth news and information to international readers.

burma.irrawaddy.com
Download Telegram
လေယာဉ်ဆီကို ဒီဇယ်ဟုလိမ်လည်ကာ စစ်အုပ်စု တင်သွင်းနေကြောင်း JFM ထုတ်ဖော်

ဧရာဝတီ၊ အောက်တိုဘာ၂၆၊ ၂၀၂၆

လေကြောင်းတိုက်ခိုက်မှုများကို ပြင်းထန်စွာ ပြုလုပ်နေသည့် အာဏာ သိမ်းစစ်အုပ်စုက လေယာဉ်ဆီရရှိရန် ကြားခံကုမ္ပဏီများ၏ သွင်းကုန် လိုင်စင်တွင် ဒီဇယ် (HSD) ဟု လိမ်လည်ထုတ်ပေးကာ တင်သွင်းစေခဲ့ကြောင်း Justice For Myanmar (JFM) က ယနေ့ ထုတ်ပြန်သည်။

ကုန်သွယ်ရေးလိမ်လည်တင်သွင်းမှု စာရွက်စာတမ်း ၆ ကြိမ်အနေဖြင့် ၂၀၂၄ ဒီဇင်ဘာမှ၂၀၂၅ နိုဝင်ဘာအတွင်း အမေရိကန် ဒေါ်လာ ၁၀၉ ဒသမ ၅ သန်း တန်ဖိုးရှိ လောင်စာဆီ စည်ပေါင်း ၈၄၃,၀၀၀ ကျော် ပါဝင်ခဲ့ပြီး စစ်အုပ်စုထိန်းချုပ်ထားသည့် မြန်မာ့ရေနံဓာတုဗေဒလုပ်ငန်း (MPE) နှင့် မိတ်ဖက်ဖြစ်သော Asia Sun Group တို့နှင့် ဆက်စပ်သည့် National Energy Prime Aviation Services Company Limited (NEPAS)၊ Dynamic Wave နှင့် PP Petroleum၊ ထိုင်းကုမ္ပဏီ Tawan-Oil Trading တို့မှတဆင့် ကြားခံ တင်သွင်းခဲ့ခြင်း ဖြစ်ကြောင်း ဖော်ပြထားသည်။

လေယာဉ်ဆီအား ဒီဇယ်အဖြစ် လိမ်လည် တင်သွင်းမှုတွင် ငွေပေးချေမှုကို ကမ္ဘောဇဘဏ် (KBZ Bank) နှင့် ထိုင်းဘက်မှ Siam Commercial Bank (SCB) တို့နှင့် ချိတ်ဆက်ကာ ဆောင်ရွက်ခဲ့ခြင်း ဖြစ်ကြောင်းလည်း JFM က ဖော်ပြသည်။

ကုလသမဂ္ဂ လူ့အခွင့်အရေးရုံး၏ မှတ်တမ်းများအရ လေယာဉ်ဆီများကို ဒီဇယ်အဖြစ် လိမ်လည်တင်သွင်းခဲ့သည့် ၂၀၂၄ ခုနှစ်တွင် စစ်တပ်၏ လေကြောင်းတိုက်ခိုက်မှုကြောင့် အရပ်သား ၆၄၁ ဦး သေဆုံးခဲ့ပြီး၊ ၂၀၂၅ ခုနှစ်တွင် စစ်တပ်၏ လေကြောင်း တိုက်ခိုက်မှုကြောင့် အရပ်သား သေဆုံးမှု ၉၈၂ ဦးအထိ မြင့်တက်လာခဲ့ရာ သေဆုံးသူများထဲတွင် ကလေးငယ် ၂၃၂ ဦး အပါအဝင် ဖြစ်ကြောင်း သိရသည်။

နိုင်ငံတကာအစိုးရများအနေဖြင့် ဒဏ်ခတ် ပိတ်ဆို့မှုများကို ပိုမို ခိုင်မာ အားကောင်းစေကာ ဟာကွက်များကို ပိတ်ပင်ရေး၊ စစ်အုပ်စု၏ ပြစ်ဒဏ် ကင်းလွတ်ခွင့် ရရှိနေမှုကို အဆုံးသတ်ရေးနှင့် ကမ္ဘာ့ဈေးကွက်အတွင်း စစ်အုပ်စု၏ လေယာဉ်ဆီရယူနိုင်စွမ်းကို ပိတ်ဆို့တားမြစ်ရေးတို့ကို မဖြစ်မနေ အရေးတကြီး လုပ်ဆောင်ရမည် ဖြစ်ကြောင်း JFM က ပြောသည်။

JFM ပြောရေးဆိုခွင့်ရှိသူ မရတနာမောင်က “စစ်အုပ်စုဟာ မြန်မာပြည်သူတွေအပေါ် အကြမ်းဖက် စစ်ဆင်ရေး တိုးချဲ့ဆင်နွှဲဖို့ လေယာဉ်ဆီကို အားထားနေရတာလည်း ဖြစ်ပါတယ်။ လေယာဉ်ဆီက စစ်အုပ်စုအတွက် စာသင်ခန်းထဲက ကလေးငယ်တွေကို သတ်ဖြတ်ဖို့၊ ဆေးရုံ ဆေးခန်းတွေကို ဖျက်ဆီးဖို့နဲ့ လူမှုအသိုင်းအဝိုင်းတွေကို အပြီးအပိုင် ပျက်စီးစေဖို့ အသုံးပြုတဲ့ မရဏလက်နက် ဖြစ်ပါတယ်။ လေယာဉ်ဆီတင်သွင်းဖို့အတွက် ကုန်သွယ်ရေးလိမ်လည်မှု နည်းလမ်းတွေကို အသုံးပြုလာရခြင်းက ဒဏ်ခတ် ပိတ်ဆို့မှုတွေနဲ့ ပြည်သူလူထုရဲ့ ဖိအားတွေက ထိရောက်နေကြောင်း ပြသနေပါတယ်။ ဒါပေမယ့် အစိုးရများအနေနဲ့ ဒီ မရဏကုန်သွယ်မှုကို ရပ်တန့်နိုင်ရေး ဆက်လက် အရှိန်မြှင့်ဆောင်ရွက်ရမှာ ဖြစ်ပါတယ်။ လက်ရှိ ဒဏ်ခတ်ပိတ်ဆို့မှုတွေက လုံလောက်မှု မရှိဘူးဆိုတာ ရှင်းလင်းနေပါတယ်” ဟု ပြောသည်။

အမေရိကန်၊ ယူကေ၊ အီးယူ၊ ကနေဒါနှင့် သြစတြေးလျနိုင်ငံတို့ အနေဖြင့် စစ်အုပ်စု လေယာဉ်ဆီ ထောက်ပံ့ရေး ကွင်းဆက်တခုလုံးကို ပစ်မှတ်ထား ပေါင်းစပ် ညှိနှိုင်းပြီး ဒဏ်ခတ် ပိတ်ဆို့မှုများ ချမှတ်ရန်နှင့်၊ ထိုင်းနိုင်ငံနှင့် စင်ကာပူနိုင်ငံတို့အနေဖြင့်လည်း စစ်အုပ်စု၊ Asia Sun Group နှင့် ၎င်းတို့ မိတ်ဖက်များ၏ အကောက်ခွန်ဆိုင်ရာလိမ်လည်မှုများအပြင် ပြည်တွင်းဥပဒေ ဆက်စပ် ချိုးဖောက်မှုများ ရှိမရှိ အပေါ် စုံစမ်း စစ်ဆေးရန်လည်း JFM က တိုက်တွန်းထားသည်။

ဓာတ်ပုံ- Justice For Myanmar

#WhatsHappeningInMyanmar
#RejectMilitaryCoup
👍56❤12😁5👎1
ရန်ကုန်မှာ တရားဥပဒေစိုးမိုးမှု လူထုမေးခွန်းထုတ်

ဧရာဝတီ၊ အောက်တိုဘာ ၂၆၊ ၂၀၂၆

ရန်ကုန်မြို့မှာ နေအိမ်ဖောက်ထွင်းခိုးယူမှုတွေအပြင် လမ်းပေါ်လုယက်မှုနဲ့ လူသတ်လုယက်မှုတွေပါ ဒီရက်ပိုင်း ခပ်စိပ်စိပ် ဖြစ်ပွားလာတာကြောင့် ပြည်သူတွေဟာ လုံခြုံရေးအတွက် စိုးရိမ်နေကြပြီး တရားဥပဒေစိုးမိုးရေးအပေါ်လည်း မေးခွန်းထုတ်လာကြပါတယ်။

ပြီးခဲ့တဲ့ အောက်တိုဘာလ ၂၁ ရက်နေ့က မင်္ဂလာတောင်ညွန့်မြို့နယ်၊ ပုသိမ်ညွန့်ရပ်ကွက်မှာ နေအိမ်နဲ့တွဲဖွင့်ထားတဲ့ စတိုးဆိုင်တခုကို လူတစု ဖောက်ထွင်းဝင်ရောက်ပြီး ဓားနဲ့တိုက်ခိုက်ခဲ့ တာကြောင့် အသက် ၂၄ နှစ်အရွယ် လူငယ်တယောက် သေဆုံးခဲ့သလို အဒေါ်ဖြစ်သူလည်း ဒဏ်ရာပြင်းထန်ခဲ့ပါတယ်။

ဒီလို နေအိမ်ဖောက်ထွင်းမှုတွေအပြင် Taxi ယာဉ်မောင်းတွေ ဓားထောက်လုယက်ခံရတာ၊ လမ်းပေါ်နဲ့ ကားတွေပေါ်မှာ ဖုန်း၊ ပိုက်ဆံအိတ် ခိုးယူခံရတာတွေလည်း ရှိနေတာကြောင့် မြို့ခံတွေဟာ နေ့စဉ်သွားလာရာမှာ သတိထားနေရသလို ညပိုင်းမှာ လူပြတ်တဲ့နေရာတွေ ကိုလည်း မသွားရဲကြတော့ဘူးလို့ ဧရာဝတီကို ပြောပါတယ်။

https://youtu.be/vSAqZuYN4Yc

#မြန်မာ #ဧရာဝတီ #ရန်ကုန် #တရားဥပဒေ #ဖောက်ထွင်းမှု #လုယက်မှု #WhatsHappeningInMyanmar
👍48😁7❤3🤔1
👎20❤12👍5😁4