ကမ္ဘာလုံးဆိုင်ရာစစ်ပွဲကြီး ဖြစ်ပွားလာပါက အမေရိကန် ဆက်လက်တိုက်ပွဲ၀င်နိုင်ရေး ပင်တဂွန်စစ်ဌာနချုပ်ပြင်ဆင်

အောက်တိုဘာ ၂၉၊ ၂၀၂၆

ပင်တဂွန်စစ်ဌာနချုပ်ဟာ ပြည်ပစစ်မြေပြင်တွေမကဘဲ ပြည်တွင်းစစ်ဘက်ဆိုင်ရာကို ပံ့ပိုးပေးနေတဲ့ အခြေခံအဆောက်အအုံတွေကိုပါ ထိခိုက်ပျက်စီးစေနိုင်တဲ့ စစ်ပွဲကြီးတခုဖြစ်ပွားလာနိုင်တဲ့အလားအလာအတွက် အမေရိကန်စစ်အခြေစိုက်စခန်းတွေကို ပြင်ပကူညီပံ့ပိုးမှု လုံး၀မရှိဘဲ အနည်းဆုံးရက်ပေါင်း ၉၀ တိုင်တိုင်ဆက်လက်လည်ပတ်နိုင်စေမယ့် စီမံချက်တခုကို အကောင်အထည်ဖော်ဆောင်ရွက်နေပါတယ်။

#မြန်မာ #ဧရာဝတီ #အမေရိကန် #စစ်ပွဲ #ပင်တဂွန်

ထောက်ခံမှုနှုန်း ကျဆင်းနေသည့် ထရမ့် မဲဆွယ်ပွဲများ ဖျက်သိမ်းပြီး ဖုန်းဖြင့်သာ မဲဆွယ်တော့မည်

ဧရာဝတီ၊ အောက်တိုဘာ ၃၀၊ ၂၀၂၆။

အမေရိကန် သမ္မတ ဒေါ်နယ်ထရမ့်သည် နိုဝင်ဘာ ၃ ရက် ကြားဖြတ်ရွေးကောက်ပွဲ မတိုင်မီ ကန်းဆပ်စ်နှင့် အိုင်အိုဝါ ပြည်နယ်များသို့ သွားရောက်မည့် မဲဆွယ်ပွဲများကို ဖျက်သိမ်းခဲ့ပြီး တယ်လီဖုန်းမှတဆင့်သာ မဲဆွယ်မှုများ ပြုလုပ်တော့မည် ဖြစ်သည်။

ဒီမိုကရက်များ အနိုင်ရရှိနိုင်ခြေ မြင့်မားနေသည့် ယခုရွေးကောက်ပွဲ အနီးတွင် အိမ်ဖြူတော်အတွင်း စိုးရိမ်ပူပန်မှုများ လွှမ်းမိုးနေပြီး ထရမ့်သည်လည်း ၎င်း၏ လူယုံ အနည်းငယ်နှင့်သာ နီးကပ်စွာ လှုပ်ရှားလျက် ရှိသည်။

မဲရုံဖွင့်ချိန်ချိန်တွင် အိုင်အိုဝါနှင့် ကန်းဆပ်စ်ပြည်နယ်တို့၌ ရီပတ်ဘလစ်ကန်တို့ အသာစီးရခဲ့သော်လည်း ရွေးကောက်ပွဲနေ့ မတိုင်မီ နောက်ဆုံးသတင်းများအရ ပြိုင်ဆိုင်မှု ပြင်းထန်လျက် ရှိသည်။ မဲဆန္ဒရှင်များအား လှုံ့ဆော်ရန် ထရမ့်က မဲဆွယ်ပွဲများစွာ ပြုလုပ်ခဲ့သော်လည်း အီရန်နှင့် စစ်ပွဲစတင်ပြီးနောက် ၎င်း၏ ထောက်ခံမှုနှုန်း ကျဆင်းသွားခဲ့ရာ မဲဆွယ်မှုများသည် ကိုယ်စားလှယ်လောင်းများအတွက် စိန်ခေါ်မှု ဖြစ်လာခဲ့သည်။

ထရမ့်က မိမိကိုယ်တိုင် ပါဝင်ယှဉ်ပြိုင်နေသည်ဟု သတ်မှတ်၍ မဲပေးကြရန် တိုက်တွန်းထားသော်လည်း ယင်းနည်းဗျူဟာသည် ၎င်းအား မထောက်ခံသူများကို ပိုမိုလှုံ့ဆော်ပေးသကဲ့သို့ ဖြစ်သွားနိုင်ကြောင်း ရီပတ်ဘလစ်ကန် ခေါင်းဆောင်အချို့က သတိပေးထားကြသည်။

ထို့ပြင် ထရမ့်သည် မဲဆွယ်ပွဲ ပင်ပန်းမှုများကို ညည်းတွားနေသလို ရွေးကောက်ပွဲသည် "တရားမျှတမှု ရှိမှသာ" ရလဒ်ကို လက်ခံမည်ဟု ပြောကြားခဲ့ရာ ၎င်း၏ ပါတီ ရှုံးနိမ့်ပါက မဲမသမာမှုကို အကြောင်းပြရန် ပြင်ဆင်နေကြောင်း ဝေဖန်မှုများ ထွက်ပေါ်နေသည်။

ကိုးကား။ ။ Reuters သတင်း Trump cancels weekend rallies, plans to phone in to other midterm campaign events

ပုံစာ - မဲဆွယ်ပွဲ ပင်ပန်းမှုများကို ထရမ့် ညည်းတွားနေသည် / AFP

အင်ဒိုနီးရှားကျောင်းသားများ လက်သုံးချောင်းထောင် ဆန္ဒပြ

ဧရာဝတီ၊ အောက်တိုဘာ ၃၀၊ ၂၀၂၆။

အင်ဒိုနီးရှားနိုင်ငံ ဂျာကာတာမြို့လည် Hotel Indonesia Roundabout ၌ သမ္မတ ပရာဘိုဝို ဆူဘီယန်တို နှင့် ဒုတိယသမ္မတ ဂီဘရန် ရာကာဘူမင်း ရာကာ တို့၏ ၂ နှစ်တာ အုပ်ချုပ်ရေးကို ဆန့်ကျင်သည့် #IndonesiaSadar ဆန္ဒပြပွဲ အောက်တိုဘာ ၂၈ ရက်တွင် ဖြစ်ပွားခဲ့သည်။ ဆန္ဒပြသူများသည် နဖူးစည်းစာတန်းများ ကိုင်ဆောင်ကာ လက်သုံးချောင်း ထောင်ပြခဲ့ကြသည်။

တောမီးနှင့် မြူခိုးအန္တရာယ်ကို အမျိုးသားအဆင့် ဘေးအန္တရာယ်အဖြစ် ကြေညာရန်၊ နိုင်ငံတော် ဘတ်ဂျက်ကို ထိန်းချုပ်ရန်၊ လောင်စာဆီနှင့် အခြေခံစားသောက်ကုန် ဈေးနှုန်းများ လျှော့ချပေးရန် အစိုးရအား တိုက်တွန်းတောင်းဆိုသည့်အနေဖြင့် ကျောင်းသား ရာပေါင်းများစွာ စုဝေးဆန္ဒပြခဲ့ကြခြင်း ဖြစ်သည်။

အဆိုပါ လက်သုံးချောင်းထောင် ဆန္ဒပြခြင်း သည် ကျရှုံးနေသော ခေါင်းဆောင်များအပေါ် ပြည်သူများ၏ ဒေါသနှင့် ဆန့်ကျင်မှုကို ဖော်ပြရာတွင် ဒေသတွင်း အမှတ်အသား ဖြစ်သည်။ ယခင်ကလည်း အင်ဒိုနီးရှားကျောင်းသားများ ထိုသို့ ဆန္ဒပြခဲ့ကြဖူးသည်။

ဤသင်္ကေတသည် The Hunger Games ရုပ်ရှင်မှ စတင်ခဲ့ခြင်းဖြစ်ပြီး၊ ဇာတ်လမ်းထဲတွင် လေးစားမှု၊ ကျေးဇူးတင်မှုနှင့် အာဏာရှင်စနစ်ကို ဆန့်ကျင်မှုကို ကိုယ်စားပြုသည်။ ဤသင်္ကေတကို ပြင်သစ်တော်လှန်ရေး၏ စံနှုန်းများဖြစ်သော လွတ်လပ်မှု (Liberté)၊ ညီမျှမှု (Égalité) နှင့် ညီအစ်ကိုရင်းချာစိတ်ဓာတ် (Fraternité) တို့နှင့် ဆက်စပ်ဖော်ပြပြီး ဒီမိုကရေစီလှုပ်ရှားမှုများအတွက် ကမ္ဘာသုံး သင်္ကေတ တခုဖြစ်လာသည်။

ထိုင်းနိုင်ငံ၌ ၂၀၁၄ စစ်တပ်အာဏာသိမ်းပြီးနောက် ဝန်ကြီးချုပ် ပရာယုကို ဆန့်ကျင်သည့် ဆန္ဒပြပွဲများနှင့် ၂၀၂၀ အစိုးရဆန့်ကျင်ရေး လှုပ်ရှားမှုများတွင် လက်သုံးချောင်းထောင် အလေးပြုခြင်းကို ကျယ်ပြန့်စွာ အသုံးပြုခဲ့ကြသည်။

မြန်မာနိုင်ငံတွင်လည်း ၂၀၂၁ ခုနှစ် စစ်တပ်အာဏာသိမ်းမှုကို ဆန့်ကျင်သည့် အာဏာဖီဆန်ရေး လှုပ်ရှားမှု (CDM) တွင် ဆရာဝန်များ၊ ကျောင်းသားများနှင့် ဝန်ထမ်းများက လက်သုံးချောင်းထောင်၍ စစ်အာဏာရှင်စနစ်ကို ဆန့်ကျင်ခဲ့ကြသည်။

ကိုးကား။ ။ VOI သတင်း Three-Finger Salute: From The Hunger Games to the Streets, Raise Three Fingers as a Sign of Resistance

အရေးပေါ် ၇၂ နာရီ သတိပေးချက် ထိုင်း မထုတ်ပြန်သေး

ဧရာဝတီ၊ အောက်တိုဘာ ၃၀၊ ၂၀၂၆။

ထိုင်း အမျိုးသားလုံခြုံရေးကောင်စီ (NSC) သည် ထိုင်းနိုင်ငံသားများအနေဖြင့် အစားအသောက်၊ သောက်သုံးရေ၊ ဆေးဝါးများနှင့် အခြားလိုအပ်သော ပစ္စည်းများအပါအဝင် မရှိမဖြစ် လိုအပ်သည့် ပစ္စည်းများကို အရေးပေါ် အန္တရာယ် ၇၂ နာရီကြာသည်အထိ စုဆောင်းထားရန် အကြံပြုထားကြောင်း သတိပေးချက်မှာ မဟုတ်မှန်ကြောင်း ပယ်ချခဲ့သည်။

သို့သော်လည်း NSC က ၎င်းတို့အနေဖြင့် အရှေ့အလယ်ပိုင်းဒေသရှိ အကျပ်အတည်းကို အနီးကပ်စောင့်ကြည့်လျက်ရှိပြီး အရေးပေါ်အခြေအနေမျိုး ဖြစ်ပေါ်လာပါက အရေးပေါ်စီမံချက်များ ပြင်ဆင်ထားနိုင်ရန် သက်ဆိုင်ရာ အာဏာပိုင်များနှင့် ပူးပေါင်းဆောင်ရွက်လျက်ရှိကြောင်း ပြောကြားခဲ့သည်။

မီဒီယာများနှင့် ပြည်သူများအနေဖြင့် အတည်မပြုရသေးသည့် သတင်းအချက်အလက်များကို ယုံကြည်ခြင်း သို့မဟုတ် ဖြန့်ဝေခြင်းမပြုဘဲ သတင်းများနှင့် ထုတ်ပြန်ချက်များကို တရားဝင်ချန်နယ်များမှတဆင့်သာ စောင့်ကြည့်လေ့လာကြရန် တိုက်တွန်းထားသည်။

အဆိုပါ ငြင်းဆိုချက်သည် ကမ္ဘာတဝှမ်းရှိ နိုင်ငံများ၊ အထူးသဖြင့် ဥရောပနိုင်ငံများတွင် အကျပ်အတည်းများကြောင့် နေ့စဉ်လူနေမှုဘဝ ထိခိုက်ပျက်စီးပါက အသုံးပြုနိုင်ရန် အိမ်ထောင်စုများအား အရေးပေါ်ရိက္ခာများကို အိမ်တွင် စုဆောင်းထားရှိကြရန် တိုက်တွန်းနေချိန်တွင် ထွက်ပေါ်လာခြင်းဖြစ်သည်။

အကြံပြုထားသော ပြင်ဆင်မှုကာလမှာ နိုင်ငံအပေါ် မူတည်၍ ၇၂ နာရီမှ ၁၀ ရက် သို့မဟုတ် ထို့ထက်ပို၍ ကွဲပြားသည်။ ထိုလမ်းညွှန်ချက်မှာ သဘာဝဘေးအန္တရာယ်များ၊ လျှပ်စစ်ဓာတ်အားပြတ်တောက်မှုများ၊ ဆိုက်ဘာတိုက်ခိုက်မှုများနှင့် ဖြစ်လာနိုင်ချေရှိသော လုံခြုံရေးခြိမ်းခြောက်မှုများကို ပြည်သူများ ကြံ့ကြံ့ခံရင်ဆိုင်နိုင်စွမ်း တိုးတက်စေရန် ရည်ရွယ်ခြင်းဖြစ်သည်။

ဥရောပတွင် ဂျာမနီနိုင်ငံသည် အိမ်ထောင်စုများကို ၁၀ ရက်အထိ သုံးစွဲနိုင်သော ရိက္ခာများ ပြင်ဆင်ထားရန် အကြံပြုထားပြီး ဆွီဒင်၊ နော်ဝေးနှင့် အက်စတိုးနီးယားတို့ကမူ အနည်းဆုံး တပတ်စာ စီမံခန့်ခွဲနိုင်ရန် လုံလောက်သော ရိက္ခာများကို ထိန်းသိမ်းထားရန် အကြံပေးထားသည်။

ပြင်သစ်၊ ဖင်လန်၊ ဒိန်းမတ်၊ နယ်သာလန်၊ ပိုလန်၊ လတ်ဗီးယားနှင့် လစ်သူယေးနီးယားတို့က သုံးရက်ခန့်အတွက် ပြင်ဆင်ရန် အကြံပြုထားပြီး ဗြိတိန်နိုင်ငံကမူ ပုံမှန်ဝန်ဆောင်မှုများမရရှိဘဲ "ရက်ပေါင်းများစွာ" ကျော်ဖြတ်နိုင်ရန် အိမ်ထောင်စုများ ပြင်ဆင်ထားကြရန် အကြံပြုထားသည်။

အာရှတွင်လည်း အလားတူအကြံပြုချက်များကို တွေ့ရှိရပြီး အစိုးရများက ငလျင်၊ တိုင်ဖုန်းမုန်တိုင်း၊ ရေကြီးရေလျှံမှုနှင့် အခြားဘေးအန္တရာယ်များအပြင် ဖြစ်လာနိုင်သည့် လုံခြုံရေးအရေးပေါ်အခြေအနေများအတွက် အိမ်ထောင်စုများ ပြင်ဆင်ထားကြရန် တိုက်တွန်းထားသည်။

ဂျပန်နိုင်ငံသည် အဓိကငလျင်ကြီးများ၊ ဆူနာမီနှင့် တိုင်ဖုန်းမုန်တိုင်းများကြောင့် သယ်ယူပို့ဆောင်ရေး၊ လျှပ်စစ်ဓာတ်အား၊ ရေပေးဝေရေးနှင့် ဖြန့်ဖြူးရေးကွန်ရက်များ ပြတ်တောက်နိုင်သဖြင့် အနည်းဆုံး သုံးရက်စာ၊ ဖြစ်နိုင်ပါက တပတ်စာ လုံလောက်သော အရေးပေါ်ရိက္ခာများကို စုဆောင်းထားရန် အကြံပြုထားသည်။

ထိုင်ဝမ်သည် သဘာဝဘေးအန္တရာယ်များနှင့် ဖြစ်လာနိုင်သော စစ်ရေးအရေးပေါ်အခြေအနေများကို အိမ်ထောင်စုများ ရင်ဆိုင်ဖြေရှင်းနိုင်ရန်အတွက် မရှိမဖြစ်လိုအပ်သည့် ပစ္စည်းများကို ခုနစ်ရက်စာ ပြင်ဆင်ထားရန် အကြံပြုထားသည်။

စင်ကာပူ၊ ဖိလစ်ပိုင်နှင့် အင်ဒိုနီးရှားနိုင်ငံတို့သည်လည်း မရှိမဖြစ်လိုအပ်သော ပစ္စည်းများနှင့် အရေးပေါ်သုံး အိတ်များ ပြင်ဆင်ထားရှိရေး လမ်းညွှန်ချက်များဖြင့် အိမ်ထောင်စုများ အရေးပေါ်ပြင်ဆင်ထားရှိမှုကို မြှင့်တင်ပေးလျက်ရှိသည်။

စင်ကာပူသည် အိမ်ထောင်စုများ၏ ကြံ့ကြံ့ခံနိုင်စွမ်းနှင့် မရှိမဖြစ် ဝန်ဆောင်မှုများ ဆက်လက်ရရှိနိုင်ရေးကို အထူးဦးစားပေးထားသည်။ စက်သုံးဆီ၊ အစားအသောက်၊ လျှပ်စစ်ဓာတ်အား၊ ဆက်သွယ်ရေးနှင့် အခြားဝန်ဆောင်မှုများ ရရှိနိုင်မှုကို ထိခိုက်စေနိုင်သည့် အနှောင့်အယှက်များအတွက် ပြင်ဆင်ထားရန်နှင့် အခြေခံလိုအပ်ချက်များကို အမြဲအဆင်သင့်ရှိနေစေရန် စင်ကာပူပြည်သူများကို တိုက်တွန်းထားသည်။

စိန်ခေါ်မှုနှင့် စွန့်စားရမှုများ ကွဲပြားသော်လည်း အခြေခံရည်ရွယ်ချက်မှာ တူညီသည်။ ယင်းမှာ ဆိုင်များပိတ်ထားခြင်း၊ သယ်ယူပို့ဆောင်ရေး ပြတ်တောက်ခြင်း သို့မဟုတ် အကူအညီများ ကြန့်ကြာခြင်းတို့ ဖြစ်ပေါ်နိုင်သည့် အရေးပေါ်အခြေအနေ စတင်ဖြစ်ပွားချိန်နှင့် ကာလအတွင်း အိမ်ထောင်စုများ ကိုယ်တိုင် ရင်ဆိုင်ဖြေရှင်း စီမံနိုင်စေရန် ဖြစ်သည်။

ကိုးကား။ ။ ThaiPBS သတင်း NSC denies 72-hour warning as the world stocks up for emergencies

ပုံစာ - ဗြိတိန်နိုင်ငံ က အကြံပြုထားသော အိမ်ထောင်စုများအတွက် ၇၂ နာရီစာ အရေးပေါ်သုံး ပစ္စည်းအိတ်

မြဝတီနယ်စပ်တိုက်ပွဲများကြောင့် ထိုင်းက ကုန်စည်သယ်ယူမှု ၇ ရက် ပိတ်

ဧရာဝတီ၊ အောက်တိုဘာ ၃၀၊ ၂၀၂၆

ထိုင်း- မြန်မာနယ်စပ် မြဝတီဘက်ခြမ်းတိုက်ပွဲများကြောင့် ထိုင်းဘက်သို့ ကျည်ကျသဖြင့် သောင်ရင်းမြစ်ကို ဖြတ်၍ ကုန်စည်သယ်ယူသည့် ဂိတ်တချို့ကို ယနေ့မှစ၍ စက်တင်ဘာ ၅ ရက်ထိ ၇ ရက်ကြာပိတ်လိုက်သည်ဟု ထိုင်းအာဏာပိုင်တို့က ကြေညာသည်။

နယ်စပ်မြို့ မြဝတီနှင့် ၁၀မိုင်ခန့်အကွာ ဖလူး၊ မင်းလက်ပံဒေသတွင်စစ်တပ်နှင့် ကရင်အမျိုးသားလွတ်မြောက်ရေးတပ်မတော် (KNLA)၊ ပြည်သူ့ကာကွယ်ရေးတပ်(PDF) ပူးပေါင်းတပ်တို့ကြား ဖြစ်နေသည့် တိုက်ပွဲသည် တနှစ်ခန့်ကြာလာပြီဖြစ်ပြီး ယမန်နေ့ကမူ ကျည်များ ထိုင်းဘက်သို့ ကျရာ ထိခိုက်ဒဏ်ရာရမှု အိမ်ပျက်စီးမှုများ ရှိခဲ့သဖြင့် နယ်စပ်ကို စနစ်တကျ ထိန်းချုပ်ရန် တိုက်ပွဲများတွင်း မည်သည့် ထောက်ပံ့ကူညီမှုများ မြန်မာဘက်ခြမ်းသို့ ကူးစက်မသွားစေရန် နယ်စပ်ဖြတ်သန်းမှု ယာယီပိတ်လိုက်ခြင်းဖြစ်သည်။

ထိုင်း-မြန်မာ နယ်စပ်ကွပ်ကဲရေးစခန်းက မဲဆောက်နှင့် ဖုတ်ဖရမြို့နယ်ရှိ အကောက်ခွန်ဂိတ်များကို ခွင့်ပြုချက်ရရှိထားသည့် လမ်းကြောင်းများမှလွဲ၍ အခြားလမ်းကြောင်းများမှ ကုန်ပစ္စည်း တင်သွင်း ၊တင်ပို့မှုကို ဆိုင်းငံ့လိုက်ခြင်းဖြစ်ပြီး ထိုင်း-မြန်မာ ချစ်ကြည်ရေးတံတား အမှတ် (၁) ၏ တောင်ဘက်မှစ၍ ခွင့်ပြုချက်မရှိသည့် လမ်းကြောင်းများ၊ ကူးတို့ဆိပ်များနှင့် သဘာဝအတိုင်း ဖြစ်တည်နေသော လမ်းကြောင်းများကို ဖြတ်သန်းခွင့်ပိတ်လိုက်ခြင်းဖြစ်သည်။

မြဝတီမြို့တောင်ဘက်တိုက်ပွဲများကြောင့် မြဝတီ-ဝေါလေ လမ်းမကြီးကို နှစ်ချီကြာ ပိတ်ထား၍ မြဝတီတောင်ဘက် နယ်စပ်တလျောက်ကျေးရွာများသည် ထိုင်းနိုင်ငံဘက်ခြမ်းမှ ကုန်စည်များကို အဓိက သယ်ယူအသုံးပြုနေကြရပြီး နယ်စပ်ဖြတ်ကျော် ကုန်သယ်ယူခွင့်ပိတ်လိုက်သဖြင့် မြဝတီတောင်ဘက် မယ်ထော်သလေး ၊ အင်ကြင်းမြိုင်ရွာတို့မှ ဆုံဆည်းမြိုင်ရွာထိ ကျေးရွာ ၁၀ ရွာကျော်ရှိ နယ်စပ်ကုန်သယ်ယူမှု လမ်းများပိတ်သွားရသည်ဟု ဒေသခံများက ပြောသည်။

ပုံစာ-နယ်စပ်မှတဆင့် ကုန်စည်သယ်သည့်လှေဆိပ်တနေရာ/ CJ

#WhatsHappeningInMyanmar
#RejectMilitaryCoup

အာဆီယံ ထိပ်သီးအစည်းအဝေး ပြန်တက်ခွင့်ရရေး အထူးသံတမန်နှင့် ဆွေးနွေး

ဧရာဝတီ၊ အောက်တိုဘာ ၃၀၊ ၂၀၂၆

မကြာမီကျင်းပမည့် (၄၉) ကြိမ်မြောက် အာဆီယံ ထိပ်သီးအစည်းအဝေးနှင့် ဆက်စပ်ထိပ်သီးအစည်းအဝေးများဆိုင်ရာ ကိစ္စရပ်များနှင့်ပတ်သက်ပြီး နေပြည်တော်ရောက် အာဆီယံအထူးသံတမန် ဖိလစ်ပိုင်နိုင်ငံခြားရေးဝန်ကြီး ထရီဆာ လာဇရိုနှင့် ဆွေးနွေးကြောင်း အာဏာသိမ်းအစိုးရ နိုင်ငံခြားရေးဝန်ကြီးဌာနက သတင်းထုတ်ပြန်သည်။

အာဏာသိမ်းအစိုးရ နိုင်ငံခြားရေးဝန်ကြီး ဦးတင်မောင်ဆွေနှင့် အာဆီယံအထူးသံတမန် လာဇရိုတို့ ဆွေးနွေးရာတွင် အာဆီယံ၌ မူလအခွင့်အရေး ပြန်ရနိုင်ရေး၊ တိုင်းပြည်တည်ငြိမ်အေးချမ်းမှုရရှိရေးနှင့် နိုင်ငံတော်ဖွံ့ဖြိုးတိုးတက်မှုရရှိရေး ဦးစားပေးရည်မှန်းချက် နှစ်ရပ်ထားရှိကာ အကြမ်းဖက်တိုက်ဖျက်ရေး၊ ငြိမ်းချမ်းရေးနှင့် လူသားချင်းစာနာမှု အကူအညီအရေးတို့ ပါဝင်သည်။

ထို့ပြင် မြန်မာ-ဖိလစ်ပိုင် နှစ်နိုင်ငံအကြား သံတမန်ဆက်ဆံရေး နှစ် (၇၀) ပြည့် အထိမ်းအမှတ်အဖြစ် ပူးပေါင်းဆောင်ရွက်မှု တိုးမြှင့်ရေး၊ နှစ်နိုင်ငံ ဆက်ဆံရေး မူဘောင်အောက်အပြန်အလှန် အကျိုးဖြစ်ထွန်းစေမည့်ကိစ္စရပ်များ၊ အထူးသဖြင့် ပူးပေါင်းဆောင်ရွက်မှုယန္တရားများ ပိုမိုခိုင်မာစေရေးနှင့် ကဏ္ဍအလိုက် ပူးပေါင်းဆောင်ရွက်မှုများ ပိုမိုတိုးမြှင့်နိုင်ရေးတို့ကို ဆွေးနွေးခဲ့ကြကြောင်းလည်း ပြောသည်။

ဖိလစ်ပိုင်နိုင်ငံခြားရေးဝန်ကြီး ထရီဆာ လာဇရိုကလည်း ယခုခရီးစဉ်အတွင်း လေ့လာသိရှိခဲ့ရမှုများကို မကြာမီ ကျင်းပမည့် အာဆီယံထိပ်သီးအစည်းအဝေးသို့ တင်ပြသွားမည်ဖြစ်ပြီး မြန်မာနိုင်ငံ၏ မူလအခန်းကဏ္ဍနှင့် အခွင့်အရေးများကို ပြန်လည်ဖော်ဆောင်နိုင်မည့် ကိုယ်ပိုင်နည်းလမ်းများကို ရှာဖွေဖော်ထုတ်နိုင်ရန်နှင့် လူသားချင်းစာနာမှု အကူအညီများ ပိုမိုပေးအပ်နိုင်ရန်အတွက် ဆက်လက်ပူးပေါင်းဆောင်ရွက်သွားမည်ဖြစ်ကြောင်း ပြောသည်။

အထူးသံတမန်၏ နေပြည်တော် ခရီးစဉ်မှာ ယနေ့ ပြီးဆုံးပြီဖြစ်ကာ ၎င်းတွေ့ဆုံခွင့် တောင်းဆိုထားသော နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့်မူ တွေ့ခွင့် မရခဲ့ပေ။

လာမည့် နိုဝင်ဘာလ၌ ဖိလစ်ပိုင်နိုင်ငံ၊ မနီလာမြို့တွင် ကျင်းပမည့် ၄၉ ကြိမ်မြောက် အာဆီယံထိပ်သီးအစည်းအဝေးသို့ ထိပ်ပိုင်းခေါင်းဆောင်များ တက်ရောက်ခွင့် ရရှိရေး မြန်မာအာဏာသိမ်းအစိုးရက တောက်လျောက်ကြိုးပမ်းနေသော်လည်း အာဆီယံ၏ ဘုံသဘောတူညီချက် ၅ ရပ်ကို ထိရောက်စွာ လိုက်နာခြင်းမရှိသေးသည့်အတွက် အာဏာသိမ်းစစ်ခေါင်းဆောင် မင်းအောင်လှိုင်အပါအဝင် နိုင်ငံရေးအရ ကိုယ်စားပြုမည့်သူများကို အစည်းအဝေးတက်ရောက်ခွင့် အာဆီယံက ပိတ်ပင်ထားဆဲဖြစ်သည်။

#WhatsHappeningInMyanmar
#RejectMilitaryCoup

အစ္စရေး ရွေးကောက်ပွဲ "ခိုးယူခံရသည်" ဟု နေတန်ညာဟု ပါတီ စွပ်စွဲ

ဧရာဝတီ၊ အောက်တိုဘာ ၃၀၊ ၂၀၂၆။

အစ္စရေးဝန်ကြီးချုပ် နေတန်ညာဟု၏ လီကွဒ် ပါတီက ယခုသီတင်းပတ် ရွေးကောက်ပွဲတွင် အာရပ်မဲဆန္ဒရှင်များ စံချိန်တင် မဲပေးခဲ့မှုကြောင့် အနိုင်မရရှိဘဲ ရွေးကောက်ပွဲ "ခိုးယူခံရသည်" ဟု စွပ်စွဲလိုက်ပြီး၊ နိုင်ငံခြားအဖွဲ့အစည်းများ၏ စွက်ဖက်မှုများရှိကြောင်း လုံခြုံရေးအေဂျင်စီ (Shin Bet) သို့ တိုင်ကြားခဲ့သည်။ အဆိုပါ စွပ်စွဲချက်များကြောင့် ရွေးကောက်ပွဲကော်မရှင်က စုံစမ်းစစ်ဆေးရန် ညွှန်ကြားထားသည်။

အာရပ်ပါတီများသည် ပါလီမန်တွင် အမတ်နေရာ ၁၉ နေရာအထိ အနိုင်ရရှိရန် ခန့်မှန်းရသဖြင့် နေတန်ညာဟုရော ၎င်း၏ ပြိုင်ဘက် ဂါဒီ အိုင်ဆန်ကော့ (Gadi Eisenkot) အုပ်စုပါ အမတ်ထက်ဝက်ကျော် အများစုအနိုင်ရရှိရေး တားဆီးနိုင်ခဲ့သည်။

ကာတာနိုင်ငံမှ နည်းလမ်းမမှန်သော ငွေကြေးစွက်ဖက်မှုများရှိသည်ဟု နေတန်ညာဟုနှင့် ၎င်း၏ လက်ယာစွန်း မဟာမိတ်များက သက်သေမပြနိုင်ဘဲ စွပ်စွဲခဲ့ကြသော်လည်း ကာတာဘက်က အပြည့်အဝ ငြင်းဆိုထားသည်။ အာရပ်ခေါင်းဆောင်များကလည်း ဤစွပ်စွဲချက်များသည် ရှုံးနိမ့်သူများ၏ ပေါက်ကရ ပြောဆိုချက်များသာဖြစ်ကြောင်း တုံ့ပြန်ခဲ့ကြသည်။

လေ့လာဆန်းစစ်သူများ အဆိုအရ နေတန်ညာဟုသည် အာရပ်ပါတီများအပေါ် တိုက်ခိုက်မှုများ အရှိန်မြှင့်တင်ခြင်းဖြင့် ဂါဒီ အိုက်ဆန်ကော့ အနေဖြင့် ၎င်းကို အာဏာမှ ဖယ်ရှားနိုင်မည့် အနည်းစုအစိုးရတရပ်ကို အာရပ်ပါတီများ၏ အကူအညီဖြင့် ဖွဲ့စည်း၍ မရအောင် ပြုလုပ်နေခြင်း ဖြစ်နိုင်သည်ဟု ဆိုကြသည်။

အင်္ဂါနေ့ ရွေးကောက်ပွဲတွင် ပြတ်သားသော အနိုင်ရရှိသူ ထွက်ပေါ်လာခြင်း မရှိသေးဘဲ အစိုးရသစ်ဖွဲ့စည်းရေးအတွက် သီတင်းပတ်ပေါင်းများစွာ ကြာမြင့်မည့် ဆွေးနွေးပွဲများ ဆက်လက်ဖြစ်ပေါ်လာဖွယ် ရှိသည်။

မဲအရေအတွက် ၉၉ ရာခိုင်နှုန်းနီးပါး ရေတွက်ပြီးချိန်တွင် နေတန်ညာဟု၏ အမျိုးသားရေးနှင့် ဘာသာရေးအခြေပြု မဟာမိတ်အဖွဲ့သည် အိုက်ဆန်ကော့ ဦးဆောင်သော လက်ယာယိမ်းနှင့် ဗဟိုလက်ဝဲယိမ်း ပါတီများအဖွဲ့ထက် အမတ်နေရာ အနည်းငယ် အသာစီးရရှိထားသည်။ သို့သော် နှစ်ဦးစလုံး၏ မဟာမိတ်အဖွဲ့များသည် လွှတ်တော်တွင် အများစုအနိုင်ရရှိရန် လိုအပ်သည့် အမတ်နေရာ ၆၁ နေရာအထိ မရရှိကြသေးပေ။

အစ္စရေးလူဦးရေ၏ ၂၁ ရာခိုင်နှုန်းရှိသော အာရပ်လူနည်းစုကို ကိုယ်စားပြုသည့် ပါတီများသည် သမိုင်းဝင် အမတ်နေရာ ၁၉ နေရာအထိ အနိုင်ရရှိမည်ဟု ခန့်မှန်းရသည်။ ထို့ကြောင့် အမတ် ၅၃ နေရာ ရရှိထားသော နေတန်ညာဟုအုပ်စု၏ နောက်တွင် ရှိနေသော ၄၈ နေရာရရှိထားသော အိုက်ဆန်ကော့၏ အုပ်စုအတွက် အာရပ်ပါတီများ၏ အပြည့်အဝ ထောက်ခံမှုမပါဘဲ အာဏာရရှိရန် လမ်းစမရှိသလောက် ဖြစ်နေသည်။

အိုက်ဆန်ကော့သည် ထိုအာရပ်ပါတီများကို အစိုးရအဖွဲ့အတွင်း ထည့်သွင်းရန် ယခုအချိန်အထိ ငြင်းဆန်ထားသည်။

ကိုးကား။ ။ Financial Times သတင်း Netanyahu’s party claims election ‘stolen’ by ‘foreign entities’

စစ်တပ်အကြမ်းဖက်မှု ပိုမိုဆိုးရွားလာခြင်းက တရုတ်နှင့် ရုရှား ပံ့ပိုးမှုကြောင့် ကုလကိုယ်စားလှယ် ပြော

ဧရာဝတီ၊ အောက်တိုဘာ ၃၀၊ ၂၀၂၆

မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေး အထူးအစီရင်ခံစာတင်သွင်းသူ ကယ်လီ အန်း အက်ကယ်စ်-ကာရီ (Kelley Anne Eckels-Currie) သည် မကြာသေးမီက ပြုလုပ်ခဲ့သည့် ကုလသမဂ္ဂအစည်းအဝေးများနှင့် သတင်းစာရှင်းလင်းပွဲများတွင် မြန်မာပြည်သူများကို စစ်တပ်က အကြမ်းဖက်သတ်ဖြတ်မှုများ ပိုမိုပြုလုပ်လာခြင်းမှာ တရုတ်နှင့် ရုရှားနိုင်ငံတို့၏ လက်နက်၊ နည်းပညာနှင့် ငွေကြေးထောက်ပံ့မှုများကြောင့်ဖြစ်ကြောင်း ထောက်ပြခဲ့သည်။

ထို့ပြင် မင်းအောင်လှိုင် သမ္မတရာထူး ရယူမှုကို ပြစ်တင်ရှုတ်ချခဲ့ပြီး ၎င်း၏ဝတ်စုံပြောင်းသွားနိုင်သော်လည်း ကြမ်းကြုတ်သောနည်းဗျူဟာများကို အသုံးပြုနေဆဲ ရက်စက်သည့် အာဏာရှင်တဦးသာ ဖြစ်သည်ဟု မြန်မာနိုင်ငံ လူ့အခွင့်အရေးဆိုင်ရာ အထူးအစီရင်ခံစာတင်သွင်းသူက ဆိုသည်။

အာဏာသိမ်းအစိုးရ ငြိမ်းချမ်းရေး ဖိတ်ခေါ်သည့် ရက် ၁၀၀ စီမံကိန်း ကာလအတွင်း စစ်တပ်က တိုက်ခိုက်မှုများ ပိုမိုပြင်းထန်စွာ ပြုလုပ်ခဲ့ပြီး ၎င်းတို့အား ဆန့်ကျင်တော်လှန်သူများနှင့် ပြည်သူများကို နှိပ်ကွပ်ရန် တရုတ်နှင့် ရုရှား မဟာမိတ်များထံမှရရှိသော လက်နက်နှင့် စောင့်ကြည့်ရေး နည်းပညာသစ်များ အရှိန်အဟုန်မြှင့် အသုံးပြုခဲ့ကြောင်း ပြောသည်။

မြန်မာနိုင်ငံသည် "အာဏာသိမ်းပြီးနောက်ပဋိပက္ခကြောင့် သေဆုံးသူ ၁၀၀,၀၀၀ ကျော်လွန်သွားသည့် ဆိုးရွားသော မှတ်တိုင်တခုကို ရောက်ရှိနေကာ သေဆုံးသူ အများစုမှာ အရပ်သားများဖြစ်သည် ဟု ဆိုသည်။ မြန်မာနိုင်ငံ၌ ပုံမှန် စီးပွားရေးလုပ်ငန်းများ ဆက်လက် ပြိုလဲနေချိန် အွန်လိုင်း လိမ်လည်မှုများ၊ လူကုန်ကူးမှုများနှင့် သဘာဝသယံဇာတ ထုတ်ယူမှုများ ပိုမိုကျယ်ပြန့်လာကြောင်းလည်း အစီရင်ခံခဲ့သည်။

ကုလသမဂ္ဂ အထွေထွေညီလာခံ တတိယကော်မတီအစည်းအဝေးနှင့် အောက်တိုဘာ ၂၉ ရက်က ပြုလုပ်ခဲ့သည့် ပူးတွဲသတင်းစာရှင်းလင်းပွဲများ၌ မြန်မာနိုင်ငံဆိုင်ရာ လူ့အခွင့်အရေး အထူးအစီရင်ခံစာတင်သွင်းသူ ကယ်လီ အန်း အက်ကယ်စ်-ကာရီ နှင့် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား (IIMM) အဖွဲ့ခေါင်းဆောင် နီကိုလပ်စ် ကွမ်ဂျီအန်တို့က မြန်မာ့အရေးနှင့် ပတ်သက်၍ အလွန်ပြင်းထန်ဆိုးရွားနေသည့် ဖြစ်ရပ်များကို ထုတ်ဖော် ပြောကြားခဲ့သည်။

နီကိုလပ်စ် ကွမ်ဂျီအန်က စစ်တပ်သည် လေကြောင်းတိုက်ခိုက်မှုများကို ပိုမိုအားပြုနေသလို ဒရုန်းများ၊ ပါရာမော်တာများအသုံးပြုကာ အရပ်သားများ၏ နေအိမ်၊ ဆေးရုံ၊ ဘာသာရေးအဆောက်အအုံ၊ စစ်ရှောင်စခန်းနှင့် စာသင်ကျောင်းများကို ခွဲခြားမှုမရှိဘဲ ရည်ရွယ်ချက်ရှိရှိ ပစ်မှတ်ထား တိုက်ခိုက်နေသဖြင့် ထိုကိစ္စများနှင့် ပတ်သက်၍ အထူးစုံစမ်းနေကြောင်း၊ ဗုံးကြဲမှုကြောင့် လတ်တလော အစုလိုက်အပြုံလိုက် လူသေဆုံးစေခဲ့သောဖြစ်ရပ်များကို တင်ပြခဲ့ကြောင်း သိရသည်။

ပုံစာ-အောက်တိုဘာ ၂၉ ရက်က ကုလသမဂ္ဂ၌ မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေး အထူးအစီရင်ခံစာတင်သွင်းသူ ကယ်လီ အန်း အက်ကယ်စ်-ကာရီနှင့် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား (IIMM) အဖွဲ့ခေါင်းဆောင် နီကိုလပ်စ် ကွမ်ဂျီအန်တို့ ပူးတွဲသတင်းစာရှင်းလင်းပွဲ ကျင်းပစဉ်/ UN

#WhatsHappeningInMyanmar
#RejectMilitaryCoup

မလေးရှားနိုင်ငံမှ ပြန်ပို့အပြီး ဖမ်းဆီးထိန်းသိမ်းခံရသူများအရေး ရှင်းလင်းပြောကြားရန် တောင်းဆိုခဲ့ပြီးနောက် ပြီးခဲ့သည့်လက ပြည်နှင်ဒဏ်ပေးခြင်းခံခဲ့ရသည့် ရခိုင်တိုင်းရင်းသား ရာပေါင်းများစွာကို မြန်မာစစ်အုပ်စုက စတင်လွှတ်ပေးလိုက်ပြီ ဖြစ်သည်။

မလေးရှားနိုင်ငံခြားရေးဝန်ကြီး မိုဟာမက် ဟာဆန်က ပါလီမန်တွင် ၎င်းတို့၏ အခြေအနေနှင့် ပတ်သက်၍ မေးမြန်းစုံစမ်းခံရပြီး ၄၈ နာရီအကြာ ဗုဒ္ဓဟူးနေ့တွင် ပြည်နှင်ဒဏ်ခံရသူ ရခိုင်တိုင်းရင်းသားများကို ပထမဆုံး လွှတ်ပေးခဲ့ခြင်း ဖြစ်သည်။

Website တွင် ဖတ်ရန် https://burma.irrawaddy.com/news/2026/10/30/417310.html
#WhatsHappeningInMyanmar
---------------------
စာဖတ်သူများ၏ ပံ့ပိုးမှုက ပြည်သူများ လိုအပ်နေသည့် အကောင်းဆုံး နှင့် အရည်အသွေးမီ သတင်းများကို ဖော်ပြစေနိုင်မည်။
Support The Irrawaddy: https://www.irrawaddy.com/donation

အမေရိကန် ကြားဖြတ်ရွေးကောက်ပွဲ မြန်မာကို ဘယ်လိုရိုက်ခတ်လာန်ိုင်မလဲ

အောက်တိုဘာ ၃၀၊ ၂၀၂၆

ဒီတပတ် ဧရာဝတီရဲ့ အယ်ဒီတာ့စကားဝိုင်းကို လာမယ့် စနေနေ့ မနက်မှာ စောင့်မျှော်ကြည့်ရှု အားပေးနိုင်ပါတယ်။

#မြန်မာ #ဧရာဝတီ #အမေရိကန် #ရွေးကောက်ပွဲ #EditorialTalk