Hech qanday "ikkinchi yarmimiz" mavjud emas. Shunchaki kim bilandir o'zimizni yaxshi his qiladigan vaqt oralig'i bor. Uch daqiqa... Ikki kun... Besh yil... Bir umr...🤍

Endi tikanlimi bu erka yoʻllar,
Yo yoʻl tugadimi — endi qaytishmi?
Gullagan sevgidan qoldimi choʻllar,
Endi begonaday “xayr” aytishmi?

Oh, qachon aldashga oʻrganasan sen,
Yuzingda kulgi-yu labingda titroq.
Men uchun oʻrtanmay, oʻrtanasan sen...
Qoʻrqma! Tillarimda qolmadi soʻroq.

Ne qilay? Yurakdan boʻshadi tanim,
Najot — koʻnishdami, najot — oʻlishda?..
Azizim, azizim, azizim manim,
Ayt, qachon ulgurding jonim boʻlishga!?...

©️Usmon Azim

Ketyapsanmi, mayli, yaxshi bor,
Balki meni tutgay faryoding.
Tushlarimga kirmassan ortiq,
Ortiq meni qiynamas yoding.

Men bir uyman...
kelib-ketarlar,
Lek koʻrmaslar ilohiy rangni.
Yuragim — non, sindirib olding,
Balki sen ham oʻz nasibangni.

Munis qushcham, mayli omon boʻl,
Sendan sira tuymagayman ranj.
Uchib ketar qushlar ham axir,
Parvoz mashqin oʻrganib olgach.

©️Guljamol Asqarova

Kelgin, qismatimiz kelishdir asli,
Ikkimiz bir hisga bo‘laylik asir.
Hadikni qo‘y endi, ey Havvo nasli,
Men ta'qiq mevasi emasman axir.

U qizda ishqim bor, ko‘nglimda u qiz,
Ey, Xudo, bu yuking bunchalar og‘ir.
Kundan kun ketyapman osmonga cho‘kib,
Men Nuhning kemasi emasman axir.

©️Najmiddin Ermatov

Suvlar ma'yus tortdi,
So‘lgan yalpizning
Xotirasin olib ketdi olisga.
Suvlardan ajralib qolgan sog‘inchni
Yupatib to‘ldirdim yam-yashil hisga.
Ammo vujudimning tomirlarida
Emaklab charchadi betaskin hayot
Ovoz ber, qaydasan, qo‘llaringni cho‘z,
O‘zimni qaytadan aylayin bunyod.
Bemajol qoqsuyak barmoqlarimda
Adashib ketadi kunlar sanog‘i.
O‘chirishga shaydir qaysar shamollar
Qorachig‘imdagi ilinj chirog‘in…
Sen borsan, daraxtlar orzusiday pok,
Har bir hujayramda jimirlar samo.
Sen borsan,
Daryoni ho‘plagan bulutlar bilan
Yodimga shudringday tushasan go‘yo.
Yomg‘ir tovushida sening qadaming
Yuragim zarbiga ketar qovushib.
O‘zimni o‘zimga tanishtirib qo‘y,
Xazonlar ichida ketmay adashib…
Sen borsan…

©️Halima Ahmedova

Menda faqat,
Xudo bor, Siz bor va so‘z bor.
boshqasini bilmayman.
uzoqda yashayman dunyodan....
ichim — bomdod,
tashim — bomdod
dilim — xufton.
Tasbehlar teraman havodan...

©️Xonzodabegim

qaytib kelaverding.
jilmayding
oʻpding
ming bor koʻz yumildi ketishlaringga
men chaqaga qimmat umrimga qo’shib
bor-budimni koʻmdim kulgichlaringga

bir senga ataldi kuzlar bahorlar
qoq ikki boʻlindi olaming, tanang
bir yoqda men hamda bechora sevgim
bir yoqda ayoling va ikki bolang

qiz koʻngil nelarni etmaydi havas?
yarim baxt izlagan kimsa yoʻq zotan…
– jonim, yana qachon kelasan?
– bilmam.
– taxminan?
– bilmadim.
– mayli, kutaman.

yashadim tarkingdan tashrifinggacha
aldoqchi tushlarda kechildi umr.
hushyor oqshomlardan sarmast tonggacha
sharob qadahlarda ichildi umr.

minglab orzularning oʻtdim bahridan
tamakiga qo’shib jonim tutatdim
o’rnim topmay yerning hech bir shahridan
men bevatan seni uyga kuzatdim

vafosiz joningga etib shukurlar
baxt quvib, armongga kelaverdim duch.
men yondim.
tepamda yosh toʻkdi hurlar;
ma'budani yoqdi ikkita kulgich.

©️Hanifa

💕.