Kaiji. Birinchi mavsum (2007)

Dastlab bir muncha qiziqmasdan, e’tiborsiz ko’rishni boshladim, ammo barchasi chappasiga aylanib ketdi. Kun tunga aylandi. Anime dunyosi rostan boshqacha. Internetdagi turli iddaolar: yosh bolalar, ko’ngli bo’shlar, “nozik” tabiatlilar uchun kabilarning bari asossiz. Dunyo shunchalar kengki, undagi g’oyalar, o’rtaga tashlanadigan mavzular xilma-xilligidan boshing aylanadi – doim o’zingga yangi nimadir olasan. Bu ham axborot – ya’ni nimadir o’rganishing uchun faqat kitob o’qishing kerak emas, axborot o’z holicha absalyut qolaveradi, shunchaki uni tashuvchi vosita o’zgaradi xolos. Bu haqida yozganman ham. Kaijiga qaytaylik, endi.

Intriga, psixologik manipulyatsiya, intellektual muhit xohlayapsanmi – unda tavsiya qilaman. Bir qiziq fakt ham bor, animeni ko’rayotganimda Kalmar o’yini bilan o’xshash joylari ko’pligi e’tiborimni tortidi. G’oyaviy o’xshashlik, atmosfera, qahramonlar... Keyin bilsam, Hvan Don Hyok ijodiy krizis payti, Kaiji mangasini o’qiganligini va undan ilhomlanganligini tan olgan ekan. To’g’ri, birga-bir ko’chirmagan, ammo yo’nalish, motivlar, o’yinning tashkillanishi ayni bir chiziqda. Farqi, animeda nima bo'lishini oldindan aytish qiyin, mantiq o'z joyida.

Grafikaga ko’p urg’u beraman. Animeni boshlaganimda qiziqishim pasayganligining sababi ham shu edi: personajlar qandaydir nootabiiy, to’rtburchak, uchburchak shaklli aniq qolipga solingan yuzlar. Olam ichiga kiraverganim sari, bu bir ramziy ma’no ekanligini angladim. Moddiyat mavzusi birinchi pardaga o’tganligi vajidan, qahramonlar ham aniq geometrik shaklda, qalin chiziqlar orqali tasvirlangan. Hammasi o’lchovli, hisob kitobli, sening hislaringa tupurgan dunyo. Ijodkorlar bu tomondan personajlar va ularni o’rab turgan muhitni uyg’unlashtirishga harakat qilishgan. Demoqchimanki, grafik jihatdan maqtana olmasligi, umum hikoyaga ta’sir qilmaydi, qo’rqmay bosavering.

9/10 baholayman. Ayniqsa, so'nggi qismlardagi: Kaiji va Yukio o’rtasidagi Imperator qarta o’yini juda muhtasham. O'zim ham o'ynab ko'rdim.

@vasilbro

Imperator qartasi (Kaiji)

Ikki kishi uchun mo’ljallangan strategik o’yin.

Qartalar soni - 10 ta

Imperator va to’rtta oddiy xalq – umumiy 5 qarta

Qul va to’rtta oddiy xalq – umumiy 5 qarta

Qoidalar:

O’yin 4 bo’lim o’ynaladi. Har bir bo’lim 3 raunddan iborat. O’yinchilar bir bo’lim imperator tomon, bir bo’lim qul tomon bo’lib o’ynashadi. Shu tariqa 2 marta o’rin almashiniladi.

Qartalar to’qnashuvi:

Imperator va oddiy xalq – imperator g’alaba qiladi

Oddiy xalq va oddiy xalq – durrang

Oddiy xalq va Qul – oddiy xalq g’alaba qiladi

Imperator va Qul – qul g’alaba qiladi. Chunki uning yo’qotadigan narsasi yo’q va yengish uchun barcha imkoniyatni ishga soladi.

Bo’limlar:

1-raundani doim imperator boshlaydi. 2-round qul. 3-round yana imperator. Raund biror tomonning qo’li baland kelmaguncha davom etadi. Birinchi raund uchun misol:

Dastlab imperator o’z qartasini tanlab stolga qo’yadi, ikkinchi bo’lib qul. So’ngra qartalar ochiladi. Imperator tomon oddiy xalq qartasidan foydalandi deylik, qul tomon esa qul qartasidan. Bunda imperator tomonning qo'li baland keladi - shu tariqa birinchi raund nihoyasiga yetadi. Qartalarni bir vaqtda tanlab, bir vaqtda ochsa ham bo’ladi, ammo bu o’yinning jozibasiga biroz ta’sir qiladi.

O’yin senga nima beradi ?

Bu omadga emas, aniq tahlilga asoslangan o’yin. Siz raqibning qaysi qartani yurishini oldindan tahmin qilishingiz kerak. Har bir kichik detal: tirjayish, ko’zlar, qo’l harakatli, manipulyatsiyon gaplar ahamiyatlidir. To’g’ri shunchaki o’ynab qo’yish ham mumkin, biroq jiddiy kirishilsa anchayin zavqli.

Istalgan odam o’ynasa bo’ladi, maxsus qartalar bo’lishi shart emas:

Sonlardan oddiy xalq. Qirol qartadan imperator, jokerdan qul sifatida foydalansangiz bo’ladi.

P.s: jiddiy yozdimmi, demak yaxshi o’yin. Endi Alice in Borderland seriali 2 mavsum 4-epizod Chishiya ishtirokidagi Valet of hearts o’yinini real hayotga moslashtirmoqchiman.

@vasibro

So’rovnoma

Aksar insonlar o’z fikrlarini absolyut deb hisoblashadi. Shu vajdan qolganlarni o’zlariga bo’ysindirishga, ularni hamfikr qilishga harakat qilishadi. Endi savol.

Agar butun dunyo faqat sizga o’xshagan insonlardan tashkil topgan bo’lsa: mulohazalaridan tortib, kiyinishigacha.

Siz bu dunyoda yashagan bo’larmidingiz ?

Bu jamiyat farovon bo’larmidi ?

Joker

Komiks voqealari Batman va Jokerning azaliy kurashi ustiga qurilmagan, aksincha Jokerning shaxsiyatini birinchi pardaga olib chiqadi. Uning hukmronlikka intilish sabablari, psixalogik beqarorligini ochiqlaydi. Nyuans bo’lib qolmasin, Todd Fillipsning antagonisti bilan bog’liqlik yeri yo’q, faqatgina shaxsiyatdagi beqarorligi qisman yaqin. Xullas, qorong’u va tumanli Gotemning ixlosmandlariga tavsiya qilaman.

Bir qiziq epizod ham bor. Xarli Kvinn Jokerga ko’z oynak sovg’a qiladigan sahna. Unga GEY (gay) so’zi tushurilgan edi. Joker buni mamnuniyat bilan qabul qiladi !

Endi tarixga yuzlanamiz. Ilgarilari gey so’zidan shunchaki insonning ruhiy holatini, ayni kayfiyatini izohlash uchun foydalanishgan. Xursand, baxtli, quvnoq degan ijobiy ma’nolarni anglatgan. Ammo, XX asrning oltmishinchi yillaridan boshlab turli ijtimoiy va madaniy o’zgarishlar natijasida bugungi jinsiy orientatsiyani, ya’ni erkaklarning o‘z jinsiga bo‘lgan romantik qiziqishini ifodalovchi atamaga evriladi.

@vasilbro

Demak 21:00 da boshlaymiz. Ochiq mikrafon, istalgan inson she’r o’qishi mumkin. Mendan tashqari albatta😁

Hammaga rahmat. Juda mazmunli bo’ldi. Yakshanbani shu tariqa kuzatdik. Keyingi hafta yana tashkillaymiz )

Yozib olishni afsuski kechroq boshladim. Ma’zur tutgaysiz.

Bilasanmi, bir kun seni o‘ldiraman ! Bu seni sevishni to‘xtatganim uchun yoki rashkdan emas, shunchaki… biror sababsiz o‘ldiraman, chunki ba’zan seni butkul yutib yuborishni, borlig‘ingni o‘zlashtirishni orzu qilaman.

Dostoyevskiy. Qimorboz

Kartina 1917 yilda Gallen-Kallela tomonidan chizilgan. Yigit o’z ortidan xanjar urib, bag’ridagi mashuqasini ham halok qiladi.

@vasilbro

Balki, bugungi kontent iste’moli vajidan kelib chiqsak, seni o’rtamiyona yozuvchilar qatoriga qo’shishardi, oshna.

Tvitterdagi chiqishlaringni tasavvur qilyapman:

Odam o’z gunohlarini oqlash uchun hamma narsani o’ylab topadi, deb postlar joylarding.

Inson qalbining tubiga kirib, fojiaviy iztiroblarni ochib beradigan asarlaring zamonaviy madaniyatning tezlik va soddalashtirishga bo‘lgan intilishlari bilan mos kelmasdi. Mavjudlikning mazmunini savolga tutib, insonning axloqiy inqirozlarini ko‘tarib chiqqaning nimasi ? Uzoq borsa, Inson qalbi jang maydonidir, degan fikrlaring bugungi arzon marketing bilan qorishib, qandaydir broshyuraga aylangan bo’larmidi, kim bilsin.

Tan olinmagan daho bo’larding. Shunchaki, jamiyatga haqiqatni aytgan g’amgin bir ovoz.

Sen bilan ichgan bo’lardim.

@vasilbro

…shundayin bir mavzu haqida yozayotgan edimki, bitilgan qatorlardan etim jimirlardi. Shod edim, mana nihoyat anchadan beri izlayotgan uslubimni topdim, derdim, o’zimga o’zim.

Yarim tun, xonamda sokinlik hukmron, fonda klassik musiqa yangramoqda, har bir lahzadan zavqlanayapman. Yozgan sarim, yozgim kelyapti. Ajoyib maqola chiqishiga ishonchim komil…

Biroq, muhitga umuman mos bo’lmagan, yoqimsiz ovoz yangray boshladi. Qarasam telefonim jiringlayapti, soat tungi uchda kim ekan desam, onam:

- alo, tinchlikmi ?
- tur bo’ldi, ishga kech qolasan.

Tush ekan, jin ursin.

#mem

Faqatgina ikkala kanalda bor odamlar tushunadi.

Orginalroq😁