ياهوى قلبي وياغاية مرامي
‏ياطروق الشعر يا اجزل قصيده

‏ياهيامي فالحياة وياغرامي
‏النظر فيك انت لايمكن اعيده

‏ان تولع فيك قلبي ما يلامي
‏لاتولع في هوى درهْ فريده

قفلت بيبان المشاريه ياسعود
‏ماعاد فيني للمشاريه طاقه

‏الي يبي وصلي له الوصل معقود
‏بوصل معه لاخر حدود العلاقه

‏والي يبي الفرقى ببادله بصدود
‏في ذمتي ليسبق فراقي فراقه

افهم كلام الصح مني وانا ابوك
‏نصيحتي علم بها كل من جاك

‏نصيحةٍ مني وعلم بها اخوك
‏لا ترتخي يسراك عن زند يمناك

‏الناس وان شافوا معك مال هابوك
‏وان سولفوا زادوك من شان دنياك

‏وان صرت مقلولٍ تعدوا وخلوك
‏لا ينوكل زادك ولا ينشرب ماك

عاش الرفيق اللي حصونه منيعه
‏في لازمك ماهوب يذخر ولا شي

‏لو قلت له ضاقت علي الوسيعه
‏يقول تكفى لا اتضايق وانا حي .

والله مانحسد بخيل على المال
‏لوكل ساعة مكسبه بالملايين

‏مكاسبي ماهي في روس الأموال
‏مكاسبي خوة رجالٍ وفيين

‏مالي خويٍ من رياجيل الأعمال
‏اللي لهم في كل حارة دكاكين

‏أصحابي اللي تمتلك طيب الأفعال
‏لو كل واحد يقضي الدين بالدين

‏اليا نشدوك الناس وش كان ذنبك
‏قل البدو لاعافوا القاع يمشون

‏أقفت ركابي ماتبي عذب شربك
‏طبع الكرام ان شافوا الضيم يقفون

للشرق دربي ان كان للغرب دربك
‏ماعاد تجمعنا مدينه على الكون

والمكان اللي ليا جيناه حصلنا الجفيّا
‏جعلنا نعتاض فيه البعد والصحراء الخليه

عداوةٍ ياتي وراها مخاليص
‏ولا رفقةٍ تستوجع الكبد منها

يالله ثبتنا على دين الاسلام
‏يوم البشر هالوقت زلت خطاها

‏ثم اكفنا شر الليالي والايام
‏واكتب لنا خير الحياة ورخاها .

وقت الرخا كل الرفاقه مطاليق
وفي ساعة الشده يا قل الجماعه

ياخوي من وقف معك حزة الضيق
إحفظ وداده مثل حفظ الوداعه

والله إني ضايقٍ مِن خَلاي وفي خَلاي
‏خاطري ماهوب وِدّه ونفسي وِدّها

‏وعاصيٍ نَفسي على شان مـاأرخي مستواي
‏لَو بطيع النَفس بعدين كيف أردّها

‏يا فهد صرت أشرب الماء ولا يَقطع ضماي
‏لا تعاتبني ترى النَفس وَصلَت حَدّها

ما تسوّلت السعاده من أحد
‏ولا لأحد مِنه على بسمة شفاي

‏إن تعبت السبت بطيب الأحد
‏وإن بكيت اليوم - يوم السعد جاي

‏ولا كرهت إنسان لو جار وجحد
‏هقوتي ما تبعد أكثر من غطاي

‏ما رجيت إلا رضى الفرد الأحد
‏في رضاه إليا رضى عني رضاي .

ياللي تقول ان فقرنا من يدينا
‏لاتحسب انا مانعرف التدابير

‏ياما غدا منا وياماعطينا
‏وياكثر ماحاشت يدينا من الخير

‏نجود من جودات ربك علينا
‏ونصبر ليا كثرت علينا المخاسير

‏وان جات من ربك على مابغينا
‏والا صبرنا في رجا الله بتيسير

‏ولو الصخر ياطأ على ماوطينا
‏خطرٍ يذوب من التجمد على الكير

( أخير منها ركعتين ٍ بالأسحار
‏لا طاب نوم اللي حياته خساره )
‏،
‏قد قالها تركي و من باب تذكار
‏لأهل النفوس اللي تحبّ الصداره
‏،
‏صلّو صلاة اموادع ٍ شاف الأخطار
‏وادعو دعا منهو مطوّل حصاره
‏،
‏ما يكشف الغمّة تناكيت واشعار
‏تكشف بتوبة و الدعا و الطهاره

عذرنا مايعـذّر .. وانت عذرك سليم
‏دام نظـرتك ميزان الخطا والصواب

‏يوم تخطي تقول الله غفورٌ رحيم
‏يوم نخطي تقول الله شديد العقاب

من لايعس الدرب من قبل ممشاه
‏يطيح في جمرٍ غطاه الرمادي

‏ومن لا تركد بالهدف قبل مرماه
‏ترميه ناسٍ رميها بالركادي

لو ترد السيل في بطن السحابه
ما ترجع قيمتك في قلب عايف

يا عيد ما يجمع قلوب المخاليق
كود الذي يحط الأرواح فيها

ياخو وضيحاء لا تسد الطواريق
ونفس تبي فرقاك لا تبتليها

ما تنفع الجهده .. بليا توافيق
والنفس ماهي في هواك تهديها

من لا يشبب بأول العمر يمناه
‏يفلس من الجزلات لاصار شايب

‏ماينفعك موروث جدك بمحياه
‏اليا حضر ماضيه وحاضرك غايب

‏كل الفعايل بالأسامي مسماه
‏لاتردف اسمك مع أسامي القرايب
‏
لاصار وجهك بالمعزه مايحماه
‏فعلك لاترفع حاجبك للنوايب
‏
غيرك يعز الاسم بالوجه والجاه
‏ماقال جدي سدني بالصعايب