🗣Адвокат: Қазақстан қашқын шешенстандықты Ресейге экстрадициялайды

Қазақстан бас прокуратурасы ұлты шешен Ресей азаматы Мансур Мовлаевты отанына экстрадициялау туралы шешім қабылдады. Бұл жөнінде адвокат Мұрат Адам хабарлады. Бұған дейін Қазақстан оның босқын мәртебесін беру туралы өтінішін қанағаттандырмаған.

“Қазір Мансур Мовлаевқа босқын мәртебесін бермеу туралы шешімді даулап, сотқа шағым түсірдік. 11 ақпанда алдын ала тыңдау болады” деді адвокат.

Бұған дейін адвокат Шешенстан тумасы Мансур Мовлаевты Ресей билігі саяси себептермен қуғындап отырғанын айтқан.

Мансур Мовлаев былтыр мамырда Алматыда ұсталып, қамалған еді.

💬 Депутат Айдос Сарым украиналық "Миротворец" тізіміне енгізілді

Сайттың хабарламасында Сарымның "Украинаны қолдаған Қазақстан азаматтарын қылмыстық жауапқа тартуға бағытталған әрекетті жария түрде насихаттағаны" және "Ресей пропагандасының нарративін" таратқаны жазылған.

Онда сонымен бірге Каспий құбыр желісі консорциумының инфрақұрылымына шабуыл жасалғанан кейін Айдос Сарымның Қазақстан бас прокуроры Берік Асыловқа қайырылып, "осы шабуылды қолдаған азаматтардың әрекетіне құқықтық баға беруді" талап еткені және мұндай әрекеттерді "Терроризмді насихаттау" және "Мемлекетке опасыздық жасау" баптарымен қарастыруды сұрағаны жазылған.

🗣Жаңа Конституция жобасы таныстырылды

Жұма, 30 қаңтарда конституциялық комиссия отырысында жаңа Конституция жобасы таныстырылды. Конституциялық сот төрағасының орынбасары Бақыт Нұрмахановтың айтуынша, ол кіріспе, 11 бөлім жәге 95 баптан тұрады.

Оның сөзінше, жобада Қазақстан Республикасының қызметінің жаңа негіз құраушы қағидаттары бекітілген.

“Конституциялық құрылыстың негіздері деген бірінші бөлімде мемлекеттің ұйымдастырылуын айқындайтын, егемендігі мен дербестігін нығайтатын іргелі ережелер қарастырылды. Оған сәйкес Қазақстан унитарлы мемлекет. Басқару нысаны – президенттік республика....Еліміздің әкімшілік аумақтық құрылысын жәй заңнмен емес, конституциялық заңмен айқындау ұсынылады. Егемендік пен тәуелсіздік, унитарлық, аумақтық тұтастық, респуликаның басқару нысаны ешқашан өзгемейтін құндылықтар қатарына жатқызылды” деді Бақыт Нұрмаханов.

🔴Жеті күнде жаңа Конституция. Асығыс реформа ма әлде өмір талабы ма?

Қазақстан билігі ақыры жаңа Конституция қабылдайтынға ұқсайды. Әуелде қазіргі Конституцияға түзету енгіземіз деген арнайы комиссия бір аптада бес рет жиналып, су жаңа Конституцияға қажет деген тұжырым жасады. Ал бүгін, 30 қаңтардағы алтыншы отырыста жаңа Конституцияның жобасын таныстырып үлгерді. Сарапшылар бұл асығыс шешім десе, Конституциялық комиссиядағы депутат "жаңа Конституция заман талабы" деп санайды.

🔗Толығырақ оқыңыз

🗣Азаматтық қоғам өкілдері Тоқаевты жаңа Конституцияны қабылдауға асықпауға шақырды

Азаматтық қоғам өкілдері, сарапшылар мен құқық қорғаушылар, белсенділер Қазақстан президенті Қасым-Жомарт Тоқаевқа қайырылып, Конституцияны өзгертуде асығыстық танытпауға шақырып, толымды қоғамдық талқылау жүргізу қажеттігін атап өтті.

Мәлімдеме авторларының айтуынша, Конституция мәтінінің 80 пайыздан астамы өзгерейін деп отыр – бұл іс жүзінде жаңа Конституция қабылдағанмен пара-пар, ал мұндай қадам жеке қоғамдық мандат, ашықтық пен азаматтардың қатысуын талап етеді.

💬 Тоқаевтың "7 трлн теңге" жайлы сөзінен кейін тексеріс басталды

"Аталған мәселені қарастыру үшін бірқатар банктің трансшекаралық операцияларын бекітілген тәртіп бойынша қаржы нарығын реттеу және дамыту агенттігі, Қазақстан ұлттық банкі, қаржы мониторинг агенттігінің қатысуымен тексеру басталды" деп жазылған қаржы нарығын реттеу және дамыту агенттігінің ҚазТАГ-қа берген жауабында.

Хабарламада қандай да бір банктің аты аталмайды.

29 қаңтарда бірқатар банк Тоқаевтың мәлімдемесіне реакция білдіріп, өздерінің аталған схемаға қатысы жоғын айтқан.

💬 Украина мен Молдованың электр желісінде ірі апат болды

31 қаңтарда Украинаның электр желісінде апат болып, елдің едәуір бөлігі жарықсыз қалды.

Энергетика министрі Денис Шмыгальдың айтуынша, "Украинаның батыс пен орталық бөлігі арасындағы 750 кВ желі мен Румыния және Молдованың энергетикалық жүйелері арасындағы 400 кВ желі бір мезгілде істен шыққан".

Соның салдарынан Украинаның станциялардың автоматтық қорғаныс жүйесі іске қосылған.

Украинаның энергетика жүйесіндегі ақау көрші Молдоваға да әсер етті. Кишинев пен өзге де елді мекендерде электр энергиясы өшті.

🗣Жаңа Конституция жобасы: Алматыда бір адам әкімшілік жауапқа тартылды

Алматы әкімшілік соты "жалған ақпарат таратты" деп айыпталған қала тұрғыны Марат Әбдірахмановты кінәлі деп танып, 86 500 теңге көлемінде айыппұл салды.
Сот шешімінде Әбдірахманов Facebook желісінде пост жариялап, "жалған ақпарат таратқаны" жазылған. Сотта жауапкер өзіне тағылған айыппен келіспеген.

🔴"Перзентханадан күтіп аламын". Жалғызбасты аналарға көмектесетін бастама қалай танылды?

Қазақстанда әйелдер жалғызбасты аналарды қолдайтын қозғалыс құрды. Еріктілер қиын жағдайға түскен, перзентханадан шыққанда қарсы алатын ешкімі жоқ аналарды күтіп алып, жаялық пен балалар киімдерімен қамтамасыз етіп, үйлеріне жеткізеді. Ал барар жері жоқ әйелдерге қонатын орын тауып береді. Бұл бастаманы Өзбекстан, Қырғызстан, Тәжікстан, Ресей мен Беларусьте де әйелдер жалғастырып жатыр.

🔗Толығырақ оқыңыз

🗣Reuters: үкімет Қарашығанақ шығынын келіскен кезде шенеуніктерге пара берілгенін мойындады

Қазақстан үкіметі Стокгольмдегі халықаралық сотта мемлекеттің мойнына жүктелмеуі керек болған Қарашығанақ кенішіндегі шығынды бекіту үшін қазақстандық шенеуніктерге пара берілгенін мойындады.

Мәселе Қазақстан билігі мен Қарашығанақ кенішін игерген консорциум (Shell, Eni, Chevron, Лукойл және мемлекеттік "ҚазМұнайГаз" кіреді) арасындағы дау жөнінде болып отыр.

Басылымның жазуынша, Қазақстан жағы сотта 2022 жылға дейін "сыбайлас жемқорлық пен клептократияға" жол бергенін мойындаған. Ал жекелеген шенеуніктер мемлекеттің мойнына жүктелмеуі керек болған Қарашығанақ кеніші шығындарын бекіткені үшін пара алған. Үкіметтің айтуынша, бұл шығынды әу-бастан ақ мемлекет өтемеуі керек болған. Енді сол шығынды өндіріп беруді талап етіп отыр.

Дереккөздің айтуынша, сот кезінде Қазақстан жағының заңгерлері Италиядағы қылмыстық процесс кезінде алынған құжаттарды да алға тартқан. Оған сәйкес, 2017 жылы бірнеше италиялық мердігер Қарашығанақ пен Қашаған кеніштерінде жұмысқа қол жеткізу үшін қазақстандық шенеуніктерге пара бергенін мойындаған.

🔴 1 ақпанда Украинаның Днепропетровск облысы Павлоград қаласындағы көмір өндіретін кәсіпорынға Ресей әскері әуеден шабуыл жасаған.

Жұмысшылар мінген автобустың қасына дрон түсіп жарылып, кемінде 12 адам мерт болып, жеті адам жараланды деген ақпарат тарады. Кейінірек ДТЭК компаниясы қаза тапқандар саны 15 адам деп хабарлады, алайда артынан деректі қайта нақтылады. Соңғы ресми мәлімет бойынша, 12 адам қаза тауып, 16 кісі зардап шеккен.

Оған дейін, жексенбі күні ресейлік күштер Запорожье қаласындағы перзентханаға да шабуыл жасап, салдарынан алты адам зардап шеккен, арасында осы перзентханада жатқан екі әйел бар.

❤️ Мемлекеттік кеңесші Ерлан Қарин осымен екінші жыл қатарынан жаңа жыл басында "Дала қырандары" ұйымы мүшелерімен кездесті. 2022 жылғы Қаңтар оқиғасынан кейін құрылған бұл жастар қозғалысы билікшіл ұстанымымен танылып жүр. Ақорданың идеологиялық саясатын жүргізетін шенеуніктің бұл ұйымға мән беруінің қандай себебі бар? Ұйымды кім қаржыландырады? Азаттық анықтауға тырысып көрді.

🔗Толығырақ оқыңыз

🗣 Украинадағы соғысты бейбіт түрде реттеу жөніндегі үшжақты келіссөздің кезекті кезеңі Әбу-Дабиде ақпанның 4-і мен 5-і күндері өтеді. Мұны жексенбі күндіз Украина президенті Владимир Зеленский хабарлады.

Оған бұл ақпаратты келіссөзге қатысып жатқан Украина делегациясы жеткізген. Ал тараптар Әбу-Дабиде 1 ақпан күні кездесті ме деген сауалға әзірге жауап жоқ, Зеленский ол жөнінде ештеңе айтпады.

Бұған дейін АҚШ, Ресей және Украина Әбу-Дабидегі келіссөздің жаңа кезеңін 1 ақпанда өткізу жоспарланғанын растаған еді. Әзірге Мәскеу де, Вашингтон да президент Зеленский айтқан ақпаратқа байланысты ешқандай пікір білдірген жоқ.
🔗Толығырақ