#xabar #muftiy #juma
🌙 МУФТИЙ ҲАЗРАТ: ПАЙҒАМБАР АЛАЙҲИССАЛОМГА ҲАМРОҲЛИК – ЭНГ ГЎЗАЛ БАХТ!

🕌 Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бугун, 6 февраль куни жума намозини Тошкент вилоятидаги "Занги ота" жоме масжидида адо этдилар.

⏺ Муфтий ҳазратлари намоздан олдин жамоатга “Расулуллоҳнинг жаннатдаги ҳамроҳлари” деган мавзуда манфаатли маъруза қилиб бердилар.

🗣 Маърузада айтилганидек, ҳадиси шарифда Расулуллоҳ соллаллоҳу алайҳи васаллам бундай деганлар: “Жаннат юз даражадир. Ҳар икки даража ораси юз йиллик йўлдир (Аффон эса: «Осмон билан ер орасичалик», деган). Фирдавс жаннати уларнинг энг олий даражасидир. Жаннатнинг тўртта анҳори ундан чиқади ва унинг устида Арш бор. Агар Аллоҳ табарока ва таолодан (жаннатни) сўрасангиз, Фирдавсни сўранг” (Имом Аҳмад ривояти).

💬 Демак, жаннатда Расулуллоҳ соллаллоҳу алайҳи васалламга ҳамроҳ бўлиш – инсон интилиши ва эришиши мумкин бўлган мукофотларнинг энг гўзалидир. Шу боис, Пайғамбаримиз алайҳиссалом мўмин-мусулмонларни ушбу юксак мартабага қизиқтириб, жаннатда у зотга яқин ва қўшни бўлишга сабаб бўлувчи бир қанча солиҳ ишларни ўргатганлар.

⏺Мазкур мақомга эришиш учун Аллоҳ ва Унинг Расулига итоат қилиш ва муҳаббат қўйиш, ибодатларда бардавом бўлиш, етимларга ғамхўрлик кўрсатиш, кўп салавот айтиш, чиройли хулқ, фарзандларга гўзал тарбия бериш каби эзгу амалларни бажариш лозимлигини оят ва ҳадислар асосида шарҳлаб берилди. Фирдавс жаннатига эришиш, абадий ҳаётда Пайғамбар алайҳиссаломга ҳамроҳ ва яқин бўлиш йўллари тарғиб қилинди.

🖥

Маънавий-маърифий файзга йўғрилган суҳбат давомида бугунги кунда авж олган кибержиноятларнинг зарари, бу борада барчамиз хушёр бўлишимиз лозимлиги ва динимизда алдамчилик энг оғир гуноҳлардан саналиши эслатиб ўтилди.

🤲 Гўзал мавъиза сўнгида Ҳақ таолодан барча мўмин-мусулмонлар ушбу юксак мукофотга ноил бўлиши ва тўғри йўлда собитқадам қилишини сўраб хайрли дуолар қилдилар.

✅ Ўзбекистон мусулмонлари идораси
Матбуот хизмати

Дўстларингизга ҳам улашинг

https://t.me/diyonatli

#xabar #muftiy #juma #masjid
📖 ҚУРЪОНДА ТАЪКИДЛАНГАН ИККИ УЛУҒ АМАЛ ВАСФ ЭТИЛДИ

🕌 Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бугун, 13 феврал куни жума намозини пойтахтимизнинг Бектемир туманида қайта қурилиб, фойдаланишга топширилган "Абдуқодир ҳожи ота" (аввалги номи "Хутон") жоме масжидида адо этдилар.

🌙 Муфтий ҳазратлари жума намозидан олдин жамоатга Қуръонда таъкидланган икки улуғ амал – зикр ва салавот айтишнинг фазилатлари ҳақида маърифий суҳбат қилиб бердилар.

💬 Дарҳақиқат, инсон турли юмушлар билан овора бўлиб, баъзан руҳий тарбиядан, қалбига озуқа бўладиган амаллардан узилиб қолади. Ҳолбуки, зикр ва салавотлар қалбни сайқаллаб, мусаффо ва нурли қилади.

💬 Маърузада айтилганидек, Аллоҳ таоло Қуръони каримнинг ўн олти жойида зикрга буюрган: “Бас, Мени ёд этингиз, (Мен ҳам) сизларни ёд этурман. Менга шукр қилингиз, ношукрчилик қилмангиз!” (Бақара сураси, 152-оят). Демак, зикрнинг энг катта фойдаси – банданинг гуноҳлари афв этилишига, Робби ҳам уни ёд этишига сабаб бўлади.

📿 Аммо баъзи инсонлар “зикр қилишим керак экан” дея кундалик касбу кор қилишдан ҳам ўзларини тортиб, аҳли оиласини танг аҳволга тушириб қўйганларини эшитиб қоламиз. Бу хато тушунча бўлиб, аслида ишлаб туриб ҳам қалбни зикр билан машғул қилиш мумкин. Баҳоуддин Нақшбанд ҳазрат: “Дилинг Аллоҳда, қўлинг ишда бўлсин”, деганида шунга далолат этганлар.

📿 Шунингдек, салавот ҳам яхшиликлар василаси, Аллоҳнинг розилигига олиб борувчи, кўплаб ажр-савоблар эшигидир. Салавот айтишнинг нечоғлик улуғ амал экани Қуръони каримда таъкидланган: “Албатта, Аллоҳ ва Унинг фаришталари Пайғамбарга салавот айтурлар. Эй, мўминлар! (Сизлар ҳам) унга салавот ва салом айтингиз!” (Аҳзоб сураси, 56-оят).

🌙 Зеро, Пайғамбар алайҳиссалом бундай марҳамат қилганлар: “Менга салавот айтинглар, чунки қаерда бўлсангиз ҳам салавотларингиз менга етиб келади” (Имом Абу Довуд ривояти).

🤲Манфаатли маъруза сўнгида барча мўмин-мусулмонлар Аллоҳнинг зикри ва Пайғамбар алайҳиссаломга салавот айтишда пешқадам бўлишини сўраб дуолар қилинди.

✅ Ўзбекистон мусулмонлари идораси
Матбуот хизмати

https://t.me/diyonatli