#MSone Release - 2850

#IranianFest - 02

Close-Up (1990)
ക്ലോസ്-അപ്പ് (1990)

ഭാഷ : പേർഷ്യൻ
സംവിധാനം : Abbas Kiarostami
പരിഭാഷ : മുബാറക്ക് റ്റി എൻ
പോസ്റ്റർ : അഷ്‌കർ ഹൈദർ
ജോണർ : ബയോഗ്രഫി, ക്രൈം, ഡ്രാമ

IMDb ⭐️ 8.3/10

വിവാഹമോചിതനും, തൊഴിൽരഹിതനുമായ ഹൊസെയ്ൻ സബ്‌സിയാൻ, ഒരു കടുത്ത സിനിമാ പ്രേമിയാണ്. ഒരു ബസ് യാത്രയ്ക്കിടയിൽ വൃദ്ധയായ ഒരു സ്ത്രീ, പ്രശസ്ത സംവിധായകനായ മൊഹ്സിൻ മഖ്മൽബഫ് ആണെന്ന് തെറ്റിദ്ധരിച്ച് സബ്‌സിയാനെ പരിചയപ്പെടുന്നു. മഖ്മൽബഫിൻ്റെ ആരാധകനായ, അദ്ദേഹത്തിൻ്റെ ഛായയുള്ള സബ്‌സിയാൻ, ആ ധാരണയ്ക്കനുസരിച്ച് സ്വാഭാവികമായി തന്നെ പെരുമാറുന്നു. വൃദ്ധയുടെ വിശേഷങ്ങൾ ചോദിച്ചറിയുന്ന സബ്‌സിയാൻ, തൻ്റെ അടുത്ത സിനിമയുടെ ലൊക്കേഷനായി അവരുടെ വീടിനെ തിരഞ്ഞെടുക്കുന്നു. കൂടാതെ, അവരുടെ മകനെ നായകനായി അവതരിപ്പിക്കാമെന്നും വാക്കു കൊടുക്കുന്നു. പിറ്റേദിവസവും, അതേവേഷത്തിൽ അവിടെയെത്തുന്ന സബ്‌സിയാൻ്റെ പെരുമാറ്റത്തിൽ സംശയം തോന്നിയ വീട്ടുകാർ, അയാളെ പോലീസിലേൽപ്പിക്കുന്നു. ആൾമാറാട്ടവും, വഞ്ചനാശ്രമവും ചുമത്തി പോലീസ് അയാളെ ജയിലിലാക്കുന്നു. പിന്നീട് നടക്കുന്ന കോടതി വിചാരണയും, മറ്റ് സംഭവ വികാസങ്ങളുമാണ് 1990 ൽ വിഖ്യാത ഇറാനിയൻ സംവിധായകൻ അബ്ബാസ് കിറോസ്തമിയുടേതായി പുറത്തു വന്ന ക്ലോസ് അപ്പ് എന്ന ചിത്രത്തിൻ്റെ പ്രമേയം.

എൺപതുകളുടെ അവസാനത്തിൽ, ടെഹ്റാനിൽ നടന്ന ഒരു യഥാർത്ഥ സംഭവത്തെ ആസ്പദമാക്കിയാണ് ചിത്രം ഒരുക്കിയിട്ടുള്ളത്. ഇതിലെ അഭിനേതാക്കളെല്ലാം തന്നെ അവരവരുടെ യഥാർത്ഥ വേഷത്തിൽ തന്നെയാണ് പ്രത്യക്ഷപ്പെടുന്നത്. സിനിമയോടുള്ള അടങ്ങാത്ത പ്രണയവും, ദാരിദ്യവും, മനുഷ്യർ തമ്മിലുള്ള തീക്ഷ്ണവും ആർദ്രവുമായുള്ള സ്നേഹബന്ധങ്ങളും ചർച്ച ചെയ്യുന്ന ചിത്രം, ലോക സിനിമയിലെ ഒരു മാസ്റ്റർപീസ് എന്നു തന്നെ പറയാം. അബ്ബാസ് കിറോസ്തമിയെന്ന സംവിധായകനെയും, അതുവഴി ഇറാനിയൻ ചിത്രങ്ങളെയും അന്താരാഷ്ട്ര തലത്തിൽ ഉയർത്തിക്കാട്ടിയ ചിത്രമായി ക്ലോസ് അപ്പ് ഗണിക്കപ്പെടുന്നു. 2012 ൽ Sight &Sound മാസിക നടത്തിയ തിരഞ്ഞെടുപ്പിൽ, എക്കാലത്തെയും മികച്ച 50 ചിത്രങ്ങളിൽ ഒന്നായി ക്ലോസ് അപ്പിനെ തിരഞ്ഞെടുക്കുകയുണ്ടായി.

അഭിപ്രായങ്ങൾ പങ്കുവെക്കാൻ

Categories : #Biography #Crime #Drama #Iranian_Fest #Persian

എംസോണിന്റെ ഒഫീഷ്യൽ ഫേസ്ബുക് പേജിൽ ഇനിയും ജോയിൻ ചെയ്യാത്തവർ ചെയ്യുക.

https://www.facebook.com/MSonePage/

#MSone Release - 2851

Brothers (2009)
ബ്രദേഴ്‌സ്‌ (2009)

ഭാഷ : ഇംഗ്ലീഷ്
സംവിധാനം : Jim Sheridan
പരിഭാഷ : വിഷ്ണു പ്രസാദ്
പോസ്റ്റർ : പ്രവീൺ അടൂർ
ജോണർ : ആക്ഷൻ, ഡ്രാമ, ത്രില്ലർ

IMDb ⭐️ 7.1/10

ഭാര്യയും 2 പെൺമക്കളും അടങ്ങിയ സന്തുഷ്ടമായ കുടുംബ ജീവിതം നയിക്കുന്ന ആളാണ് ക്യാപ്റ്റൻ സാം കെഹിൽ. സാമിന്റെ സഹോദരനാണ് ടോമി. മോഷണക്കുറ്റത്തിന് ജയിലിൽ കഴിഞ്ഞ ടോമിയെ, സാമിന്റെ ഭാര്യ ഗ്രേസിനും മക്കൾക്കും ഇഷ്ടമല്ലായിരുന്നു.

ഒരു നാൾ അഫ്‌ഗാനിസ്ഥാനിലേക്ക് പോകേണ്ടി വരുന്ന സാം അവിടെ വെച്ചൊരു ഹെലികോപ്റ്റർ അപകടത്തിൽ മരിച്ചെന്ന് നാട്ടിലറിയുന്നു. സാമിന്റെ മരണത്തോടെ ആകെ തളർന്ന ഗ്രേസിനും മക്കൾക്കും ടോമി താങ്ങാകുന്നു, വൈകാതെ തന്നെ ടോമി അവരുടെയെല്ലാം ഇഷ്ടം പിടിച്ചുപറ്റി.

എന്നാൽ സാം മരിച്ചിരുന്നില്ല. തീവ്രവാദികൾ തട്ടിക്കൊണ്ടുപോയി, രഹസ്യ വിവരങ്ങൾ കിട്ടാൻ വേണ്ടി ഉപദ്രവിക്കുകയും അവനെക്കൊണ്ട് പലതും ചെയ്യിപ്പിക്കുകയും ചെയ്തു. പിന്നീട് അവിടെ നിന്നും രക്ഷപ്പെട്ട് നാട്ടിലെത്തിയ സാമിന്‌, താൻ സഹിക്കേണ്ടി വന്ന യാതനകളും, തന്റെ കുടുംബത്തിന് വേണ്ടി ചെയ്ത തെറ്റും ആരോടും പറയാൻ പറ്റാതെ ബുദ്ധിമുട്ടുന്നു. സഹോദരനായ ടോമി, സ്വന്തം ഭാര്യയുമായി സെക്സിൽ ഏർപ്പെടുന്നുണ്ടെന്ന് പോലും സാമിന്‌ സംശയമുണ്ടാകുന്നു. പിന്നീട് ആ കുടുംബത്തിൽ നടക്കുന്ന പ്രശ്നങ്ങളാണ് ബ്രദേഴ്‌സ്‌ എന്ന ഈ സിനിമ പറയുന്നത്.

അഭിപ്രായങ്ങൾ പങ്കുവെക്കാൻ

Categories : #Action #Drama #English #Thriller

ഇറാനിയന്‍ ഫെസ്റ്റ്.

മനുഷ്യ ജീവിതത്തിലെ കഷ്ടപ്പാടുകളും ദുരിതങ്ങളും, സ്നേഹത്തിൻ്റെയും, കാരുണ്യത്തിൻ്റെയും അകമ്പടിയോടെ അവതരിപ്പിക്കുന്ന ചിത്രങ്ങളാണ്, ഇറാനിൽ നിന്നും പുറത്തിറങ്ങുന്നത്.
വളരെ കര്‍ക്കശമായ സെന്‍സര്‍ഷിപ്പ് നിയമങ്ങളുടെ ഭാരം പേറുമ്പോഴും കാലികപ്രസക്തിയുള്ള വിവിധ സാമൂഹിക-സാംസ്കാരിക പ്രശ്നങ്ങളുടെ കഥ പറയുന്നതില്‍ ഒട്ടും മടി കാണിക്കുന്നവയല്ല ഇറാനിയന്‍ സിനിമകള്‍.
കൃത്യമായ ഇടവേളകളില്‍ വളരെ ചിന്തോദ്ദീപകവും സുന്ദരവുമായ ചിത്രങ്ങള്‍ നിര്‍മ്മിച്ച് ലോകസിനിമാപ്രേമികളെ തന്റെ ഹൃദയകവാടത്തിലേക്ക് മാടിവിളിക്കുന്നുണ്ടെങ്കില്‍ അത് ഇറാനിയന്‍ ചിത്രങ്ങളുടെ മാത്രം പ്രത്യേകതയാണ്.
എംസോണിൽ നിങ്ങൾക്ക് ആസ്വദിക്കാം... ഇറാനിയൻ ചിത്രങ്ങളുടെ മായജാലം ഇറാനിയൻ ഫെസ്റ്റിലൂടെ...
ഈ ഫെസ്റ്റിൽ ഇത് വരെ രണ്ട് ചിത്രങ്ങളാണ് ഇറങ്ങിയിട്ടുള്ളത്.
Close-Up / ക്ലോസ്-അപ്പ് (1990)
എംസോൺ റിലീസ് – 2850,
Manuscripts Don’t Burn
എംസോൺ റിലീസ് – 2848, തുടർന്ന് മറ്റു ചിത്രങ്ങൾ റിലീസാവുന്നതാണ്.

#MSone Release - 2852

#IranianFest - 03

Gabbeh (1996)
ഗബ്ബേ (1996)

ഭാഷ : പേർഷ്യൻ
സംവിധാനം : Mohsen Makhmalbaf
പരിഭാഷ : അക്ഷയ് ടി
പോസ്റ്റർ : അഷ്‌കർ ഹൈദർ
ജോണർ : ഡ്രാമ, മിസ്റ്ററി, റൊമാൻസ്

IMDb ⭐️ 6.9/10

വൃദ്ധരായദമ്പതികൾ തങ്ങളുടെ പരവതാനി (ഗബ്ബേ) കഴുകാൻ തുടങ്ങുകയായിരുന്നു. അപ്പോഴാണ് പരവതാനിയിൽ ഒരു സുന്ദരിയായ യുവതി പ്രത്യക്ഷപ്പെട്ടത്. ഒരു നാടോടി പരവതാനി നെയ്ത്തുകുടുംബത്തിലെ അംഗമായ അവൾ, ചെന്നായയുടെ ശബ്‌ദമുള്ള ഒരു കുതിരക്കാരനുമായുള്ള തന്റെ പ്രണയകഥ വൃദ്ധദമ്പതികളോട് പറയുന്നു.

മാജിക്കൽ റിയലിസമെന്ന ആവിഷ്ക്കരണരീതിയിലൂടെ ഇറാനിയൻ ഗ്രാമഭംഗിയും ജീവിതവും പശ്ചാത്തലമാക്കി പ്രശസ്ത ഇറാനിയൻ സംവിധായകൻ മൊഹ്സെൻ മഖ്മൽബാഫ് സംവിധാനം ചെയ്ത സിനിമയാണ് ഗബ്ബേ. കഥാപാത്രങ്ങളോടൊപ്പംതന്നെ പ്രകൃതിക്കും, മൃഗങ്ങൾക്കും, നിറങ്ങൾക്കും പ്രാധാന്യം നൽകിക്കൊണ്ടുളള പ്രതീകാത്മകമായ അവതരണം തന്നെയാണ് സിനിമയുടെ ഏറ്റവും വലിയ സവിശേഷതയും.

അഭിപ്രായങ്ങൾ പങ്കുവെക്കാൻ

Categories : #Drama #Iranian_Fest #Mystery #Persian #Romance

#MSone Release - 2833

Jirisan (2021)
ജിരിസാൻ (2021)

Episodes: 07-08 / എപ്പിസോഡ്‌സ്: 07-08

ഭാഷ : കൊറിയൻ
സംവിധാനം : Eung-bok Lee
പരിഭാഷ : ഹബീബ് ഏന്തയാർ, കൃഷ്ണപ്രസാദ്‌ പി ഡി, ജീ ചാങ് വൂക്ക് & തൗഫീക്ക് എ
പോസ്റ്റർ : ഉണ്ണി ജയേഷ്
ജോണർ : ഡ്രാമ, മിസ്റ്ററി, ത്രില്ലർ

IMDb ⭐️ 8.9/10

ഏറെ വർഷത്തെ കാത്തിരിപ്പിനൊടുവിൽ സിഗ്നൽ, കിംഗ്ഡം എന്നീ പ്രശസ്ത കൊറിയൻ സീരീസുകളുടെ തിരക്കഥാകൃത്തായ “കിം യൂൻ ഹീ”യുടെ തിരക്കഥയിൽ 2021ൽ tvn 15-ാം വാർഷികവുമായി ബന്ധപ്പെട്ട്, ജിരിസാൻ നാഷണൽ പാർക്കിലെ റേഞ്ചർമാരുടെ ജീവിതകഥയെ അടിസ്ഥാനമാക്കി എടുത്ത ആക്ഷൻ, മിസ്റ്ററി ത്രില്ലർ സീരീസാണ് ജിരിസാൻ. ഒരു നീണ്ട ഇടവേളക്ക് ശേഷം കൊറിയൻ താരസുന്ദരി ജുൻ ജീ ഹ്യൂൻ മടങ്ങിയെത്തുന്ന സീരീസ്, മികച്ച വിഷ്വലുകൾ കൊണ്ടും, നിഗൂഢത നിറഞ്ഞ സംഭവങ്ങളും അതിനോടിണങ്ങി ചേർന്ന പശ്ചാത്തല സംഗീതം കൊണ്ടും ഇതിനോടകം കാഴ്ചക്കാരുടെ എണ്ണത്തിൽ റെക്കോർഡ് സ്ഥാപിച്ചു കഴിഞ്ഞു.

ജിരിസാൻ പർവ്വതം! ചിലർക്കത് പ്രതീക്ഷയുടെ പ്രകാശമാണെങ്കിൽ മറ്റു ചിലർക്കത് മരണമുനമ്പാണ്. കണക്കുകൾ പ്രകാരം വർഷം 3 ലക്ഷം പേരാണ് ജിരിസാൻ സന്ദർശിക്കുന്നത്. ആ പർവ്വതത്തിന്റെ കാവൽക്കാരാണ് ജിരിസാൻ നാഷണൽ പാർക്കിലെ റേഞ്ചർമാർ. അങ്ങനെയിരിക്കെ പുതുതായി സ്ഥലം മാറ്റം കിട്ടി വന്ന റേഞ്ചർ നായകൻ കാങ് ഹ്യുൻ ജോ(ജു ജി ഹൂൺ)ക്ക് കയറിയ ഉടനെ ഒരു മിസ്സിംഗ് കേസ് അന്വേഷിക്കേണ്ടി വരുന്നു. രാക്ഷസി എന്ന് ഇരട്ടപ്പേരുള്ള നായിക സോ യി ഗാങിനൊപ്പം (ജുൻ ജി ഹ്യുൺ) സെർച്ചിംഗ് പങ്കാളിയായി ചേർന്ന്, കാണാതായ ആ ഹൈക്കറെ അവർ കണ്ടെത്തുന്നു. പക്ഷേ നായകന്റെ പെരുമാറ്റത്തിലും വർത്തമാനത്തിലും പന്തികേട് തോന്നിയ നായിക, എങ്ങനെയാണ് കാണാതായ ഹൈക്കർ ഇരിക്കുന്ന സ്ഥലം കൃത്യമായി മനസ്സിലായത് എന്നും മറ്റും ചോദിക്കുന്നു. ഇത് ആദ്യമായിട്ടല്ല എന്നും, മുൻപ് പലതവണയായി കാണാതായ ഹൈക്കർമാർ പർവ്വതത്തിൽ എവിടെയുണ്ടെന്ന് തനിക്ക് ഒരു ദീർഘ ദൃഷ്ടിയിലൂടെ കാണാൻ സാധിക്കുമെന്നും പറയുന്നു. ആദ്യമൊന്നും ആരുമത് വിശ്വസിച്ചില്ല. പക്ഷേ പിന്നീട് പല നിഗൂഢമായ സംഭവങ്ങളും ജിരിസാൻ പർവ്വതത്തെ ചുറ്റിപ്പറ്റി നടക്കുന്നു. പർവ്വതത്തിലേക്ക് ഹൈക്കിങ്ങിന് വന്ന് സഹായം ലഭിക്കാതെ വഴിതെറ്റുന്ന ഹൈക്കർമാർ സ്വാഭാവികമായി മരിക്കുന്നതല്ലെന്നും, ആരോ കൊലപ്പെടുത്തുന്നതാണെന്നും റേഞ്ചർമാർ മനസ്സിലാക്കുന്നു. സംഭവത്തിന്റെ ചുരുളഴിക്കാൻ ഇറങ്ങിയ നായകനും നായികയ്ക്കും പ്രതീക്ഷിക്കാത്ത ചില സംഭവങ്ങളായിരുന്നു നേരിടേണ്ടിവന്നത്.
ആരാണത്? എന്താണ് ജിരിസാൻ പർവ്വതത്തിലെ ആ നിഗൂഢത?

അഭിപ്രായങ്ങൾ പങ്കുവെക്കാൻ

Categories : #Drama #Korean #Mystery #Thriller #Web_Series

#MSone Release - 2853

#IranianFest - 04

Two Women (1999)
ടൂ വിമെൻ (1999)

ഭാഷ : പേർഷ്യൻ
സംവിധാനം : Tahmineh Milani
പരിഭാഷ : ഷൈജു എസ്
പോസ്റ്റർ : അഷ്‌കർ ഹൈദർ
ജോണർ : ഡ്രാമ

IMDb ⭐️ 6.7/10

ഫെരിഷ്തെയും റോയയും യൂണിവേഴ്സിറ്റിയിലെ ആർകിടെക്ച്ചർ വിദ്യാർത്ഥിനികളാണ്. ഒരു വിഷയത്തിൽ സഹായം തേടാനായി റോയ, പഠനത്തിൽ സമർത്ഥയായ ഫെരിഷ്തെയെ പരിചയെപ്പടുകയും വൈകാതെ തന്നെ ഇരുവരും ഉറ്റ സുഹൃത്തുക്കളായും മാറുന്നു. വാപ്പയുടെ പൂർണ്ണ സമ്മതമില്ലാതെയും സാമ്പത്തിക ബുദ്ധിമുട്ടുകൾ നേരിട്ടുമാണ് ഫെരിഷ്തെ പഠിക്കാനെത്തുന്നത്. വിവാഹത്തിനൊന്നും ഉടനെ തയ്യാറല്ലെന്നും പഠിച്ചു ജോലി നേടി ഉപ്പയെ സഹായിക്കാനും ഇളയ സഹോദരങ്ങളെ തുടർപഠനത്തിനയക്കുന്നതുമൊക്കെയാണ് അവളുടെ ലക്ഷ്യം. സമ്പന്ന കുടുംബത്തിൽ നിന്നും വരുന്ന റോയക്ക് തന്റെ കൂട്ടുകാരി എപ്പോഴും ഒരു അത്ഭുതമാണ്. കുറേനാളുകളായി ഫെരിഷ്തെയുടെ പുറകെ ശല്യം ചെയ്ത് നടന്നിരുന്ന ഹസ്സൻ എന്നൊരുവൻ അവളുടെ ഇഷ്ടം നേടാൻ കഴിയാത്തതിന്റെ പേരിൽ അവൾക്ക് നേരെ ആസിഡ് എറിയുകയും അന്നേരം കൂടെയുണ്ടായിരുന്ന അവളുടെ കസിന് പരിക്കേൽക്കുകയും ചെയ്യുന്നു. തത്ഫലമായി ഇനി പഠനമൊന്നും വേണ്ടെന്ന് പറഞ്ഞ് അവളെ വാപ്പ നാട്ടിലേക്ക് കൊണ്ടു പോവുന്നു.

വിപ്ലവം പൊട്ടിപ്പുറപ്പെട്ടതിന്റെ ഭാഗമായി യൂണിവേഴ്സിറ്റികളെല്ലാം സർക്കാർ അടച്ചു പൂട്ടി. തുടർപഠനം അങ്ങനെ ചോദ്യചിഹ്നമായി. ഹസ്സൻ അവളെ വിടാൻ ഒരുക്കമല്ലായിരുന്നു. അവൻ അവളെത്തേടി നാട്ടിലേക്കെത്തി. കാറിൽ പോവുകയായിരുന്ന ഫെരിഷ്തെയെ അവൻ ബൈക്കിൽ പിന്തുടർന്ന് അതൊരു അപകടത്തിന് വഴിയൊരുക്കുന്നു. പന്തുകളിച്ചു കൊണ്ടിരുന്ന കുട്ടികളെ വണ്ടി ഇടിച്ച് അതിലൊരു കുട്ടി മരണപ്പെടുകയും ഹസ്സൻ ജയിലിലാവുകയും ചെയ്യുന്നു. ഇതെല്ലാം തന്നെ ഫെരിഷ്തെയുടെ ജീവിതത്തെയും മാറ്റി മറിക്കുകയാണ്.

പഠിക്കാനോ ജോലിക്ക് പോവാനോ പുറത്തിറങ്ങി സ്വതന്ത്രമായി നടക്കാനോ പോലും അനുവാദമില്ലാതെ സ്ത്രീകൾ നാല് ചുമരുകൾക്കുളിൽ അനുഭവിച്ചു തീർക്കുന്ന വേദനകൾ നല്ല രീതിയിൽ സംവിധായകൻ പകർത്തിയെടുത്തിട്ടുണ്ട്. വ്യത്യസ്ത ജീവിത സാഹചര്യങ്ങളിൽ നിന്നും പഠിക്കാനെത്തുന്ന രണ്ടു സ്ത്രീകളുടെ ജീവിതം വർഷങ്ങൾക്കപ്പുറം ഏത് നിലയിലെത്തി നിൽക്കുന്നുവെന്നതാണ് ചിത്രം പറഞ്ഞു വെക്കുന്നത്.

അഭിപ്രായങ്ങൾ പങ്കുവെക്കാൻ

Categories : #Drama #Iranian_Fest #Persian

#MSone Release - 2854

#IranianFest - 05

The Child and the Soldier (2000)
ദ ചൈൽഡ് ആൻഡ് ദ സോൾജിയർ (2000)

ഭാഷ : പേർഷ്യൻ
സംവിധാനം : Reza Mirkarimi
പരിഭാഷ : ഷെഫിൻ
പോസ്റ്റർ : പ്രവീൺ അടൂർ
ജോണർ : ഡ്രാമ

IMDb ⭐️ 7.2/10

ബഹ്‌മാൻ അമിൻപോർ എന്ന പട്ടാളക്കാരൻ ന്യൂ ഇയർ അവധിക്ക് തന്റെ കല്യാണം ഉറപ്പിക്കുന്നതിനായി നാട്ടിൽ പോകാൻ നേരത്തേ ലീവ് ചോദിക്കുന്നു. എന്നാൽ മേലുദ്യോഗസ്ഥൻ അത് നിഷേധിക്കുന്നു. എന്നാൽ പിന്നീട് ഒരു കുട്ടികുറ്റവാളിയെ ദുർഗുണപരിഹാര പാഠശാലയിൽ എത്തിച്ചാൽ അവിടുന്ന് നാട്ടിൽ പോകാമെന്ന് മേലുദ്യോഗസ്ഥൻ പറയുന്നു. അതനുസരിച്ച് കുട്ടിയുമായി പുറപ്പെടുന്ന നായകൻ നേരിടുന്ന പ്രയാസങ്ങളും അത് തരണം ചെയ്യുന്നതും മറ്റും നർമത്തിലും അല്പം ഹൃദയഹാരിയായും അവതരിപ്പിച്ചിരിക്കുന്ന ചിത്രമാണ് "ദ ചൈൽഡ് ആൻഡ് ദ സോൾജ്യർ"

അഭിപ്രായങ്ങൾ പങ്കുവെക്കാൻ

Categories : #Drama #Iranian_Fest #Persian

#MSone Release - 2855

Cyrano Agency (2010)
സിറനോ ഏജൻസി (2010)

ഭാഷ : കൊറിയൻ
സംവിധാനം : Hyun-seok Kim
പരിഭാഷ : സാരംഗ് ആര്‍. എന്‍, സജിത്ത് ടി. എസ്
പോസ്റ്റർ : ഉണ്ണി ജയേഷ്
ജോണർ : കോമഡി, റൊമാൻസ്

IMDb ⭐️ 6.5/10

Um Tae-Woong, Park Shin-Hye, Choi Daniel, Lee Min-Jung എന്നിവരെ കേന്ദ്ര കഥാപാത്രങ്ങളാക്കി Kim Hyun-Seok ന്റെ സംവിധാനത്തിൽ 2010 ൽ പുറത്തിറങ്ങിയ ഒരു കൊറിയൻ റൊമാന്റിക് കോമഡി മൂവിയാണ് സിറനോ ഏജൻസി.

ബ്യുങ്-ഹുനും സംഘവും ഒരു തീയേറ്റർ നിർമിക്കാൻ വേണ്ടിയുള്ള പണത്തിന് വേണ്ടി പ്രണയിക്കുന്നവരെ തമ്മിൽ രഹസ്യമായി ഒന്നിക്കുന്ന ‘സിറനോ ഏജൻസി’ എന്നൊരു ഏജൻസി തുടങ്ങുന്നു. അവർക്ക് കിട്ടുന്ന എല്ലാ ക്ലയെറ്റുകളെയും അവർ രഹസ്യമായ ദൗത്യതിലൂടെ ഒന്നിപ്പിക്കുന്നു. അങ്ങനെയിരിക്കെയാണ് സങ്-യോങ് എന്നൊരാൾ സഹായം തേടി ഇവരെ അന്വേഷിച്ചു വരുന്നത്. പിന്നീടുള്ള സംഭവ വികാസങ്ങളാണ് ചിത്രം പറഞ്ഞു വെക്കുന്നത്.

ചെറിയ Budgetൽ പിടിച്ച ഈ ചിത്രം 2010ൽ കൊറിയയിൽ വലിയ ഹിറ്റായി മാറി. ‘ഇത് എന്ന മായം’ എന്ന പേരിൽ ഈ ചിത്രം 2015ൽ തമിഴിലേക്ക് Remake ചെയ്യുകയും ഉണ്ടായി.

അഭിപ്രായങ്ങൾ പങ്കുവെക്കാൻ

Categories : #Comedy #Korean #Romance

#MSone Release - 2856

MSONE GOLD RELEASE

Short Films Special Release – 10
ഷോര്‍ട്ട് ഫിലിംസ് സ്പെഷ്യല്‍ റിലീസ് – 10

ഷോർട് ഫിലിം – 01

Occurrence at Owl Creek Bridge (1961)
ഒക്കറൻസ് അറ്റ് ഔൾ ക്രീക്ക് ബ്രിഡ്ജ് (1961)

ഭാഷ : ഇംഗ്ലീഷ്
സംവിധാനം : Robert Enrico
പരിഭാഷ : മുബാറക്ക് റ്റി എൻ
പോസ്റ്റർ : ഉണ്ണി ജയേഷ്
ജോണർ : അഡ്വഞ്ചർ, ഡ്രാമ, ഷോർട്

IMDb ⭐️ 8.1/10

വിഖ്യാത അമേരിക്കൻ എഴുത്തുകാരൻ അംബ്രോസ് ബിയേഴ്സിൻ്റെ “An Occurrence at Owl Creek Bridge” എന്ന കഥയെ ആസ്പദമാക്കി, റോബർട്ട് എൻറിക്കോ സംവിധാനം ചെയ്ത്, 1961 ൽ പുറത്തിറങ്ങിയ ഫ്രഞ്ച് ഹ്രസ്വചിത്രമാണ് “La Rivière du hibou”.1964 ൽ, “ട്വൈലൈറ്റ് സോൺ” എന്ന ടെലിവിഷൻ പരമ്പരയിൽ സംപ്രേക്ഷണം ചെയ്തതിലൂടെ ഫ്രാൻസിന് പുറത്തേക്കും, ചിത്രം സ്വീകാര്യത നേടി.

അമേരിക്കൻ ആഭ്യന്തര യുദ്ധത്തിൻ്റെ പശ്ചാത്തലത്തിൽ, അലബാമയിലെ തോട്ടമുടമയായ പെയ്റ്റൻ ഫാർക്കറെ, സൈന്യം തൂക്കിലേറ്റാൻ തയ്യാറെടുക്കുന്നതായി കാണിച്ചു കൊണ്ടാണ് ചിത്രം ആരംഭിക്കുന്നത്. തുടർന്ന്, മരണത്തെ മുഖാമുഖം കാണുന്ന അയാളുടെ മനസ്സിലൂടെ കടന്നുപോകുന്ന സംഘർഷങ്ങൾ പ്രേക്ഷകന് മുന്നിൽ അനാവരണം ചെയ്യപ്പെടുന്നു. തുടക്കം മുതൽ തന്നെ പ്രേക്ഷകനെ പിടിച്ചിരുത്തുന്ന അവതരണ ശൈലിയും, ഞെട്ടിപ്പിക്കുന്ന കഥാന്ത്യവും ചിത്രത്തിൻ്റെ മാറ്റ് കൂട്ടുന്നു.

Editing എന്ന കലയ്ക്ക്, സിനിമയിൽ എത്രത്തോളം പ്രാധാന്യമുണ്ടെന്ന് 25 മിനിറ്റ് മാത്രം ദൈർഘ്യമുള്ള ഈ ചിത്രം നമ്മെ ഓർമപ്പെടുത്തുന്നു. “സമയത്താൽ കൊത്തിയെടുത്ത ശിൽപ്പമാണ് സിനിമയെന്ന” വാക്കുകളെ അക്ഷരംപ്രതി ശരിവെക്കുന്ന തരത്തിലാണ്, ചിത്രത്തിൻ്റെ എഡിറ്റിംഗ് നിർവഹിച്ചിട്ടുള്ളത്. പരിമിതമായ സാങ്കേതിക വിദ്യകളുടെ സഹായത്തോടെ അണിയിച്ചൊരുക്കിയ ഈ ചിത്രം, ചലച്ചിത്ര വിദ്യാർഥികൾക്ക് ഒരു അത്ഭുതമായി നിലകൊള്ളുന്നു.

ഇന്നും, നിരന്തരമായ ചർച്ചകൾക്കും പഠനങ്ങൾക്കും വിധേയമായി കൊണ്ടിരിക്കുന്ന ഈ ചിത്രം, 1962 ലെ കാൻ പുരസ്കാരവും, 1963 ൽ മികച്ച ഹ്രസ്വ ചിത്രത്തിനുള്ള ഓസ്ക്കാർ പുരസ്കാരവും നേടുകയുണ്ടായി.

അഭിപ്രായങ്ങൾ പങ്കുവെക്കാൻ

Categories : #Adventure #Drama #English #MsoneGold #Short

#MSone Release - 2857

#IranianFest - 06

Mum’s Guest (2004)
മംമ്സ് ഗസ്റ്റ് (2004)

ഭാഷ : പേർഷ്യൻ
സംവിധാനം : Dariush Mehrjui
പരിഭാഷ : ഷിഹാസ് പരുത്തിവിള
പോസ്റ്റർ : അഷ്‌കർ ഹൈദർ
ജോണർ : കോമഡി, ഡ്രാമ

IMDb ⭐️ 7.2/10

ഇറാനിയൻ സിനിമയെന്ന് കേൾക്കുമ്പോൾ ചിലരുടെ മനസ്സിൽ വിടരുന്നത് കുറെ ദൈന്യതയുടെ ചിത്രങ്ങളായിരിക്കാം. കഥാപാത്രങ്ങൾ അനുഭവിക്കുന്ന ദുരിതങ്ങൾ കണ്ട് വശം കെട്ടവർക്ക് തത്കാലം വിശ്രമിക്കാം. നർമ്മ മുഹൂർത്തങ്ങൾ കൊണ്ട് സമ്പന്നമായ മംമ്സ് ഗസ്റ്റ് എന്ന ഇറാനിയൻ ചിത്രമാണ് നിങ്ങൾക്കായി ഇന്ന് ഞാൻ പരിചയപ്പെടുത്തുന്നത്.

എഫത്തിന്റെ വീട്ടിലേക്ക് അവരുടെ ബന്ധുകൂടിയായ നവദമ്പതികൾ വിരുന്നിന് എത്തുന്നതും അവരെ സത്കരിക്കുന്നതുമാണ് കഥാപശ്ചാത്തലം. തേയിലയും പഞ്ചസാരയും പോലും ഇല്ലാതിരുന്നിടത്ത് നിന്നും അതിഗംഭീരമായ വിരുന്നുസത്കാരമൊരുക്കാൻ എഫത്തിന് കഴിയുമോ? എങ്കിൽ എങ്ങനെ? എഫത്തിന് ഇതൊരു അഭിമാന പ്രശ്നം കൂടിയാണ്.

ഈ സിനിമയിൽ എടുത്തുപറയേണ്ടത് കഥാപാത്രങ്ങളെയാണ്. വെറുതെ ആരും വന്നുംപോയുമില്ല. എന്തിനേറെ കുളത്തിൽ കിടക്കുന്ന ഗോൾഡ് ഫിഷിന് പോലും പ്രത്യേക റോളുണ്ടായിരുന്നു! എഫത്ത്, സിനിമാകമ്പക്കാരനായ ഭർത്താവ്, അവരുടെ മക്കൾ, അയൽക്കാരായ മയക്കുമരുന്നിന് അടിമയായ യൂസുഫ്, അവന്റെ സ്നേഹനിധിയായ ഗർഭിണിയായ ഭാര്യ, രണ്ടാം വർഷ ഫാർമസി കോഴ്സ് പഠിക്കുന്ന “ഡോക്ടർ”, തന്റെ കോഴികളെ സ്വന്തം ജീവനോളം സ്നേഹിക്കുന്ന ഉമ്മൂമ്മ… അങ്ങനെ എല്ലാവരും തകർത്താടിയ ഒരു കോമഡി ഫീൽഗുഡ് സിനിമയാണ് മംമ്സ് ഗസ്റ്റ്.

നർമ്മനിമിഷങ്ങൾ കൊണ്ട് സമ്പന്നമാണെങ്കിലും ചില നേരങ്ങളിൽ പ്രേക്ഷകരുടെ കണ്ണുകൾ ഈറനണിയുന്നുമുണ്ട്. ഭക്ഷണത്തിനായി കോഴിയെ അന്വേഷിച്ച് ഉമ്മൂമ്മയുടെ വീട്ടിൽ എത്തുന്ന യൂസുഫിന്റെ ഭാര്യയോട് അവർ പറയുന്നുണ്ട്, ആരോരുമില്ലാത്ത എനിക്ക് ആകെയുള്ളത് ഈ കോഴികൾ മാത്രമാണ്. അവൾക്ക് കൊടുക്കാനായി ഓരോ കൂടുകൾ തുറന്ന് കോഴിയെ പരിചയപ്പെടുത്തുമ്പോൾ ആ കോഴി മറ്റുള്ള കോഴികൾക്ക് ആഹാരം ബാക്കിവെക്കാതെ എല്ലാം ഒറ്റയ്ക്ക് തിന്നുകൊഴുത്തിരിക്കുകയാണ് അതുകൊണ്ട് അതിനെ കൊല്ലാമെന്ന് പറയുന്നു. പിന്നീട് മനസ്സ് മാറുന്നു. അങ്ങനെ ഓരോ കോഴികളുടെയും കുറ്റം പറഞ്ഞ് കഴുത്തിൽ കത്തിവെക്കുമ്പോൾ പിടയുന്നത് പ്രേക്ഷകരുടെ ഇടനെഞ്ചുകൂടിയാണ്.

വ്യത്യസ്തങ്ങളായ ചിത്രങ്ങൾ ഇഷ്ടപ്പെടുന്നവർക്ക് കാഴ്ചയുടെ വിരുന്നൊരുക്കാൻ പര്യാപ്തമായതാണ് മംമ്സ് ഗസ്റ്റ്

Awards: 22-മത് ഫജ്ർ അന്താരാഷ്ട്ര ചലച്ചിത്രമേളയിലെ മികച്ച ചിത്രം.

എന്തെങ്കിലും നേടിയെടുക്കണമെന്ന് ഒരാൾ പൂർണ്ണമനസ്സോടെ ആഗ്രഹിച്ചാൽ ആ ആഗ്രഹം സഫലമാക്കാനായി ലോകം മുഴുവൻ സഹായത്തിനെത്തും.
– പൗലോ കൊയ്ലോ

അഭിപ്രായങ്ങൾ പങ്കുവെക്കാൻ

Categories : #Comedy #Drama #Iranian_Fest #Persian