#MSone Release - 2865

Transcendence (2014)
ട്രാൻസെൻഡൻസ് (2014)

ഭാഷ : ഇംഗ്ലീഷ്
സംവിധാനം : Wally Pfister
പരിഭാഷ : അരുൺ ബി. എസ്. കൊല്ലം
പോസ്റ്റർ : നിഖിൽ ഇ കൈതേരി
ജോണർ : ആക്ഷൻ, ഡ്രാമ, സയൻസ് ഫിക്ഷൻ

IMDb ⭐️ 6.2/10

ഭൂമിയിൽ ഇന്നുവരെ ജനിച്ചിട്ടുള്ള മനുഷ്യരുടെയെല്ലാം ബുദ്ധിശക്തിയും വികാരങ്ങളും ബോധവുമുള്ളൊരു സംവിധാനം വന്നാൽ എങ്ങനെയിരിക്കും? അത് ലോകത്തിന് ഗുണമായിരിക്കുമോ അതോ ദോഷമായിരിക്കുമോ ഉണ്ടാക്കുക?

ആർട്ടിഫിഷ്യൽ ഇന്റലിജൻസ് രംഗത്തെ പ്രമുഖ ശാസ്ത്രജ്ഞനായ ഡോ. വിൽ കാസ്റ്റർ അത്തരമൊരു സംവിധാനം രൂപപ്പെടുത്താനുള്ള ശ്രമത്തിലാണ്. അദ്ദേഹമതിൽ വിജയിക്കുമോ അതോ പരാജയപ്പെടുമോ? അതോ സ്വന്തം ജീവിതം തന്നെ നഷ്ടപ്പെടുത്തുമോ? അതറിയാൻ 2014-ൽ പുറത്തിറങ്ങിയ ട്രാൻസെൻഡൻസ് (Transcendence) എന്ന അമേരിക്കൻ സയൻസ് ഫിക്ഷൻ ത്രില്ലർ ചലച്ചിത്രം കാണുക.

ജോണി ഡെപ്പ്, മോർഗൻ ഫ്രീമാൻ, കിലിയൻ മർഫി, റബേക്ക ഹാൾ തുടങ്ങീ വൻ താരനിരയുള്ള ഈ ചിത്രം ആർട്ടിഫിഷ്യൽ ഇന്റലിജൻസിന്റെ ഗുണങ്ങളും ദോഷങ്ങളും നമുക്ക് കാട്ടിത്തരുന്നു. ചടുലമായ ആക്ഷൻ രംഗങ്ങളോ പ്രേഷകരെ പിടിച്ചിരുത്തുന്ന മുഹൂർത്തങ്ങളോ ഒന്നുമില്ലാതെ പതിഞ്ഞ താളത്തിൽ സഞ്ചരിക്കുന്ന ഈ സിനിമ, പ്രേഷകരെ ചിന്തിപ്പിക്കുന്ന പല കാര്യങ്ങളും മുന്നോട്ടുവയ്ക്കുന്നുണ്ട്. ബോക്സ് ഓഫീസിൽ വേണ്ടത്ര ശ്രദ്ധ കിട്ടാതെപോയ ഈ ചിത്രം വ്യത്യസ്തമായ പ്രമേയം കൊണ്ടും അഭിനേതാക്കളുടെ മികച്ച പ്രകടനം കൊണ്ടും മികച്ച ഛായാഗ്രഹണം കൊണ്ടും നിരൂപകശ്രദ്ധ നേടുകയുണ്ടായി.

അഭിപ്രായങ്ങൾ പങ്കുവെക്കാൻ

Categories : #Action #Drama #English #Sci_Fi

#MSone Release - 2833

Jirisan (2021)
ജിരിസാൻ (2021)

Episodes: 09-10 / എപ്പിസോഡ്‌സ്: 09-10

ഭാഷ : കൊറിയൻ
സംവിധാനം : Eung-bok Lee
പരിഭാഷ : ഹബീബ് ഏന്തയാർ, കൃഷ്ണപ്രസാദ്‌ പി ഡി, ജീ ചാങ് വൂക്ക് & തൗഫീക്ക് എ
പോസ്റ്റർ : ഉണ്ണി ജയേഷ്
ജോണർ : ഡ്രാമ, മിസ്റ്ററി, ത്രില്ലർ

IMDb ⭐️ 7.9/10

ഏറെ വർഷത്തെ കാത്തിരിപ്പിനൊടുവിൽ സിഗ്നൽ, കിംഗ്ഡം എന്നീ പ്രശസ്ത കൊറിയൻ സീരീസുകളുടെ തിരക്കഥാകൃത്തായ “കിം യൂൻ ഹീ”യുടെ തിരക്കഥയിൽ 2021ൽ tvn 15-ാം വാർഷികവുമായി ബന്ധപ്പെട്ട്, ജിരിസാൻ നാഷണൽ പാർക്കിലെ റേഞ്ചർമാരുടെ ജീവിതകഥയെ അടിസ്ഥാനമാക്കി എടുത്ത ആക്ഷൻ, മിസ്റ്ററി ത്രില്ലർ സീരീസാണ് ജിരിസാൻ. ഒരു നീണ്ട ഇടവേളക്ക് ശേഷം കൊറിയൻ താരസുന്ദരി ജുൻ ജീ ഹ്യൂൻ മടങ്ങിയെത്തുന്ന സീരീസ്, മികച്ച വിഷ്വലുകൾ കൊണ്ടും, നിഗൂഢത നിറഞ്ഞ സംഭവങ്ങളും അതിനോടിണങ്ങി ചേർന്ന പശ്ചാത്തല സംഗീതം കൊണ്ടും ഇതിനോടകം കാഴ്ചക്കാരുടെ എണ്ണത്തിൽ റെക്കോർഡ് സ്ഥാപിച്ചു കഴിഞ്ഞു.

ജിരിസാൻ പർവ്വതം! ചിലർക്കത് പ്രതീക്ഷയുടെ പ്രകാശമാണെങ്കിൽ മറ്റു ചിലർക്കത് മരണമുനമ്പാണ്. കണക്കുകൾ പ്രകാരം വർഷം 3 ലക്ഷം പേരാണ് ജിരിസാൻ സന്ദർശിക്കുന്നത്. ആ പർവ്വതത്തിന്റെ കാവൽക്കാരാണ് ജിരിസാൻ നാഷണൽ പാർക്കിലെ റേഞ്ചർമാർ. അങ്ങനെയിരിക്കെ പുതുതായി സ്ഥലം മാറ്റം കിട്ടി വന്ന റേഞ്ചർ നായകൻ കാങ് ഹ്യുൻ ജോ(ജു ജി ഹൂൺ)ക്ക് കയറിയ ഉടനെ ഒരു മിസ്സിംഗ് കേസ് അന്വേഷിക്കേണ്ടി വരുന്നു. രാക്ഷസി എന്ന് ഇരട്ടപ്പേരുള്ള നായിക സോ യി ഗാങിനൊപ്പം (ജുൻ ജി ഹ്യുൺ) സെർച്ചിംഗ് പങ്കാളിയായി ചേർന്ന്, കാണാതായ ആ ഹൈക്കറെ അവർ കണ്ടെത്തുന്നു. പക്ഷേ നായകന്റെ പെരുമാറ്റത്തിലും വർത്തമാനത്തിലും പന്തികേട് തോന്നിയ നായിക, എങ്ങനെയാണ് കാണാതായ ഹൈക്കർ ഇരിക്കുന്ന സ്ഥലം കൃത്യമായി മനസ്സിലായത് എന്നും മറ്റും ചോദിക്കുന്നു. ഇത് ആദ്യമായിട്ടല്ല എന്നും, മുൻപ് പലതവണയായി കാണാതായ ഹൈക്കർമാർ പർവ്വതത്തിൽ എവിടെയുണ്ടെന്ന് തനിക്ക് ഒരു ദീർഘ ദൃഷ്ടിയിലൂടെ കാണാൻ സാധിക്കുമെന്നും പറയുന്നു. ആദ്യമൊന്നും ആരുമത് വിശ്വസിച്ചില്ല. പക്ഷേ പിന്നീട് പല നിഗൂഢമായ സംഭവങ്ങളും ജിരിസാൻ പർവ്വതത്തെ ചുറ്റിപ്പറ്റി നടക്കുന്നു. പർവ്വതത്തിലേക്ക് ഹൈക്കിങ്ങിന് വന്ന് സഹായം ലഭിക്കാതെ വഴിതെറ്റുന്ന ഹൈക്കർമാർ സ്വാഭാവികമായി മരിക്കുന്നതല്ലെന്നും, ആരോ കൊലപ്പെടുത്തുന്നതാണെന്നും റേഞ്ചർമാർ മനസ്സിലാക്കുന്നു. സംഭവത്തിന്റെ ചുരുളഴിക്കാൻ ഇറങ്ങിയ നായകനും നായികയ്ക്കും പ്രതീക്ഷിക്കാത്ത ചില സംഭവങ്ങളായിരുന്നു നേരിടേണ്ടിവന്നത്.
ആരാണത്? എന്താണ് ജിരിസാൻ പർവ്വതത്തിലെ ആ നിഗൂഢത?

അഭിപ്രായങ്ങൾ പങ്കുവെക്കാൻ

Categories : #Drama #Korean #Mystery #Thriller #Web_Series

#MSone Release - 2866

Miracle: Letters to the President (2021)
മിറക്കിൾ: ലെറ്റേഴ്സ് ടു ദി പ്രസിഡന്റ് (2021)

ഭാഷ : കൊറിയൻ
സംവിധാനം : Jang-Hoon Lee
പരിഭാഷ : ഹബീബ് ഏന്തയാർ & ഗോകുൽ എസ് എൻ ചെറുവല്ലൂർ
ജോണർ : ഡ്രാമ

IMDb ⭐️ 7.3/10

കൊറിയൻ സിനിമാപ്രേമികളുടെ മനം കവർന്ന ‘ബീ വിത്ത്‌ യൂ‘ വിന്റെ സംവിധായകനായ ലീ ജാങ് ഹൂണിന്റെ സംവിധാനത്തിലൊരുങ്ങി 2021ൽ പുറത്തിറങ്ങിയ ഫീൽഗുഡ്, റൊമാന്റിക്, ഡ്രാമ ചിത്രമാണ് ‘മിറക്കിൾ: ലെറ്റേഴ്സ് ടു ദി പ്രസിഡന്റ്’

ഗതാഗത സൗകര്യങ്ങൾ അത്യന്തം പരിതാപകരമായ ഒരു ഗ്രാമമാണ് ബുഞ്ചോൺ-രി. യാത്ര ചെയ്യാനായി അവിടുത്തെ ഗ്രാമവാസികളുടെ ഏക ആശ്രയം തീവണ്ടി മാത്രമാണ്. അതും സ്വന്തം ഗ്രാമത്തിൽ സ്റ്റേഷൻ ഇല്ലാത്തതിനാൽ റെയിൽവേ പാളത്തിലൂടെ കിലോമീറ്ററുകളോളം തുരങ്കങ്ങളും പാലങ്ങളും കടന്നു വേണം അയൽഗ്രാമത്തിലെ സ്റ്റേഷനിൽ എത്താൻ. പാസഞ്ചർ ട്രയിനുകളുടെ സമയം ഗ്രാമവാസികൾക്ക് അറിയാം. പക്ഷേ, സമയം തെറ്റി വരുന്ന ചരക്ക് തീവണ്ടികൾ ഒരുപാട് മനുഷ്യ ജീവനുകൾ കവർന്നിട്ടുണ്ട്. സ്റ്റേഷനില്ലാത്തതിനാൽ പാളത്തിലൂടെ നടക്കേണ്ടി വരുന്ന തന്റെ നാട്ടുകാരുടെ കഷ്ടതകൾ അവസാനിപ്പിക്കാൻ, ഒരു റെയിൽവേ വേണമെന്ന് ആവശ്യപ്പെട്ട് ജൂൻ ക്യുങ് എന്ന പയ്യൻ നിരന്തരമായി പ്രസിഡന്റിന് കത്തയക്കുന്നു. തന്റെ നാട്ടിലൊരു സ്റ്റേഷൻ കൊണ്ടുവരാനുള്ള അവന്റെ പരിശ്രമങ്ങളും ഹൈസ്‌കൂൾകാലത്തെ അവന്റെ പ്രണയവുമുൾപ്പെടെ ഒട്ടേറെ വൈകാരികനിമിഷങ്ങൾ കോർത്തിണക്കിയാണ് ഈ ചിത്രം മുന്നോട്ട് പോകുന്നത്.

24 വർഷങ്ങൾക്ക് ശേഷം 2012ൽ അടച്ചുപൂട്ടിയ കൊറിയയിലെ ആദ്യത്തെ പ്രൈവറ്റ് സ്റ്റേഷനായ യാങ്‌വോണിന്റെ ഉദയത്തിന് പിന്നിലെ യഥാർത്ഥ സംഭവവും, ജൂൻ ക്യുങ് എന്ന ബാലൻ അവിടെ റെയിൽവേ സ്റ്റേഷൻ പണിയാൻ അത്രമേൽ ആഗ്രഹിച്ചിരുന്നതിന്റെ ആ സത്യവും രസകരമായ ഒരു കഥയിലൂടെ പറയുകയാണ് സംവിധായകൻ. സിനിമ അതിന്റെ പര്യവസാനത്തോട് അടുക്കുമ്പോൾ, തലക്കെട്ടിന്റെ അർത്ഥം മനസ്സിലാകുന്നതോടെ, കൊറിയൻ സിനിമ പ്രേമികൾക്ക് എന്നെന്നും മനസ്സിൽ സൂക്ഷിക്കാനുള്ള ഒരു മനോഹര ഗ്രാമ ചിത്രമായി മാറും ഈ സിനിമ.

അഭിപ്രായങ്ങൾ പങ്കുവെക്കാൻ

Categories : #Drama #Korean

#MSone Release - 96

The Chaser (2008)
ദി ചേസര്‍ (2008)

ഭാഷ : കൊറിയന്‍
സംവിധാനം : Na Hong-jin
പരിഭാഷ : ഫ്രാൻസിസ് സി വർഗീസ്
പോസ്റ്റർ : രോഹിത്ത് ജി. എസ്
ജോണർ : ആക്ഷൻ, ക്രൈം, ത്രില്ലർ

IMDb ⭐️ 7.8/10

ദി യെല്ലോ സീ (2010), ദി വെയിലിംഗ് (2016) തുടങ്ങിയ സിനിമകളുടെ സംവിധായകനായ നാ ഹോങ്-ജിന്റെ ആദ്യ സംവിധാന സംരംഭമാണ് ദി ചേസർ.

കൂട്ടിക്കൊടുപ്പുക്കാരനായ ജുങ്-ഹോ ഒരു മുൻ പോലീസ് ഉദ്യോഗസ്ഥൻ കൂടിയാണ്. തന്റെ കീഴിലുള്ള പെൺക്കുട്ടികളെ കാണാതാവുക മൂലം കടുത്ത സാമ്പത്തിക പ്രതിസന്ധിയിലാണയാൾ. കാണാതായവരെയെല്ലാം വിളിച്ചിരിക്കുന്നത് ഒരാളാണെന്ന് മനസിലാക്കുന്ന ജുങ്-ഹോ, അയാളെ കുടുക്കാൻ തീരുമാനിക്കുന്നു. അതിനായി തന്റെ മറ്റൊരു പെൺക്കുട്ടിയെ അയാൾ നിയോഗിക്കുന്നു. നായകൻ അവരെ പിന്തുടരാൻ തുടങ്ങുന്നു. പക്ഷേ അയാളുടെ കണക്ക് കൂട്ടലുകൾ തെറ്റുന്നു. തുടർന്ന് നടക്കുന്ന സംഭവവികാസങ്ങളാണ് ചിത്രം മുഴുവൻ.

യൂ യംഗ്-ചൊൾ എന്ന യഥാർത്ഥ സീരിയൽ കൊലപാതകിയുടെ കൊലപാതക പരമ്പരയിൽ നിന്ന് പ്രചോദനം ഉൾക്കൊണ്ടാണ് ഈ ചിത്രം നിർമിച്ചിരിക്കുന്നത്. റിയലിസ്റ്റികായ അവതരണ രീതിയും, മികച്ച ഛായാഗ്രഹണവും, ചിത്രസംയോജനവും, സംഗീതവും ചിത്രത്തെ കൂടുതൽ ആസ്വാദ്യകരമാക്കുന്നു.

N.B: അശ്ലീല സംഭാഷണങ്ങളും, വയലൻസും ഉള്ളതിനാൽ, പ്രായപൂർത്തിയായവർ മാത്രം ഈ ചിത്രം കാണാൻ ശ്രദ്ധിക്കുക.

അഭിപ്രായങ്ങൾ പങ്കുവെക്കാൻ

Categories : #Action #Crime #Korean #Thriller

#MSone Release - 2867

Venom: Let There Be Carnage (2021)
വെനം: ലെറ്റ് ദെയർ ബീ കാർണേജ് (2021)

ഭാഷ : ഇംഗ്ലീഷ്
സംവിധാനം : Andy Serkis
പരിഭാഷ : മാജിത് നാസർ & കൃഷ്ണപ്രസാദ്‌ പി ഡി,
പോസ്റ്റർ : ഉണ്ണി ജയേഷ്
ജോണർ : ആക്ഷന്‍, അഡ്വഞ്ചർ, സയൻസ് ഫിക്ഷൻ

IMDb ⭐️ 6.1/10

വെനം ആദ്യ ഭാഗത്തിന്റെ തുടർച്ചയായാണ് രണ്ടാം ഭാഗവും ഒരുക്കിയിരിക്കുന്നത്.

ജയിലിൽ സന്ദർശകരെ കാണാൻ വിസമ്മതിച്ചിരുന്ന ക്ലീറ്റസ് ക്യാസഡി എന്ന സീരിയൽ കില്ലർ, എഡി ബ്രോക്കിനോട് സംസാരിക്കണമെന്ന് ആവശ്യപ്പെടുന്നു. ഒരു എക്സ്‌ക്ലൂസിവിനായി കാത്തിരിക്കുന്ന എഡി, വെനത്തിനോടൊപ്പം ആ കൂടിക്കാഴ്ചയ്ക്കായി തയ്യാറാകുന്നു. എന്നാൽ ആ സന്ദർശനം ഇവരുടെ ജീവിതത്തെ തന്നെ മാറ്റി മറിക്കുകയാണ്.

ആദ്യ ചിത്രത്തിൽ നിന്ന് വിഭിന്നമായി കോമഡി രംഗങ്ങൾക്ക് കൂടുതൽ പ്രാധാന്യം നൽകിയാണ് രണ്ടാം ഭാഗം ഒരുക്കിയിരിക്കുന്നത്. വെനവും, എഡിയും തമ്മിലുള്ള കൊമ്പിനേഷൻ സീനുകൾ ശരിക്കും ചിരി ഉണർത്തുന്നുണ്ട്. ചിത്രം ബോക്സ്ഓഫിസിലും മികച്ച പ്രകടനം കാഴ്ച വെയ്ക്കുകയുണ്ടായി.

അഭിപ്രായങ്ങൾ പങ്കുവെക്കാൻ

Categories : #Action #Adventure #English #Sci_Fi

#MSone Release - 2863

The Wheel of Time – Season 01 (2021)
ദ വീൽ ഓഫ് ടൈം – സീസൺ 01 (2021)

Episodes – 4 / എപ്പിസോഡ്സ് – 4

ഭാഷ : ഇംഗ്ലീഷ്
നിർമാണം : Sony Pictures Television
പരിഭാഷ : വിഷ്ണു പ്രസാദ് & ഗിരി പി. എസ്.
പോസ്റ്റർ : പ്രവീൺ അടൂർ
ജോണർ : ആക്ഷൻ, അഡ്വഞ്ചർ, ഡ്രാമ

IMDb ⭐️ 7.4/10

റോബർട്ട് ജോർദന്റെ “ദ വീൽ ഓഫ് ടൈം” എന്ന നോവൽ സീരിസിനെ ആധാരമാക്കി അതേ പേരിൽ തന്നെ ആമസോണിലൂടെ പുറത്ത് വന്ന സീരീസാണ് “ദ വീൽ ഓഫ് ടൈം” എപ്പിക് ഫാന്റസി സീരീസ് നോവലുകളുടെ ചരിത്രത്തിലെ നാഴിക കല്ലെന്ന് വിശേഷിപ്പിക്കുന്ന ഒരു നോവൽ ചലച്ചിത്ര രൂപേണ പുറത്ത് വരുമ്പോൾ വേണ്ട എല്ലാ മികവും ആദ്യ എപ്പിസോഡുകളിൽ തന്നെ ഈ സീരീസ് പ്രേക്ഷകർക്ക് സമ്മാനിക്കുന്നുണ്ട്.

ഐസ് സെഡായ് എന്ന സംഘടനയിൽ നിന്നും റോസമുണ്ട് പൈക്ക് അവതരിപ്പിക്കുന്ന കഥാപാത്രമായ മൊയ്റെയ്ൻ, തിന്മയെ നേരിടാൻ പുനഃജന്മം നേടിയ ഡ്രാഗണിനെ തിരഞ്ഞു പോകുന്നതിലൂടെയാണ് കഥ ആരംഭിക്കുന്നത്.

ടു റിവേഴ്സ് എന്ന സ്ഥലത്ത് 4 ആളുകളാണ് സാധ്യത എന്ന് മനസ്സിലാക്കിയ മൊയ്റെയ്ൻ അവരെ തേടി വരുന്ന അതേ സമയം തിന്മയുടെ പ്രതീകമായ ഡാർക്ക്‌ വണ്ണും സൈന്യവും ഇതേ ആളുകളെ തേടി ടു റിവേഴ്‌സിലേക്ക് എത്തുകയും ചെയ്യുന്നു.

ഡ്രാഗൺ ആരാണ്, മൊയ്റെയ്ന് ഡ്രാഗണെ കണ്ടെത്താനാകുമോ, മൊയ്റെയ്ന് ഡാർക്ക്‌ വണ്ണിനേയും സൈന്യത്തെയും മറികടക്കാനാകുമോ എന്നതൊക്കെയാണ് ആദ്യ സീസണിൽ പ്രേക്ഷകർക്ക് കാണാനാകുന്നത്.

അഭിപ്രായങ്ങൾ പങ്കുവെക്കാൻ

Categories : #Action #Adventure #Drama #English #Web_Series

#MSone Release - 2868

Coffee or Tea? (2020)
കോഫി ഓർ ടീ? (2020)

ഭാഷ : ചൈനീസ്
സംവിധാനം : Derek Hui
പരിഭാഷ : സുബീഷ് ചിറ്റാരിപ്പറമ്പ്
പോസ്റ്റർ : ഉണ്ണി ജയേഷ്
ജോണർ : കോമഡി, ഡ്രാമ

IMDb ⭐️ 6.1/10

Derek Hui യുടെ സംവിധാനത്തിൽ 2020-ൽ പുറത്തിറങ്ങിയ ഒരു ചൈനീസ് ചലച്ചിത്രമാണ് കോഫി ഓർ ടീ. ചൈനയിലെ യുനാൻ പ്രവിശ്യയിൽ, പ്രകൃതിസൗന്ദര്യം കവിഞ്ഞൊഴുകുന്ന ഒരു ഗ്രാമത്തിൽ നടക്കുന്ന കഥയാണ് ഈ ചിത്രത്തിൽ വർണ്ണിക്കുന്നത്.

വ്യത്യസ്ഥ സാഹചര്യങ്ങളിൽ ജീവിച്ച മൂന്ന് ചെറുപ്പക്കാർ. ഒരാൾ ജീവിതം മടുത്ത് ആത്മഹത്യ ചെയ്യാൻ വരെ തീരുമാനമെടുത്തയാൾ.
രണ്ടാമൻ ഗ്രാമത്തിൽ നിന്ന് നഗരത്തിലേക്ക് ജോലിക്കായി വന്നെങ്കിലും, മനസ്സു മുഴുവൻ ഗ്രാമത്തിൽ അർപ്പിച്ച് നാളുകൾ തള്ളി നീക്കുന്നവൻ. മൂന്നാമൻ പ്രണയം കാപ്പിയോട് മാത്രം എന്ന് മനസ്സിലുറപ്പിച്ച് കൃഷിയുമായി ജീവിക്കുന്ന വ്യക്തി.
ഇവർ ഒരു പ്രത്യേക സാഹചര്യത്തിൽ ഒരുമിച്ച് കണ്ടു മുട്ടുകയും, ഒരു ബിസിനസ്സ് ചെയ്യാൻ തീരുമാനമെടുക്കുകയും ചെയ്യുന്നു. അതാണ് കോഫി ബിസിനസ്സ്.
പക്ഷേ ആ ഗ്രാമത്തിൽ തേയിലയാണ് മുഖ്യ വരുമാനം. അവിടെ കാപ്പി എന്ന് കേട്ടാൽ തന്നെ കലിവരുന്ന ആളുകളാണ് കൂടുതലും. അവിടെ ഈ ചെറുപ്പക്കാർക്ക് എന്ത് ചെയ്യാൻ സാധിക്കും എന്നത് നർമ്മത്തിന്റെ മേമ്പൊടിയോടെ പ്രേക്ഷകർക്ക് മുൻപിൽ എത്തുകയാണ്.

അഭിപ്രായങ്ങൾ പങ്കുവെക്കാൻ

Categories : #Chinese #Comedy #Drama

#MSone Release - 2869

Agatha Christie’s Poirot: Season 8 (2001-02)
അഗത ക്രിസ്റ്റീസ് പ്വാറോ: സീസൺ 8 (2001-02)

Episode 01: Evil Under the Sun
എപ്പിസോഡ് 01: ഈവിൾ അണ്ടർ ദി സൺ

ഭാഷ: ഇംഗ്ലീഷ്
നിർമാണം : London Weekend Television
പരിഭാഷ: ഫഹദ് അബ്ദുൾ മജീദ്
പോസ്റ്റർ : പ്രവീൺ അടൂർ
ജോണർ : ക്രൈം, ഡ്രാമ, മിസ്റ്ററി

IMDb ⭐️8.6/10

അഗത ക്രിസ്റ്റീസ് പ്വാറോ (1989 – 2013)

അഗത ക്രിസ്റ്റീസ് പ്വാറോ: സീസൺ 1 (1989)
അഗത ക്രിസ്റ്റീസ് പ്വാറോ: സീസൺ 2 (1990)
അഗത ക്രിസ്റ്റീസ് പ്വാറോ: സീസൺ 3 (1990 – 1991)
അഗത ക്രിസ്റ്റീസ് പ്വാറോ: സീസൺ 4 (1992)
അഗത ക്രിസ്റ്റീസ് പ്വാറോ: സീസൺ 5 (1993)
അഗത ക്രിസ്റ്റീസ് പ്വാറോ: സീസൺ 6 (1994)
അഗത ക്രിസ്റ്റീസ് പ്വാറോ: സീസൺ 7 (2000)

തന്റെ നടത്തം കൊണ്ടും, പെരുമാറ്റം കൊണ്ടും, നിരീക്ഷണപാഠവം കൊണ്ടും, എത്രവലിയ ചുരുളുകൾക്കിടയിലും കുടുങ്ങിക്കിടക്കുന്ന കേസുകളെ നിസ്സാരമായി അഴിച്ചെടുക്കാനുള്ള അസാമാന്യ കഴിവ് കൊണ്ടും അഗതാ ക്രിസ്റ്റിയുടെ തൂലികയിലൂടെ ലോകം അറിഞ്ഞ അപസർപ്പകനാണ് ഹെർക്യൂൾ പ്വാറോ. ആരാധകരുടെ എണ്ണത്തിൽ ഷെർലക്ക് ഹോംസിന് തൊട്ടുപിന്നിൽ സ്ഥാനം പിടിക്കാനും അതുതന്നെയാണ് കാരണവും.

ക്യാപ്റ്റൻ ഹേസ്റ്റിംഗ്സിന്റെ പുതിയ റെസ്റ്റോറന്റ് ഉത്ഘാടനത്തിന് ചെന്നതാണ് പ്വാറോ. സ്വാദിഷ്ടമായ ഒരു സൂപ്പ് കുടിച്ചതോടെ പ്വാറോ ബോധം കെട്ടു വീണു. പേടിക്കാനില്ല... പ്വാറോയുടെ പൊണ്ണത്തടിയാണ്
പ്രശ്നക്കാരൻ. തടി കുറയ്ക്കാൻ നല്ല സ്ട്രിക്റ്റ് ഡയറ്റും വ്യായാമവും, പിന്നെ വെയിലും കടലുമൊക്കെയായി ചെറിയാെരു ചികിത്സക്കായി പ്വാറോയ്ക്ക് തെക്കൻ തീരത്തുള്ള സാൻഡി കോവ് ഹോട്ടലിലേക്ക് മനസ്സില്ലാമനസ്സോടെ മാറേണ്ടി വരുന്നു. പ്വാറോയ്ക്ക് പുറമെ ക്യാപ്റ്റൻ ഹേസ്റ്റിംഗ്സും, നടിയായ അർലേന സ്റ്റുവർട്ടും ഭർത്താവും മകനും അവരുടെ പരിചയക്കാരായ മറ്റു പലരും ഉണ്ടായിരുന്നു ആ ഹോട്ടലിൽ. പക്ഷേ, ഹോട്ടലിൽ ചെന്ന് കയറിയതും പ്വാറോയ്ക്ക് അവിടെ അസ്വാഭാവികത മണത്തു. നിഗൂഡമായ പെരുമാറ്റങ്ങളായിരുന്നു ചുറ്റുപാടും.
ചെറിയൊരു വശപ്പിശക് തോന്നിയ പ്വാറോയ്ക്ക്, വലിയ എന്തോ സംഭവിക്കാൻ സാധ്യതയുണ്ടെന്ന ഉൾവിളി വന്നു. ചിന്ത തെറ്റിയില്ല..!! അതിഥികളിൽ ഒരാൾ ദുരൂഹമായി കൊല്ലപ്പെടുന്നു. തന്റെ ചുറ്റും നിഗൂഡരായ ഒരുപറ്റം ആളുകളെ കണ്ട പ്വാറോയുടെ മനസ്സിൽ ഉത്തരമില്ലാത്ത ഒരുപാട് ചോദ്യങ്ങൾ ഉയർന്നു.
ആരായിരിക്കും ആ കൊലയാളി?
എന്തായിരിക്കും പ്രേരണ?

കഥയിലെ ഓരോ കഥാപാത്രങ്ങളും വളരെ ദുരൂഹമായി തുടരുന്ന, പ്രേക്ഷകന്റെ ഊഹങ്ങളെ പോലും കാറ്റിൽ പറത്തുന്ന, അതിനിഗൂഢവും അവിശ്വസനീയവുമായ ഈ ക്രൈം ത്രില്ലർ നിങ്ങളെ ആശയക്കുഴപ്പത്തിന്റെ പടുകുഴിയിൽ വീഴ്ത്തുമെന്നത് തീർച്ചയാണ്. സീരീസ് മുഴുവനായി കാണാത്തവർക്കും ഒരു സിനിമ എന്നോണം കാണാൻ സാധിക്കുന്നതാണ് “അഗതാ ക്രിസ്റ്റിയുടെ പ്വാറോ” സീരീസിലെ ഏട്ടാം സീസണിലെ ആദ്യത്തെ എപ്പിസോഡായ “ഈവിൾ അണ്ടർ ദി സൺ”.

അഭിപ്രായങ്ങൾ പങ്കുവെക്കാൻ

Categories : #Crime #Drama #English #Mystery

#MSone Release - 130

The Matrix (1999)
ദി മേട്രിക്സ് (1999)

ഭാഷ : ഇംഗ്ലീഷ്
സംവിധാനം : Lana Wachowski & Lilly Wachowski
പരിഭാഷ : മാജിത് നാസർ
പോസ്റ്റർ : രോഹിത്ത് ജി. എസ്
ജോണർ : ആക്ഷൻ, സയൻസ് ഫിക്ഷൻ

IMDb ⭐️ 8.7/10

തങ്ങളുടെ സുഖ സൗകര്യത്തിനായി യന്ത്രങ്ങളെ സൃഷ്ടിച്ച മനുഷ്യനെ തന്നെ അടക്കി വാഴുന്ന നിർമ്മിത ബുദ്ധിയുള്ള യന്ത്രങ്ങളുടെ യുഗമാണ് ദി മേട്രിക്സ് എന്ന സയൻസ് ഫിക്ഷൻ ചിത്രത്തിന്റെ പശ്ചാത്തലം.

മേട്രിക്സ് എന്ന സ്വപ്‍നലോകത്ത് മനുഷ്യരെ അടിമകളെപ്പോലെ ജീവിക്കാൻ വിട്ട്, അവരിൽ നിന്നുള്ള ഊർജ്ജം സ്വീകരിക്കുന്ന യന്ത്രങ്ങൾക്കെതിരെ ഒരു കൂട്ടം മനുഷ്യർ നടത്തുന്ന ചെറുത്തുനിൽപ്പിന്റെ കഥയാണ് ചിത്രം പറയുന്നത്.

ബുള്ളറ്റ് ടൈം എന്ന പ്രത്യേക വിഷ്വൽ എഫക്ട് സംവിധാനം ആദ്യമായി ഉപയോഗിച്ചതു വഴി, ദി മേട്രിക്സ്, ഹോളിവുഡ് ആക്ഷൻ ചിത്രങ്ങൾക്കിടയിൽ ഒരു തരംഗം തന്നെ സൃഷ്ടിക്കുകയുണ്ടായി.

ചിത്രത്തിന്റെ രണ്ടാം ഭാഗമായ ദി മേട്രിക്സ് റീലോഡഡ്, 2003ൽ പുറത്തിറങ്ങി.

അഭിപ്രായങ്ങൾ പങ്കുവെക്കാൻ

Categories : #Action #English #Sci_Fi

#MSone Release - 2870

We're the Millers (2013)
വീ ആർ ദ മില്ലേഴ്സ് (2013)

ഭാഷ : ഇംഗ്ലീഷ്
സംവിധാനം : Rawson Marshall Thurber
പരിഭാഷ : മാജിത് നാസർ
പോസ്റ്റർ : രോഹിത്ത് ജി. എസ്
ജോണർ : കോമഡി, ക്രൈം

IMDb ⭐️ 7.0/10

ചെറിയ ലെവലിൽ കഞ്ചാവൊക്കെ വിറ്റ് അല്ലല്ലില്ലാതെ കഴിഞ്ഞു പോയിരുന്ന ഡേവിഡിന് സാഹചര്യങ്ങളുടെ സമ്മർദ്ദം മൂലം ഡ്രഗ് സ്മഗ്ലിങ്ങിലേക്ക് തിരിയേണ്ടി വരുന്നു. സ്മഗ്ലിങ്ങ് എന്ന് പറയുമ്പോ, സ്വല്പം കഞ്ചാവ് മെക്സിക്കോയിൽ നിന്ന് അമേരിക്കയിലേക്ക് കടത്തണം. അത്രേയൂള്ളൂ.

കടുത്ത പരിശോധനാ സംവിധാനങ്ങൾ മറികടന്ന് സാധനം അമേരിക്കയിൽ എത്തിക്കാൻ ഒരു വെറൈറ്റി ഐഡിയയാണ് ഡേവിഡ് പയറ്റുന്നത്. മെക്സിക്കോയിലേക്കൊരു വ്യാജ ഫാമിലി ട്രിപ് നടത്തുക. ഫാമിലി ആകുമ്പോൾ പരിശോധനകൾ ഒന്നുമില്ലാതെ അതിർത്തി കടക്കുകയും ചെയ്യാം, തിരികെ പോരുമ്പോൾ സ്മഗ്ലിങ്ങും നടക്കും.

എന്നാൽ, യാതൊരു ബോധവുമില്ലാത്തവരാണ് ഫാമിലി ആയി ഡേവിഡിനെ അനുഗമിക്കുന്നതെങ്കിലോ?
അങ്ങനെയുള്ള ഒരു ലോക്കൽ സ്മഗ്ലിങ്‌ ടീമിന്റെ കഥയാണ് വീ ആർ ദ മില്ലേഴ്സ് പറയുന്നത്.

തുടക്കം മുതൽ ഒടുക്കം വരെ ഓർത്തു ചിരിക്കാനുള്ള ഒരുപാട് നിമിഷങ്ങൾ ചിത്രം സമ്മാനിക്കുന്നുണ്ട്.
അശ്ലീല സംഭാഷണങ്ങൾ ധാരാളമുള്ളതിനാൽ പ്രേക്ഷകർ വിവേകപൂർവ്വമായ അകലം പാലിക്കുക.

അഭിപ്രായങ്ങൾ പങ്കുവെക്കാൻ

Categories : #Comedy #Crime #English