നടുക്കുന്നൊരു കുറ്റകൃത്യത്തിന്റെ മൂകസാക്ഷിയായി ഒരു കോഴി മാറിയാലോ?

എരിതീയിൽ നിന്നും വറചട്ടിയിലേക്ക് എന്ന പ്രയോഗം അന്വർത്ഥമാക്കുന്നതായിരുന്നു സറിയിലസത്തിന്റെ ഗുരുതുല്യനായ ഗോർജി പാൽഫിയുടെ “ഹെൻ” എന്ന ചിത്രത്തിലെ പിടക്കോഴിയുടെ ജീവിതം. തീൻമേശയിൽ നിന്നും രക്ഷപ്പെട്ട് മനുഷ്യരുടെ ഇടയിലേക്ക് തത്തിക്കളിച്ച് പോകുന്ന നമ്മുടെ താരം ഒരുനിമിഷമെങ്കിലും കരുതിയിട്ടുണ്ടാകും തീൻമേശയായിരുന്നു ഇതിലും ഭേദമെന്ന്! ഒരു കോഴിയുടെ വീക്ഷണകോണിലൂടെ കഥപറയുന്ന ഈ ചിത്രത്തിൽ പ്രണയമുണ്ട്, വിരഹമുണ്ട്, നാം കാണാത്ത മനുഷ്യജീവിതവുമുണ്ട്.

ആദ്യാവസാനം ത്രില്ലടിപ്പിക്കുന്ന ഈ സിനിമയിലെ കോഴിയുടെ അതിസാഹസിക പ്രയാണം അക്ഷരാർത്ഥത്തിൽ ഞെട്ടിപ്പിക്കുന്നതാണ്. അവളുടെ സന്തോഷത്തിലും ദുഃഖത്തിലും പ്രേക്ഷകരുടെ കണ്ണുകൾ ഒരുപോലെ നിറയും. കോഴിയുടെ ചില നോട്ടങ്ങൾ പോലും ഉള്ളുപൊള്ളിക്കും. ചിത്രമവസാനിക്കുമ്പോൾ ആരും പറഞ്ഞുപോകും, ഈ കോഴി ഒരു സാധാരണ കോഴിയല്ലെന്ന്.

TIFF, സാൻ സെബാസ്റ്റ്യൻ, ടോക്കിയോ, റോം തുടങ്ങിയ പ്രധാനപ്പെട്ട അന്താരാഷ്ട്ര ചലച്ചിത്രോത്സവങ്ങളിൽ പ്രദർശിപ്പിച്ച ചിത്രത്തിന് വ്യാപകമായ പ്രേക്ഷകപ്രശംസ ലഭിച്ചിരുന്നു.

എന്ത് ആഗ്രഹവും നടത്തി തരുന്ന ഒരു മാന്ത്രിക വസ്തുവാണ് വൺ വിഷ് വില്ലോ. അതുവെച്ച് താൻ സ്നേഹിക്കുന്ന പെൺകുട്ടി ഈ ലോകത്തിൽ മറ്റാരെക്കാളുമധികമായി തന്നെ സ്നേഹിക്കണമെന്ന് ഒരാൾ ആഗ്രഹിക്കുന്നു. ആ ആഗ്രഹത്തിന്റെ അനന്തരഫലങ്ങൾ ചെറുതായൊന്ന് കൈവിട്ടുപോകുന്നു.

ലോസ് ആഞ്ചൽസിലെ തിരക്കുകൾക്കിടയിൽ, ബൗളിംഗ് കളിച്ചും ‘വൈറ്റ് റഷ്യൻ’ കുടിച്ചും യാതൊരു ലക്ഷ്യവുമില്ലാതെ അലസമായി ജീവിക്കുന്ന ജെഫ്രി ലെബോവ്സ്കി അഥവാ ‘ദി ഡ്യൂഡ്’ എന്ന കഥാപാത്രത്തിലൂടെയാണ് ഈ ചിത്രം വികസിക്കുന്നത്. എന്നാൽ ഇതേ പേരുള്ള മറ്റൊരു കോടീശ്വരനാണെന്ന് തെറ്റിദ്ധരിച്ച് ചില ഗുണ്ടകൾ ഡ്യൂഡിന്റെ വീട്ടിൽ കയറുകയും, അയാളുടെ പ്രിയപ്പെട്ട വിരിപ്പിൽ മൂത്രമൊഴിക്കുകയും ചെയ്യുന്നതോടെ ആ ശാന്തജീവിതം തകിടം മറിയുന്നു.

ഇതിന് നഷ്ടപരിഹാരം ചോദിക്കാൻ പോകുന്ന ഡ്യൂഡ് ചെന്ന് ചാടുന്നത്, തട്ടിക്കൊണ്ടുപോകലുകാരും നൈലിസ്റ്റുകളും (ജീവിതത്തിന് പ്രത്യേക അർത്ഥമൊന്നുമില്ലെന്ന് വിശ്വസിക്കുന്നവർ), ഭ്രാന്തന്മാരായ ഗുണ്ടകളും പോൺ ഫിലിം നിർമ്മാതാക്കളും ഒക്കെയുള്ള അത്യന്തം രസകരവും എന്നാൽ അപകടകരവുമായ ഒരു അധോലോക കുരുക്കിലാണ്. ഓരോ പുതിയ കഥാപാത്രവും കഥയെ കൂടുതൽ വിചിത്രമാക്കുമ്പോൾ, എന്താണ് യഥാർത്ഥത്തിൽ നടക്കുന്നതെന്ന് പ്രേക്ഷകനും ഡ്യൂഡിനൊപ്പം തിരഞ്ഞുനടക്കേണ്ടി വരും.

കോയൻ ബ്രദേഴ്സിന്റെ സംവിധാനത്തിൽ 1998-ൽ പുറത്തിറങ്ങിയ ഈ ചിത്രം വെറുമൊരു ക്രൈം കോമഡി മാത്രമല്ല; പൂർണമായും നിയന്ത്രണം വിട്ടുപോകുന്ന ഒരു കഥയെ എത്രത്തോളം രസകരവും ഓർമ്മയിൽ തങ്ങിനിൽക്കുന്നതുമായ അനുഭവമാക്കി മാറ്റാം എന്നതിന്റെ മികച്ച ഉദാഹരണമാണ്. ലോകമെമ്പാടുമുള്ള സിനിമാപ്രേമികൾക്കിടയിൽ സമാനതകളില്ലാത്ത ഒരു കൾട്ട് ക്ലാസിക്കായി മാറിയ ഈ ചിത്രത്തിന്റെ സ്വാധീനം എത്രത്തോളമാണെന്ന് വെച്ചാൽ, നായകന്റെ ജീവിതവീക്ഷണത്തിൽ ആകൃഷ്ടരായി യഥാർത്ഥ ലോകത്ത് “ഡ്യൂഡിസം” (Dudeism) എന്നൊരു പാരഡി മതം തന്നെ രൂപപ്പെട്ടു എന്നതാണ്. “ലോകത്തിലെ ഏറ്റവും സാവധാനം വളരുന്ന മതം” എന്ന് സ്വയം വിശേഷിപ്പിക്കുന്ന ഈ പ്രസ്ഥാനം, ജീവിതത്തിലെ സകല ടെൻഷനുകളെയും വളരെ കൂളായി നേരിടാനാണ് പഠിപ്പിക്കുന്നത്.

അസാധ്യമായ ഡാർക്ക് ഹ്യൂമറും, മറക്കാനാവാത്ത കഥാപാത്രങ്ങളും, ഇന്നും ഉദ്ധരിക്കപ്പെടുന്ന ഡയലോഗുകളും നിറഞ്ഞ ഈ ചിത്രം അവസാനിച്ച ശേഷവും മനസ്സിൽ കറങ്ങിക്കൊണ്ടിരിക്കും. ചില സിനിമകൾ കഥ പറയാറുണ്ട്; ചില സിനിമകൾ ഒരു ലോകം സൃഷ്ടിക്കുന്നു. ‘ദി ബിഗ് ലെബോവ്സ്കി’ രണ്ടാമത്തെ വിഭാഗത്തിൽ പെടുന്ന അപൂർവ സിനിമകളിലൊന്നാണ്.

NB: R-റേറ്റഡ് ചിത്രമായതിനാൽ, പ്രായപൂർത്തിയായവർ മാത്രം കാണുക.

തീർത്തും അസംതൃപ്തമായ ദാമ്പത്യജീവിതം നയിക്കുന്ന ഒരു വീട്ടമ്മയാണ് കെയ്റ്റ് മില്ലർ. പണക്കാർക്ക് വേണ്ടി സേവനം ചെയ്യുന്ന ഒരു കോൾഗേളാണ് ലിസ്സ് ബ്ലേക്ക്. ന്യൂയോർക്ക് നഗരത്തിൽ തീർത്തും വ്യത്യസ്തമായ ജീവിതങ്ങൾ നയിക്കുന്ന ഈ രണ്ട് സ്ത്രീകളെ ഒരു അജ്ഞാതനായ കൊലയാളി വേട്ടയാടുന്നു.

ഒരു പർവ്വതമനുഷ്യനായി ജീവിക്കാൻ ആഗ്രഹിച്ച് അമേരിക്കയിലെ റോക്കി മലനിരകളിലേക്ക് എത്തുകയാണ് ജെറമയ ജോൺസൺ എന്ന മുൻ പട്ടാളക്കാരൻ. പർവ്വതത്തിന് മുകളിൽ ഒറ്റയ്ക്കുള്ള ജീവിതമാണ് അയാളിഷ്ടപ്പെടുന്നത്. ഭക്ഷണത്തിന് മൃഗങ്ങളെ വേട്ടയാടണം. എല്ലാ സജ്ജീകരണങ്ങളുമായി അയാൾ അപകടങ്ങൾ പതിയിരിക്കുന്ന റോക്കി മലനിരകളിലെത്തുന്നു. തുടർന്ന് അപ്രതീക്ഷിതമായ പ്രതിസന്ധികളാണ് അയാൾക്ക് നേരിടേണ്ടിവരുന്നത്.
അമേരിക്കയിലെ ജോൺ ജെറമയ ജോൺസൺ എന്ന പർവ്വതമനുഷ്യന്റെ ജീവിതത്തിൽ നിന്ന് പ്രചോദനമുൾക്കൊണ്ട് നിർമിച്ച സിനിമയാണിത്.