#MSone Release - 3276

#AlienFest - 06

Battle Los Angeles (2011)a
ബാറ്റിൽ ലോസ് ആഞ്ചലസ്‌ (2011)

ഭാഷ: ഇംഗ്ലീഷ്
സംവിധാനം: Jonathan Liebesman
പരിഭാഷ: അരുൺ അശോകൻ
പോസ്റ്റർ: ഉണ്ണി ജയേഷ്
ജോണർ: ആക്ഷൻ, അഡ്വഞ്ചർ, സയൻസ് ഫിക്ഷൻ

IMDb ⭐️ 5.7/10

മിക്ക ഏലിയൻ കടന്നാക്രമണ സിനിമകളും രക്ഷകരായി സൂപ്പർ ഹീറോസിനെയോ അല്ലെങ്കിൽ അവസരത്തിനൊത്ത് ഉയരുന്ന സാധാരണക്കാരെയോ അവതരിപ്പിച്ച് നമ്മെ വിസ്മയിപ്പിച്ചിട്ടുണ്ട്. എന്നാല്‍ യഥാര്‍ത്ഥത്തിൽ അന്യഗ്രഹജീവികളുടെ ആക്രമണമുണ്ടായാൽ, നമ്മുടെ രക്ഷയ്ക്ക് ആദ്യമെത്തുന്നവർ ആരാകും? അവർ തന്നെയാണ് ഈ സിനിമയിലെ നായകർ. സൈന്യം!

ഒരു മിഷനിടയിൽ തന്റെ കീഴിലുണ്ടായിരുന്ന എല്ലാവരും നഷ്ടമായതിന്റെ ട്രോമയിൽ സൈന്യത്തിൽ നിന്ന് വിരമിക്കാനിരിക്കുകയാണ് മൈക്കിൾ നാന്റ്സ്. അപ്പോഴാണ് ലോകമെമ്പാടും ഒരു ഉൽക്കാവർഷമുണ്ടാകുന്നത്. അതൊരു ഏലിയൻ ആക്രമണമാണെന്ന് തിരിച്ചറിയാന്‍ ഏറെ താമസമുണ്ടായില്ല. പല നഗരങ്ങളും കീഴടക്കിയ അന്യഗ്രഹജീവികൾ ലോസ് ആഞ്ചലസും പിടിക്കുമെന്ന ഘട്ടത്തിൽ ആണവായുധം പ്രയോഗിക്കാൻ ഗവണ്‍മെന്റ് നിർബന്ധിതരാകുന്നു.

എന്നാൽ അവിടെയൊരു കെട്ടിടത്തിൽ ഏതാനും സാധാരണക്കാർ കുടുങ്ങിക്കിടക്കുകയാണ്. അവിടം ചുട്ടുചാമ്പലാക്കുന്നതിന് മുമ്പ് അവരെ രക്ഷിച്ച് കൊണ്ടുവരാനുള്ള ദൗത്യം നാന്റ്സിലും അയാളുടെ ബറ്റാലിയനിലും ഭരമേൽപ്പിക്കപ്പെടുന്നു. സ്വന്തം കീഴ്ജീവനക്കാർക്ക് പോലും അയാളുടെ നേതൃത്വത്തില്‍ സന്ദേഹമുള്ളപ്പോൾ അവരുടെ വിശ്വാസമാർജ്ജിച്ച് അന്യഗ്രഹജീവികളുടെ സേനയെ എതിരിട്ട് ആ സാധാരണക്കാരെ സുരക്ഷയുടെ തണലിലെത്തിക്കാൻ അയാൾക്ക് കഴിയുമോ?

അഭിപ്രായങ്ങൾ പങ്കുവെക്കാൻ

Categories : #Action #Adventure #Alien_Fest #English #Sci_Fi

#MSone Release - 3277

#AlienFest - 07

Signs (2002)
സൈൻസ് (2002)

ഭാഷ: ഇംഗ്ലീഷ്
സംവിധാനം: M. Night Shyamalan
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ഡ്രാമ, മിസ്റ്ററി, സയൻസ് ഫിക്ഷൻ

IMDb ⭐️ 6.8/10

നിങ്ങളുടെ വീടിന് ചുറ്റും ഏക്കറിന് കണക്കിന് പരന്നുകിടക്കുന്ന ഒരു ചോളപ്പാടമുണ്ട്. ഒരുദിവസം നിങ്ങൾ എഴുന്നേറ്റ് നോക്കുമ്പോൾ വലിയ വൃത്തത്തിലും മറ്റും ചോളങ്ങൾ നശിപ്പിച്ച് ഇട്ടിരിക്കുന്നു. അതും നല്ല വലിപ്പത്തിലും ഭംഗിയിലും. ആകാശത്ത് നിന്ന് നോക്കിയാല്‍ ഇതൊരു പ്രത്യേക ഡിസൈനായിട്ട് തോന്നും. പക്ഷേ ആരാണിത് ചെയ്തത്? എന്തായാലും ഒരൊറ്റ രാത്രി കൊണ്ട് ഇത്രയും വലിയൊരു അടയാളമുണ്ടാക്കാൻ മനുഷ്യന് ഒരിക്കലും പറ്റില്ല.

അപ്പോൾ പിന്നെയീ വിളവൃത്തങ്ങൾക്ക് പിന്നിൽ അന്യഗ്രഹജീവികളായിരിക്കുമോ? എന്താണ് ഇതിന്റെ ഉദ്ദേശ്യം? മനുഷ്യരാശിയ്ക്ക് വരാൻ പോകുന്ന ആപത്തിന്റെ സൂചനയാണോ ഇത്? മുമ്പേ തന്നെ ദൈവവിശ്വാസം നഷ്ടപ്പെട്ടിരുന്ന ആ പുരോഹിതനും അയാളുടെ കുടുംബവും വരാനിരിക്കുന്ന അനർത്ഥത്തെ നേരിടാന്‍ ഒരുങ്ങിക്കഴിഞ്ഞു.

എഴുപതുകളുടെ അവസാനം പ്രത്യക്ഷപ്പെട്ട, ലോകത്ത് ഇന്നും ചൂടേറിയ ചർച്ചാവിഷയമായി തുടരുന്ന, വിളവൃത്തങ്ങളെ അടിസ്ഥാനമാക്കി എം. നൈറ്റ് ശ്യാമളൻ സംവിധാനം ചെയ്ത ഈ സിനിമ അദ്ദേഹത്തിന്റെ വലിയ ഹിറ്റുകളിൽ ഒന്നായിട്ടാണ് വിശേഷിക്കപ്പെടുന്നത്. വിശ്വാസത്തെയും ശാസ്ത്രത്തെയും ഒരുപോലെ ചേർത്തുപിടിക്കാൻ ശ്രമിക്കുന്ന ഇതിലെ സാരാംശം, നമ്മുടെ ജീവിതത്തിലെ ദുരിതങ്ങളെ മറ്റൊരു രീതിയില്‍ നോക്കിക്കാണാൻ പ്രേരിപ്പിക്കുമെന്നതിൽ സംശയമില്ല.

അഭിപ്രായങ്ങൾ പങ്കുവെക്കാൻ

Categories : #Alien_Fest #Drama #English #Mystery #Sci_Fi

#MSone Release - 3278

#AlienFest - 08

Species (1995)
സ്പീഷീസ് (1995)

ഭാഷ: ഇംഗ്ലീഷ്
സംവിധാനം: Roger Donaldson
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, ഹൊറർ, സയൻസ് ഫിക്ഷൻ

IMDb ⭐️ 5.9/10

ഭൂമിയുടെ വിവരങ്ങൾ ഉൾക്കൊള്ളിച്ച്, അമേരിക്കയിലെ ശാസ്ത്രസംഘം താരാപഥങ്ങളിലേക്ക് പറത്തിവിട്ട റേഡിയോ തരംഗങ്ങൾ ഏതോ അന്യഗ്രഹജീവികൾ പിടിച്ചെടുക്കുന്നു. അവർ അയച്ചുതന്ന വിവരങ്ങളുടെ അടിസ്ഥാനത്തില്‍, ശാസ്ത്രജ്ഞർ ആ ജീവികളുടെ DNA മനുഷ്യരുടെ അണ്ഡത്തിൽ കുത്തിവച്ച് ഒരു പരീക്ഷണം നടത്തി. അങ്ങനെ ഒരു പുതിയ സ്പീഷീസിന്റെ ഭ്രൂണമുണ്ടാകുന്നു.

എന്നാൽ ഗർഭാവസ്ഥ മുതലുള്ള അതിന്റെ ത്വരിതഗതിയിലുള്ള വളർച്ച കണ്ട്, പരീക്ഷണം നടത്താനുള്ള തീരുമാനം തെറ്റായെന്ന് ഭയന്ന ശാസ്ത്രജ്ഞർ, മനുഷ്യരൂപത്തിൽ ജനിച്ചയാ പെൺകുട്ടിയെ കൊല്ലാൻ തീരുമാനിച്ചു. പക്ഷേ പുറംലോകത്തേക്ക് രക്ഷപ്പെട്ട ആ പെണ്‍കുട്ടി, ഏതാനും ദിവസങ്ങള്‍ക്കകം പൂര്‍ണവളർച്ചയെത്തിയ സുന്ദരിയായൊരു യുവതിയായി.

ജീവന്റെ ത്വരകളിലൊന്നാണല്ലോ പ്രത്യുൽപാദനം. തന്റെ പുതിയ തലമുറയെ ജനിപ്പിക്കാൻ, പുരുഷന്മാരുമായി ഇണ ചേരാൻ ഇവൾ ഒരുമ്പിട്ടിറങ്ങുന്നു. ആദർശം തൊട്ടുതീണ്ടാത്ത, മനുഷ്യരുടെ നിയമങ്ങൾ കാറ്റില്‍ പറത്തിയുള്ള, അവളുടെ പുരുഷവേട്ടയിൽ ശവങ്ങൾ കുമിഞ്ഞുകൂടുന്നു. ലോകനിലനില്പിന് തന്നെ ഭീഷണിയായ ഈ വേട്ടക്കാരിയെ വേട്ടയാടാൻ ഒരു നാലംഗസംഘം ഇറങ്ങിത്തിരിക്കുന്നു. അവർക്കതിന് കഴിയുമോ?

വശീകരണവും കൊടുംക്രൂരതകളും സിനിമയെന്ന് പറയുമ്പോഴേ അറിയാമല്ലോ. പ്രായപൂർത്തിയായവർ മാത്രം ഇത് കാണുക.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Horror #Sci_Fi

#MSone Release - 3279

#AlienFest - 09

Jules (2023)
ജൂൾസ് (2023)

ഭാഷ: ഇംഗ്ലീഷ്
സംവിധാനം: Marc Turtletaub
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: കോമഡി, ഡ്രാമ, സയൻസ് ഫിക്ഷൻ

IMDb ⭐️ 6.7/10

ജീവിതസായാഹ്നത്തില്‍ എത്തിയവർക്കിടയിലേക്ക് പൊട്ടിവീണ ഒരന്യഗ്രഹജീവിയുടെ കഥയാണ് ജൂൾസ്. വാർദ്ധക്യത്തിലുള്ളവരുടെ ഭയവും നിസ്സഹായതയും ഒറ്റപ്പെടലും പിന്നെ സമൂഹത്തിന്റെ പരിഗണന ആഗ്രഹിക്കുന്ന അവരുടെ പഴക്കം ചെന്ന മനസ്സുമൊക്കെ ഈ ചിത്രത്തിൽ തെളിയുന്നു. എന്നാലും ഇതൊരു ഫീൽഗുഡ് സിനിമ തന്നെയാണ്.

അൽഷിമേഴ്സിന്റെ പ്രാഥമികലക്ഷണങ്ങൾ കാണിച്ചുതുടങ്ങിയ മിൽട്ടൺ എന്ന വൃദ്ധന്റെ വീടിന്റെ പിന്നാമ്പുറത്ത് ഒരു പറക്കുംതളിക ഇടിച്ചിറങ്ങുന്നു. അയാളത് എല്ലാവരോടും പറഞ്ഞിട്ടും പ്രായാധിക്യവും മറവിരോഗവും കാരണം മകളും സമൂഹവും ആ വാക്കുകളെ അവഗണിച്ചു. ഗത്യന്തരമില്ലാതെ, പരുക്കേറ്റ ആ അന്യഗ്രഹജീവിയെ അയാള്‍ വീട്ടിൽ തന്നെ പരിചരിക്കുന്നു. നിരുപദ്രവകാരിയും വിചിത്രമായ ഭക്ഷണരീതിയുള്ള ആ കൊച്ചു ഏലിയനോട് അയാളങ്ങനെ അടുത്തുകൊണ്ടിരിക്കവേ യാദൃച്ഛികമായി ആ കൂട്ടുകെട്ടിലേക്ക് രണ്ട് വൃദ്ധകളും വന്നുചേരുന്നു.

ഒന്നും ഉരിയാടില്ലെങ്കിലും എല്ലാം മനസ്സിലാകുന്ന കണ്ണുകളുള്ള ആ ഏലിയനോട് ഒരു തെറാപ്പിസ്റ്റ് എന്ന പോലെ വർത്തമാനം പറയുന്ന ആ വൃദ്ധർക്ക് അവൻ മുറിവിനുള്ള മരുന്നായി, ഒറ്റപ്പെടലിനുള്ള ഉത്തരമായി, ആപത്തിലുള്ള സംരക്ഷകനായി. അങ്ങനെ ജീവിതത്തിന് പുതിയൊരു ലക്ഷ്യബോധം കൈവരിച്ച അവർ മൂവരും ആ അന്യഗ്രഹജീവിയുടെ പറക്കുംതളികയുടെ കേടുപാട് തീർക്കാൻ അവരാൽ കഴിയുന്നത് ചെയ്യുകയാണ്. തികച്ചും ഹൃദയം കൊണ്ട് കാണേണ്ടൊരു ചിത്രം.

അഭിപ്രായങ്ങൾ പങ്കുവെക്കാൻ

Categories : #Alien_Fest #Comedy #Drama #English #Sci_Fi

#MSone Release - 3280

#AlienFest - 10

The Predator (2018)
ദ പ്രിഡേറ്റർ (2018)

ഭാഷ: ഇംഗ്ലീഷ്
സംവിധാനം: Shane Black
പരിഭാഷ: അരുൺ അശോകൻ
പോസ്റ്റർ: ഉണ്ണി ജയേഷ്
ജോണർ: ആക്ഷൻ, ഹൊറർ, സയൻസ് ഫിക്ഷൻ

IMDb ⭐️ 5.3/10

പതിവ് വേട്ടയാടൽ വിനോദത്തിൽ നിന്ന് വ്യതിചലിച്ച്, വരാനിരിക്കുന്ന യുദ്ധത്തിന് മനുഷ്യരെ പ്രാപ്തരാക്കാനുള്ള സഹായഹസ്തവുമായിട്ടാണ് ഇത്തവണത്തെ പ്രിഡേറ്ററിന്റെ വരവ്. എന്നാൽ അപ്രതീക്ഷിതമായി അതിന്റെ പേടകം, ക്വിൻ മെക്കന്നയെന്ന പട്ടാളക്കാരന്റെയും കൂട്ടരുടെയും മുന്നിലേക്ക് ഇടിച്ചിറങ്ങുകയാണുണ്ടായത്. പേടകത്തിലെ ഉപകരണങ്ങള്‍ കൈക്കലാക്കിയ മെക്കന്നയുടെ പിന്നാലെയായി ആ പ്രിഡേറ്ററും ഗവണ്മെന്റും.

അങ്ങനെ അയാളെ പിടിക്കുമെന്ന ഘട്ടത്തിലാണ്, അന്നുവരെ മനുഷ്യർ കണ്ടതിൽ വച്ചേറ്റവും പൊക്കമുള്ള, ജനിതകമാറ്റം വരുത്തിയ മറ്റൊരു സങ്കരയിനം പ്രിഡേറ്ററിന്റെ വരവ്. അതോടെ മനുഷ്യരുടെ നിലനിൽപ്പിനായുള്ള പോരാട്ടത്തിന്റെ നേതൃത്വം മെക്കന്നയ്ക്ക് ഏറ്റെടുക്കേണ്ടി വരുന്നു. കൂട്ടിനായി മുൻ സൈനികരായ കുറെ വട്ടന്മാരും ഒരു സയൻസ് ടീച്ചറുമുണ്ട്.

വേട്ടയാടലിൽനിന്ന് ശേഖരിക്കുന്ന അറിവുകൾ പ്രിഡേറ്ററുകൾ അവരുടെ നേട്ടത്തിന്, പ്രായോഗികമായി ഉപയോഗിക്കുന്നതായി കാണിക്കുന്നത്, മുൻഭാഗങ്ങളെ അപേക്ഷിച്ച് ഈ സിനിമയുടെ കഥാതന്തുവിലെ പുതുമയാണ്. ഡാർക്ക് ഹ്യൂമറും അപ്രതീക്ഷിതമായ ട്വിസ്റ്റുകളും നിറഞ്ഞ ചിത്രത്തിന്റെ പിടിച്ചിരുത്തുന്ന ഘടകം, എണ്ണം പറഞ്ഞ അതിന്റെ ആക്ഷൻ രംഗങ്ങൾ തന്നെയാണെന്ന് പറയാം.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Horror #Sci_Fi

#MSone Release - 3281

#AlienFest - 11

Alien vs. Predator (2004)
ഏലിയൻ vs. പ്രിഡേറ്റർ (2004)

ഭാഷ: ഇംഗ്ലീഷ്
സംവിധാനം: Paul W.S. Anderson
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, ഹൊറർ, സയൻസ് ഫിക്ഷൻ

IMDb ⭐️ 5.7/10

വർഷം 2004. വേലാന്റ് കമ്പനിയുടെ ഉപഗ്രഹം അന്റാർട്ടിക്കയിൽ 2000 അടി താഴ്ചയിൽ പിരമിഡെന്ന് തോന്നിക്കുന്ന ആദിമസംസ്ക്കാരത്തിന്റെ അവശേഷിപ്പ് കണ്ടെത്തുന്നു. ലോകചരിത്രത്തിൽ തന്റെ പേര് എഴുതിച്ചേർക്കണമെന്ന ആഗ്രഹത്തോടെ, വേലാന്റ് കമ്പനിയുടമ കിട്ടാവുന്നതിൽ വച്ചേറ്റവും മികച്ച ഖനനോപകരങ്ങളും വിദഗ്ധരുടെ സംഘവുമായി അന്റാർട്ടിക്കയിലേക്ക് പുറപ്പെടുന്നു.

എന്നാൽ അവിടെ കണ്ട കാഴ്ച അവരെ അമ്പരപ്പിച്ചു. വെറും ഒറ്റ ദിവസം കൊണ്ട് മറ്റാരോ ആ 2000 അടി വളരെ തന്മയത്വത്തോടെ കുഴിച്ച് പിരമിഡ് വരെ ചെന്നിരിക്കുന്നു. അത്രയും പുരോഗമിച്ച ടെക്‌നോളജി ലോകത്തെവിടെയുമില്ല. അപ്പോള്‍ ആരാണവർ? എന്താണ് അവരുടെ ഉദ്ദേശ്യം? അതറിയാനുള്ള ജിജ്ഞാസയോടെ ആ ദൗത്യസംഘം കീഴേക്ക്, ആ ആദിമസംസ്ക്കാരത്തിന്റെ ശേഷിപ്പിലേക്ക് ഇറങ്ങുന്നു. അവിടെ അവരെ എന്താകും കാത്തിരിക്കുന്നത്?!

പ്രശസ്തമായ രണ്ട് ഫ്രാഞ്ചെസികളിലെ വില്ലൻവർഗ്ഗങ്ങൾ നേർക്കുനേർ വരുന്ന കഥയാണിത്. അവരിൽ ആര് ജയിച്ചാലും ഇടയിൽ പെട്ടുപോകുന്ന മനുഷ്യർക്ക് നഷ്ടം പറ്റുമെന്നതിൽ സംശയമില്ല. എങ്കിലും ശത്രുവിന്റെ ശത്രു മിത്രമെന്ന ആപ്തവാക്യത്തിന്റെ അടിസ്ഥാനത്തില്‍, ഇവരിൽ ആരുടെ കൂടെ നിൽക്കുന്നതാകും ഒന്നുകൂടി ഭേദം?!

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Horror #Sci_Fi

#MSone Release - 3282

#AlienFest - 12

Mars Attacks! (1996)
മാഴ്‌സ് അറ്റാക്കസ്! (1996)

ഭാഷ: ഇംഗ്ലീഷ്
സംവിധാനം: Tim Burton
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: കോമഡി, സയൻസ് ഫിക്ഷൻ

IMDb ⭐️ 6.4/10

ഇരുപതാം നൂറ്റാണ്ടിന്റെ അവസാനം. ചൊവ്വയില്‍ നിന്ന് പറന്നുവരുന്ന ഒരു കൂട്ടം പറക്കുംതളികളുടെ ചിത്രങ്ങൾ യുഎസ് ഉപഗ്രഹങ്ങൾ ഒപ്പിയെടുക്കുന്നു. ഞെട്ടിത്തരിച്ച അമേരിക്കന്‍ പ്രസിഡന്റ്, വൈറ്റ് ഹൗസിൽ തന്റെ വിശ്വസ്തരായ ഉപദേശകരുടെ രഹസ്യയോഗം വിളിച്ചുകൂട്ടി. ബുദ്ധിവികാസം പ്രാപിച്ച ജീവികൾ സംസ്കാരസമ്പന്നരും സമാധാനപ്രിയരും ആയിരിക്കുമെന്നും, അതിനാൽ അവരെ മാലയിട്ട് സ്വീകരിക്കണമെന്നും ഒരു പക്ഷം. അതല്ല വെടിയുതിർത്താണ് സ്വീകരിക്കേണ്ടതെന്ന് മറുപക്ഷം. എന്തായാലും ചർച്ചകൾക്കൊടുവിൽ യുഎസ് ഉദ്യോഗസ്ഥരും മാധ്യമങ്ങളും ജനങ്ങളും ആവേശപൂര്‍വ്വം ഒരു വലിയ ഗ്രൗണ്ടില്‍ അവരെ സ്വീകരിക്കാനൊരുങ്ങുന്നു. അതിനുശേഷം നടന്നത് കണ്ടുതന്നെ അറിയൂ.

അസംഖ്യം ഓസ്കാർ ജേതാക്കൾ അണിനിരന്ന ടിം ബർട്ടന്റെ സയന്‍സ് ഫിക്ഷന്‍ പാരഡി മൂവിയാണ് മാഴ്സ് അറ്റാക്ക്സ്! എന്നാല്‍ അതോടൊപ്പം തന്നെ ഇതൊരു പൊളിറ്റിക്കൽ സാറ്റയർ സിനിമയുമാണ്. രാഷ്ട്രീയക്കാരുടെ അത്യാഗ്രഹവും ബുദ്ധിമാന്മാരെന്ന് അവകാശപ്പെടുന്നവരുടെ വിവരക്കേടും സൈന്യത്തിന്റെ ഒറ്റബുദ്ധിയും മാധ്യമങ്ങളുടെ ഔചിത്യമില്ലായ്മയുമൊക്കെ ഇതിൽ രസകരമായി പരിഹസിക്കപ്പെടുന്നുണ്ട്. ഒപ്പം, ഞങ്ങൾ നിങ്ങളുടെ കൂട്ടുകാരാണെന്ന് പറഞ്ഞുകൊണ്ട് തന്നെ വെടിയുതിർക്കുന്ന ചൊവ്വാജീവികളുടെ ക്രൂരമായ പ്രാക്ടിക്കൽ തമാശകളും ഭൂമിക്ക് പുറത്തുള്ള ജീവനെപ്പറ്റി ജാഗ്രതയോടെ ഇരിക്കാൻ പ്രേക്ഷകരെ പ്രേരിപ്പിക്കുന്നു.

അഭിപ്രായങ്ങൾ പങ്കുവെക്കാൻ

Categories : #Alien_Fest #Comedy #English #Sci_Fi

#MSone Release - 3283

#AlienFest - 13

Save the Green Planet! (2003)
സേവ് ദ ഗ്രീൻ പ്ലാനറ്റ്! (2003)

ഭാഷ: കൊറിയൻ
സംവിധാനം: Joon-Hwan Jang
പരിഭാഷ: അരവിന്ദ് കുമാർ
പോസ്റ്റർ: ഉണ്ണി ജയേഷ്
ജോണർ: കോമഡി, ക്രൈം, സയൻസ് ഫിക്ഷൻ

IMDb ⭐️ 7.2/10

വളരെയധികം നിരൂപക പ്രശംസ നേടിയിട്ടുള്ള കൊറിയയിലെ ഏറ്റവും മികച്ച സയൻസ് ഫിക്ഷൻ ചിത്രങ്ങളിൽ മുൻപന്തിയിലുള്ള ഒരു കൊറിയൻ മാസ്റ്റർപീസ് ചിത്രമാണ് “സേവ് ദ ഗ്രീൻ പ്ലാനറ്റ്“.കൊറിയൻ സിനിമ ഇൻഡസ്ട്രിയിലെ തന്നെ കൾട്ട് ക്ലാസിക്ക് ചിത്രങ്ങളിൽ ഒന്നായി പരിഗണിക്കപ്പെടുന്ന 2003 ഇൽ പുറത്തിറങ്ങിയ ചിത്രത്തിൻ്റെ റീമേക്ക് അവകാശം അടുത്തിടെ ഹോളിവുഡ് ഇൻഡസ്ട്രി മേടിച്ചത് തന്നെ ചിത്രത്തിൻ്റെ അംഗീകാരത്തിൻ്റെ തിരിച്ചറിവിൻ്റെ അടയാളമാണ്. ഒട്ടുമിക്ക എല്ലാ ജേണറിലൂടെയും കടന്ന് പോകുന്ന ഈ ചിത്രത്തെ ഒരു പ്രത്യേക വിഭാഗത്തിൽ മാത്രം ഒതുക്കാൻ പറ്റാത്ത അപൂർവത കാണുന്ന സിനിമാപ്രേക്ഷകന് അനുഭവപ്പെട്ടേക്കാം.ത്രില്ലർ, ഡാർക്ക് കോമഡി, സയൻസ് ഫിക്ഷൻ,ഹൊറർ തുടങ്ങി പല ജേണറുകളിലൂടെയും കടന്ന് പോകുന്ന ചിത്രം ഒരിക്കലെങ്കിലും ഏതൊരു സിനിമാ ആരാധകരും തീർച്ചയായും കണ്ടിരിക്കേണ്ട ചിത്രങ്ങളിൽ ഇടം പിടിക്കേണ്ട ഒന്നാണ്.

ചിത്രത്തിലെ നായക കഥാപാത്രമായ ബ്യുങ് ഗോ തൻ്റെ നാട്ടിൽ അന്യഗ്രഹ ജീവികളുടെ അധിനിവേശം നടന്നതായി സംശയിക്കുകയും തുടർന്ന് അന്യഗ്രഹ ജീവി എന്ന സംശയത്തിൻ്റെ പുറത്ത് ഒരു കെമിക്കൽ കമ്പനിയുടെ തലവനെ തട്ടി കൊണ്ട് പോയി പീഡിപ്പിച്ചു അതുവഴി ഭൂമിയെ താൻ രക്ഷിക്കാൻ ശ്രമിക്കുന്നതായി കരുതുന്നു.നഗരത്തിലെ പ്രമുഖൻ്റെ തിരോധാനത്തിന് പിന്നിലെ രഹസ്യം കണ്ടെത്താൻ പോലീസും അന്വേഷണം ആരംഭിക്കുന്നു.തുടർന്നുള്ള രസകരവും ഉദ്ധ്വേജനകവുമായ കഥയിലൂടെ പ്രേക്ഷകന് മികച്ചൊരു സിനിമാനുഭവം ചിത്രം സമ്മാനിക്കുന്നു.

അഭിപ്രായങ്ങൾ പങ്കുവെക്കാൻ

Categories : #Alien_Fest #Comedy #Crime #Korean #Sci_Fi

#MSone Release - 3284

#AlienFest - 14

Life (2017)
ലൈഫ് (2017)

ഭാഷ: ഇംഗ്ലീഷ്
സംവിധാനം: Daniel Espinosa
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ഹൊറർ, സയൻസ് ഫിക്ഷൻ, ത്രില്ലർ

IMDb ⭐️ 6.6/10

മനുഷ്യരാശി അന്നൊരു നാഴികക്കല്ല് പിന്നിടുകയായിരുന്നു. ഭൂമിയ്ക്ക് പുറത്തുള്ള ജീവന്റെ അനിഷേധ്യമായ തെളിവ് അവർ കണ്ടെത്തിയിരിക്കുന്നു! സ്ഫോടനാത്മകമായ ഈ കണ്ടെത്തല്‍ നടന്നിരിക്കുന്നത്, നാം ഇന്നുവരെ നിർമ്മിച്ചതിൽ വച്ചേറ്റവും ചിലവേറിയ ഭവനത്തിൽ വച്ചാണ്. ISS അഥവാ അന്താരാഷ്ട്ര ബഹിരാകാശനിലയത്തിൽ വെച്ച്. അന്നേ ദിവസം അതിലെ ആറ് ബഹിരാകാശയാത്രികരുടെ നീണ്ട കാത്തിരിപ്പിനൊടുവില്‍ പിൽഗ്രിം ക്യാപ്സ്യൂൾ എന്ന പേടകം ചൊവ്വയിലെ മണ്ണിന്റെ സാമ്പിളുമായി ബഹിരാകാശനിലയത്തിലേക്ക് വന്നുചേർന്നു.

അപ്രതീക്ഷിതമായൊരു വെല്ലുവിളിയെ അതിജീവിച്ച് ആ സാമ്പിൾ കൈപ്പറ്റി അതിനെ നിലയത്തിൽ വച്ചുതന്നെ പഠിച്ചപ്പോൾ, ചൊവ്വാമണ്ണിൽ നിർജ്ജീവാവസ്ഥയിലുള്ള ഒരു ഏകകോശത്തെ കണ്ടെത്തി. താപമുയർത്തിയും അന്തരീക്ഷങ്ങൾ മാറ്റിയും അതിൽ പരീക്ഷണം നടത്തിയപ്പോൾ കണ്ടത് അന്യഗ്രഹജീവന്റെ ആദ്യ തുടിപ്പുകളായിരുന്നു! സുവാർത്തയറിഞ്ഞ് ലോകം ആവേശഭരിതമായി. ആ കൊച്ചുകോശത്തിന് കാൽവിനെന്ന് ഓമനപ്പേരിട്ട് അവർ മനുഷ്യകുലത്തിന്റെ ചുവടുവെപ്പ് ആഘോഷിച്ചു.

എന്നാൽ എല്ലാം നല്ല രീതിയില്‍ പോയിക്കൊണ്ടിരുന്നപ്പോഴാണ് കാൽവിൻ തന്റെ തനിനിറം കാട്ടിത്തുടങ്ങിയത്. തുടർപരീക്ഷണങ്ങൾക്ക് വിധേയമാക്കവേ ആ ജീവൻ കൂടുതൽ ആക്രമകാരിയാകാൻ തുടങ്ങി. അതോടെ ബഹിരാകാശനിലയത്തിലുള്ള ഏവരുടെയും ജീവിതം അവതാളത്തിലാകുന്നു. ചൊവ്വാജീവിയുടെ വേട്ട തുടങ്ങുകയായി!

പ്രശസ്തസിനിമയായ ഏലിയനോട് സമാനമായി, സയൻസ് ഫിക്ഷൻ സിനിമ എന്നതിനേക്കാൾ ഒരു ഹൊറര്‍ സിനിമ എന്ന രീതിയിൽ സമീപിച്ചാലാണ് ഈ ചിത്രം ഏറ്റവും നന്നായി ആസ്വദിക്കാനാവുക. കാരണം അത്രത്തോളം ഭീതിജനകവും ത്രില്ലടിപ്പിക്കുന്നതുമായ ഒട്ടനവധി രംഗങ്ങൾ കൊണ്ട് സമ്പുഷ്ടമാണ് സിനിമ.

അഭിപ്രായങ്ങൾ പങ്കുവെക്കാൻ

Categories : #Alien_Fest #English #Horror #Sci_Fi #Thriller

#MSone Release - 3285

#AlienFest - 15

Brightburn (2019)
ബ്രൈറ്റ്ബേൺ (2019)

ഭാഷ: ഇംഗ്ലീഷ്
സംവിധാനം: David Yarovesky
പരിഭാഷ: അനുപ് അനു
പോസ്റ്റർ: ഉണ്ണി ജയേഷ്
ജോണർ: ഡ്രാമ, ഹൊറർ, സയൻസ് ഫിക്ഷൻ

IMDb ⭐️ 6.1/10

2019-ൽ പുറത്തിറങ്ങിയ ഒരു സൂപ്പർഹീറോ ഹൊറർ ചിത്രമാണ് “ബ്രൈറ്റ്ബേൺ.” തനിക്ക് അസാമാന്യ ശക്തിയുണ്ടെന്ന് കണ്ടെത്തുന്ന അന്യഗ്രഹ വംശജനായ ബ്രാൻഡൻ ബ്രെയർ എന്ന ആൺകുട്ടിയെ ചുറ്റിപ്പറ്റിയാണ് ഈ ചിത്രം പുരോഗമിക്കുന്നത്. ഒരു ദിവസം രാത്രി കുട്ടികളില്ലാതെ വിഷമിച്ചിരുന്ന കൈൽ-ടോറി ദമ്പതികളുടെ വീടിന് സമീപം ഒരു ബഹിരാകാശ പേടകം തകർന്നുവീഴുന്നിടത്താണ് ചിത്രത്തിന്റെ കഥ ആരംഭിക്കുന്നത്. പിന്നീട് അങ്ങോട്ട് ബ്രാൻഡൻ ബ്രെയർ എന്ന കുട്ടിയുടെ ചെറുപ്പകാലമാണ് ചിത്രത്തിൽ കാണിക്കുന്നത്.

പ്രായപൂർത്തിയായതിൽ പിന്നെ തനിക്ക് അമാനുഷിക ശക്തിയുണ്ടെന്ന് ബ്രാൻഡൻ പതിയെ മനസ്സിലാക്കുന്നു. അവന്റെ സ്വഭാവത്തിലുണ്ടാകുന്ന മാറ്റങ്ങൾ രക്ഷിതാക്കളായ കൈൽ-ടോറി ദമ്പതികളെ വളരെ അധികം അസ്വസ്ഥരാക്കുന്നു. മറ്റുള്ളവരെ സഹായിക്കാൻ തന്റെ ശക്തി ഉപയോഗിക്കുന്നതിനുപകരം, തന്റെ നഗരത്തിലെ ജനങ്ങളെ ദ്രോഹിക്കാനും ഭയപ്പെടുത്താനുമാണ് ബ്രാൻഡൻ ശ്രമിക്കുന്നത്. തുടർന്നങ്ങോട്ടുണ്ടാകുന്ന സംഭവവികാസങ്ങളാണ് ഈ ചിത്രത്തിന്റെ ഇതിവൃത്തം. സൂപ്പർ ഹീറോ സിനിമകൾ ഇഷ്ടപ്പെടുന്നവരെ നിരാശപ്പെടുത്താത്ത ഒരു ചിത്രമായിരിക്കും ബ്രൈറ്റ്ബേൺ.

അഭിപ്രായങ്ങൾ പങ്കുവെക്കാൻ

Categories : #Alien_Fest #Drama #English #Horror #Sci_Fi

#MSone Release - 3286

#AlienFest - 16

Skyline (2010)
സ്കൈലൈൻ (2010)

ഭാഷ: ഇംഗ്ലീഷ്
സംവിധാനം: Colin Strause & Greg Strause
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, സയൻസ് ഫിക്ഷൻ, ത്രില്ലർ

IMDb ⭐️ 4.5/10

സുഹൃത്തായ ടെറിയുടെ പിറന്നാൾ ആഘോഷിക്കാൻ കാലിഫോർണിയയിൽ എത്തിയതാണ് ജെറോഡും ഭാര്യ എലൈനും. ഈ വരവില്‍ അവരെ ലോസ് ആഞ്ചലസിലേക്ക് താമസം മാറ്റാൻ സമ്മതിപ്പിക്കണമെന്ന ഉദ്ദേശമുണ്ട് ടെറിയ്ക്ക്. എന്നാൽ എലൈനാകട്ടെ, അവളൊരു അമ്മയാകുന്ന വിവരം ജെറോഡിനോട് അവതരിപ്പിക്കുന്ന ടെൻഷനിലായിരുന്നു.

അങ്ങനെ ബർത്ത്ഡേ പാർട്ടിക്കിടെ നടന്ന ചെറിയ തർക്കങ്ങളൊക്കെ കഴിഞ്ഞ്, ടെറിയുടെ അപ്പാർട്ട്മെന്റിൽ അവരെല്ലാം ആ രാത്രി ഉറങ്ങാൻ കിടന്നു. രാത്രി അധികം വൈകിയില്ല, പ്രഭാതം പൊട്ടിവിരിയുന്നത് പോലെ ആകാശത്തിലൊരു നീലവെളിച്ചം തെളിഞ്ഞു. ആ വെളിച്ചത്തിലേക്ക് നോക്കിയവർ ഹിപ്പ്നോട്ടൈസ് ചെയ്യപ്പെട്ടതുപോലെ അതിലേക്ക് നടന്നുകേറി. അത്തരത്തിൽ, ലോകത്താകമാനമുള്ള കോടിക്കണക്കിന് മനുഷ്യരെ എവിടെനിന്നോ വന്ന അന്യഗ്രഹജീവികൾ അവരുടെ നിഗൂഢമായ ഉദ്ദേശ്യത്തിന് വേണ്ടി തട്ടിയെടുത്തു. വെളിച്ചം കൊണ്ട് പിടികൂടാൻ പറ്റാഞ്ഞവരെ നേരിട്ടും കളത്തിലിറങ്ങി പിടിക്കാൻ തുടങ്ങി.

തലനാരിഴക്ക് രക്ഷപ്പെട്ട് നിൽക്കുന്ന ജെറോഡും കൂട്ടരും അപ്പാർട്ട്മെന്റിൽനിന്ന് പുറത്തുകടക്കണോ വേണ്ടയോ എന്ന വാദപ്രതിവാദങ്ങൾ നടത്തിക്കൊണ്ടിരിക്കുമ്പോഴും കൂട്ടത്തിലുള്ളവരെ ഓരോന്നായി ആ അന്യഗ്രഹജീവികൾ തട്ടിയെടുത്തുകൊണ്ടിരുന്നു. ലോകമെമ്പാടും നടക്കുന്ന വലിയൊരു ഏലിയൻ ആക്രമണത്തെ ഒരു ഫ്ലാറ്റിലുള്ള ഏതാനും പേരുടെ കാഴ്ചപ്പാടിലൂടെ കാണിക്കുന്ന, അവരുടെ അതിജീവിക്കാനുള്ള ശ്രമങ്ങളുടെ കഥയാണ് സ്കൈലൈൻ.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Sci_Fi #Thriller

#MSone Release - 3287

#AlienFest - 17

Beyond Skyline (2017)
ബിയോണ്ട് സ്കൈലൈൻ (2017)

ഭാഷ: ഇംഗ്ലീഷ്
സംവിധാനം: Liam O’Donnell
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, അഡ്വഞ്ചർ, സയൻസ് ഫിക്ഷൻ

IMDb ⭐️ 5.3/10

സ്കൈലൈനിലെ സംഭവങ്ങൾ നടന്ന അതേ സമയത്ത്, മറ്റൊരിടത്ത് നടക്കുന്ന… കുറെ മനുഷ്യരുടെ ചെറുത്തുനില്പിന്റെ കഥയാണ് ബിയോണ്ട് സ്കൈലൈൻ. പോലീസ് ഉദ്യോഗസ്ഥനായ മാർക്ക്, മകനൊപ്പം മെട്രോയിൽ യാത്ര ചെയ്യവേ പെട്ടെന്നാണ് പവർ നഷ്ടമായി ട്രെയിൻ ഇടിച്ചുനിന്നത്! വയർലെസ്സും പ്രവർത്തിക്കുന്നില്ല. കർത്ത്യബോധമുണർന്ന മാർക്ക്, ട്രെയിനിലെ യാത്രക്കാരെ നയിച്ചുകൊണ്ട് ടണലിലൂടെ നടന്ന് വെളിയിലെത്തി. അപ്പോഴാണ് ഏലിയൻസ് ലോകം ആക്രമിക്കുന്നതും നീലവെളിച്ചവും ഒക്കെ കാണുന്നത്. ആ വെളിച്ചത്തിലേക്ക് നോക്കിയവരെയെല്ലാം അന്യഗ്രഹജീവികൾ പേടകങ്ങളിലേക്ക് വലിച്ചെടുത്തു, ഒപ്പം മാർക്കിന്റെ മകനെയും!

അവനെ രക്ഷിക്കാൻ രണ്ടും കല്പിച്ച് ഷിപ്പിലെത്തിയ മാർക്ക്, അവിടുത്തെ പോരാട്ടങ്ങൾക്കൊടുവിൽ മറ്റൊരു രാജ്യത്തെത്തുന്നു. അവിടുത്തെ വിമതരുമായി സഖ്യമുണ്ടാക്കി അയാൾ ടെക്നോളജിയിൽ ബഹുദൂരം മുന്നിലുള്ള ആ അന്യഗ്രഹജീവികൾക്കെതിരെ കടശ്ശിക്കളിയ്ക്ക് ഒരുങ്ങുകയാണ്. അവർ തട്ടിയെടുത്ത മനുഷ്യരുടെ വിമോചനമാണ് അവരുടെ ലക്ഷ്യം.

അഭിപ്രായങ്ങൾ പങ്കുവെക്കാൻ

Categories : #Action #Adventure #Alien_Fest #English #Sci_Fi

#MSone Release - 3288

#AlienFest - 18

Nope (2022)
നോപ് (2022)

ഭാഷ: ഇംഗ്ലീഷ്
സംവിധാനം: Jordan Peele
പരിഭാഷ: അഭിഷേക് പി യു
പോസ്റ്റർ: ഉണ്ണി ജയേഷ്
ജോണർ: ഹൊറർ, മിസ്റ്ററി, സയൻസ് ഫിക്ഷൻ

IMDb ⭐️ 6.8/10

വരണ്ട ഭൂപ്രകൃതിയെങ്കിലും സുന്ദരമായ മലനിരകളുള്ള ഒരു കാലിഫോര്‍ണിയൻ താഴ്‌വരയിലാണ് ഹെയ്വുഡ് കുടുംബത്തിന്റെ താമസം. സിനിമകളിലേക്കുള്ള കുതിരകളെ വളർത്തി പരിശീലിപ്പിക്കുന്ന ബിസിനസ്സ് നടത്തുന്നവരാണവർ. അങ്ങനെയിരിക്കെ ഒരു ദിവസം ആ കുടുംബത്തിലെ അച്ഛനും മകനും അവിടുത്തെ റാഞ്ചിൽ കുശലം പറഞ്ഞതുകൊണ്ടിരിക്കുമ്പോഴാണ് ആകാശത്തുനിന്നും വീണ ഒരു നാണയം തലയില്‍ തുളഞ്ഞുകേറി അച്ഛന്‍ മരിക്കുന്നത്. വിമാനത്തിൽ നിന്ന് വീണതാണെന്ന പൊലീസ് ഭാഷ്യത്തോട് പൊരുത്തപ്പെടാൻ ആ മകന് കഴിഞ്ഞില്ല.

ഏതായാലും ആ സംഭവത്തിന് ആറ് മാസം കഴിഞ്ഞുള്ള ഒരു രാത്രിയില്‍, അയാളും സഹോദരിയും തങ്ങളുടെ ഫാമിന് മുകളിൽ ആകാശത്ത് എന്തോ ഒന്ന് പറന്നു നടക്കുന്നതായി കണ്ടെത്തി. തങ്ങളുടെ അച്ഛന്റെ മരണത്തിന് ഉത്തരവാദിയായ രഹസ്യത്തിലേക്ക് ഇറങ്ങിച്ചെല്ലാനുള്ള അവരുടെ പരിശ്രമങ്ങളിലൂടെ സിനിമ മുന്നോട്ടുപോകുന്നു.

ജോർദാൻ പീൽ എഴുതി സംവിധാനം ചെയ്ത സിനിമ IMAX ൽ ആണ് ഷൂട്ട്‌ ചെയ്തിട്ടുള്ളത്. മികച്ച ഛായാഗ്രഹണത്തിനും ആവിഷ്ക്കാരത്തിനും പുറമേ നിരവധി ലെയറുകളും ഉപകഥകളും അടങ്ങുന്ന നോപ്, അതിനെ ആഴത്തിൽ ഉൾക്കൊള്ളാൻ ആസ്വാദകന്റെ മുഴുവന്‍ ശ്രദ്ധയും ആവശ്യപ്പെടുന്നുണ്ട്. ആദ്യ ഒന്നര മണിക്കൂറിലെ ഹൊറര്‍ മൂഡിൽ നിന്ന് പിന്നീട് ത്രില്ലർ മൂഡിലേക്കുള്ള സിനിമയുടെ കൂടുമാറ്റത്തിനൊപ്പം സഞ്ചരിക്കുന്നവർക്ക് എല്ലാ അർത്ഥത്തിലും ഇതൊരു നവ്യാനുഭവമായിരിക്കും.

അഭിപ്രായങ്ങൾ പങ്കുവെക്കാൻ

Categories : #Alien_Fest #English #Horror #Mystery #Sci_Fi

#MSone Release - 3289

#AlienFest - 19

Super 8 (2011)
സൂപ്പർ 8 (2011)

ഭാഷ: ഇംഗ്ലീഷ്
സംവിധാനം: J.J. Abrams
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, മിസ്റ്ററി, സയൻസ് ഫിക്ഷൻ

IMDb ⭐️ 7.0/10

കുട്ടികളെ കേന്ദ്രകഥാപാത്രങ്ങളാക്കി ഇരുപതാം നൂറ്റാണ്ടിന്റെ പശ്ചാത്തലത്തിലൊരുക്കിയ നിരവധി ഹിറ്റ് സിനിമകൾക്കും സീരിസുകൾക്കും വഴികാട്ടിയായിരുന്നു ജെ. ജെ അബ്രാംസിന്റെ സൂപ്പർ 8.

1979-ലെ ഒരു ഫിലിം ഫെസ്റ്റിവലിലേക്ക് അയക്കാൻ ഒരു ഷോർട്ട് ഫിലിം എടുക്കാനുള്ള തത്രപ്പാടിലായിരുന്നു ഒരുകൂട്ടം കുട്ടികൾ. അങ്ങനെ പാതിരാത്രി വീട്ടുകാരുടെ കണ്ണുവെട്ടിച്ച് ഒരൊഴിഞ്ഞ റെയില്‍വേ സ്റ്റേഷനിൽ അവർ ഷൂട്ടിങ് നടത്തവേയാണ് ഒരു ചരക്കുട്രെയിൻ പാളം തെറ്റി അവിടെ ഭീകരമായ അപകടമുണ്ടായത്! അതിൽനിന്ന് എങ്ങനെയൊക്കെയോ രക്ഷപ്പെട്ട അവർ അപകടാനന്തരം ചെന്ന് പരിശോധിച്ചപ്പോൾ അത് എയർഫോഴ്സിന്റെ ട്രെയിനാണെന്നും അതിൽ നൂറുകണക്കിന് വിചിത്രമായ വെളുത്ത ക്യൂബുകൾ കടത്തുകയായിരുന്നെന്നും കണ്ടെത്തി.

അവർ ആ സംഭവത്തെപ്പറ്റി ആരോടും ഉരിയാടില്ലെങ്കിലും പിന്നീടങ്ങോട്ട് അന്നാട്ടിൽ കുഴപ്പങ്ങളുടെ ഘോഷയാത്ര തന്നെയായിരുന്നു. പിറ്റേന്നുതന്നെ അവിടം എയർഫോഴ്സ് കയ്യേറുകയും നാട്ടുകാരെ ഒഴിപ്പിച്ച് എന്തോ നിഗൂഢമായ ഓപ്പറേഷന്‍ നടത്താൻ പദ്ധതിയിടുകയും ചെയ്തു. ഇതിന്റെ പിന്നിലെ സത്യാവസ്ഥ അറിയാൻ നമ്മുടെ കുട്ടിപ്പട്ടാളം ഇറങ്ങിത്തിരിക്കുകയായി!

കുട്ടികൾ ടീമായിട്ടുള്ള അഡ്വഞ്ചർ സിനിമകൾ ഇഷ്ടപ്പെടുന്നവർ ഒരിക്കലും മിസ്സാക്കരുതാത്ത ചിത്രമാണിത്. മനോഹരമായ ഫ്രെയിമുകൾക്കും ത്രില്ലടിപ്പിക്കുന്ന സംഭവങ്ങൾക്കും പുറമേ, ആദ്യ പ്രണയത്തിന്റെ മധുരവും കളങ്കമില്ലാത്ത സൗഹൃദത്തിന്റെ ഊഷ്മളതയും ബാല്യചാപല്യത്തിൽ നിന്ന് ഉദിക്കുന്ന തമാശകളുമൊക്കെ ഇത്തരം സിനിമകളിൽ ആസ്വദിക്കാനാകും.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Mystery #Sci_Fi

#MSone Release - 3290

#AlienFest - 20

Predators (2010)
പ്രിഡേറ്റേഴ്സ് (2010)

ഭാഷ: ഇംഗ്ലീഷ്
സംവിധാനം: Nimród Antal
പരിഭാഷ: അരവിന്ദ് കുമാർ
പോസ്റ്റർ: ഉണ്ണി ജയേഷ്
ജോണർ: ആക്ഷൻ, അഡ്വഞ്ചർ, സയൻസ് ഫിക്ഷൻ

IMDb ⭐️ 6.4/10

പരസ്പരം പരിചിതരല്ലാത്ത ഒരു കൂട്ടം ആൾക്കാർ ഒരു കാട്ടിലകപ്പെടുന്നു. തങ്ങൾ എത്തിപ്പെട്ടത് എവിടെയാണെന്ന് കണ്ടെത്താൻ ശ്രമിക്കുമ്പോൾ ഞെട്ടിപ്പിക്കുന്ന സത്യങ്ങളാണ് അവർ തിരിച്ചറിഞ്ഞത്. അന്യഗ്രഹ ജീവികൾക്ക് നായാട്ടുവിനോദം നടത്താനായി അവർ ഒരുക്കിയ കളിക്കളമാണ് ആ ഗ്രഹമെന്ന് തിരിച്ചറിഞ്ഞതോടെ അവർ പിന്നീടുള്ള ഓരോ ചുവടും അതിസൂക്ഷ്മതയോടെ വെച്ച് നടന്നു. അവിടെ അതിജീവിച്ചുകൊണ്ട് ഭൂമിയിലേക്ക് തിരികെ മടങ്ങാനുള്ള മാർഗ്ഗങ്ങൾ കണ്ടെത്താനുള്ള അവരുടെ പരിശ്രമമാണ് ചിത്രം പറയുന്നത്. 

ഇര പിടിയന്മാരായ അന്യഗ്രഹവാസികളിൽ നിന്ന് അവർക്ക് രക്ഷപ്പെടാനാകുമോ? എന്തൊക്കെ ആപത്തുകളാണ് അവരെയാ വനത്തിൽ കാത്തിരിക്കുന്നത്? ഒട്ടും മുഷിപ്പിക്കാതെ കണ്ടിരിക്കാവുന്ന ഒന്നേ മുക്കാൽ ദൈർഘ്യം
മാത്രമുള്ള ഒരു സയൻസ് ഫിക്ഷൻ ആക്ഷൻ ത്രില്ലർ ചിത്രമാണ് പ്രിഡേറ്റേഴ്സ്.

അഭിപ്രായങ്ങൾ പങ്കുവെക്കാൻ

Categories : #Action #Adventure #Alien_Fest #English #Sci_Fi

#MSone Release - 3291

#AlienFest - 21

The Tomorrow War (2021)
ദ ടുമോറോ വാർ (2021)

ഭാഷ: ഇംഗ്ലീഷ്
സംവിധാനം: Chris McKay
പരിഭാഷ: ജിതിൻ ജേക്കബ് കോശി & വിഷ്ണു പ്രസാദ്
പോസ്റ്റർ: ഉണ്ണി ജയേഷ്
ജോണർ: ആക്ഷൻ, അഡ്വഞ്ചർ, സയൻസ് ഫിക്ഷൻ

IMDb ⭐️ 6.6/10

ഖത്തറിലെ കത്തുന്ന വേനലില്‍ 2022 ലോകകപ്പിന്റെ ആവേശകരമായ ഫൈനല്‍. അലറിവിളിക്കുന്ന ഗ്യാലറിയുടെ അകമ്പടിയോടെ ബ്രസീൽ സ്ട്രൈക്കർ പന്തുമായി എതിർ ഗോൾമുഖത്തേക്ക് പാഞ്ഞടുക്കുന്നു. പെട്ടെന്നാണ് ആകാശം പിളര്‍ന്ന് കുറെ പട്ടാളക്കാർ മാനത്തുനിന്ന് ഗ്രൗണ്ടിലേക്ക് നടന്നിറങ്ങിയത്. ലോകമാകെ സ്തംഭിച്ചുപോയി.

2051-ൽ നിന്നും വന്ന സമയയാത്രികരായിരുന്നു അവർ. നാളത്തെ യുദ്ധത്തെ കുറിച്ചുള്ള അടിയന്തരസന്ദേശം നൽകാൻ എത്തിയവർ. മുപ്പത് വർഷം കഴിയുമ്പോൾ വൈറ്റ്സ്പൈക്ക്സ് എന്ന അന്യഗ്രഹജീവിവർഗ്ഗം ഭൂമി ആക്രമിക്കുമെന്നും, ആ ആഗോളയുദ്ധത്തിൽ മനുഷ്യകുലം വംശനാശത്തിലേക്ക് അടുക്കാറായെന്നും അവർ വെളിപ്പെടുത്തുന്നു. ജനസംഖ്യ നന്നേ കുറഞ്ഞയാ ഘട്ടത്തില്‍ തങ്ങളുടെ പൂർവ്വികരോട് ഭാവിയിലെ യുദ്ധത്തിലേക്ക് ടൈംട്രാവൽ ചെയ്ത് തങ്ങളോടൊപ്പം പോരാടണമെന്നാണ് അവരുടെ അഭ്യർത്ഥന. ക്യാമറാക്കണ്ണുകളിലൂടെ മുഴുവന്‍ ലോകത്തോടും അവർ യാചിച്ചു.

അങ്ങനെ ലോകരാഷ്ട്രങ്ങൾ, അന്യഗ്രഹജീവികളുമായി യുദ്ധം ചെയ്യുന്നതിന് ഇവിടെയുള്ള പട്ടാളക്കാർക്ക് പുറമേ സാധാരണക്കാരെയും ആഴ്ച തോറും ഭാവിയിലേക്ക് അയച്ചു. പക്ഷേ ഭൂരിഭാഗവും അവിടെ വച്ച് കൊല്ലപ്പെട്ടപ്പോൾ ഈ നിർബന്ധിത റിക്രൂട്ട്മെന്റ് ഏവർക്കും പേടിസ്വപ്നമായി. അപ്പോഴാണ് ഡാൻ എന്ന ഹൈസ്ക്കൂള്‍ അധ്യാപകന് ഭാവിയുദ്ധത്തിൽ പങ്കെടുക്കാനുള്ള ഉത്തരവ് കിട്ടുന്നത്. അങ്ങനെ ഗത്യന്തരമില്ലാതെ 2051-ൽ ചെല്ലുന്ന ഡാനിന്റെ അതിജീവനത്തിനായുള്ള പോരാട്ടവും മനുഷ്യരാശിയെ രക്ഷിക്കാനുള്ള ശ്രമങ്ങളുമാണ് പിന്നീടങ്ങോട്ട് ചിത്രത്തിൽ. ആക്ഷൻ കൊണ്ടും ത്രില്ലിങ് സന്ദർഭങ്ങൾ കൊണ്ടും സമ്പന്നമായ ഒരു പോപ്പ്കോൺ ചിത്രം.

അഭിപ്രായങ്ങൾ പങ്കുവെക്കാൻ

Categories : #Action #Adventure #Alien_Fest #English #Sci_Fi

#MSone Release - 3292

#AlienFest - 22

Dark Skies (2013)
ഡാർക്ക് സ്കൈസ് (2013)

ഭാഷ: ഇംഗ്ലീഷ്
സംവിധാനം: Scott Stewart
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, സയൻസ് ഫിക്ഷൻ, ത്രില്ലർ

IMDb ⭐️ 6.3/10

കുടുംബനാഥന്റെ ജോലി നഷ്ടപ്പെട്ടത് കാരണം, ബാരറ്റ് കുടുംബം ചെറിയ സാമ്പത്തിക ഞെരുക്കത്തിലൂടെ കടന്നുപോവുകയാണ്. അപ്പോഴാണ് ഇളയകുട്ടിയുടെ സ്വപ്നത്തില്‍ ‘സാൻഡ്മാൻ’ എന്നൊരാൾ കടന്നുവരാൻ തുടങ്ങിയത്. രാത്രി വീട്ടിൽ അതിക്രമിച്ചുകടന്ന് കുട്ടിയോട് സംസാരിക്കുന്ന സാൻഡ്മാൻ, അടുക്കളയിൽ കേറി ആഹാരസാധനങ്ങൾ എടുക്കുകയും വിചിത്രമായ രീതിയില്‍ വീട്ടുസാധനങ്ങള്‍ അടുക്കിവെക്കുകയും ചെയ്യുന്നത് പതിവായപ്പോൾ വീട്ടുകാർ പകച്ചുപോയി.

പക്ഷേ അതൊരു തുടക്കം മാത്രമായിരുന്നു, ആ വീട്ടിലെ ഓരോത്തരുടെയും മനസ്സിനെ ആരൊക്കെയോ നിയന്ത്രിച്ചുതുടങ്ങി. അങ്ങനെ വിചിത്രമായ ഒരുപാട് സംഭവങ്ങള്‍ അരങ്ങേറിയപ്പോഴാണ് ഗത്യന്തരമില്ലാതെ അവർ ഇത്തരം കാര്യങ്ങളില്‍ അറിവുള്ള ഒരാളെ ചെന്ന് കാണുന്നത്. ഞെട്ടിപ്പിക്കുന്ന കാര്യങ്ങളാണ് അയാൾ വെളിപ്പെടുത്തിയത്. തങ്ങളുടെ കുടുംബത്തെ ഏതോ ഗൂഢോദ്ദേശ്യത്തിനായി അന്യഗ്രഹ ജീവികൾ തിരഞ്ഞെടുത്തിരിക്കുകയാണെന്ന സത്യം അവർ മനസ്സിലാക്കുന്നു. അവരെ പ്രതിരോധിക്കാൻ ബാരറ്റ് കുടുംബത്തിന് എന്ത് ചെയ്യാനാകും?

സമാധാനത്തോടെ കഴിയുന്ന കുടുംബത്തിലേക്ക് വിചിത്രമായ അതിഥികൾ വരുന്നതോടെ അവരുടെ ജീവിതം കീഴ്മേല്‍ മറിയുന്ന, പരിചിതമായ പ്രേതകഥകൾക്ക് സമാനമായ കാഴ്ചാനുഭവമാണ് ഡാർക്ക് സ്കൈസ് പകരുന്നത്.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Sci_Fi #Thriller

#MSone Release - 3293

#AlienFest - 23

District 9 (2009)
ഡിസ്ട്രിക്റ്റ് 9 (2009)

ഭാഷ: ഇംഗ്ലീഷ്
സംവിധാനം: Neill Blomkamp
പരിഭാഷ: വിഷ്ണു പ്രസാദ് & ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, സയൻസ് ഫിക്ഷൻ, ത്രില്ലർ

IMDb ⭐️ 7.9/10

അന്യഗ്രഹജീവികളും മനുഷ്യരും ഭൂമിയിൽ ഒത്തൊരുമിച്ച് സന്തോഷത്തോടെ ജീവിക്കുന്ന നിറം പിടിപ്പിച്ച കഥകൾ പല കാർട്ടൂണുകൾക്കും വിഷയമായിട്ടുണ്ട്. എന്നാല്‍ അങ്ങനെയൊന്ന് യഥാര്‍ത്ഥത്തിൽ നടന്നാൽ നമ്മളില്‍ എത്ര പേർ ഉൾക്കൊള്ളും? അങ്ങനൊരു റിയലിസ്റ്റിക് സാഹചര്യത്തെ തുറന്നുകാട്ടാനാകണം, ഡിസ്ട്രിക്റ്റ് 9 ചിത്രീകരിച്ചിരിക്കുന്നത് ഒരു ഡോക്യുമെന്ററി ശൈലിയിലാണ്.

അന്യഗ്രഹത്തിൽ നിന്ന് സ്പേസ്ഷിപ്പ് വന്നത് അമേരിക്കയിലായിരുന്നില്ല. ദക്ഷിണാഫ്രിക്കയിലെ ജോഹന്നാസ്ബർഗിന് മുകളിൽ അതങ്ങനെ മാസങ്ങളോളം നിശ്ചലമായി നിലകൊണ്ടു. ഒടുവില്‍ ചട്ടക്കൂട്ട് പൊളിച്ച് അകത്തുകേറിയ ദൗത്യസംഘം കണ്ടത്, മൃതപ്രായരായി കിടക്കുന്ന ലക്ഷക്കണക്കിന് അന്യഗ്രഹജീവികളെയായിരുന്നു.

മാനുഷികമൂല്യങ്ങളെ മുൻനിർത്തി അവരെ ‘പ്രോൺ’ എന്ന് വിളിപ്പേരിട്ട് സർക്കാർ, സ്പേസ്ഷിപ്പിന് തൊട്ടുതാഴെയുള്ള ഭൂമിയിൽ ചേരി കെട്ടി പാർപ്പിച്ചു. പക്ഷേ അവരും മനുഷ്യരും ഒരുമിച്ചുള്ള ജീവിതസാഹചര്യങ്ങളിൽ കലഹങ്ങളും കുഴപ്പങ്ങളും പെരുകിയത്, കോളനി ഒഴിപ്പിച്ച് അവരെയെല്ലാം നഗരത്തിന് വെളിയിലേക്ക് മാറ്റാൻ സർക്കാരിനെ നിർബന്ധിതരാക്കി. എന്നാല്‍ അതിനായി ഉത്സാഹിച്ച് മുന്നില്‍ നിന്ന MNU എന്ന കോർപ്പറേറ്റിന്റെ കണ്ണ് പ്രോണുകളുടെ അത്യാധുനികമായ ആയുധങ്ങളിലായിരുന്നു!

ഫാന്റസി സ്വഭാവമുള്ള കഥയായിരുന്നിട്ടുകൂടി, റിയലിസത്തിൽ അവതരിപ്പിക്കാൻ സംവിധായകന്‍ കാണിച്ച യുക്തിബോധം പ്രശംസനീയമാണ്. സാധാരണ സിനിമകളിൽ നിന്ന് വ്യത്യസ്തമായി അന്യഗ്രഹജീവികളെ അവതരിപ്പിച്ചതും വേറിട്ട കഥാ സന്ദർഭവും പശ്ചാത്തലവുമൊക്കെ ഇതിനെ ഏലിയൻ ജോണറിലെ മികച്ച ചിത്രങ്ങളിലൊന്നാക്കുന്നു.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #English #Sci_Fi #Thriller

#MSone Release - 3294

#AlienFest - 24

Men in Black (1997)
മെൻ ഇൻ ബ്ലാക്ക് (1997)

ഭാഷ: ഇംഗ്ലീഷ്
സംവിധാനം: Barry Sonnenfeld
പരിഭാഷ: ജിതിൻ ജേക്കബ് കോശി
പോസ്റ്റർ: ഉണ്ണി ജയേഷ്
ജോണർ: ആക്ഷൻ, കോമഡി, സയൻസ് ഫിക്ഷൻ

IMDb ⭐️ 7.3/10

ന്യൂയോര്‍ക്ക് പൊലീസ് സേനയിലെ കഴിവുറ്റ ഉദ്യോഗസ്ഥനാണ് എഡ്വേര്‍ഡ്സ്. എന്നാൽ ഒരു രാത്രി അയാൾ പിന്തുടർന്ന വിചിത്രനായൊരു കുറ്റവാളി കെട്ടിടത്തിന് മുകളില്‍ നിന്ന് വീണ് മരിച്ചതിനെ തുടർന്ന് ന്യൂയോര്‍ക്ക് പൊലീസ് അയാളെ ചോദ്യം ചെയ്യുന്നു. അപ്പോഴാണ് കറുത്ത സ്യൂട്ടിട്ട ഏജന്റ് കെയുടെ വരവ്. അയാൾ അവനൊരു വിസിറ്റിങ് കാർഡ് കൊടുക്കുന്നു.

ആ വിലാസം തേടി ചെന്ന എഡ്വേർഡ്സ് കണ്ടത് ലോകത്തിന്റെ ഇതുവരെ അറിയാത്ത മറ്റൊരു മുഖമാണ്. മനുഷ്യരും അന്യഗ്രഹ ജീവികളും ഉണ്ടാക്കിയ ഒരു ധാരണയെ തുടർന്ന് ഏലിയൻസ് നമുക്കിടയിൽ രഹസ്യമായി ജീവിച്ചുവരുന്നെന്ന വിവരം അവനെ അമ്പരപ്പിച്ചു. അവരുടെ പ്രവര്‍ത്തനങ്ങൾ നിയന്ത്രിക്കാൻ മനുഷ്യർക്കൊരു സീക്രട്ട് ഏജന്‍സി പോലുമുണ്ട്. അവരാണ് മെൻ ഇൻ ബ്ലാക്ക്. ചില പരീക്ഷകൾക്ക് ശേഷം എഡ്വേര്‍ഡ്സിനെയും അവർ ഏജന്‍സിയിലേക്ക് എടുക്കുന്നു.

അങ്ങനെ സ്വന്തം ഐഡന്റിറ്റി ഉപേക്ഷിച്ച് അയാളും കറുത്ത കോട്ടണിഞ്ഞ് കെയുടെ പങ്കാളിയായ ഏജന്റ് ജെ ആകുന്നു. ഒരുമിച്ചുള്ള ആദ്യ മിഷനിൽ തന്നെ അവർക്ക് തടയാനുള്ളത് ലോകാവസാനത്തിന് കാരണമായേക്കാവുന്ന ഒരു ഏലിയന്റെ ഭീഷണിയെയാണ്. മികച്ച മേക്കിംഗിനും ഹ്യൂമറിനും തിരക്കഥയ്ക്കും പുറമേ വിൽ സ്മിത്തിന്റെയും ടോമി ലീ ജോൺസിന്റെയും കെമിസ്ട്രിയാണ് ഈ ചിത്രത്തെ പതിറ്റാണ്ടുകൾക്ക് ശേഷവും അനശ്വരമാക്കുന്നത്.

അഭിപ്രായങ്ങൾ പങ്കുവെക്കാൻ

Categories : #Action #Alien_Fest #Comedy #English #Sci_Fi

#MSone Release - 3295

#AlienFest - 25

Independence Day (1996)
ഇന്‍ഡിപ്പെന്‍ഡന്‍സ് ഡേ (1996)

ഭാഷ: ഇംഗ്ലീഷ്
സംവിധാനം: Roland Emmerich
പരിഭാഷ: എല്‍വിന്‍ ജോണ്‍ പോള്‍
പോസ്റ്റർ: ഉണ്ണി ജയേഷ്
ജോണർ: ആക്ഷൻ, സയൻസ് ഫിക്ഷൻ, ത്രില്ലർ

IMDb ⭐️ 7.0/10

ഈ പ്രപഞ്ചത്തിൽ അന്യഗ്രഹജീവികൾ ഉണ്ടെങ്കിൽ, നമ്മളവരെ കണ്ടെത്തും മുന്നേ, അവരാദ്യം നമ്മളെ കണ്ടെത്തിയാൽ എന്താണ് സംഭവിക്കുക എന്ന് ആലോചിക്കുന്ന പലരുമുണ്ടാവും. അവര് സമാധാനത്തിലാകുമോ വരിക, അതോ നമ്മളെ നശിപ്പിക്കാനോ? രണ്ടാമത് പറഞ്ഞ തരത്തിലുള്ളൊരു കഥ പറയുന്ന സിനിമയാണ് റോളണ്ട് എമറിക് രചനയും സംവിധാനവും നിർവഹിച്ച്, വിൽ സ്മിത്തും, ജെഫ് ഗോൾഡ്ബ്ലൂമും പ്രധാനവേഷങ്ങളിൽ എത്തിയ 1996-ൽ പുറത്തിറങ്ങിയ ഇൻഡിപ്പെൻഡൻസ് ഡേ എന്ന ഹോളിവുഡ് ചലച്ചിത്രം.

അമേരിക്കയുടെ സ്വാതന്ത്ര്യ ദിനാഘോഷത്തിന് 2 ദിവസം മുന്നേ ജൂലായ് 2-ന് ഭൂമിയിലേക്ക് ഒരു കൂട്ടം പറക്കുംതളികകൾ വന്ന് ലോകത്തിലെ പ്രധാനനഗരങ്ങളെല്ലാം നശിപ്പിച്ചു തുടങ്ങുന്നു. മനുഷ്യർക്ക് തിരിച്ച് ആക്രമിക്കാൻ പോലും പറ്റാത്ത രീതിയിലുള്ള സാങ്കേതികവിദ്യകളാണ് ഈ അന്യഗ്രഹപേടകങ്ങൾക്ക് ഉള്ളതെന്ന് വളരെ പെട്ടെന്ന് തന്നെ സിനിമയിലെ കഥാപാത്രങ്ങൾ മനസ്സിലാക്കുന്നു. എങ്കിലും ഏത് സാഹചര്യവും അതിജീവിക്കാനുള്ള മനുഷ്യൻ്റെ ഇച്ഛാശക്തിയിലും വലുതല്ല ഒരു സാങ്കേതികവിദ്യയും. ആദ്യത്തെ ആക്രമണത്തിൽ നിന്നും രക്ഷപ്പെടുന്ന ഒരു കൂട്ടം മനുഷ്യർ ഒരുമിച്ച് അന്യഗ്രഹജീവികളെ തുരത്താനുള്ള വഴികൾ കണ്ടെത്താൻ ശ്രമിക്കുന്നതാണ് ചിത്രത്തിൻ്റെ ഇതിവൃത്തം.

അഭിപ്രായങ്ങൾ പങ്കുവെക്കാൻ

Categories : #Action #Adventure #Alien_Fest #English #Sci_Fi