LelleBelle / ലെല്ലെബെല്ലെ (2010)

എംസോൺ റിലീസ് – 2715



ഭാഷ: ഡച്ച്
സംവിധാനം: Mischa Kamp
പരിഭാഷ: ശ്രീകേഷ്  പി. എം.
പോസ്റ്റർ : രോഹിത്ത് ജി. എസ്
ജോണർ: ഡ്രാമ, മ്യൂസിക്കല്‍, റൊമാൻസ്

പത്തൊന്‍പത് വയസ്സുള്ള ബെല്ലെ ഒരു വയലിനിസ്റ്റ് ആണ്. പക്ഷേ, അവളുടെ വയലിന്‍ വായനയില്‍ വികാരങ്ങളോ ഭാവങ്ങളോ അവള്‍ക്ക് കൊണ്ടുവരാന്‍ സാധിക്കുന്നില്ല. എന്നാല്‍ ഒരു ദിവസം അവള്‍ അതിനുള്ള പ്രചോദനം കണ്ടെത്തുന്നു. അതവളുടെ ജീവിതത്തെത്തന്നെ മാറ്റുന്നു. മനുഷ്യന്റെ ലൈംഗിക വികാരങ്ങളെ അടക്കി നിര്‍ത്താനുള്ളതല്ല, മറിച്ച് അവയെ ഉത്തേജിപ്പിക്കുന്നതോടെ ജീവിതം കൂടുതല്‍ സുന്ദരമാകും എന്ന് ഈ സിനിമ പറയുന്നു.

ലൈംഗികരംഗങ്ങള്‍ ഉള്ള ഈ സിനിമ പ്രായപൂര്‍ത്തിയായവര്‍ മാത്രം കാണുക.

അഭിപ്രായങ്ങൾ പങ്കുവെക്കാൻ

Categories : #Drama #Dutch #Musical #Romance

#MSone Release - 2803

Saawariya (2007)
സാവരിയാ (2007)

ഭാഷ : ഹിന്ദി
സംവിധാനം: Sanjay Leela Bhansali
പരിഭാഷ: പ്രശാന്ത് ശ്രീമംഗലം
പോസ്റ്റർ : ഉണ്ണി ജയേഷ്
ജോണർ: ഡ്രാമ, മ്യൂസിക്കല്‍, റൊമാൻസ്

IMDb ⭐️5.2/10

വിഖ്യാത സാഹിത്യകാരൻ തിയദോർ ദസ്തയെവ്സ്കിയുടെ ‘വൈറ്റ് നൈറ്റ്സ്’ എന്ന കൃതിയെ ആധാരമാക്കി സഞ്ജയ്‌ ലീല ബൻസാലി അണിയിച്ചൊരുക്കി 2007 ൽ പുറത്തിറങ്ങിയ ഹിന്ദി ചലച്ചിത്രമാണ് “സാവരിയാ“

ഒരു സാങ്കൽപ്പിക നഗരത്തിൽ നടക്കുന്ന ഈ കഥ, ഒരു ലൈംഗിക തൊഴിലാളിയായ ഗുലാബ് ജി (റാണി മുഖർജി)യുടെ വിവരണത്തിൽ കൂടിയാണ് ചുരുളഴിയുന്നത്. ആ നഗരത്തിലെ ആഡംബര ബാറായ RK ബാറിലെ പ്രധാന ഗായകനാണ് രാജ് (രൺബീർ കപൂർ). തനിച്ചു താമസിക്കുന്ന വൃദ്ധയായ ലിലിയന്റെ (സൊഹ്റ സെഹ്ഗാൾ) വീട്ടിൽ പേയിംഗ് ഗസ്റ്റ് ആയി താമസിക്കുന്ന രാജിന്റെ ജീവിതത്തിലേക്ക് സക്കീന (സോനം കപൂർ) കടന്നുവരുന്നതോട് കൂടി ചിത്രം, മനുഷ്യബന്ധങ്ങളുടെ തീവ്രത തന്റെ കൃതികളിലേക്ക്‌ ആവാഹിച്ച ദസ്തയെവ്‌സ്കി എന്ന മഹാനായ എഴുത്തുകാരന്റെ കൃതിയെ ഇന്ത്യൻ സാഹചര്യങ്ങളിലേക്ക് പറിച്ചുനടുകയാണ്.

ഇമാന്റെ (സൽമാൻ ഖാൻ) ചിത്രത്തിലേക്കുള്ള കടന്നുവരവ്, ഗുലാബ് ജിയുടെ വാക്കുകൾ കടമെടുത്താൽ “വരാനിരിക്കുന്ന രാത്രികള്‍ എന്ത് കൊടുങ്കാറ്റാണ് കൊണ്ടുവരാനിരുന്നതെന്ന്” നമുക്ക് മുൻപിൽ കാട്ടിത്തരികയാണ്.

ബ്ലൂറേ ഡിസ്‌ക്കിൽ പുറത്തിറങ്ങിയ ആദ്യ ബോളിവുഡ് ചിത്രമായ സാവരിയാ, സൊഹ്‌റ സെഹ്ഗാളിന്റെ അവസാന ചിത്രവും കൂടിയാണ്.

അഭിപ്രായങ്ങൾ പങ്കുവെക്കാൻ

Categories : #Drama #Hindi #Musical #Romance

#MSone Release - 2909

Back to the 90s (2015)
ബാക്ക് ടു ദി 90s (2015)

ഭാഷ : തായ്
സംവിധാനം : Yanyong Kuruaungkoul
പരിഭാഷ : സാരംഗ് ആർ. എൻ, സജിത്ത് ടി. എസ്
പോസ്റ്റർ : അഷ്‌കർ ഹൈദർ
ജോണർ: കോമഡി, ഡ്രാമ, മ്യൂസിക്കല്‍

IMDb ⭐️ 6.5/10

Yanyong Kuruaungkoul ന്റെ സംവിധാനത്തിൽ 2015 ൽ പുറത്തിറങ്ങിയ ഒരു കോമഡി, ഫാന്റസി, മ്യൂസിക്കൽ Thai movie യാണ് ‘Back To The 90s‘.

അച്ഛന്റെയും അമ്മയുടെ വിവാഹ വാർഷികത്തിന്റെ അന്ന് വീട്ടിലെത്തുമ്പോഴാണ് കേട്ടു പരിചയമില്ലാത്ത ഒരു ശബ്ദം Kong കേൾക്കുന്നത്. അങ്ങനെ ആ ശബ്ദം ഉണ്ടായ സ്ഥലത്തേക്ക് പോയി നോക്കുമ്പോ അവനൊരു Pager ഉം, ഒരു പത്രവും, ഫോട്ടോയും കിട്ടുന്നു.

ഒപ്പം Pager ൽ ഒരു മെസ്സേജും, ഫോട്ടോയുടെ പിന്നിൽ തന്റെ അച്ഛന് Som എന്ന പെണ്ണ് എഴുതിയ ഒരു ഓട്ടോഗ്രാഫും കാണുന്നു.
രാത്രി അച്ഛന്റെയും അമ്മയുടെയും വഴക്ക് കേട്ട് ചെല്ലുമ്പോഴാണ് അവന് മനസ്സിലാകുന്നത്, അവർ തർക്കിക്കുന്നത് ഫോട്ടോയുടെ പിന്നിൽ ഓട്ടോഗ്രാഫ് എഴുതിയ Som ന്റെ പേരും പറഞ്ഞാണെന്ന്. തുടർന്ന് അവൻ അച്ഛനുമായി വഴക്കിട്ട് വീട്ടിൽ നിന്നിറങ്ങി പോകുന്നു. കൂട്ടുകാരനെ വിളിച്ച് വീട്ടിലേക്ക് വരാൻ പറയുമ്പോഴാണ് മഴ പെയ്യുന്നത്. ഓടി കയറിയത് ഒരു ഫോൺ ബൂത്തിലേക്ക്. Pager ൽ കണ്ട നമ്പറിലേക്ക് വിളിക്കാൻ തുടങ്ങുന്നതും അവന്റെ ബോധം പോകുന്നു. പിന്നീട് എഴുന്നേൽക്കുമ്പോൾ സ്ഥലമാകെ മാറിപ്പോയിരുന്നു.

Road ലൂടെ നടന്ന് പോകുന്നതിനിടയിൽ അച്ഛന്റെയും അമ്മയുടെയും പേരിൽ വഴക്കിടുന്ന രണ്ട് പേരുടെ ശബ്ദം കേട്ട് അവനൊരു വീട്ടിലേക്ക് ചെല്ലുന്നു. അവിടെ നിന്ന് വഴക്ക് കൂടുന്നത് തന്റെ അച്ഛനും അമ്മയുമാണെന്നും താൻ 90 കളിലേക്ക് time travel ചെയ്‌തെന്നും അവൻ തിരിച്ചറിയുന്നു. തുടർന്ന് പോകാൻ ഒരിടമില്ലാത്ത അവൻ അവിടെ താമസിച്ച് തന്റെ അച്ഛനും അമ്മയും വഴക്ക് കൂടുന്നതിന് കാരണക്കാരിയായ Som ഉം അച്ഛനും തമ്മിലുള്ള ബന്ധം അറിയുവാൻ ശ്രമിക്കുന്നു. Comedy ക്ക് പ്രാധാന്യം കൊടുത്ത ഈ ചിത്രത്തിൽ Thailand ലെ മികച്ച നായികമാരിൽ ഒരാളായ Pimchanok Leuwisetpaiboon (Baifern) ആണ് ഒരു പ്രധാന കഥാപാത്രത്തെ അവതരിപ്പിച്ചിരിക്കുന്നത്.

അഭിപ്രായങ്ങൾ പങ്കുവെക്കാൻ

Categories : #Comedy #Drama #Musical #Thai

#MSone Release - 2979

#OscarFest2022 - 04

CODA (2021)
കോഡ (2021)

ഭാഷ : അമേരിക്കൻ ആംഗ്യഭാഷ & ഇംഗ്ലീഷ്
സംവിധാനം : Sian Heder
പരിഭാഷ : സജിൻ എം.എസ് & പ്രശോഭ് പി. സി.
പോസ്റ്റർ : പ്രവീൺ അടൂർ
ജോണർ : കോമഡി, ഡ്രാമ, മ്യൂസിക്കല്‍

IMDb ⭐️ 8.1/10

2021 ആപ്പിൾ ടിവിയിലൂടെ പുറത്തുവന്ന ചിത്രമാണ് കോഡ. 2014-ൽ ഇറങ്ങിയ ഫ്രഞ്ച് ചിത്രമായ La Famille Bélier നെ അടിസ്ഥാനമാക്കിയാണ് ഈ ചിത്രമൊരുക്കിയത്.

ഷാൻ ഹേയ്ഡർ സംവിധാനം ചെയ്ത ചിത്രം 94 ആമത് ഓസ്കാർ അവാർഡിൽ മികച്ച ചിത്രം അടക്കം മൂന്ന് അവാർഡുകൾ നേടി. Child Of Deaf Adults എന്നതാണ് CODAയുടെ പൂർണ്ണരൂപം.

റൂബി ഒരു ഹൈസ്കൂൾ വിദ്യാർത്ഥിനിയാണ്, അവളുടെ അച്ഛനും അമ്മയ്ക്കും സഹോദരനും കേൾവിശക്തിയില്ല. അതുകൊണ്ടുത്തന്നെ മൂവരുടെയും ജീവിതം പൂർണ്ണമായും റൂബിയെ ആശ്രയിച്ചാണ്, റൂബിയില്ലാതെ ഒരു ദിവസം പോലും കഴിച്ചുകൂട്ടാൻ അവർക്ക് കഴിയില്ല.
ഒരുക്കൽ റൂബിയുടെ പാടാനുള്ള കഴിവ് സ്കൂളിലെ സംഗീത അധ്യാപകൻ കണ്ടെത്തുകയും അവൾക്കുവേണ്ടി സ്‌പെഷ്യൽ ക്ലാസ് ആരംഭിക്കുകയും ചെയ്യുന്നു. റൂബി തന്റെ സ്വപ്നമായ സംഗീതത്തിലേക്ക് അടുക്കുമ്പോൾ തങ്ങളുടെ മകൾ അകന്നുപോവുമോയെന്ന പേടി മാതാപിതാക്കളെ അലട്ടാൻ തുടങ്ങുന്നു.

അഭിപ്രായങ്ങൾ പങ്കുവെക്കാൻ

Categories : #Comedy #Drama #English #Musical #Oscar_Fest_2022

#MSone Release - 2996

#MSoneGoldRelease

Man with a Movie Camera (1929)
മാൻ വിത്ത് എ മൂവി ക്യാമറ (1929)

ഭാഷ : നിശബ്ദ ചിത്രം
സംവിധാനം : Dziga Vertov
പരിഭാഷ : മുബാറക്ക്‌ ടി.എന്‍.
പോസ്റ്റർ : പ്രവീൺ അടൂർ
ജോണർ : ഡോക്യുമെന്ററി, മ്യൂസിക്കല്‍

IMDb ⭐️ 8.4/10

ഈ ഉപകരണം വിൽപ്പനയ്ക്കുള്ളതല്ല. വാങ്ങുന്നവരുടെ സാമ്പത്തിക ശേഷി കുറയ്ക്കാൻ മാത്രമേ ഇതുപകരിക്കൂ. ചിലപ്പോൾ, കുറച്ചു നാളത്തേക്ക് ശാസ്ത്രീയ അഭിരുചി വളർത്താൻ ഇത് സഹായിക്കും. അതിനപ്പുറത്തേക്ക്, ഈ ഉപകരണത്തിന് യാതൊരു ഭാവിയും ഞാൻ കാണുന്നില്ല.”

താൻ നിർമിച്ച ക്യാമറ വാങ്ങാനെത്തിയ ജോർജസ് മെലീസിന്റെ ആവശ്യത്തോട് മുഖം തിരിച്ചു കൊണ്ട്, ലൂമിയേ സഹോദരൻമാരുടെ പിതാവ്, അൻ്റോയിൻ ലൂമിയേ പറഞ്ഞ വാക്കുകളാണ് മുകളിൽ വായിച്ചത്. തന്നെ കടക്കെണിയിലെത്തിച്ച ഒരുപകരണം, മറ്റൊരാളെ കൂടി അതേ അവസ്ഥയിൽ എത്തിക്കേണ്ട എന്നു കരുതിയാണ് അന്നദ്ദേഹം അങ്ങനെ പറഞ്ഞത്. പിൽക്കാലത്ത്, A Trip to the Moon എന്ന വിഖ്യാത ചിത്രം നിർമിച്ചു കൊണ്ട്, സിനിമയ്ക്ക് പുതിയൊരു വ്യാഖ്യാനം തന്നെ മെലീസ് സൃഷ്ടിച്ചു.

എന്താണ് ഒരു സിനിമയുടെ ഉദ്ദേശ്യം? സീഗ്ഫ്രെഡ് ക്രോക്കറെന്ന ചലച്ചിത്ര സൈദ്ധാന്തികൻ്റെ അഭിപ്രായത്തിൽ, “ഭൗതിക യാഥാർത്ഥ്യത്തിൻ്റെ വിമോചനമാണ് സിനിമ”. ഇരുപതാം നൂറ്റാണ്ടിന്റെ ആദ്യ ദശകങ്ങളിൽ രൂപപ്പെട്ട സിനിമകളിലും ഇതേ രീതിയിലുള്ള ആവിഷ്കാരങ്ങൾ കണ്ടെത്താൻ കഴിയും. അതിൽ ഏറ്റവും പ്രധാന്യം അർഹിക്കുന്ന ഒന്നാണ്,

1929 ൽ റഷ്യക്കാരനായ സീഗാ വെർതോവിന്റെ സംവിധാനത്തിൽ പുറത്തിറങ്ങിയ നിശബ്ദ ചിത്രമായ മാൻ വിത്ത് എ മൂവി ക്യാമറ. 1920 കളിലെ സോവിയറ്റ് നഗരത്തിൻ്റെ ഒരു ദിവസത്തെ ദൃശ്യങ്ങളാണ് ഇതിൽ പകർത്തിയിരിക്കുന്നത്. നഗരത്തിന്റെ ആധുനികതയും, ഉയരമേറിയ കെട്ടിടങ്ങളും, അവിടത്തെ വ്യവസായങ്ങളും, സോവിയറ്റ് റഷ്യയിലെ ദൈനംദിന ജീവിതവും, യന്ത്രങ്ങളുമെല്ലാം പ്രേക്ഷകന് മുന്നിൽ തെളിയുന്നു.

4 വർഷം കൊണ്ട് ചിത്രീകരിച്ച സിനിമയുടെ കഥാ പരിസരം എവിടെയെന്ന് ഒരിടത്തു പോലും പറയുന്നില്ല. 1775 ഷോട്ടുകൾ അതിവിദഗ്ധമായി സംയോജിപ്പിച്ച ചിത്രം പറയുന്നത്, ഒരു നഗരത്തിന്റെ കഥയാണ്. അവിടത്തെ ജനങ്ങളുടെ കഥയാണ്. എല്ലാത്തിലും ഉപരിയായ്, ഒരു ക്യാമറയുടെ യഥാർത്ഥ കഴിവ് എന്തെന്ന് ലോകത്തിന് മുന്നിൽ വരച്ചു കാട്ടുകയാണ്. അക്കാലത്തെ സാങ്കേതിക പരിമിതികൾക്കുള്ളിൽ നിന്നു കൊണ്ടാണെങ്കിലും, നൂതനമായ സിനിമാറ്റിക് ടെക്നിക്കുകളാണ് സിനിമയിലുടനീളം വെർതോവ് ഉപയോഗിച്ചിരിക്കുന്നത്. Multiple Exposure, Fast Motion, Slow Motion, Freeze Frames, Match Cuts, Jump Cuts, Split Screens, Dutch Angles, Extreme Close-Ups, Tracking Shots, Reversed Footage, Stop Motion വിദ്യകളെല്ലാം അദ്ദേഹം പരീക്ഷിച്ചിട്ടുണ്ട്.

എക്കാലത്തെയും മികച്ച 10 ചിത്രങ്ങളിൽ ഒന്നായി ബ്രിട്ടിഷ് ഫിലിം ഇൻസ്റ്റിറ്റ്യൂട്ട് തിരഞ്ഞെടുത്ത ഈ ചിത്രം, സെക്കൻഡിൽ 24 ഫ്രെയിമുകളോടുന്ന സിനിമയെന്ന സത്യത്തെ മുൻനിർത്തിയുള്ള വേറിട്ട ഒരു പരീക്ഷണം തന്നെയാണെന്ന് പറയാം.

അഭിപ്രായങ്ങൾ പങ്കുവെക്കാൻ

Categories : #Documentary #MsoneGold #Musical

#MSone Release - 2997

Samsara (2011)
സംസാര (2011)

ഭാഷ : നിശബ്ദ ചിത്രം
സംവിധാനം : Ron Fricke
പരിഭാഷ : മുബാറക്ക്‌ ടി.എന്‍.
പോസ്റ്റർ : നിഷാദ് ജെ. എൻ
ജോണർ : ഡോക്യുമെന്ററി, മ്യൂസിക്കല്‍

IMDb ⭐️ 8.4/10

“സംസാര” എന്ന വാക്കിന്, സംസ്കൃതത്തിൽ ലോകം എന്നാണർത്ഥം. അസ്തിത്വ ചക്രം, അനന്തമായ പുനർജന്മം, ധർമ്മചക്രം എന്നും ഈ വാക്കിന് അർത്ഥമുണ്ട്. ബുദ്ധമത പ്രകാരം, “തുടക്കമോ ഒടുക്കമോ ഇല്ലാത്ത, കഷ്ടപ്പാടുകൾ നിറഞ്ഞ ജീവിതത്തിന്റെയും മരണത്തിന്റെയും പുനർജന്മത്തിന്റെയും തുടർച്ചയായ ചക്രമാണ്” സംസാര. 2011 ൽ Ron Fricke ൻ്റെ സംവിധാനത്തിൽ പുറത്തിറങ്ങിയ Samsara എന്ന Non Narrative Documentary യും പറഞ്ഞു വെക്കുന്നത് ഇതേ ആശയമാണ്. ഇതിലൂടെ ഭൂമിയിലെ ഏറ്റവും മനോഹരമായ ദൃശ്യങ്ങൾ 99 മിനിറ്റ് കൊണ്ട്, പ്രേക്ഷകർക്ക് മുന്നിൽ തെളിയുകയാണ്. ഒരേ സമയം, ആത്മീയതയും അത്ഭുതങ്ങളും, അവർക്ക് മുന്നിൽ അനാവരണം ചെയ്യപെടുകയാണ്.

25 രാജ്യങ്ങളിലെ 100 ലൊക്കേഷനുകളിലായി ഷൂട്ട് ചെയ്ത ഡോക്യുമെന്ററി, 70 mm ഫോമാറ്റിലാണ് ചിത്രീകരിച്ചിരിക്കുന്നത്. ജനനം, മരണം, പുനർജന്മം എന്നീ ആശയങ്ങളുമായി ബന്ധപ്പെടുത്തിയുള്ള രംഗങ്ങൾ ചിത്രീകരിക്കുവാൻ വേണ്ടി 5 വർഷമാണ് സംവിധായകനും സംഘവും ചിലവഴിച്ചത്. Michael Stearns, Lisa Gerrard, Marcello De Francisci എന്നിവർ ചേർന്നൊരുക്കിയ പശ്ചാത്തല സംഗീതം, പ്രേക്ഷകർക്ക് ഒരു ധ്യാനത്തിലെന്ന പോലെ ആത്മീയ ഉണർവ്വ് നൽകുന്ന ഒന്നാണ്. യാത്രകൾ പോകാൻ ഇഷ്ടപ്പെടുന്നവർക്കും, വിവിധ സംസ്കാരങ്ങളെപ്പറ്റി അറിയാൻ ആഗ്രഹിക്കുന്നവർക്കുമുള്ള ഒരു ദൃശ്യ വിരുന്നാണ് ഈ ഡോക്യുമെന്ററി.

അഭിപ്രായങ്ങൾ പങ്കുവെക്കാൻ

Categories : #Documentary #Musical

#MSone Release - 3008

The Sound of Magic (2022)
സൗണ്ട് ഓഫ് മാജിക് (2022)

ഭാഷ : കൊറിയൻ
സംവിധാനം : Sung-Yoon Kim
പരിഭാഷ : ജീ ചാങ് വൂക്ക്
പോസ്റ്റർ : ഉണ്ണി ജയേഷ്
ജോണർ : ഡ്രാമ, ഫാന്റസി, മ്യൂസിക്കല്‍

IMDb ⭐️ 7.9/10

2022 മെയ് 6 ന് നെറ്റ്ഫ്ളിക്സ് റിലീസ് ചെയ്ത ഏറ്റവും പുതിയ കൊറിയൻ ഫാൻ്റസി മ്യൂസിക്കൽ ഡ്രാമ ആണ്, സൗണ്ട് ഓഫ് മാജിക് അഥവാ അന്നരാ, സുമനാരാ.

നഗരത്തിലെ ഒറ്റപ്പെട്ട മലമുകളിലെ, ഉപേക്ഷിക്കപ്പെട്ട പഴയ പാർക്കിൽ ദുരൂഹതയുള്ള ഒരു മജീഷ്യൻ താമസിക്കുന്നുണ്ട്. മാജിക് തുടങ്ങുന്നതിന് മുമ്പ് അയാൾ ആളുകളുടെ കണ്ണിലേക്ക് സൂക്ഷിച്ച് നോക്കി ചോദിക്കും,

“നിങ്ങൾ, മാജിക്കിൽ വിശ്വസിക്കുന്നുണ്ടോ? “ശരിക്കും ആരാണയാൾ?

ഒരു യഥാർത്ഥ മജീഷ്യൻ തന്നെ ആണോ? അതോ മാജിക്കിൻ്റെ ഭാഷയിൽ തന്നെ പറഞ്ഞാൽ എല്ലാം ഒരു “മിസ്-ഡിറക്ഷൻ”
മാത്രമാണോ?

മാജിക്കിന്റെ അത്ഭുത ലോകത്ത് നിന്ന് പ്രതീക്ഷയുടെ, ബാല്യത്തിലെ നിഷ്കളങ്കതയുടെ, മുതിർന്നവരുടെ പരുക്കൻ ജീവിതയാഥാർത്ഥ്യങ്ങളുടെ, ദുരൂഹതയുടെ, ഒക്കെ ലോകത്തേക്ക് കാഴ്ചക്കാരെ നയിക്കുന്ന സൗണ്ട് ഓഫ് മാജിക്, അഭിനേതാക്കളുടെ മികച്ച പ്രകടനങ്ങൾ കൊണ്ടും മനോഹരമായ മായക്കാഴ്ചകൾ കൊണ്ടും സമ്പന്നമാണ്.

നിരവധി സുന്ദരമായ OSTകൾ നിറഞ്ഞ ഈ മ്യൂസിക്കൽ ഡ്രാമ, സംപ്രേഷണം തുടങ്ങിയ ഉടൻ തന്നെ നെറ്റ്ഫ്ളിക്സ് World Top 10 ടിവി സീരീസുകളിൽ ഇടംപിടിച്ചിട്ടുണ്ട്.

അഭിപ്രായങ്ങൾ പങ്കുവെക്കാൻ

Categories : #Drama #Fantasy #Korean #Musical

#MSone Release - 3022

Hum Dil De Chuke Sanam (1999)
ഹം ദിൽ ദേ ചുകേ സനം (1999)

ഭാഷ : ഹിന്ദി
സംവിധാനം: Sanjay Leela Bhansali
പരിഭാഷ: പ്രശാന്ത് ശ്രീമംഗലം
പോസ്റ്റർ : അഷ്‌കർ ഹൈദർ
ജോണർ: കോമഡി, ഡ്രാമ, മ്യൂസിക്കല്‍

IMDb ⭐️ 7.4/10

സഞ്ജയ്‌ ലീലാ ബാൻസാലിയുടെ സംവിധാനത്തിൽ 1999ൽ പുറത്തിറങ്ങിയ ഐശ്വര്യ റായി, സൽമാൻ ഖാൻ, അജയ് ദേവ്ഗൺ തുടങ്ങിയവർ അഭിനയിച്ച ഹിന്ദി ചലച്ചിത്രമാണ് ഹം ദിൽ ദേ ചുകേ സനം.

ശാസ്ത്രീയ സംഗീതജ്ഞനായ ദർബാർ സാഹിബിന്റെ മകളാണ് നന്ദിനി. അദ്ദേഹത്തിന്റെയടുത്ത് സംഗീതം പഠിക്കാനായി ഇറ്റലിയിൽ നിന്ന് വരുന്ന സമീറിനോട് പ്രണയത്തിലാകുന്ന നന്ദിനിയുടെ കഥയാണ് ഈ ചലച്ചിത്രം. കുടുംബ മഹിമയുടെ പേരിൽ അകറ്റി മാറ്റപ്പെടുന്ന ഇരുവരും ഒരുമിക്കാൻ വിധി അനുവദിക്കുമോയെന്നതാണ് ഈ ചിത്രത്തിന്റെ കഥാതന്തു.

മികച്ച ഗാനങ്ങളുടെ അകമ്പടിയുള്ള ഈ ചലച്ചിത്രം, 45ആമത് ഫിലിം ഫെയർ അവാർഡിൽ മികച്ച ചലച്ചിത്രം, സംവിധായകൻ (ബാൻസാലി), മികച്ച നടി (ഐശ്വര്യ റായി), മികച്ച പിന്നണി ഗായകൻ (ഉദിത് നാരായൺ) എന്നിവ ഉൾപ്പെടെ 7 പുരസ്‌കാരങ്ങൾ നേടിയ ചിത്രവുമാണ്.

അന്തരിച്ച മലയാളിയായ പിന്നണി ഗായകൻ കെകെ യുടെ “തഡപ് തഡപ് കെ ഇസ് ദിൽ സെ…” എന്ന അതിമനോഹര ഗാനവും ഈ ചിത്രത്തിലേതാണ്.

അഭിപ്രായങ്ങൾ പങ്കുവെക്കാൻ

Categories : #Comedy #Drama #Hindi #Musical