The Irrawaddy - Burmese

Express များ ကုန်တင်ခွင့်ကန့်သတ်မှု လုပ်ငန်းများကို ရိုက်ခတ်နိုင်ဟုဆို

ဧရာဝတီ၊ နိုဝင်ဘာ ၄၊ ၂၀၂၆

Express လူစီးယာဉ်လိုင်းများ ခရီးသည်ပစ္စည်းမှအပ ကုန်မတင်ဖို့ နှုတ်ဖြင့်ပြောဆိုကန့်သတ်နေရာ နောင် ယာဉ်လိုင်း အတွက်သာမက ကုန်သည်ငယ်များပါ အခက်အခဲဖြစ်နိုင်ကြောင်း လုပ်ငန်းရှင်များက ဆိုသည်။

အောက်တိုဘာ ၂၅ ရက်နေ့စွဲဖြင့် အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့၏ ထုတ်ပြန်ချက်တွင် Express ကားများ၌ ကုန်တင်ပါက ယာဉ်အလေးချိန်များပြားကာ တာယာပေါက်၊ ဘရိတ်မမိဖြစ်ပြီး ယာဉ် တိမ်းမှောက် နိုင်သဖြင့် ခရီးသည်ပစ္စည်းများမှအပ ကျန်ကုန်စည်များ မတင်ဖို့ရန်၊ စစ်ဆေးတွေ့ရှိပါက အမြန်လမ်းမကြီးများဥပဒေအရ အရေးယူမည့်အပြင် အမြန်လမ်း အသုံးပြုခွင့်ကိုပါ ရုပ်သိမ်းမည်ဟု ဖော်ပြထားသည်။

Express ကား ပိုင်ရှင်တဦးက “အခုတော့ သတိပေးတာမျိုးပဲ ရှိသေးတယ်။ ဝန်ထုပ်ဝန်ပိုး ဖြစ်အောင် မတင်ဖို့ပြောတယ်။ မုန့်ဖာတွေ၊ ဂျပ်ဖာတွေ ဖြန့်ဖြူးရေးသမားတွေ ပို့တဲ့အထုပ်ကြီးတွေဆိုရင် အဆင်မပြေတော့ဘူး။ ကျမတို့ ယာဉ်လိုင်းတွေ ကလည်း ခရီးသည်နည်ချိန် ကုန်တင်ခနဲ့ အားထားနေရသလို ကုန်သည်လေးတွေလည်း နေ့စဉ်ထွက်တဲ့ Express ကား တွေကို အားထားပြီး ကုန်ဖြန့်ဖြူး နေရတာပါ။ ကန့်သတ် လိုက်ရင် နှစ်ဖက်အခက်အခဲ ဖြစ်လာမှာပါ” ဟု ပြောသည်။

လက်ရှိ ကုန်အနည်းငယ်တင်ခွင့်ရသေးသော်လည်း အများအပြားဆိုလျှင် အခက်အခဲရှိကြောင်း၊ ရန်ကုန်တန်ဆာခက တပေပတ်လည် ဂျပ်ဖာတဗူး ၆,၀၀၀၊ ၇,၀၀၀ ကျပ်မှစ၍ ရှိရာ ကုန်တင်ခွင့် လုံးဝပိတ်လျှင် လက်ရှိ စက်သုံးဆီဈေးနှင့် လုပ်ငန်းလည်ပတ်စရိတ်ကြောင့် ကုန်တင်ခမရှိဘဲ ပြေးဆွဲဖို့ အခက်အခဲ ရှိလာနိုင်သလို ကားခနှုန်းထားများလည်း မြင့်တက်လာနိုင်ကြောင်း ယာဉ်ပိုင်ရှင် များထံက သိရသည်။

လတ်တလော ပို့ဆောင်နိုင်သေးသော်လည်း မည်သည့်အချိန်တွင် အရေးယူမှုများ စတင်လာ မည်ကို မသိရသဖြင့် စိုးရိမ်နေရကြောင်း Express ကားများကို အားထား၍ ကျောင်းသုံး၊ ရုံးသုံး စာရေးကိရိယာများနှင့် စာအုပ်များ ပို့ဆောင်ဖြန့်ဖြူးနေသည့် အသေးစားနှင့် အလတ်စားလုပ်ငန်းရှင်တဦးက ဧရာဝတီသို့ ပြောသည်။

“ကျနော်တို့က ကွန်ပျူတာစာစီစာရိုက် လုပ်ငန်းဖြစ်လို့ ကျောင်းသုံး၊ ရုံးသုံးစာရေးကိရိယာတွေနဲ့ စာအုပ်တွေကို Express ကားတွေကိုပဲ အားထားပြီး အဓိကဖြန့်ဖြူးနေရတာပါ။ ကုန်တင်ခွင့် ပိတ်လိုက်ရင် တနိုင်တပိုင် သယ်ယူပို့ဆောင်ရေးတွေ အခက်အခဲဖြစ်သွားမှာ။ နောက်တခုက တရုတ်က ဝင်လာတဲ့ ကျနော်တို့ လုပ်ငန်းသုံး ကုန်ကြမ်း တွေက နှစ်လလောက်ရှိပြီ ပြတ်လပ်နေပြီး လုပ်ငန်းတချို့လည်း ရပ်နားထားရပါတယ်။ ဒီလိုအခြေအနေမှာ ကုန်စည်သယ် ယူပို့ဆောင်ရေးကို ထပ်မံ ကန့်သတ်လာမယ်ဆိုရင် လုပ်ငန်းတွေအတွက် ပိုပြီး ခက်ခဲလာနိုင်ပါတယ်” ဟု ၎င်းက ပြောသည်။

ထို့ကြောင့် ကုန်ကားငှားဖို့ ငွေမတတ်နိုင်သည့် ကုန်သည်ငယ်များသည် Express ကားများဖြင့်သာ အဓိကပို့ဆောင်နေကြသဖြင့် တန်ဆာခများ မြင့်တက်လာနိုင်ခြင်း၊ ကုန်တင်ပို့ရသည့်ပမာဏကို လျှော့ချတင်ပို့ရနိုင်ခြင်းတို့ကြောင့် အချိန်မီ မဖြန့်ဖြူးနိုင်ခြင်း အစရှိသည့် အခက်အခဲများ ကြုံတွေ့လာနိုင်ကြောင်း သိရသည်။

ယခု ကန့်သတ်ချက်ကြောင့် ကုန်ကားငှားရမ်းရန် အခက်အခဲရှိသည့် အသေးစားကုန်သည်များအနေဖြင့် ကုန်စည်ပို့ဆောင် ရေးအတွက် အားထားရသည့် နည်းလမ်းတခု လျော့နည်းသွားနိုင်သည့်အပြင် ကုန်တင်ခွင့်ကို ပိုမိုတင်းကျပ်လာပါက ယာဉ်လိုင်းများ၏ ကုန်တင်ဝင်ငွေနှင့် အသေးစားကုန်သည်များ၏ ပို့ဆောင်ရေးစရိတ်အပေါ် သက်ရောက်မှုရှိလာနိုင်ကြောင်း လုပ်ငန်းရှင်များက သုံးသပ်ပြောကြားသည်။

Website တွင် ဖတ်ရန် https://burma.irrawaddy.com/news/2026/11/04/417434.html

ဧရာဝတီ

Express များ ကုန်တင်ခွင့်ကန့်သတ်မှု လုပ်ငန်းများကို ရိုက်ခတ်နိုင်ဟုဆို

အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့ ပြီးခဲ့သည့်တပတ်မှစတင်၍ အမြန်လမ်း စစ်ဆေးရေးဂိတ်များတွင် ကုန်စည် တင်ဆောင်မှုနှင့်ပတ်သက်၍ နှုတ်ဖြင့် သတိပေးနေသော်လည်း ခံဝန် လက်မှတ်ရေးထိုးခိုင်းခြင်းများ၌ မရှိသေးကြောင်း Express ကားပိုင်ရှင်များက ပြောသည်။

👍30❤9👎6😁3

3.5K views08:47